ڒخذايم 2
2
أَرُّوْح يقدّْسن يهوَّا-د خ ڒْمُوْمِنِين
1وَامِي د يُوْوض ڒْعِيذ ن نْهَار وِيس خمْسِين،#2.1 ڒْعِيذ ن نْهَار وِيس خمْسِين ذ يجّن ن ڒْعِيذ ن أَيث-إِسْرَائِيل يتَاس-اَسن-د خمْسِين يُوْم منْبَعْد إِ ڒْعِيذ اَمقّْرَان نْسن. مُوْنن مَارَّا ڒْمُوْمِنِين ذݣ يِجّن ن ومْشَان. 2عْلَاغَفْلَا يهْوَا-د يجّن ن ڒْحسّ زݣ وجنَّا اَم اَرِّيح إِي يتْصُوْضن س جّْهذ، يُوْذف ذِي مْكُڒ جِّهث ن ثدَّارْث مَانِي قِّيمن. 3ࢲْرِين يڒسَاون اَم يصْفضَاون ن ثْمسِّي يرُوْح كُڒ يِيڒس وَاحْذس يمَارْس يج يج خ كُڒ يجّن زَّايْسن. 4شُّوْرن س أَرُّوْح يقدّْسن مَارَّا إِذْسن، بْذَان سَّاوَاڒن س لُّغَاث وَار يدْجِين بو نْسن اَمشْنَاو مَامّش ذَاسن يُوْشَا أَرُّوْح اَذ سِّيوْڒن.
5ذِنِّي شَان يرْيَازن زِي أَيث-إِسْرَائِيل تݣّْوْذن أَربِّـي تْزُوْرَان غَار لْقُدْس، نِثْنِي زِي مَارَّا ثِمُوْرَا ن دُّنشْت-أَ. 6يرْيَازن نِّي وَامِي سْڒَان إِ ڒْحسّ نِّي ؤُسِين-د مُوْنن ذِنِّي قِّيمن تْعجّْبن، مْكُڒ يجّن يتسْڒَا إِ لُّغَا نّس. 7ذهّْشن تْعجّْبن نَّان جَارَاسن: "مَارَّا يوْذَان-أَ إِي سَّاوَاڒن لْأَصل نْسن زِي ثْمُوْرْث ن لْجَلِيل نِغ لَّا؟ 8مَامّش مْكُڒ يجّن زَّايْنغ يتسْڒَا إِ لُّغَا ن ثْمُوْرْث نّس؟ 9يعْنِي ثَمُوْرْث ن بَارْدْيَا ذ مَادْيَا ذ عِيلَام، ذ يمزْذَاغ ن مِيسِيبُوْطَامْيَا#2.9 أَوَاڒ-أَ قَّارن-اَس س ثعْرَابْث النَّهْرِين. ذ يَهُوْذِيَا ذ كَپْدُوْكْيَا، ذ پُـنْطُس ذ آسْيَا، 10ذ فْرِيْجْيَا ذ پَـامْفِيلْيَا، ذ مِصْرَا ذ جْوَايه ن لْقُرِينَا ذِي لِيبْـيَا، ذ يِنِّي يتْزُوْرَان زِي ثنْدِينْت ن رُوْمَا. 11ذ أَيث-إِسْرَائِيل ذ يِنِّي يسڒْمن ذِي دِّين ن أَيث-إِسْرَائِيل، ذ أَيث-كْرِيت ذ وَاعْرَابن. نشِّين مَارَّا نتْسْڒَا-يَاسن سَّاوَاڒن س لُّغَاث نّغ خ ثْمسْڒَايِين ثِمقّْرَانِين ن أَربِّـي."
12ذهْشن شّكّن، بْذَان سَّاوَاڒن جَارَاسن نَّان: "مِين يخس اَذ يِينِي مَانَايَا؟" 13ڒبْعَاض ضحْشن خَاسن نَّان قَا سْوِين اَطَّاس ن وَامَان وضِيڒ.
لْخُطْبَا ثَمزْوَارُوْت ن اَرَّسُوْل بُطْرُس
14بُطْرُس اَقَاث اَك حِيطَاش نِّي ن اَرُّسُل، ئِكَّر يسِّيوڒ س جّْهذ ينَّا-ٱسن: "آي يرْيَازن ن أَيث-إِسْرَائِيل ذ مَارَّا يمزْذَاغ ن لْقُدْس، ئِتْخصَّا اَذ تسّْنم اَذ تْصنّْطم مْلِيح إِ وَاوَاڒن ينُو. 15ئِوْذَان-أَ وَار سْوِين شَا وَار غلَّان شَا س شّْرب اَمشْنَاو مَامّش ثْحسّْبم مِينْزِي ثْسَعَّات-أَ عَاذ ذ تسْعَا ن صْبَاح وَاهَا! 16لَّا، يسِّيوڒ نَّبِي وَائِل خ مَانَايَا ذݣ يِجّن ن زْمَان وَامِي ينَّا:
17أَربِّـي ينَّا: ذݣ وُوْسَّان ينݣُّوْرَا
أَذ فَرْغغ أَرُّوْح ينُو خ مَارَّا يوْذَان.
ثَارْوَا نْوم ذ يِيسِّيثْوم اَذ سِّيوْڒن س مِين عڒْمن زِي أَربِّـي.
ئِحنْجِيرن نْوم اَذ ࢲْرن لْوَحِي،
ئِوسُّوْرَا نْوم اَذ اَرْجَان ثِيرْجَا.
18ذݣ وُوْسَّان نِّي اَذ فَرْغغ أَرُّوْح ينُو
خ لْعِبَاد ينُو يرْيَازن ذ ثمْغَارِين،
أَذ سِّيوْڒن س مِين عڒْمن زِي أَربِّـي.
19أَذ ݣّغ ڒَعْجَايب ذݣ وجنَّا ذ لْعَلَامَاث ذِي ثْمُوْرْث،
أَذ يڒِين يذَامّن ذ ثْمسِّي ذ وَاطَّاس ن دّخَّان.
20ثْفُوْشْت اَذ تذْوڒ ذ ثَادْجسْت، ثَزِيرِي اَذ تذْوڒ ذ يذَامّن
قْبڒ إِي د غَا يَاس نْهَار نِّي اَمقّْرَان لْعَضِيم ن سِيذِي أَربِّـي.
21سّنِّي مَارَّا ونِّي إِي غَا يڒَاغَان س يِيسم ن سِيذِي أَربِّـي اَتَاف اَذ ينْجم.
22آي يرْيَازن ن أَيث-إِسْرَائِيل، صنّْطث إِ مِين ذَاوم غَا ينِيغ. عِيْسَى-يَا زِي نَاصِرَا مِين يعْنَا نتَّا؟ نتَّا ذ يجّن ن ورْيَاز يتْوَاظْهَار-د زِي أَربِّـي إِ كنِّيو س لْمُعْجِيزَاث ذ لْبُرْهَانَاث ذ لْعَلَامَاث إِݣ يݣَّا أَربِّـي خ وفُوْس ن عِيْسَى جَارَاوم مَامّش ثسّْنم. 23ئِي كنِّيو مِين ذَاس ثݣِّيم؟ وَامِي يتْوَاسلّم عْلَاحْسَاب مَامّش يخس أَربِّـي ذ مَامّش تُوْغَا يسّن نتَّا، كنِّيو ثْصلّْبم-ث ثنْغِيم-ث س يفَاسّن ن لْكُفَّار. 24وَلَكِن أَربِّـي نتَّا يسكَّر-يث-يذ يضْڒق-اَس زي ڒحْرِيق نِّي ن ڒْموْث خْمِي تَارو، أَقَا ڒْموْث وَار ذَاس ثْزمَّر. 25لِأَنَّا يسِّيوڒ خَاس نَّبِي دَاود ذݣ يِجّن ن زْمَان وَامِي ينَّا:
قَا تْوَاڒِيغ سِيذِي أَربِّـي زَّاثِي إِ ڒبْدَا،
أَقَاث خ وفُوْسِي ينُو بَاش وَار ترْجِيجِيغ.
26خ مَانَايَا يفَرّح وُوْڒ ينُو، ئِزهُّو يِيڒس ينُو.
دَّات ينُو اَذ تْعِيش ذِي لْأَمَل.
27وَار ثْسمّْحذ شَا ذِي ڒَعْمَار ينُو ذِي لْأَخِرَا،
وَار تجِّيذ شَا لْعَظِيم نّش اَذ يكِيشّو.
28ثْسظْهَارذ-اَيِي-د يبْرِيذن ن ثُوْذَارْث،
أَذَايِي ثسْفَرْحذ س وَاطَّاس خْمِي غَا ࢲرغ اَغمْبُوْب نّش.
29آي اَيثْمَا، أَذَاوم ينِيِغ صَّرَاحَا: دَاود زِي سَّلَف صَّالِحِين، نتَّا يمُّوْث يتْوَانْضڒ. أَنْضڒ نّس اَقَّاث اَكِذْنغ اَڒ نْهَارَا. 30أَزدْجِيذ دَاود تُوْغَا ذ نَّبي يعْنِي يسّن بلِّي يوْعذ-يث أَربِّـي ينَّا-ٱس اَقَا اَذ سْغِيمغ يجّن زِي دُّوْرِّيث نّش خ لْعَرْش نّش. 31دَاود يعْڒم زِي أَربِّـي مِين غَا يوقْعن، ئِسِّيوڒ خ لْقِيَامَا ن لْمَسِيح بلِّي وَار ذَايس يسمّح شَا ذِي لْأَخِرَا، وَار تْكِيشِّيو شَا دَّات نّس. 32عِيْسَى-يَا وَانِيتَا يسكَّر-يث-يذ أَربِّـي زِي ڒْموْث، أَقَا نشِّين مَارَّا نْشهّذ خ مَانَايَا. 33وَامِي يتْوَارْفع غَار وفُوْسِي ن أَربِّـي،#2.33 مَانَايَا يخس اَذ يِينِي يجّن ن ومْشَان غَارس شَّان ذ اَمقّْرَان. ئِيْسِي زِي بَابَاس أَرُّوْح يقدّْسن إِي زِي ث يوْعذ، ئِسْفَرغ-د عِيسَى مَانَايَا إي تْوَاڒَام ڒخُّو ذ مَانَايَا إي ثسْڒَام. 34قَا دَاود وَار يتْوَارْفع شَا غَار وجنَّا، نتَّا س يِيخْف نّس إِي ينَّان:
سِيذِي أَربِّـي ينَّا-ٱس إِ سِيذِي: قِّيم-د خ وفُوْسِي ينُو،
35أَڒ د غَا ݣّغ ڒْعَذْيَان نّش سْوَادَّاي إِ يضَارن نّش.
36إِيوَا كنِّيو يتْخصَّا اَذ تسّْنم مَارَّا أَيث-إِسْرَائِيل مبْڒَا شّكّ، قَا عِيْسَى-يَا وَانِيتَا إِي ثْصلّْبم يݣِّي-ث أَربِّـي ذ سِيذِيثْنغ ذ لْمَسِيح."
37ئِوذَان نِّي وَامِي سْڒِين إِ وَاوَاڒ-أَ، ؤُڒَاون نْسن شمْضن. كَّرن نَّان-اَس إِ بُطْرُس ذ اَرُّسُل نّغْنِي: "آي اَيثْمَا، مِين غَا نݣّ؟"
38ينَّا-ٱسن بُطْرُس: "تُوْبث، تْوَاطهَّارث س وَامَان كُڒ يجّن زَّايْوم عْلَاحْسَاب يسم ن عِيْسَى لْمَسِيح حمَا اَذ تْوَاغْفَرنْت ڒْمُعْصِيَاث نْوم، أَتَاف اَذَاوم يمُّوْش أَرُّوْح يقدّْسن ذ لْهَدِيَا. 39لِأَنَّا يُوْشَا-اَوم ڒْعَهذ إِ كنِّيو ذ ثَارْوَا نْوم ذ مَارَّا يِنِّي يݣّْوْجن، يعْنِي إِ مَارَّا يِنِّي إِي خف د غَا يڒَاغَا سِيذِي أَربِّـي." 40يعْڒم-اَسن بُطْرُس اَطَّاس يوصَّا-ٱثن ينَّا-ٱسن: "سْنجْمث يخْف نْوم زݣ يِوْذَان ن ڒْوقْث-أَ ذِي دْجَان يخَرْوِيضن." 41سّنِّي يِنِّي يقبْڒن اَوَاڒ نّس رُوْحن تْوَاطهَّارن س وَامَان. نْهَار نِّي مَارْنِين شَان ثڒْتْاَڒَاف إِذْسن غَار ڒْمُوْمِنِين.
مَامّش تْعِيشن ڒْمُوْمِنِين يمزْوُوْرَا
42 ڒْمُوْمِنِين ڒبْدَا تسْڒَان إِ تَّعْلِيم ن اَرُّسُل، تْمُوْنن اَݣ وَايَاوْيَا اَم وَاوْمَاثن، تتّن اَغْرُوْم اَݣ وَايَاوْيَا، تْࢲَادْجَان. 43أَرُّسُل تݣّن اَطَّاس ن لْمُعْجِيزَاث ذ لْبُرْهَانَاث، ئِوْذَان تْعجّْبن زَّايْسن مَارَّا. 44تْمُوْنن مَارَّا ڒْمُوْمِنِين شَرّْشن مَارَّا اَݣ وَايَاوْيَا. 45زْنُوْزَان اَݣْڒَا نْسن ذ ڒحْوَايج نْسن، فرّْقن خ مْكُڒ يجّن مِين يحْذَاج. 46تْمُوْنن مَارَّا إِذْسن مكُڒ نْهَار ذِي ثمْزِيذَا ثَمقّْرَانْت ن أَيث-إِسْرَائِيل. تتّن اَغْرُوْم مَارَّا ذِي ثُوْذْرِين نْسن، تتّن مشَّا س ڒفْرَاحث ذ ڒْخَاضَر نْسن. 47حمّْذن أَربِّـي، رطَّان خَاسن يِوْذَان مَارَّا. كُڒ نْهَار يَرنِّي-يَاسن سِيذِي أَربِّـي ذِي لْعَدَد ن يِنِّي ينجّْمن.
Currently Selected:
ڒخذايم 2: ريف
Highlight
Share
Copy
Want to have your highlights saved across all your devices? Sign up or sign in
