ڒخذايم 24
24
تْحَاكَامن خ اَرَّسُوْل بُوْلُس زَّاث إِ لْوَالِي فِيلِيكْس
1منْبَعْد إِ خمْسِييَّام يهْوَا-د غَار قَيْصَارِيَا اَرَّايس ن ڒْفُقَهَا أَنَاس اَكِذس ڒبْعَاض ن يمقّْرَانن ن أَيث-إِسْرَائِيل ذ يجّن ن لْمُحَامِي قَّارن-اَس تَارْتُوْلُوْس، تَاهَّامن بُوْلُس غَار لْوَالِي. 2-3ڒَاغَان-د خ بُوْلُس، ئِبْذَا تَارْتُوْلُوْس يتَاهَام-يث يقَّار: "آ سِي لْوَالِي فِيلِيكْس، نشِّين زِي سَّبَاب نّش نتْعِيش ذݣ يِجّن ن ڒهْنَا ذ اَمقّْرَان، أُو س وعْذڒ نّش ثْصڒْحذ مْلِيح ثُوْذَارْث نّغ ذِي ثْمُوْرْث-أَ. نشِّين نْقبّڒ مَانَايَا، نْشكَّر-يشك اَطَّاس ذي كُڒ ڒْوقْث ذ كُڒ اَمْشَان. 4وَلَكِن وَار خْسغ شَا اَش سْعطَّرغ اَطَّاس، تتَّارغ زَّايك عْلَاحْسَاب ڒْخَاضَر نّش اَغَارْنغ ثسْڒذ شْوَايْت.
5أَرْيَاز-أَ وَانِيتَا نُوْفِي-ث يتْخَارْوَاض وَاهَا يتݣّ لْفِيتْنَا جَار مَارَّا يسْرَائِيلِيْين إِي دْجَان ذِي مَارَّا دُّنشْت. نتَّا ذ يجّن ن اَرَّايس ن لْبِدْعَا ن نَّصَارَا. 6عَاوذ يرزُّو اَذ يسخْنز حتَّا ثَمْزِيذَا ثَمقّْرَانْت. نشِّين نطّف-يث {نخْس اَخَاس نحْكم عْلَاحْسَاب شَّرِيعَا نّغ. 7وَلَكِن يُوْسَا-د اَرَّايس ن ڒْعَسْكَار لِيسْيَاس يكّس-اَنغ-ث زݣ وفُوْس نّغ س لْقُوَّا. 8يُوْمَر يِنِّي يتݣّن تُّهْمَاث بَاش اَغَارك د اَسن.} أَخْمِي ذَاس غَا ثݣّذ شك س يِيخف نّش لْإِسْتِجْوَاب اَذ تسّْنذ مِينْخف ث نْتَاهَام نشِّين." 9تَافْقن يسْرَائِيلِيْين خ تُّهْمَاث نِّي، قَّارن قَا مَانَاينِّي يݣِّي-ث ذ صَّح.
أَرَّسُوْل بُوْلُس يتْذَافَاع خ يِيخف نّس
10ئِشيَّر-اَس لْوَالِي إِ بُوْلُس بَاش اَذ يسِّيوڒ. ئِنْدق-د بُوْلُس ينَّا-ٱس: "نش سّْنغ مشْحَاڒ زݣ وَامِي شك ثْحكّْمذ خ ثْمُوْرْث-أَ. خ مَانَايَا فَرّْحغ بَاش اَذ ذَافْعغ خ يِيخف ينُو. 11ثْزمَّرذ اَذ تسّقْسِيذ نش يَالَّاه ثنْعَاشَر يُوْم زݣ وَامِي ݣَعّْذغ غَار لْقُدْس مَاشِي كْتَار، بَاش اَذ عبْذغ أَربِّـي. 12وَار ذَايِي ؤُفِين شَا تْمنْغِيغ اَك شَان حَدّ ذِي ثمْزِيذَا ثَمقّْرَانْت، نِغ تْسَامَرغ ڒْغَاشِي ڒَا ذِي ثمْزِيذَاوِين ؤُڒَا ذِي ثنْدِينْت. 13وَار غَارْسن بُو دَّلِيل خ تُّهْمَاث-أَ إِي خَافِي تْقدَّامن ڒخُّو. 14وَلَكِن قَّارغ-اَش نش تَعْتَرَافغ زَّاثش عبّْذغ أَربِّـي ن ڒجْذُوْذ نّغ عْلَاحْسَاب اَبْرِيذ-أَ إِي حسّْبن نِثْنِي زَعْمَا ذ لْبِدْعَا. تَامْنغ س مَارَّا مِين يتَافَاقن اَك شَّرِيعَا ذ مِين د يُوْرِين ذِي لْكُتُب ن لْأَنْبِيَا. 15غَارِي لْأَمَال زِي أَربِّـي مَامش غَارْسن يدْجَا غَار يرْيَازن-أَ، يعْنِي اَذ د كَّرن زِي ڒْموْث صَّالِحِين ذ ضَّالِمِين. 16فَلِهَاذَا تݣّغ مَارَّا جّْهذ ينُو بَاش اَذ عِيْشغ س يِجّن ن ضَّمِير مرْتَاح زَّاث إِ أَربِّـي ذ يِوْذَان.
17منْبَعْد إِ وَاطَّاس ن يسݣّْوُوْسَا عقْبغ-د غَار ثنْدِينْت ن لْقُدْس ؤُوِيغ-د شَان ن صَّذَقَا إ لْأُمَّا ينُو، قدّْمغ شَا ن دْبِيحَاث. 18وَامِي ذَايِـي ؤُفِين ذِي ثمْزِيذَا ثَمقّْرَانْت تݣّغ ڒُوْضُو. وَار ؤُفِين اَكِذِي بُو ڒْغَاشِي، وَار تݣّغ بُو سّْدَع. وَلَكِن ذِنِّي شَان ن يسْرَائِيلِيْين زِي لْإِقْلِيم ن آسْيَا، 19ئِتْخصَّا نِثْنِي اَغَارك د اَسن س يِيخف نْسن ذَانِيتَا بَاش اَذ ينِين تُّهْمَاث إِي غَارْسن ضد ينُو. 20نِغ اَذَاش ينِين يِيْنَا إِي ذَا يبدّن مَان لْجَرِيمَا إي خَافِي ؤُفِين وَامِي بدّغ زَّاث إِ جْمَاعث ن لْحُكَّام نْسن. 21وَاش يمْكن خ وَاوَاڒ نِّي إِي نِّيغ س وڒَاغِي جَارَاسن وَامِي بدّغ ذِنِّي؟ نِّيغ-اَسن اَقَا كنِّيو تْحَاكَامم خَافِي نْهَارَا مِينْزِي تَامْنغ بلِّي يوْذَان اَذ د كَّرن زِي ڒْموْث ذِي لْقِيَامَا."
ئِقِّيم اَرَّسُوْل بُوْلُس ذِي ڒحْبس ن قَيْصَارِيَا
22فِيلِيكْس نتَّا يسّن مْلِيح خ وبْرِيذ-أَ ن عِيْسَى، وَلَكِن ئِأَجّل لْحُكم نّس ينَّا-ٱسن: "حتَّا اَذ د يَاس اَرَّايس ن ڒْعَسْكَار لِيسْيَاس عَاذ إِي غَا حكْمغ خ مَانَايَا." 23يُوْمَر يجّن ن ومقّْرَان ن ڒْعَسْكَار ينَّا-ٱس: "عسّ خ بُوْلُس ذِي ڒحْبس." ينَّا-ٱس: "وَلَكِن ؤُش-اَس شْوَايْت ن لْحُرِّيَا، اجّ يمدُّوْكَاڒ نّس اَغَارس د اَسن بَاش اَذَايس تْهِيلَّان."
24عْذُوْن شَان وُوْسَّان، يُوْسَا-د فِيلِيكْس اَكِذس ثَمْغَارْث نّس دْرُوْسِيلَا، نتَّاث ذ ثَئِسْرَائِيلِيث. ئِڒَاغَا-د خ بُوْلُس يصنّط-اَس وَامِي يسَّاوَاڒ خ لْإِيمَان زِي عِيْسَى لْمَسِيح. 25وَامِي يسِّيوڒ بُوْلُس خ مِين يدْجَان نِيشَان، ذ مَامّش غَا يحْكم بْنَاذم خ يِيْخف نّس، ذ يُوْم لْحِسَاب ذ لْعِقَاب إِي د غَا يَاسن أُوْشَا ئِنخْڒع فِيلِيكْس ينَّا-ٱس: "صَافِي ڒخُّو، عْقب. خْمِي غَارِي غَا ثِيڒِي لْفُرْصَا اَخَاك د ڒَاغِيغ." 26نتَّا عَاوذ فِيلِيكْس يرزُّو زِي بُوْلُس اَرّشْوث. س مَانَايَا يتْڒَاغَا-د خَاس اَطَّاس ن ثْوَاڒَاثِين يسَّاوَاڒ اَكِذس. 27عْذُوْن ثْنَاين ن يسݣّْوُوْسَا، ئِذْوڒ-د بُوْرْكْيُوْس فَسْتُوْس ذݣ ومْشَان ن لْوَالِي فِيلِيكْس. وَلَكِن فِيلِيكْس يݣَّا-ٱسن ڒْخَاضَر إِ يسْرَائِيلِيْين، يجَّا بُوْلُس ذِي ڒحْبس.
Currently Selected:
ڒخذايم 24: ريف
Highlight
Share
Copy
Want to have your highlights saved across all your devices? Sign up or sign in
