ಮಾರ್ಕೆ 5

ಯೇಸು ದೆವ್ವ ಪತ್ತ್‌ದಿನಾಯನ್ ಗುಣ ಮಲ್ಪುನವು

(ಮತ್ತಾಯೆ 8:28-34; ಲೂಕೆ 8:26-39)

1ಯೇಸು ಬೊಕ್ಕ ಆಯನ ಶಿಷ್ಯೆರ್ ಕಡಲ್ ದಾಂಟ್‌ದ್ ಆಪೆದ ಬರಿಕ್ಕ್ ಗೆರಸೇನೆರೆ ಸೀಮೆಗ್ ಮುಟ್ಟಿಯೆರ್. 2ಯೇಸು ಓಡೊಡ್ದು ಜತ್ತಿ ಕೂಡ್ಲೆ, ಒರಿ ದೆವ್ವ ಪತ್ತ್‌ದಿನಾಯೆ ಸಮಾಧಿದ ಮಾಟೆದುಲಯಿಡ್ದ್ ಆಯ ಎದುರು ಬತ್ತೆ. 3-4ಸಮಾಧಿದ ಮಾಟೆಲು ಆಯನ ಇಲ್ಲ್ ಆದಿತ್ತ್ಂಡ್. ಆಯನ್ ಕುಂಟೊಲೆಡ್ಲಾ ಸಂಕಲೆಡ್ಲಾ ಕಟ್ಟ್‌ದಿತ್ತ್ಂಡಲಾ ಆಯೆ ಸಂಕಲೆನ್ಲಾ ಕುಂಟೊಲೆನ್ಲಾ ಪೊಲ್ತೊಂದುದಿತ್ತೆ. ಆಯನ್ ಏರೆಗ್ಲಾ ಸಂಕಲೆಡ್ದ್ ಕಟ್ಟಿಯೆರೆ ಆವಂದೆ ಪೋಯೆರ್. ಆಯನ್ ಪತ್ತಿಯೆರೆ ಏರೆಡ್ದ್‌ಲಾ ಆಯಿಜಿ. 5ಆಯೆ ರಾತ್ರೆ ಪಗೆಲ್ ಸಮಾಧಿ ಮಾಟೆಲೆಡ್ಲಾ ಗುಡ್ಡೆಲೆಡ್ಲಾ ಬೊಬ್ಬೆ ಪಾಡೊಂದು, ಕಲ್ಲ್‌ಡ್ ತನನ್ ಕಡ್ತೊಂದಿತ್ತೆ.

6ಯೇಸುನು ಆಯೆ ದೂರೊಡ್ದು ತೂದು ಪಾರ್ ಬತ್ತ್‌ದ್ ಆಯಗ್ ಅಡ್ಡಬೂರ್ಯೆ. 7ಮಲ್ಲ ಸ್ವರೊಟ್ಟು ಅರಬಾಯಿ ದೀದ್, “ಯೇಸೋ ಪರಾತ್ಪರೆ ಆದುಪ್ಪು ದೇವೆರೆ ಮಗಾ ಎನ ಸುದ್ಧಿ ನಿಕ್ಕ್ ದಾಯೆಗ್? ದೇವೆರೆ ಆಜ ಪಾಡ್ವೆ, ಎಂಕ್ ಭಂಗ ಕೊರೊಡ್ಚಿ .” 8ಆಯೆ ಇಂಚ ಪಂಡಿನಿ ದಾಯೆಗಂದ್ಂಡ, ಯೇಸು, “ಓ ದೆವ್ವನೇ, ಇಂಬ್ಯನ್ ಬುಡ್ದು ಪೋಲ,” ಅಂದ್‌ದ್ ಪಂಡ್ದಿತ್ತೆ.

9ಬೊಕ್ಕ ಯೇಸು ಆಯಡ, “ನಿನ ಪುದರ್ ಎಂಚಿನ?” ಅಂದ್‌ದ್ ಕೇಂಡಿನೆಕ್ಕ್ ಆಯೆ, “ಎನ ಪುದರ್ ‘ದಂಡ್,’ ದಾಯೆಗಂದ್ಂಡ, ಎಂಕುಲು ಮಸ್ತ್ ಜನ ಉಲ್ಲ,” ಅಂದ್‌ದ್ ಪಂಡೆ. 10ಎಂಕ್ಲೆನ್ ಈ ಸೀಮೆಡ್ದ್ ಗಿಡ್ತ್ ಬುಡೊಡ್ಚಿ ಅಂದ್‌ದ್ ಆಯಡ ನಟ್ಟೊಂಡ.

11ಅಲ್ಪ ಗುಡ್ಡೆದ ಪುಡೆಟ್ಟ್ ಪಂಜಿದ ಮಲ್ಲ ಪುಂಡು ಮೇಯೊಂದಿತ್ತ್‌ಂಡ್. 12ಆ ದೆವ್ವೊಲು, “ಪಂಜಿಲೆ ಗುಂಪುದುಲಯಿ ಸೇರೊನಿಯೆರೆ ಎಂಕ್ಲೆನ್ ಕಡಪುಡ್ದು ಕೊರ್ಲ,” ಅಂದ್‌ದ್ ನಟ್ಟೊಂಡ. 13ಅಪಗ ಯೇಸು ಐಕ್ಲೆಗ್ ಅಪ್ಪಣೆ ಕೊರಿಯೆ. ಬೊಕ್ಕ ದೆವ್ವೊಲು ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ; ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕಡಲ್ದ ಉಲಯಿ ಬೂರ್ದು ದಮ್ಮು ಕಟ್ಟ್‌ದ್ ಸೈತ. ಹೆಚ್ಚಿಕಡಿಮೆ ರಡ್ಡ್ ಸಾರ ಪಂಜಿಲು ಇತ್ತ.

14ಪಂಜಿಲೆನ್ ಮೇಪಾವುನಕುಲು ಪಾರ್‌ಪೋದು ಊರುಡ್ಲಾ ಹಳ್ಳಿಲೆಡ್ಲಾ ನಡತಿ ಸಂಗತಿನ್ ತೆರಿಪಾಯೆರ್. ಜನೊಕುಲು ನಡತಿ ಸಂಗತಿ ದಾನೆಂದ್ ತೂಯೆರೆ ಬತ್ತೆರ್. 15ಯೇಸು ಇತ್ತಿನಡೆಗ್ ಬತ್ತ್‌ದ್ ಆ ದಂಡ್ ಇನ್ಪಿ ದೆವ್ವ ಪತ್ತ್‌ದಿನಾಯೆ, ಕುಂಟು ಪಾಡೊಂದು ಸ್ವಸ್ಥ ಬುದ್ಧಿಡ್ ಕುಲ್ಲುದಿನೆನ್ ತೂದು ಪೋಡಿಯೆರ್. 16ನಡತಿ ಸಂಗತಿಲೆನ್ ತೂಯಿನಾಕುಲು ಆ ದೆವ್ವ ಪತ್ತ್‌ದಿನಾಯಗ್ ಇಂಚ ಆಂಡ್ ಪನ್ಪಿನೆನ್ಲಾ ಪಂಜಿಲೆ ಸಂಗತಿನ್ಲಾ ತೆರಿಪಾನಗ

17ಅಕುಲು ಯೇಸುನು, ತನ್ಕುಲೆ ಸೀಮೆನ್ ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್. 18ಆಯೆ ಓಡೊನು ಮಿತ್ತಾನಗ ಆ ದೆವ್ವ ಪತ್ತ್‌ದಿನಾಯೆ, “ಯಾನ್ ನಿನಡೊಪ್ಪ ಉಪ್ಪುವೆ,” ಅಂದ್‌ದ್ ಯೇಸುಡ ನಟ್ಟೊಂಡೆ.

19ಆಂಡ ಯೇಸು ಆಯನ್ ಲೆತ್ತೊಂದು ಪೋಯೆರೆ ಒಪ್ಪಿಯಂದೆ ಆಯಡ, “ಈ ನಿನ ಇಲ್ಲಡೆಗ್ ನಿನ್ನಾಕುಲೆ ಕೈತಲ್‌ ಪೋದು, ಸ್ವಾಮಿ ನಿಕ್ಕ್ ಕರುಣೆ ತೋಜಾದ್ ನಿಕ್ಕ್ ಎಂಚೆಂಚಿನ ಉಪಕಾರೊನು ಮಲ್ತ್‌ದೆ,” ಅಂದ್‌ದ್ ತೆರಿಪಾಲ.

20ಆಯೆ ಅಲ್ಪಡ್ದ್ ಪೋದು, ಯೇಸು ತನ್ಕ್ ಮಲ್ತಿನ ಉಪಕಾರೊನು ದೆಕಪೊಲಿ ಸೀಮೆಲೆಡ್ ಸಾರಿಯೆರೆ ಸುರು ಮಲ್ತೆ. ಮಾತೆರ್ಲಾ ಅಚ್ಚಿರ ಆಯೆರ್.

ಯಾಯಿರೆನ ಮಗಲ್ ಬೊಕ್ಕ ಸೀಕ್‌ದ ಪೊಂಜೊವು

(ಮತ್ತಾಯೆ 9:18-26; ಲೂಕೆ 8:40-56)

21ಯೇಸು ಪಿರ ಓಡೊಡು ಈಯೆರೆಗ್ ಕಡತ್‌ದ್ ಬತ್ತಿ ಬೊಕ್ಕ ಜನೊಕುಲು ಮಲ್ಲ ಗುಂಪಾದ್ ಆಯನ ಸುತ್ತಲಾ ಕೂಡಿಯೆರ್. ಆಯೆ ಕಡಲ ಬರಿಟ್ಟಿತ್ತೆ. 22ಅಪಗ ಸಭಾಮಂದಿರದ ಅಧಿಕಾರಿಲೆಡ್ ಯಾಯಿರೆ ಪನ್ಪಿನಾಯೆ ಬತ್ತ್‌ದ್, ಯೇಸುನು ತೂದು ಆಯನ ಕಾರ್‌ಗ್ ಅಡ್ಡಬೂರ್ದು, 23“ಎನ ಎಲ್ಯ ಮಗಲ್ ಇತ್ತೆ ಸೈಪಿನಂಚ ಉಲ್ಲಲ್. ಆಲ್ ಗುಣ ಆದ್ ಬದುಕುಲೆಕ್ಕ ಈ ಬತ್ತ್‌ದ್ ಆಲೆನ ಮಿತ್ತ್ ಕೈ ದೀವೊಡು,” ಅಂದ್‌ದ್ ನಟ್ಟೊಂಡೆ.

24ಯೇಸು ಆಯ ಒಟ್ಟುಗು ಪೋಯೆ. ಬೊಕ್ಕ ಮಸ್ತ್ ಜನೊಕುಲು ಆಯನ್ ನೂಕೊಂದು ಆಯನ ಬೆರಿಯೆ ಪೋಯೆರ್.

25ಐಡ್ದ್ ಬೊಕ್ಕ ಅಲ್ಪ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು ಬತ್ತಲ್. 26ಆಲ್ ಮಸ್ತ್ ವೈದ್ಯೆರೆಡ್ದ್ ಮರ್ದ್ ಮಲ್ತ್‌ದ್ ಗುಣ ಆವಂದೆ ಬಾರಿ ಕಷ್ಟೊನು ಸಹಿಸೊಂದು ಕೈಟಿತ್ತಿ ಮಾತ ಕಾಸ್‌ನ್ ಕಳೆವೊಂಡಲ್. ಸೀಕ್ ಕಡಿಮೆ ಆವಂದೆ ಹೆಚ್ಚೊಂದೇ ಪೋಂಡು. 27-28ಆ ಪೊಂಜೊವು ಯೇಸುನ ಸುದ್ಧಿನ್ ಕೇಂಡ್ದ್, “ಯಾನ್ ಆಯನ ಕುಂಟುನು ಮುಟ್ಟುಂಡ, ಎಂಕ್ ಗುಣ ಆವು,” ಎನ್ನ್‌ದ್, ಗುಂಪುದ ಪಿರವುಡು ಬತ್ತ್‌ದ್ ಆಯನ ಕುಂಟುನು ಮುಟ್ಟಿಯಲ್.

29ಮುಟ್ಟಿ ಕೂಡ್ಲೆ ಆಲೆನ ನೆತ್ತೆರ್ ಪೋಪಿನ ಉಂತುಂಡು. ಎಂಕ್ ಉಪದ್ರ ಮಲ್ತೊಂದಿತ್ತಿ ಸೀಕ್‌ಡ್ದ್ ಗುಣ ಆಂಡ್ ಅಂದ್‌ದ್ ಆಲ್ ಅಪಗನೇ ಶರೀರೊಡು ತೆರಿಯೊಂಡಲ್. 30ಆ ಗಳಿಗೆಡೇ ಯೇಸು ತನಡ್ದ್ ಬಲ ಪಿದಾಡ್ದ್ ಪೋಂಡು ಅಂದ್‌ದ್ ಅಪಗನೆ ಪಿರ ತಿರ್ಗ್‌ದ್, “ಎನ ಕುಂಟುನು ಏರ್ ಮುಟ್ಟಿನಿ?” ಅಂದ್‌ದ್ ಕೇನ್ನಗ

31ಆಯನ ಶಿಷ್ಯೆರ್ ಆಯಡ, “ಜನೊಕುಲು ನಿನನ್ ಒತ್ತುನೆನ್ ತೂಂಡಲಾ ಎನನ್ ಏರ್ ಮುಟ್ಟಿನಿ ಅಂದ್‌ದ್ ಪನ್ಪನಾ?” ಪಂಡೆರ್.

32ಆಂಡ ಯೇಸು ಉಂದೆನ್ ತೆರಿಯೊನೊಡು ಪಂಡ್ದ್ ಸುತ್ತಲಾ ತೂವೊಂದುಪ್ಪುನಗ, 33ಆ ಪೊಂಜೊವು, ತನ್ಕ್ ಆಯಿನೆನ್ ತೆರಿದ್ ಪೋಡಿದ್ ನಡುಗೊಂದು ಬತ್ತ್‌ದ್ ಆಯ ದುಂಬು ಅಡ್ಡಬೂರ್ದು, ಆಲೆಗ್ ನಡತಿ ನಿಜ ಸತ್ಯೊನು ಪಂಡಲ್. 34ಆಯೆ ಆಲೆಗ್, “ಮಗಲೇ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್. ಸಮಾಧಾನೊಡು ಪೋಲ, ನನ ಮಿತ್ತ್ ಈ ಸೀಕ್ ನಿಕ್ಕ್ ತೊಂದರೆ ಕೊರಂದ್,” ಅಂದ್‌ದ್ ಪಂಡೆ.

35ಆಯೆ ನನಲಾ ಪಾತೆರೊಂದುಪ್ಪುನಗ ಸಭಾಮಂದಿರದ ಅಧಿಕಾರಿನ ಇಲ್ಲದಾಕುಲು ಬತ್ತ್‌ದ್ ಅಧಿಕಾರಿಡ, “ನಿನ ಮಗಲ್ ಸೈತಲ್, ನನ ದಾಯೆಗ್ ಗುರುಕು ತೊಂದರೆ ಕೊರ್ಪ,” ಪಂಡೆರ್.

36ಅಕುಲು ಪಂಡಿನ ಪಾತೆರೊನು ಯೇಸು ಲಕ್ಷ ಮಲ್ಪಂದೆ ಸಭಾಮಂದಿರದ ಅಧಿಕಾರಿಡ, “ಪೋಡ್ಯಡ, ನಂಬಿಕೆ ಮಾತ್ರ ಉಪ್ಪಡ್,” ಪಂಡೆ. 37ಬೊಕ್ಕ ಆಯೆ ಪೇತ್ರೆ, ಯಾಕೋಬು, ಯಾಕೋಬುನ ಮೆಗ್ಯೆ ಆದುಪ್ಪು ಯೋಹಾನೆ ಮೊಕ್ಲೆನ್ ಅತ್ತಂದೆ ಬೇತೆ ಏರೆನ್ಲಾ ತನಡೊಪ್ಪ ಲೆತ್ತೊಂದು ಪೋಯೆರೆ ಒಪ್ಪಿಗೆ ಕೊರ್ಜೆ. 38ಅಕುಲು ಆ ಸಭಾಮಂದಿರದ ಅಧಿಕಾರಿನ ಇಲ್ಲಗ್ ಬನ್ನಗ ಆಯೆ, ಜನೊಕುಲು ಗೌಜಿ ಮಲ್ಪುನೆನ್, ಬೊಕ್ಕ ಅರಬಾಯಿ ದೀಪಿನಾಕುಲೆನ್ಲಾ ಬುಲ್ಪುನಾಕಲೆನ್ಲಾ ತೂಯೆ. 39ಆಯೆ ಉಲಯಿ ಪೋದು, “ನಿಕುಲು ದಾಯೆಗ್ ಈತ್ ಗೌಜಿ ಮಲ್ತೊಂದು ಬುಲ್ತೊಂದುಲ್ಲರ್? ಪೊಣ್ಣು ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್,” ಪನ್ನಗ 40ಅಕುಲು ಆಯಗ್ ಗೇಲಿ ಮಲ್ತೆರ್. ಆಂಡ ಆಯೆ ಮಾತೆರೆನ್ಲಾ ಪಿದಯಿ ಕಡಪುಡ್ದು, ಆ ಪೊಣ್ಣನ ಅಪ್ಪೆನ್ಲಾ ಅಮ್ಮೆರೆನ್ಲಾ ತನಡೊಪ್ಪ ಇತ್ತಿನಾಕುಲೆನ್ಲಾ ಆ ಪೊಣ್ಣು ಜೆತ್ತ್‌ದಿನಡೆಗ್ ಲೆತ್ತೊಂದು ಪೋಯೆ. 41ಆ ಪೊಣ್ಣನ ಕೈ ಪತ್ತ್‌ದ್ ಆಲೆಡ, “ತಲಿಥಾ ಕೂಮ್,” ಅಂದ್‌ದ್ ಪಂಡೆ. “ಎಲ್ಯ ಪೊಣ್ಣೇ, ಲಕ್ಕ್‌ಲ,” ಅಂದ್‌ದ್ ನಿಕ್ಕ್ ಪನ್ಪೆ ಇನ್ಪಿನವು ಈ ಪಾತೆರದ ಅರ್ಥ.

42ಅಪಗನೇ, ಆ ಪೊಣ್ಣು ಲಕ್ಕ್‌ದ್ ನಡಪೆರೆ ಸುರು ಮಲ್ತಲ್. ಆಲ್ ಪದ್ರಾಡ್ ವರ್ಸ ಪ್ರಾಯದಾಲ್. ಉಂದೆನ್ ತೂದು ಮಾತೆರ್ಲಾ ಅಚ್ಚಿರ ಆಯೆರ್. 43ಯೇಸು ಅಕ್ಲೆಡ ಈ ವಿಷಯ ಏರೆಗ್ಲಾ ತೆರಿಯೆರೆ ಬಲ್ಲಿ ಪಂಡ್ದ್ ಕಂಡಿತಾದ್ ಅಪ್ಪಣೆ ಕೊರ್ದು, “ಆ ಪೊಣ್ಣಗ್ ವಣಸ್ ಮಲ್ಪಾಲೆ,” ಅಂದ್‌ದ್ ಪಂಡೆ.

Currently Selected:

ಮಾರ್ಕೆ 5: ತುಳು

Highlight

Copy