ಲೂಕೆ 17

ತಪ್ಪು

(ಮತ್ತಾಯೆ 18:6,7,21,22; ಮಾರ್ಕೆ 9:42)

1ಯೇಸು ತನ ಶಿಷ್ಯೆರೆಡ ಪಂಡಿನಿ, “ಜನೊಕುಲೆನ್ ಶೋಧನೆಗ್ ನಡಪಾವುನ ಸಂಗತಿಲು ಬರಂದೆ ಉಪ್ಪಂದ್; ಆಂಡಲಾ ಅವು ಏರೆಡ್ದ್ ಬರ್ಪುಂಡಾ ಆಯನ ಗತಿನ್ ದಾನೆಂದ್ ಪನೊಲಿ? 2ಆಯೆ ಈ ಎಲ್ಯಾಕುಲೆಡ್ ಒರಿಯಗ್ ತೊಂದರೆ ಕೊರ್ಪಿನೆಡ್ದ್ ತನ ಕಂಟೆಲ್‌ಗ್ ಮಲ್ಲ ಬೀಸುನ ಕಲ್ಲ್ ಕಟ್ಟ್‌ದ್ ಕಡಲ್‌ಗ್ ಪಾಡೊನುನವೇ ಎಡ್ಡೆ ಅಂದ್‌ದ್ ತೋಜುಂಡು. 3ನಿಕ್ಲೆನ ಬಗೆಟ್ ಎಚ್ಚರಿಕೆ ಆದುಪ್ಪುಲೆ. ನಿನ ಸಹೋದರೆ ಪಾಪ ಮಲ್ತ್ಂಡ ಆಯಗ್ ದಟ್ಟಿಲ. ಆಯೆ ಪಶ್ಚಾತಾಪ ಪಡೆಂಡ ಆಯನ ಪಾಪೊನು ಮಾಪು ಮಲ್ಪು. 4ನಿನ ಸಹೋದರೆ ಒಂಜಿ ದಿನೊಟು ಏಳ್ ಸರ್ತಿ ನಿಕ್ಕ್ ಪಾಪ ಮಲ್ತೆಡ, ಆಯೆ ಏಳ್ ಸರ್ತಿ ನಿನ ಕೈತಲ್‌ ಬತ್ತ್‌ದ್, ‘ಯಾನ್ ಪಶ್ಚಾತಾಪ ಪಡೆಪೆ,’ ಎನನ್ ಮಾಪು ಮಲ್ಪುಲ ಪಂಡ್ಂಡ ಆಯನ್ ಮಾಪು ಮಲ್ಪುಲ.”

ನಂಬಿಕೆ

5ಅಪೊಸ್ತಲೆರ್ ಕರ್ತವಡ, “ಎಂಕ್ಲೆನ ನಂಬಿಕೆನ್ ಬಲ ಮಲ್ಪುಲ,” ಪಂಡೆರ್. 6ಐಕ್ ಕರ್ತವೆ ಪಂಡಿನಿ, “ದಾಸೆಮಿ ಬಿತ್ತ್‌ದಾತ್ ನಂಬಿಕೆ ಇತ್ತ್ಂಡ, ‘ಈ ಅರ್ತಿದ ಮರೊಕು ಬೇರ್‌ದೊಟ್ಟಿಗೆ ಕಡಲ್ಡ್ ಬೂರ್ಲ’ ಅಂದ್‌ದ್ ಪಂಡಡ, ಅವುಲಾ ನಿಕ್ಲೆನ ಪಾತೆರೊನು ಕೇನುಂಡು.

ಚಾಕ್ರಿದಾಯನ ಬೇಲೆ

7“ನಿಕ್ಲೆಡ್ ಏರೆಗಾಂಡಲಾ ದಪ್ಪುನ ಅತ್ತ್‌ಂಡ ಕುರಿ ಮೇಪಾವು ಚಾಕ್ರಿದಾಯೆ ಇತ್ತ್ಂಡ ಆಯೆ ಕಂಡೊಡ್ದು ಇಲ್ಲಗ್ ಬತ್ತಿ ಕೂಡ್ಲೆ, ಬೇಲೆದಾಯಗ್ ಇತ್ತೆನೇ ಬತ್ತ್‌ದ್ ವಣಸ್‌ಗ್ ಕುಲ್ಲು ಅಂದ್‌ದ್ ಪನ್ಪೆನಾ? 8ಇಜ್ಜಿ, ಅಂಚ ಪನಂದೆ, ‘ಈ ಎನ ವಣಸ್ ತಯಾರ್ ಮಲ್ಪು ಯಾನ್ ವಣಸ್ ಮಲ್ತ್‌ದ್ ಬರ್ಪಿನೆಟ್ಟ ಎನ ಚಾಕ್ರಿ ಮಲ್ಪುಲ; ಐಡ್ದ್ ಬೊಕ್ಕ ಈ ವಣಸ್ ಮಲ್ಪುಲ,’ ಅಂದ್‌ದ್ ಪನ್ಪೆ ಅತ್ತಾ? 9ತಾನ್ ಅಪ್ಪಣೆ ಮಲ್ತಿ ಬೇಲೆ ಮುಗಿ ಬೊಕ್ಕ ಚಾಕ್ರಿದಾಯಗ್ ನಿನಡ್ದ್ ಉಪಕಾರ ಆಂಡ್ ಅಂದ್‌ದ್ ಆಯಗ್ ಪನ್ಪೆನಾ? ಇಂಚೆನೆ ನಿಕ್ಲೆನ ಸಂಗತಿಲಾ. 10ನಿಕ್ಲೆಗ್ ಅಪ್ಪಣೆ ಕೊರಿನವು ಮಾತೆನ್ಲಾ ಮಲ್ತಿ ಬೊಕ್ಕ, ‘ಎಂಕುಲು ಚಾಕ್ರಿದಾಕುಲು ದಾಲಾ ಪ್ರಯೋಜನದಾಂತಿನಾಕುಲು, ಎಂಚಂದ್ಂಡ ಮಲ್ಪೊಡಾಯಿನೆನ್ ಮಾತ್ರ ಎಂಕುಲು ಮಲ್ತ, ಪನ್ಲೆ ಅಂದ್‌ದ್ ಪಂಡೆ.’”

ಯೇಸು ಪತ್ತ್ ಜನೊಕುಲೆನ್ ಗುಣ ಮಲ್ಪುನವು

11ಯೇಸು ಸಮಾರ್ಯ ಗಲಿಲಾಯೊನು ಕಡತ್‌ದ್ ಯೆರೂಸಲೇಮುಗು ಪೋಯೆ. 12ಒಂಜಿ ಹಳ್ಳಿಗ್ ಬತ್ತಿನಪಗ ಪತ್ತ್ ಜನ ಕೊಷ್ಟದಾಕುಲು ಆಯಡ್ದ್ ದೂರೊಡು ಉಂತುದು 13“ಯೇಸೋ, ಗುರೂ, ಎಂಕ್ಲೆನ ಮಿತ್ತ್ ಕನಿಕರ ತೋಜಾಲ!” ಪಂಡ್ದ್ ಬುಲ್ತುದು ಪಂಡೆರ್. 14ಯೇಸು ಅಕ್ಲೆನ್ ತೂದು, “ನಿಕುಲು ಪೋದು ಯಾಜಕೆರ್‌ಗ್ ಮೆಯಿ ತೋಜಾಲೆ,” ಅಂದ್‌ದ್ ಪಂಡೆ. ಅಕುಲು ಪೋನಗನೇ ಶುದ್ಧ ಆಯೆರ್. 15ಅಕ್ಲೆಡ್ ಒರಿ ತನ್ಕ್ ಗುಣ ಆದುಪ್ಪುನೆನ್ ತೂದು ಮಲ್ಲ ಶಬ್ಧೊಡು ದೇವೆರೆನ್ ಪುಗರ್‌ದ್ ಪಿರ ಬತ್ತ್‌ದ್, 16ಯೇಸುನ ಪಾದೊಲೆಗ್ ಅಡ್ಡಬೂರ್ದು ಸೊಲ್ಮೆ ಸಂದಾದ್ ಸುಗಿತೆ. ಆಯೆ ಸಮಾರ್ಯದಾಯೆ. 17ಯೇಸು ಉಂದೆನ್ ತೂದು, “ಪತ್ತ್ ಜನ ಶುದ್ಧ ಆಯೆರತ್ತಾ ಬಾಕಿದ ಒಂರ್ಬ ಜನ ಓಲ್ಲೆರ್? 18ದೇವೆರೆಗ್ ಮೈಮೆ ಕೊರಿಯೆರೆ ಪರದೇಶದಾಯೆ ಅತ್ತಂದೆ ಬೇತೆ ಏರ್ಲಾ ಪಿರ ಬತ್ತಿಜೆರತ್ತಾ?” ಅಂದ್‌ದ್ ಪಂಡ್ದ್ 19ಯೇಸು ಆಯಡ, “ಲಕ್ಕ್‌ದ್ ಪೋಲ, ನಿನ ನಂಬಿಕೆ ನಿನನ್ ಗುಣ ಮಲ್ತ್ಂಡ್,” ಅಂದ್‌ದ್ ಪಂಡೆ.

ದೇವೆರೆ ರಾಜ್ಯ ಬರ್ಪುಂಡು

(ಮತ್ತಾಯೆ 24:23-28,37-41)

20ದೇವೆರೆ ರಾಜ್ಯ ಏಪ ಬರ್ಪುಂಡು ಅಂದ್‌ದ್ ಪರಿಸಾಯೆರ್ ಆಯಡ ಕೇನ್ನಗ ಆಯೆ ಅಕ್ಲೆಡ “ದೇವೆರೆ ರಾಜ್ಯ ಡಂಭಾಚಾರೊಡು ಬರ್ಪುಜಿ. 21ಇಂದಾ, ‘ಮೂಲುಂಡು,’ ಅಂದಾ, ‘ಅವುಲುಂಡು,’ ಅಂದ್‌ದ್ ಏರೆಗ್ಲಾ ಪನಿಯೆರೆ ಆಪುಜಿ, ದಾಯೆಗ್ ಪಂಡ ದೇವೆರೆ ರಾಜ್ಯ ಅವು ನಿಕ್ಲೆ ಉಲಯಿ ಉಂಡು ಅಂದ್‌ದ್ ತೆರಿಯೊನ್ಲೆ,” ಅಂದ್‌ದ್ ಉತ್ತರ ಕೊರಿಯೆ.

22ಬೊಕ್ಕ ಯೇಸು ತನ ಶಿಷ್ಯೆರೆಡ ಪಂಡಿನಿ ದಾನೆಂದ್ಂಡ, “ಒಂಜಿ ಕಾಲ ಬರ್ಪುಂಡು, ಐಟ್ಟ್ ನಿಕುಲು ನರಮಾನಿ ಮಗನ ದಿನೊಕುಲೆಡ್ ಒಂಜಿ ದಿನೊನು ತೂವೊಡು ಅಂದ್‌ದ್ ಆಸೆ ಮಲ್ತರ್ಡಲಾ ಅವೆನ್ ತೂವಂದೆ ಉಪ್ಪುವರ್. 23ಜನೊಕುಲು ನಿಕ್ಲೆಗ್ ಆಯೆ ‘ಅವುಲುಲ್ಲೆ,’ ‘ಮೂಲುಲ್ಲೆ,’ ಅಂದ್‌ದ್ ಪಂಡ್ಂಡ ನಿಕುಲು ನಂಬೊಡ್ಚಿ, ಅಕ್ಲೆನ ಬೆರಿ ಪತ್ತುನಲಾ ಬೊಡ್ಚಿ. 24ಮಿಂಚಿ ಮಿಂಚೊಂದು ಬಾನೊಡು ಒಂಜಿ ಕಡೆಡ್ದ್ ಬೊಕ್ಕೊಂಜಿ ಕಡೆಕ್ಕ್ ಎಂಚ ಬೊಲ್ಪು ಕೊರ್ಪುಂಡಾ ಅಂಚೆನೇ ನರಮಾನಿ ಮಗೆ ತನ ದಿನೊಟು ತೋಜುವೆ. 25ಆಂಡ ದುಂಬತ್ತ ಆಯೆ ಮಸ್ತ್ ಕಷ್ಟೊಲೆನ್ ಅನುಭವ ಮಲ್ತ್‌ದ್ ಈ ಕಾಲದ ಜನೊಕುಲೆಡ್ದ್ ತಿರಸ್ಕಾರ ಪಡೆವೊಡು. 26ನೋಹನ ದಿನೊಕುಲೆಡ್ ಎಂಚ ಇತ್ತ್ಂಡ ಅಂಚೆನೇ ನರಮಾನಿ ಮಗನ ದಿನೊಟುಲಾ ನಡಪುಂಡು. 27ನೋಹೆ ಕಪ್ಪಲ್‌ಡ್ ಸೇರಿನ ದಿನ ಮುಟ್ಟ ಜನೊಕುಲು ಉನೊಂದಿತ್ತೆರ್, ಪರೊಂದಿತ್ತೆರ್, ಬೊಕ್ಕ ಮದ್ಮೆ ಮಲ್ತೊಂದಿತ್ತೆರ್ ಮದ್ಮೆ ಮಲ್ತ್ ಕೊರೊಂದಿತ್ತೆರ್. ಆ ಸಮಯೊಡು ಮಲ್ಲ ಬೊಲ್ಲ ಬತ್ತ್‌ದ್ ಮಾತೆರೆನ್ ನಾಶ ಮಲ್ತ್ಂಡ್. 28ಬೊಕ್ಕ ಲೋಟನ ದಿನೊಟು ನಡತಿ ಪ್ರಕಾರ ನಡಪುಂಡು. ಅಕುಲು ಉನೊಂದಿತ್ತೆರ್, ಪರೊಂದಿತ್ತೆರ್, ದೆತ್ತೊನೊಂದಿತ್ತೆರ್, ಮಾರೊಂದಿತ್ತೆರ್, ನಡೊಂದಿತ್ತೆರ್, ಕಟ್ಟೊಂದಿತ್ತೆರ್. 29ಆಂಡ ಲೋಟೆ ಸೋದೋಮು ಪಟ್ಟಣನ್‌ ಬುಡ್ದು ಪೋಯಿ ಬೊಕ್ಕ ಬಾನೊಡ್ದು ತೂ ಬೊಕ್ಕ ಗಂಧಕೊಲು ಬೂರ್ದು ಅಕ್ಲೆನ್ ಮಾತೆರೆನ್ ನಾಶ ಮಲ್ತ್ಂಡ್. 30ನರಮಾನಿ ಮಗೆ ತೋಜಿದ್ ಬರ್ಪಿ ದಿನೊಟು ಅವ್ವೇ ರೀತಿಡ್ ಉಪ್ಪು.

31“ಆ ದಿನೊಟು ಮಾಳಿಗೆಡ್ ಉಪ್ಪುನಾಯೆ ಇಲ್ಲದುಲಯಿ ತನ ವಸ್ತುಲೆನ್ ದೆತ್ತೊನಿಯೆರೆ ತಿರ್ತ್ ಜಪ್ಪೆರೆ ಬಲ್ಲಿ; ಅವ್ವೇ ಪ್ರಕಾರ ಕಂಡೊಡು ಉಪ್ಪುನಾಯೆಲಾ ಪಿರ ಇಲ್ಲಡೆ ಪೋಯೆರೆ ಬಲ್ಲಿ. 32ಲೋಟನ ಬೊಡೆದಿನ್ ನೆನೆಪು ಮಲ್ತೊನ್ಲೆ. 33ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ. ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ. 34ಆ ರಾತ್ರೆಡ್ ಒಂಜೇ ಮಂಚವುದ ಮಿತ್ತ್ ಇರ್ವೆರ್ ಜೆತ್ತ್‌ದ್ದುಪ್ಪುನಗ; ಒರಿಯನ್ ದೆತ್ತೊನುವೆರ್, ಬೊಕ್ಕೊರಿಯನ್ ಬುಡ್ಪೆರ್. 35ಇರ್ವೆರ್ ಪೊಂಜೊವುಲು ಒಂಜೇ ಕಲ್ಲ್‌ಡ್ ಬೀಸೊಂದುಪ್ಪುವೆರ್; ಒರ್ತಿನ್ ದೆತ್ತೊನ್ವೆರ್ ಒರ್ತಿನ್ ಬುಡ್ಪೆರ್.”

36ಇರ್ವೆರ್ ಕಂಡೊಡು ಉಪ್ಪುವೆರ್, ಒರಿಯನ್ ದೆತ್ತೊನ್ವೆರ್, ಒರಿಯನ್ ಬುಡ್ಪೆರ್. 37ಈ ಪಾತೆರೊಗು ಶಿಷ್ಯೆರ್‌ಲು, “ಕರ್ತವಾ, ಅವು ಒಲ್ಪ ಆಪುಂಡು?” ಅಂದ್‌ದ್ ಕೇನ್ನಗ ಆಯೆ ಅಕ್ಲೆಗ್, “ಪುಣೊಕುಲು ಓಲುಂಡಾ ಅಲ್ಪನೇ ಗಿಡಿಕುಲು ಕೂಡುಂಡು,” ಅಂದ್‌ದ್ ಪಂಡೆ.

Currently Selected:

ಲೂಕೆ 17: ತುಳು

Highlight

Copy