ಮಾರ್ಕೆ 8

ನಾಲ್ ಸಾರ ಜನೊಕುಲೆಗ್ ವಣಸ್

(ಮತ್ತಾಯೆ 15:32-39)

1ಆ ದಿನೊಕುಲೆಡ್ ಜನೊಕುಲು ಕುಡ ಗುಂಪು ಕಟ್ಟೊಂದು ಬತ್ತೆರ್. ಅಪಗ ಅಕ್ಲೆಡ ತಿನಿಯೆರೆ ದಾಲಾ ಇಜ್ಜಂದಿನೆಡ್ದ್ ಯೇಸು ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್, 2ಅಕ್ಲೆಡ ಪಂಡಿನಿ, “ಈ ಜನೊಕುಲೆನ್ ತೂದು ಕನಿಕರ ಆಪುಂಡು. ಮೊಕುಲು ಎನ ಕೈತಲ್‌ ಬತ್ತ್‌ದ್ ಮೂಜಿ ದಿನ ಆಪುಂಡು. ಮೊಕ್ಲೆಗ್ ವಣಸ್‌ಗ್ ದಾಲಾ ಇಜ್ಜಿ. 3ಮೊಕ್ಲೆನ್ ಉಪವಾಸೊಡು ಇಲ್ಲಗ್ ಕಡಪುಡುಂಡ ಸಾದಿಡ್ ಬರೆಲ್ದ್ ಪೋವೆರ್, ದಾಯೆಗಂದ್ಂಡ, ಮೊಕ್ಲೆಡ್ ಕೆಲೆವೆರ್ ದೂರೊಡ್ದು ಬೈದೆರತ್ತಾ,” ಅಂದ್‌ದ್ ಪಂಡಿನೆಕ್ಕ್,

4ಶಿಷ್ಯೆರ್, “ಈ ಕಾಡ್‌ಡ್ ಮೊಕ್ಲೆಗ್ ಬೋಡಿತ್ತಿನಾತ್ ರೊಟ್ಟಿಲೆನ್ ಒಲ್ತುಡ್ದು ಕನವೊಲಿ?” ಪಂಡೆರ್.

5ಆಯೆ, “ನಿಕ್ಲೆಡ ಏತ್ ರೊಟ್ಟಿಲು ಉಂಡು,” ಪಂಡ್ದ್ ಅಕ್ಲೆಡ ಕೇಂಡಿನೆಕ್ಕ್, “ಏಳ್ ಉಂಡು,” ಪಂಡೆರ್.

6ಅಪಗ ಯೇಸು ಜನೊಕುಲೆ ಗುಂಪುಗು ನೆಲತ್ತ ಮಿತ್ತ್ ಕುಲ್ಲೆರೆ ಅಪ್ಪಣೆ ಕೊರಿಯೆ. ಆ ಏಳ್ ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ರೊಟ್ಟಿನ್ ಪೊಲ್ತುದು, ಪಟ್ಟೆರೆಗಾದ್ ತನ ಶಿಷ್ಯೆರೆ ಕೈಕ್ ಕೊರಿಯೆ. ಅಕುಲು ಗುಂಪುದಾಕುಲೆಗ್ ಪಟ್ಟ್‌ದ್ ಕೊರಿಯೆರ್. 7ಉಂದತ್ತಂದೆ ಅಕ್ಲೆಡ ಕೆಲವು ಎಲ್ಯ ಮೀನ್‌ಲಾ ಇತ್ತ್ಂಡ್. ಅವೆನ್ಲಾ ಆಯೆ ದೆತ್ತೊಂದು, ಸುಗಿತ್‌ದ್, ಉಂದೆನ್ಲಾ ಪಟ್ಟ್‌ದ್ ಕೊರ್ಲೆ ಅಂದ್‌ದ್ ಶಿಷ್ಯೆರೆಗ್ ಪಂಡೆ. 8ಅಕುಲು ವಣಸ್ ಮಲ್ತ್‌ದ್ ಬಂಜಾರ ಆಯೆರ್. ಒರಿದಿನ ತುಂಡುಲೆನ್ ಒಟ್ಟು ಮಲ್ಪುನಗ ಏಳ್ ಪುಡಯಿ ದಿಂಜಿಂಡ್. 9ಅವುಲು ವಣಸ್ ಮಲ್ತಿನಾಕುಲು ಹೆಚ್ಚಿಕಡಿಮೆ ನಾಲ್ ಸಾರ ಅಂಜೊವುಲು ಇತ್ತೆರ್. 10ಬೊಕ್ಕ ಆಯೆ ಅಕ್ಲೆನ್ ಕಡಪುಡ್ದು ಕೊರ್ದು ಅಪಗನೆ ತನ ಶಿಷ್ಯೆರೆನ್ ಲೆತ್ತೊಂದು, ಓಡೊನು ಮಿತ್ತಾರ್ದ್, ದಲ್ಮನೂಥ ಸೀಮೆಗ್ ಬತ್ತೆ.

ಪರಿಸಾಯೆರ್ ಕಾರ್ನಿಕೊಲೆನ್ ಬಯಕುನವು

(ಮತ್ತಾಯೆ 16:14)

11ಐಡ್ದ್ ಬೊಕ್ಕ ಪರಿಸಾಯೆರ್ ಬತ್ತ್‌ದ್ ಆಯಡ ತರ್ಕ ಮಲ್ತೊಂದು, ಪರೀಕ್ಷೆ ಮಲ್ಪೆರೆಗಾದ್, ಈ ಬಾನೊಡು ಒಂಜಿ ಗುರ್ತ ತೋಜಾದ್ ಕೊರೊಡು ಅಂದ್‌ದ್ ಕೇನ್ನಪಗ 12ಯೇಸು ತನ ಆತ್ಮೊಡು ಬೇಜಾರಾದ್, “ಈ ಸಂತಾನ ಗುರ್ತೊನು ಬಯಕುನು ದಾಯೆಗ್? ನಿಕ್ಲೆಗ್ ನಿಜಾದ್ ಪನ್ಪೆ, ಈ ಸಂತಾನೊಗು ವಾ ಗುರ್ತಲಾ ತಿಕ್ಕಂದ್.” ಅಂದ್‌ದ್ ಪಂಡೆ.

13ಬೊಕ್ಕ ಅಕ್ಲೆನ್ ಬುಡ್ದು ಪಿರ ಓಡೊನು ಮಿತ್ತಾರ್ದ್ ಆಪೆ ಬರಿಕ್ಕ್ ಪೋಯೆ.

ಹೆರೋದೆ ಬೊಕ್ಕ ಪರಿಸಾಯೆರೆ ಬಗೆಟ್

(ಮತ್ತಾಯೆ 16:5-12)

14ಶಿಷ್ಯೆರ್ ರೊಟ್ಟಿದ ಬುತ್ತಿ ಕಟ್ಟೊನಿಯೆರೆ ಮದತೆರ್. ಓಡೊಡು ಅಕ್ಲೆಡ ಒಂಜೇ ಒಂಜಿ ರೊಟ್ಟಿ ಮಾತ್ರ ಇತ್ತ್ಂಡ್. 15ಬೊಕ್ಕ ಯೇಸು ಅಕ್ಲೆಡ, “ಜಾಗ್ರತೆಡುಪ್ಪುಲೆ! ಪರಿಸಾಯೆರೆ ಬೊಕ್ಕ ಹೆರೋದನ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಕಂಡಿತಾದ್ ಪನ್ನಗ

16ಅಕುಲು, “ನಮಡ ರೊಟ್ಟಿ ಇಜ್ಜಂದಿನೆಡ್ದೇ ಆಯೆ ಇಂಚ ಪನೊಂದುಲ್ಲೆ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

17ಉಂದೆನ್ ತೆರಿದ್ ಯೇಸು, “ರೊಟ್ಟಿ ಇಜ್ಜತ್ತಾ ಪಂಡ್ದ್, ನಿಕ್ಲೆ ಉಲಯಿ ದಾಯೆಗ್ ಪಾತೆರುವರ್? ನಿಕ್ಲೆಗ್ ನನಲಾ ತೆರಿಯುಜಾ? ಅರ್ಥ ಆಪುಜ? ನಿಕ್ಲೆನ ಉಡಲ್ ಕಲ್ಲಾತ್ತ್‌ಂಡಾ? 18ನಿಕ್ಲೆಗ್ ಕಣ್ಣ್ ಇತ್ತ್‌ದ್‌ಲಾ ತೂಪುಜರಾ? ಕೆಬಿ ಇತ್ತ್‌ದ್‌ಲಾ ಕೇನುಜರಾ? ನಿಕ್ಲೆಗ್ ನೆನೆಪುಲಾ ಇಜ್ಜಾ? 19ಯಾನ್ ಐನ್ ರೊಟ್ಟಿ ಪೊಲ್ತುದು ಐನ್ ಸಾರ ಜನೊಕುಲೆಗ್ ಪಟ್ಟಿನಪಗ ತಿನಂದೆ, ಒರಿದಿನ ತುಂಡುಲೆಡ್, ಏತ್ ಪುಡಯಿ ಒಟ್ಟು ಮಲ್ತರ್?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಪದ್ರಾಡ್,” ಪಂಡೆರ್.

20“ಬೊಕ್ಕ ಆ ಏಳ್ ರೊಟ್ಟಿ ನಾಲ್ ಸಾರ ಜನೊಕುಲೆಗ್ ಪಟ್ಟಿನಪಗ, ಒರಿದಿನ ತುಂಡುಲೆಡ್, ಏತ್ ಪುಡಯಿ ಒಟ್ಟು ಮಲ್ತರ್?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಏಳ್,” ಪಂಡೆರ್.

21ಅಪಗ ಯೇಸು ಅಕ್ಲೆಡ, “ನಿಕ್ಲೆಗ್ ನನಲಾ ಅರ್ಥ ಆಪುಜ,” ಅಂದ್‌ದ್ ಪಂಡೆ

ಯೇಸು ಕುರುಡನ್ ಗುಣ ಮಲ್ಪುನವು

22ಬೊಕ್ಕ ಅಕುಲು ಬೆತ್ಸಾಯಿದ ಊರುಗು ಬತ್ತೆರ್. ಅಲ್ಪ ಜನೊಕುಲು ಒರಿ ಕುರುಡನ್ ಯೇಸುನ ಕೈತಲ್‌ ಲೆತ್ತೊಂದು ಬತ್ತ್‌ದ್, ಆಯನ್ ಮುಟ್ಟೊಡು ಅಂದ್‌ದ್ ಆಯಡ ನಟ್ಟೊಂಡೆರ್. 23ಆಯೆ ಕುರುಡನ ಕೈ ಪತ್ತ್‌ದ್, ಊರುದ ಪಿದಯಿ ಲೆತ್ತೊಂದು ಪೋದು, ಆಯನ ಕಣ್ಣ್‌ಗ್ ಉಬ್ಬಿದ್, ಆಯನ ಮಿತ್ತ್ ಕೈ ದೀದ್, “ನಿಕ್ಕ್ ದಾದಾಂಡಲಾ ತೋಜುಂಡಾ?” ಅಂದ್‌ದ್ ಆಯಡ ಕೇಂಡೆ.

24ಆಯೆ ತರೆ ದೆರ್ತ್ತ್‌ದ್ ತೂದು, “ಅಂದ್, ಎಂಕ್ ಜನೊಕುಲು ತೋಜುವೆರ್. ಅಕುಲು ನಡಪುನ ಮರತ ಲೆಕ್ಕ ತೋಜುವೆರ್,” ಅಂದ್‌ದ್ ಪಂಡೆ.

25ಕುಡ ಯೇಸು ಆಯನ ಕಣ್ಣ್‌ದ ಮಿತ್ತ್ ಕೈ ದೀಯೆ. ಆಯೆ ಆಯನ ಕಣ್ಣ್ ಬುಡ್ದು ತೂನಗ ಆಯಗ್ ಗುಣ ಆದಿತ್ತ್ಂಡ್. ಬೊಕ್ಕ ಆಯಗ್ ಮಾತಲಾ ಸರಿಯಾದ್ ತೋಜ್ಂಡ್. 26ಐಡ್ದ್ ಬೊಕ್ಕ ಯೇಸು, “ಈ ಊರುದುಲಯಿ ಪೋವೊಡ್ಚಿ,” ಪಂಡ್‌ದ್ ಆಯನ್ ಆಯನ ಇಲ್ಲಗ್ ಕಡಪುಡಿಯೆ.

ಪೇತ್ರೆ ಯೇಸುನು ಕ್ರಿಸ್ತೆ ಅಂದ್‌ದ್ ಪನ್ಪಿನವು

(ಮತ್ತಾಯೆ 16:13-20; ಲೂಕೆ 9:18-21)

27ಯೇಸುಲಾ ಆಯನ ಶಿಷ್ಯೆರ್‌ಲಾ ಫಿಲಿಪ್ಪಿ ಕೈಸರೆಯ ಪನ್ಪಿ ಪಟ್ಟಣಲೆಡ್ ಸೇರ್ದಿನ ಗ್ರಾಮೊಲೆಗ್ ಪಿದಾಡಿಯೆರ್. ಸಾದಿಡ್ ಆಯೆ ತನ ಶಿಷ್ಯೆರೆಡ, “ಜನೊಕುಲು, ಎನನ್ ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್

28ಅಕುಲು ಆಯಡ, “ನಿನನ್ ಕೆಲೆವೆರ್ ಸ್ನಾನಿಕೆ ಯೋಹಾನೆ, ಪನ್ಪೆರ್. ಕೆಲೆವೆರ್ ಎಲೀಯೆ ಪನ್ಪೆರ್, ನನ ಕೆಲೆವೆರ್ ಪ್ರವಾದಿಲೆಡ್ ಒರಿ ಪನ್ಪೆರ್,” ಅಂದ್‌ದ್ ಪಂಡೆರ್.

29ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರ್ ಅಂದ್‌ದ್ ಪನ್ಪರ್?” ಅಂದ್‌ದ್ ಕೇನ್ನಗ ಪೇತ್ರೆ, “ಈ ಬರೊಡಾಯಿನ ಕ್ರಿಸ್ತೆ,” ಅಂದ್‌ದ್ ಉತ್ತರ ಕೊರಿಯೆ. 30ಐಕ್ ಆಯೆ, “ಎನ ಸಂಗತಿಡ್ ಏರೆಗ್ಲಾ ಪನಡೆ,” ಅಂದ್‌ದ್ ಶಿಷ್ಯೆರೆಗ್ ಕಂಡಿತಾದ್ ಪಂಡೆ.

ಯೇಸು ತನ ಮರಣದ ಸಂಗತಿನ್ ತೆರಿಪಾವುನವು

(ಮತ್ತಾಯೆ 16:21-28; ಲೂಕೆ 9:22-27)

31ಉಂದತ್ತಂದೆ, “ನರಮಾನಿ ಮಗೆ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ತಿರಸ್ಕಾರ ಮಲ್ತ್‌ದ್ ಕೆರ್ವೆರ್. ಮೂಜಿ ದಿನೊಡ್ದು ಬೊಕ್ಕ ಜೀವ ಆದ್ ಲಕ್ಕುವೆ,” ಅಂದ್‌ದ್ ಬೋಧನೆ ಕೊರಿಯೆರೆ ಸುರು ಮಲ್ತೆ. 32ಆಯೆ ಈ ಪಾತೆರೊನು ಸ್ಪಷ್ಟಾದ್ ಪಂಡೆ. ಅಪಗ ಪೇತ್ರೆ ಆಯನ ಕೈ ಪತ್ತ್‌ದ್ ಬರಿಕ್ಕ್ ಲೆತ್ತ್‌ದ್ ಈ ಇಂಚ ಪನ್ಪಿನವು ಸರಿ ಅತ್ತ್ ಅಂದ್‌ದ್ ದಟ್ಟಿಯೆರೆ ಸುರು ಮಲ್ತೆ. 33ಯೇಸು ಪಿಜಿರ್‌ದ್ ತನ ಶಿಷ್ಯೆರೆನ್ ತೂದು ಪೇತ್ರನ್ ದಟ್ಟಿದ್, “ಸೈತಾನ, ಎನ ದುಂಬು ಉಂತಡ, ನಿನ ಆಲೋಚನೆ ನರಮಾನಿನ ಆಲೋಚನೆ ಅತ್ತಂದೆ, ದೇವೆರೆನವು ಅತ್ತ್.”

34ಬೊಕ್ಕ ಆಯೆ ತನ ಶಿಷ್ಯೆರೆಡೊಪ್ಪ ಜನೊಕುಲೆ ಗುಂಪುನು ಕೈತಲ್‌ ಲೆತ್ತ್‌ದ್, ಅಕ್ಲೆಡ ಪಂಡಿನಿ ದಾನೆಂದ್ಂಡ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್. 35ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ, ಆಂಡ ಎಂಕಾದ್‌ಲಾ ಸುವಾರ್ತೆಗಾದ್‌ಲಾ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ. 36ಒರಿ ನರಮಾನಿ ಇಡೀ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಹಾಳ್ ಮಲ್ತೊಂಡೆಡ ಆಯಗ್ ದಾದ ಪ್ರಯೋಜನ ಉಂಡು? 37ಒರಿ ತನ ಪ್ರಾಣೊಗು ಎಂಚಿನ ಪಗತೆ ಕೊರೊಲಿ? 38ವ್ಯಭಿಚಾರಿಲೆಕ್ಕ ಉಪ್ಪು ಈ ಪಾಪಿಷ್ಟ ಸಂತಾನೊಡು, ಏರಾಂಡಲಾ ಎನನ್ ಬೊಕ್ಕ ಎನ ಪಾತೆರೊಗು ನಾಚಿಗೆ ಮಲ್ತೊನುವೆನಾ ಆಯಗ್ ನರಮಾನಿ ಮಗೆಲಾ ತಾನ್ ತನ ಅಮ್ಮೆರೆನ ಮೈಮೆಡ್ ಪರಿಶುದ್ಧ ದೂತೆರೆಡೊಪ್ಪ ಬನ್ನಗ ನಾಚಿಗೆ ಮಲ್ಪೆ,” ಅಂದ್‌ದ್ ಪಂಡೆ.

Currently Selected:

ಮಾರ್ಕೆ 8: ತುಳು

Highlight

Copy