ಮತ್ತಾಯೆ 8

ಯೇಸು ಕೊಷ್ಟದಾಯನ್ ಗುಣ ಮಲ್ತಿನವು

(ಮಾರ್ಕೆ 1:40-45; ಲೂಕೆ 5:12-16)

1ಯೇಸು ಪರ್ವತೊಡ್ದು ತಿರ್ತ್ ಬನ್ನಗ ಮಸ್ತ್ ಜನ ಆಯ ಬೆರಿಯೆ ಬತ್ತೆರ್. 2ಒರಿ ಕೊಷ್ಟದಾಯೆ ಯೇಸು ಕೈತಲ್‌ ಬತ್ತ್‌ದ್ ಅಡ್ಡಬೂರ್ದು, “ಕರ್ತವಾ, ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಅಂದ್‌ದ್ ಪಂಡೆ.

3ಯೇಸು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು, ಶುದ್ಧ ಆಲ,” ಅಂದ್‌ದ್ ಪಂಡೆ. ಅಪಗನೆ ಆಯನ ಕೊಷ್ಟ ಪೋದು ಶುದ್ಧ ಆಯೆ. 4ಅಪಗ ಯೇಸು ಆಯಡ, “ತೂಲ ಉಂದೆನ್ ಏರೆಗ್ಲಾ ಪನೊಡ್ಚಿ, ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಕಾಣಿಕೆನ್ ಅರ್ಪಣೆ ಮಲ್ಪುಲ; ಅವು ಜನೊಕುಲೆಗ್ ಸಾಕ್ಷಿ ಆವಡ್,” ಅಂದ್‌ದ್ ಪಂಡೆ.

ಶತಾಧಿಪತಿನ ಬೇಲೆದಾಯನ್ ಗುಣ ಮಲ್ತಿನವು

(ಲೂಕೆ 7:1-10)

5-6ಯೇಸು ಕಪೆರ್ನೌಮುಗು ಬತ್ತಿನಪಗ ಒರಿ ಶತಾಧಿಪತಿ ಆಯ ಕೈತಲ್‌ ಬತ್ತ್‌ದ್, “ಕರ್ತವಾ, ಎನ ಬೇಲೆದಾಯೆ ಪಕ್ಷವಾತ ಆದ್ ಬೇನೆಡ್ ನರಳೊಂದು ಇಲ್ಲಡ್ ಬೂರೊಂದೆ,” ಅಂದ್‌ದ್ ಪಂಡೆ.

7ಐಕ್ ಯೇಸು ಆಯಡ, “ಯಾನ್ ಬತ್ತ್‌ದ್ ಆಯನ್ ಗುಣ ಮಲ್ಪುವೆ,” ಅಂದ್‌ದ್ ಪಂಡಿನೆಕ್ಕ್ 8ಶತಾಧಿಪತಿ ಉತ್ತರ ಕೊರ್ದು, “ಕರ್ತವಾ! ಈ ಎನ ಮಾಡ್‌ದ ಉಲಯಿ ಬರ್ಪಿನಾತ್ ಯೋಗ್ಯತೆ ಎಂಕಿಜ್ಜಿ; ಈ ಒಂಜಿ ಪಾತೆರ ಪಂಡ್ಂಡ ಯಾವು, ಎನ ಬೇಲೆದಾಯಗ್ ಗುಣ ಆವು. 9ಯಾನ್ಲಾ ಬೊಕ್ಕೊರಿಯನ ಅಧಿಕಾರದ ಉಲಯಿ ಉಪ್ಪುನಾಯೆ. ಎನ ಕೈ ತಿರ್ತ್‌ಲಾ ಸಿಪಾಯಿಲು ಉಲ್ಲೆರ್. ಯಾನ್ ಅಕ್ಲೆಡ್ ಒರಿಯಗ್ ‘ಪೋ’ ಪಂಡ್ಂಡ ಪೋಪೆ. ಬೊಕ್ಕೊರಿಯನ್ ‘ಬಲ’ ಪಂಡ ಬರ್ಪೆ. ಎನ ಬೇಲೆದಾಯಗ್ ಇಂಚಿತ್ತಿನೆನ್ ಮಲ್ಪು ಪಂಡ್ಂಡ ಮಲ್ಪುವೆ,” ಅಂದ್‌ದ್ ಪಂಡೆ.

10ಯೇಸು ಉಂದೆನ್ ಕೇಂಡ್ದ್ ಅಚ್ಚಿರ ಆದ್ ತನ ಪಿರವುಡು ಬರೊಂದಿತ್ತಿನಾಕುಲೆಗ್, “ಯಾನ್ ಇಂಚಿತ್ತಿ ಮಲ್ಲ ನಂಬಿಕೆನ್ ಇಸ್ರಾಯೇಲ್ ಜನೊಕುಲೆಡ್ಲಾ ತೂತುಜಿ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ. 11ಉಂದತ್ತಂದೆ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಮೂಡಾಯಿ ಪಡ್ಡಯಿ ದಿಕ್ಕ್‌ಲೆಡ್ದ್ ಮಸ್ತ್ ಜನೊಕುಲು ಬತ್ತ್‌ದ್ ಪರಲೋಕ ರಾಜ್ಯೊಡು ಅಬ್ರಹಾಮು ಇಸಾಕ್ ಯಾಕೋಬು ಮೊಕ್ಲೆ ಒಟ್ಟುಗು ವಣಸ್‌ಗ್ ಕುಲ್ಲುವೆರ್. 12ಆಂಡ ಆ ರಾಜ್ಯದ ಬಾಧ್ಯಸ್ಥೆರ್ ಇಸ್ರಾಯೇಲ್ಯೆರೆಡ್ ಪರಲೋಕ ರಾಜ್ಯೊಡು ಉಪ್ಪುನಂಚ ಯೋಗ್ಯತೆ ಇಜ್ಜಂದಿನಾಕುಲೆನ್ ಪಿದಾಯಿ ಗರ್ಗಂಡ ಕತ್ತಲೆಗ್ ಪಾಡ್ವೆರ್. ಅಲ್ಪ ಅರ್ಪಿನವುಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು,” ಅಂದ್‌ದ್ ಪಂಡೆ. 13ಐಡ್ದ್ ಬೊಕ್ಕ ಯೇಸು ಆ ಶತಾಧಿಪತಿಗ್, “ಈ ನಂಬಿ ಲೆಕ್ಕನೇ ನಿಕ್ಕ್ ಆವಡ್. ಪೋಲ” ಅಂದ್‌ದ್ ಪಂಡೆ.

ಅವ್ವೇ ಗಳಿಗೆಡ್ ಆಯ ಬೇಲೆದಾಯಗ್ ಗುಣ ಆಂಡ್.

ಯೇಸು ಸೀಕ್‌ದಾಕುಲೆನ್ ಗುಣ ಮಲ್ತಿನವು

(ಮಾರ್ಕೆ 1:29-34; ಲೂಕೆ 4:38-41)

14ಐಡ್ದ್ ಬೊಕ್ಕ ಯೇಸು ಪೇತ್ರ ಇಲ್ಲಗ್ ಬತ್ತ್‌ದ್, ಅಲ್ಪ ಆಯನ ಮಾಮಿ ಜ್ವರೊಟು ಜೆತ್ತ್‌ದಿನೆನ್ ತೂದು ಆಲೆನ ಕೈ ಮುಟ್ಟಿಯೆ. 15ಮುಟ್ಟಿನಪಗನೇ ಆಲೆನ ಜ್ವರ ಬುಡ್ದು ಪೋಂಡು, ಆಲ್ ಲಕ್ಕ್‌ದ್ ಆಯನ ಉಪಚಾರ ಮಲ್ತಲ್.

16ಬೈಯಗ್‌ ದೆವ್ವ ಪತ್ತ್‌ದಿನಾಕುಲೆನ್ ಆಯ ಕೈತಲ್‌ಗ್ ಲೆತ್ತೊಂದು ಬತ್ತೆರ್. ಆಯೆ ಬಜೀ ಪಾತೆರೊಡೇ ದೆವ್ವೊಲೆನ್ ಬುಡ್ಪಾಯಿನತ್ತಂದೆ ಮೆಯಿಟ್ ಸಮಕಟ್ಟ್ ಇಜ್ಜಂದಿನಾಕುಲೆನ್ಲಾ ಗುಣ ಮಲ್ತೆ. 17ಉಂದೆಡ್ದ್, “ಎಂಕ್ಲೆನ ಬೇನೆಲೆನ್ ತಾನೆ ದೆತ್ತೊಂದು ಎಂಕ್ಲೆನ ಸೀಕ್‌ಲೆನ್ ತುಂಬೊಂಡೆ,” ಅಂದ್‌ದ್ ಯೆಶಾಯೆ ಪನ್ಪಿ ಪ್ರವಾದಿಡ್ದ್ ಪನ್ಪಾಯಿನ ಪಾತೆರ ನಡತ್ಂಡ್.

ಶಿಷ್ಯೆರಾವೆರೆಗ್ ಬೋಧನೆ

(ಲೂಕೆ 9:57-62)

18ಯೇಸು ತನ ಸುತ್ತ ಇತ್ತಿ ಜನೊಕುಲೆ ಮಲ್ಲ ಗುಂಪುಲೆನ್ ತೂದು ಆಪೆದ ಬರಿಕ್ಕ್ ಪೋಯಿ ಅಂದ್‌ದ್ ಅಪ್ಪಣೆ ಕೊರಿಯೆ. 19ಅಪಗ ಒರಿ ಶಾಸ್ತ್ರಿ ಕೈತಲ್‌ ಬತ್ತ್‌ದ್ ಯೇಸುಡ, “ಗುರೂ, ಈ ಒಡೆಗ್ ಪೋಂಡಲಾ ಯಾನ್ ನಿನ ಬೆರಿಯೆ ಬರ್ಪೆ,” ಅಂದ್‌ದ್ ಪನ್ನಗ, 20ಯೇಸು ಆಯಗ್, “ಕುದ್‌ಕೆರ್‌ಲೆಗ್ ಮಾಟೆಲು ಉಂಡು, ಬಾನೊಡು ರಾಪಿನ ಪಕ್ಕಿಲೆಗ್ ಗೂಡುಲು ಉಂಡು, ಆಂಡ ನರಮಾನಿ ಮಗಕ್ಕ್ ತರೆ ದೀಪಿನಾತ್ ಜಾಗ್‌ಲಾ ಇಜ್ಜಿ,” ಅಂದ್‌ದ್ ಪಂಡೆ.

21ಶಿಷ್ಯೆರೆಡ್ ಬೇತೆ ಒರಿ, “ಕರ್ತವಾ, ಯಾನ್ ದುಂಬತ್ತ ಪೋದು ಎನ ಅಮ್ಮೆರೆನ್ ಕೌಂತ್‌ದ್ ಬರಿಯೆರೆ ಎಂಕ್ ಅಪ್ಪಣೆ ಆವೊಡು,” ಅಂದ್‌ದ್ ಪಂಡೆ.

22ಐಕ್ ಯೇಸು ಆಯಗ್, “ಎನ ಬೆರಿಯೆ ಬಲ, ಸೈತಿನಾಕುಲು ತನ್ಕುಲೆಡ್ ಸೈತ್ ಪೋತಿನಾಕುಲೆನ್ ಕೌಂಪಡ್,” ಅಂದ್‌ದ್ ಪಂಡೆ.

ಸುಳಿಗಾಳಿನ್ ಉಂತಾಯಿನವು

(ಮಾರ್ಕೆ 4:35-41; ಲೂಕೆ 8:22-25)

23ಯೇಸು ಓಡೊಗು ಮಿತ್ತಾರ್ನಗ ಆಯನ ಶಿಷ್ಯೆರ್ ಆಯನ ಬೆರಿಯೆ ಪೋಯೆರ್. 24ಆಂಡ ಅಕುಲು ಪೋವೊಂದುಪ್ಪುನಗ ಕಡಲ್ಡ್ ಮಲ್ಲ ಮಲಕ ಲಕ್ಕ್‌ದ್ ಓಡ ಸೆರೆಕ್ಕುಲೆಡ್ದ್ ಮುಚ್ಚಿದ್ ಪೋಂಡು, ಆಂಡ ಯೇಸು ನಿದ್ರೆ ಬತ್ತ್‌ದ್ ಜೆತ್ತ್‌ದಿತ್ತೆ. 25ಅಕುಲು ಕೈತಲ್‌ ಬತ್ತ್‌ದ್ ಆಯನ್ ಲಕ್ಕಾದ್, “ಕರ್ತವಾ! ಎಂಕ್ಲೆನ್ ಕಾಪುಲಾ, ಎಂಕುಲು ಸೈಯೊಂದುಲ್ಲ,” ಅಂದ್‌ದ್ ಪನ್ನಗ, 26ಆಯೆ ಅಕ್ಲೆಗ್, “ಒಂತೆ ನಂಬುನಾಕುಲೇ ನಿಕುಲು ದಾಯೆಗ್ ಪೋಡಿವರ್,” ಪಂಡ್ದ್ ಲಕ್ಕ್‌ದ್ ಗಾಳಿನ್ಲಾ ಕಡಲ್‌ನ್ಲಾ ದಟ್ಟಿಯೆ; ಅಪಗ ಮಾತಲಾ ಶಾಂತ ಆಂಡ್. 27ಅಪಗ ಅಕುಲು ಪೋಡಿದ್, “ಉಂಬೆ ಎಂಚಿತ್ತಿನಾಯೆ ಆದುಪ್ಪೆ? ಗಾಳಿಲಾ ಕಡಲ್‌ಲಾ ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಪಂಡೆರ್.

ದೆವ್ವ ಪತ್ತ್‌ದಿನಾಕುಲೆನ್ ಗುಣ ಮಲ್ತಿನವು

(ಮಾರ್ಕೆ 5:1-20; ಲೂಕೆ 8:26-39)

28ಐಡ್ದ್ ಬೊಕ್ಕ ಯೇಸು, ಆಪೆದ ಬರಿಕ್ಕ್ ಗದರೇನೆರೆ ಸೀಮೆಗ್ ಮುಟ್ಟಿನಪಗ, ದೆವ್ವ ಪತ್ತ್‌ದಿನಾಕುಲು ಇರ್ವೆರ್ ಸಮಾಧಿದ ಮಾಟೆದುಲಯಿಡ್ದ್ ಪಿದಾಡ್ದ್ ಆಯ ಎದುರು ಬತ್ತೆರ್. ಅಕುಲು ಬಾರಿ ಕಠಿಣದಾಕುಲು ಆದಿತ್ತಿನೆಡ್ದ್ ಆ ಸಾದಿಡ್ ಏರ್ಲಾ ಪೋವೊಂದಿಜ್ಜಾಂಡ್. 29ಅಕುಲು “ದೇವೆರೆ ಮಗಾ, ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆಗ್? ಕಾಲ ಬರೊಡ್ದುಂಬು ಎಂಕ್ಲೆಗ್ ಉಪದ್ರ ಕೊರಿಯೆರೆ ಇಡೆಗ್ ಬತ್ತನಾ,” ಅಂದ್‌ದ್ ಅರಬಾಯಿ ದೀಯೆರ್.

30ಆ ಜಾಗ್‌ದ ಒಂತೆ ದೂರೊಡು, ಮಲ್ಲ ಪಂಜಿದ ಒಂಜಿ ಪುಂಡು ಮೇಯೊಂದಿತ್ತ್‌ಂಡ್. 31ಅಪಗ ಆ ದೆವ್ವೊಲು ಆಯಡ ನಟ್ಟೊಂಡ, “ಈ ಎಂಕ್ಲೆನ್ ಮೊಕ್ಲೆಡ್ದ್ ಪಿದಯಿ ಪಾಡ್ವಡ, ಆ ಪಂಜಿಲೆ ಗುಂಪುದುಲಯಿ ಕಡಪುಡ್ದು ಕೊರ್ಲ.”

32ಆಯೆ ಐಕ್ಲೆಗ್, “ಪೋಲೆ” ಪನ್ನಗ ಐಕುಲು ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ, ಆ ಕ್ಷಣೊಟೇ ಆ ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕಡಲ್ದ ಉಲಯಿ ಬೂರ್ದು ನೀರ್‌ಡ್ ಮುರ್ಕುದು ಸೈತ್ ಪೋಯ.

33ಪಂಜಿಲೆನ್ ಮೇಪಾವುನಾಕುಲು ಊರುದ ಉಲಯಿ ಪಾರ್‌ಪೋದು ಮಾತ ನಡತಿನೆನ್ಲಾ ದೆವ್ವ ಪತ್ತ್‌ದಿನಾಕುಲೆ ಸಂಗತಿನ್ಲಾ ತೆರಿಪಾನಗ 34ಆ ಊರುದಾಕುಲು ಮಾತೆರ್ ಯೇಸುನು ತೂವೆರೆ ಪಿದಾಡ್ದ್ ಬತ್ತ್‌ದ್ ಆಯನ್ ತೂಯಿ ಬೊಕ್ಕ ತನ್ಕುಲೆ ಸೀಮೆನ್ ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್.

Currently Selected:

ಮತ್ತಾಯೆ 8: ತುಳು

Highlight

Copy