ಯೋಹಾನೆ 9
9
ಪುಟ್ಟು ಕುರುಡನ್ ಗುಣ ಮಲ್ಪುನವು
1ಯೇಸು ಪೋವೊಂದುಪ್ಪುನಗ ಒಂಜಿ ಪುಟ್ಟು ಕುರುಡನ್ ತೂಯೆ. 2ಆಯನ ಶಿಷ್ಯೆರ್, “ಓ ಗುರೂ, ಉಂಬೆ ಕುರುಡೆ ಆದ್ ಪುಟ್ಟಿಯೆರೆ ಏರ್ ಪಾಪ ಮಲ್ತ್‌ದಿನಿ? ಉಂಬೆನಾ, ಉಂಬ್ಯನ ಅಪ್ಪೆಅಮ್ಮೆನಾ?” ಆಯಡ ಕೇಂಡೆರ್.
3ಐಕ್ ಯೇಸು, “ಉಂಬೆಲಾ ಪಾಪ ಮಲ್ತ್‌ಜೆ, ಉಂಬ್ಯನ ಅಪ್ಪೆಅಮ್ಮೆಲಾ ಪಾಪ ಮಲ್ತ್‌ಜೆರ್, ದೇವೆರೆ ಕಾರ್ಯೊಲು ಉಂಬ್ಯಡ ತೋಜಿದ್ ಬರಿಯೆರೆ ಇಂಚ ಆಂಡ್. 4ಎನನ್ ಕಡಪುಡ್ದಿನಾಯನ ಕಾರ್ಯೊಲೆನ್ ಪಗೆಲ್‌ಗೆ ಮಲ್ಪೊಡು ರಾತ್ರೆ ಬರ್ಪುಂಡು, ಅವು ಬತ್ತಿ ಬೊಕ್ಕ ಏರೆಗ್ಲಾ ಬೇಲೆ ಮಲ್ಪೆರೆ ಆಪುಜಿ 5ಯಾನ್ ಲೋಕೊಡು ಉಪ್ಪುನಗ, ಲೋಕೊಗು ಬೊಲ್ಪು ಆದುಲ್ಲೆ,” ಅಂದ್‌ದ್ ಪಂಡೆ.
6ಉಂದೆನ್ ಪಂಡಿ ಬೊಕ್ಕ ನೆಲಕ್ ಉಬ್ಬಿದ್, ಆ ಉಬ್ಬಿನೀರ್‌ಡ್ದ್ ಕೆಸರ್ ಲೇಪ ಮಲ್ತ್‌ದ್, ಆ ಲೇಪೊನು ಕುರುಡನ ಕಣ್ಣ್‌ಗ್ ಪೂಜಿದ್ 7ಆಯಡ, “ಈ ಸಿಲೋವ ಕೆದುಕು ಪೋದು ದೆಕ್ಕೊನ್ಲ,” ಪಂಡೆ. (ಸಿಲೋವಾ ಪನ್ಪಿ ಪಾತೆರೊಗು “ಕಡಪುಡ್ದಿನಾಯೆ” ಅಂದ್‌ದ್ ಅರ್ಥ). ಆಯೆ ಪೋದು ದೆಕ್ಕೊಂದು ಪಿರ ಬನ್ನಗ ಕಣ್ಣ್ ತೋಜುನಾಯೆ ಆದ್ ಬತ್ತೆ.
8ಅಪಗ ನಿರೆಕರೆತಾಕುಲು ಆಯೆ ನಟ್ಟುನಾಯೆ ಆದಿತ್ತಿನೆನ್ ಸುರುಟ್ಟು ತೂತಿನಾಕುಲು “ಉಂಬೆ ಕುಲ್ಲೊಂದಿತ್ತಿ ಆ ನಟ್ಟುನಾಯೆ ಅತ್ತಾ,” ಪಂಡೆರ್.
9ಕೆಲೆವೆರ್, ಅಂದ್ “ಆಯೆನೇ, ಪಂಡೆರ್; ನನ ಕೆಲೆವೆರ್, ಆಯೆ ಉಂಬೆ ಅತ್ತ್, ಆಯ ಲೆಕ್ಕ ಉಲ್ಲೆ,” ಪಂಡೆರ್.
ಆಂಡ ಆ ಕುರುಡೆ, “ಯಾನ್ ಆಯೆನೇ.” ಪಂಡೆ.
10ಅಪಗ ಅಕುಲು ಆಯಡ, “ನಿಕ್ಕ್ ಕಣ್ಣ್‌ದ ದೃಷ್ಟಿ ಎಂಚ ಬತ್ತ್ಂಡ್?” ಅಂದ್‌ದ್ ಆಯಡ ಕೇಂಡಿನೆಕ್ಕ್, 11“ಯೇಸು ಪನ್ಪಿನಾಯೆ ಒರಿ ಉಲ್ಲೆತ್ತಾ, ಆಯೆನೆ ಉಬ್ಬಿನೀರ್‌ಡ್ ಮಣ್ಣ್‌ದ ಲೇಪ ಮಲ್ತ್‌ದ್ ಎನ ಕಣ್ಣ್‌ಗ್ ಪೂಜಿದ್ ‘ಸಿಲೋವ ಕೆದುಕು ಪೋದು ದೆಕ್ಕೊನ್ಲ,’ ಪಂಡೆ. ಯಾನ್ ಪೋದು ದೆಕ್ಕೊಂಡೆ, ಕಣ್ಣ್‌ದ ದೃಷ್ಟಿ ಬತ್ತ್ಂಡ್,” ಪಂಡೆ
12ಅಪಗ ಅಕುಲು ಆಯಡ, “ಆಯೆ ಓಲುಲ್ಲೆ?” ಅಂದ್‌ದ್ ಆಯಡ ಕೇಂಡಿನೆಕ್ಕ್ ಆಯೆ, “ಎಂಕ್ ಗೊತ್ತಿಜ್ಜಿ.” ಅಂದ್‌ದ್ ಪಂಡೆ.
ಪರಿಸಾಯೆರ್ ಕುರುಡನ್ ಗುಣ ಮಲ್ತಿನೆನ್ ವಿಚಾರ ಮಲ್ತಿನವು
13ಐಡ್ದ್ ಬೊಕ್ಕ ಕುರುಡೆ ಆದಿತ್ತ್‌ದ್ ದೃಷ್ಟಿ ಬತ್ತಿ ಉಂಬ್ಯನ್ ಪರಿಸಾಯೆರೆ ಕೈತಲ್ ಲೆತ್ತೊಂದು ಪೋಯೆರ್. 14ಯೇಸು ಮಣ್ಣ್‌ದ ಲೇಪ ಪಾಡ್ದ್ ಆಯಗ್ ಕಣ್ಣ್‌ದ ದೃಷ್ಟಿ ಕೊರ್ತಿನ ದಿನ ಸಬ್ಬತ್‌ದಿನ ಆದಿತ್ತ್ಂಡ್. 15ಅವೆಡ್ದಾವರ ಆ ಪರಿಸಾಯೆರ್‌ಲಾ ಆಯನ್ ವಿಚಾರ ಮಲ್ತ್‌ದ್, “ನಿಕ್ಕ್ ಎಂಚ ಕಣ್ಣ್ ತೋಜ್ಂಡ್?” ಅಂದ್‌ದ್ ಕೇಂಡೆರ್. ಆಯೆ ಅಕ್ಲೆಡ, “ಮಣ್ಣ್‌ದ ಲೇಪ ಎನ ಕಣ್ಣ್‌ಗ್ ಪೂಜಿಯೆ. ಯಾನ್ ದೆಕ್ಕೊಂಡೆ, ಇತ್ತೆ ಎಂಕ್ ಕಣ್ಣ್ ತೋಜುಂಡು,” ಅಂದ್‌ದ್ ಉತ್ತರ ಕೊರಿಯೆ.
16ಆ ಪರಿಸಾಯೆರೆಡ್ ಕೆಲೆವೆರ್, “ಈ ನರಮಾನಿ ದೇವೆರೆಡ್ದ್ ಬೈದಿನಾಯೆ ಆದುಪ್ಪಯೆ ದಾಯೆಗ್ ಪಂಡ ಆಯೆ ಸಬ್ಬತ್‌ದಿನೊನ್ಲಾ ಗೆನ್ಪುಜೆ.” ಪಂಡೆರ್. ನನ ಕೆಲೆವೆರ್, “ಇಂಚಿತ್ತಿ ಕಾರ್ನಿಕೊಲೆನ್ ಪಾಪಿ ಆಯಿ ನರಮಾನಿನ ಕೈಡ್ದ್ ಮಲ್ಪೆರೆ ಎಂಚಾವು?” ಪಂಡೆರ್. ಇಂಚ ಅಕ್ಲೆ ಉಲಯಿ ಭೇದ ಉಂಡಾಂಡ್.
17ಅಕುಲು ಕುಡ ಗುಣ ಆಯಿನ ಕುರುಡಡ, ಆಯೆ ನಿಕ್ಕ್ ಕಣ್ಣ್ ಕೊರಿನೆಡ್ದ್ ಈ ಆಯ ಸಂಗತಿಡ್ ದಾನೆ ಪನ್ಪ? ಅಂದ್‌ದ್ ಕೇನ್ನಗ ಗುಣ ಆಯಿನ ಕುರುಡೆ, “ಆಯೆ ನಿಜವಾದ್ ಒಂಜಿ ಪ್ರವಾದಿ ಆದುಲ್ಲೆ,” ಅಂದ್‌ದ್ ಪಂಡೆ.
18ಆಂಡ ಕಣ್ಣ್ ಬತ್ತಿನಾಯನ ಸಂಗತಿಡ್ ಆ ಯೆಹೂದ್ಯೆರ್, ಉಂಬೆ ಕುರುಡೆ ಆದಿತ್ತೆ, ಇತ್ತೆ ಕಣ್ಣ್ ತೋಜುನಾಯೆ ಆಯೆ ಅಂದ್‌ದ್ ನಂಬಂದೆ, ಆಯನ ಅಪ್ಪೆಅಮ್ಮಾಡ್ಲೆನ್ ಲೆಪ್ಡಾದ್, 19“ಉಂಬೆ ನಿಕ್ಲೆನ ಮಗೆನಾ, ಆಯೆ ಪುಟ್ಟುನಗನೇ ಕುರುಡೆ ಆದಿತ್ತೆನಾ? ಇತ್ತೆ ಆಯಗ್ ದೃಷ್ಟಿ ಎಂಚ ಬತ್ತ್ಂಡ್?” ಅಂದ್‌ದ್ ಅಕ್ಲೆಡ ಕೇಂಡೆರ್.
20ಆಯ ಅಪ್ಪೆಅಮ್ಮೆ, “ಉಂಬೆ ಎಂಕ್ಲೆನ ಮಗೆನೇ ಬೊಕ್ಕ ಆಯೆ ಕುರುಡೆ ಆದ್ ಪುಟ್ಟುದಿತ್ತೆ ಪಂಡ್ದ್‌ಲಾ ಎಂಕ್ಲೆಗ್ ಗೊತ್ತುಂಡು. 21ಆಂಡ ದೃಷ್ಟಿ ಎಂಚ ಬತ್ತ್ಂಡ್ ಅಂದ್‌ದ್ ಎಂಕ್ಲೆಗ್ ತೆರಿದ್‌ಜೆ. ದೃಷ್ಟಿ ಏರ್ ಕೊರಿಯೆರ್ ಪಂಡ್ದ್‌ಲಾ ಎಂಕ್ಲೆಗ್ ತೆರಿದ್‌ಜೆ. ಉಂಬ್ಯಡನೇ ಕೇನ್ಲೆ, ಉಂಬೆ ಪ್ರಾಯದಾಯೆ ಅತ್ತಾ, ಉಂಬೆನೇ ತನ ವಿಷಯೊನು ಪನ್ಪೆ,” ಅಂದ್‌ದ್ ಉತ್ತರ ಕೊರಿಯೆರ್. 22ಆಯನ ಅಪ್ಪೆಅಮ್ಮೆ ಯೆಹೂದ್ಯೆರೆಗ್ ಪೋಡಿನೆಡ್ದ್ ಇಂಚ ಪಂಡೆರ್. ದಾಯೆ ಪಂಡ, ಏರಾಂಡಲಾ ಯೇಸುನು “ಕ್ರಿಸ್ತೆ” ಅಂದ್‌ದ್ ನಂಬಿಯೆರ್ಡ, ಅಂಚಿತ್ತಿನಾಯಗ್ ಸಭೆಡ್ದ್ ಪಿದಯಿ ಪಾಡೊಡು ಅಂದ್‌ದ್ ಯೆಹೂದ್ಯೆರ್ ಅವೆಡ್ದುಂಬು ತೀರ್ಮಾನ ಮಲ್ತ್‌ದಿತ್ತೆರ್. 23“ಉಂಬೆ ಪ್ರಾಯದಾಯೆ, ಉಂಬ್ಯಡನೇ ಕೇನ್ಲೆ,” ಅಂದ್‌ದ್ ಆಯ ಅಪ್ಪೆಅಮ್ಮೆ ಪಂಡಿನೆಕ್ಕ್ ಉಂದೇ ಕಾರಣ.
24ಅಕುಲು ಪುಟ್ಟುಡೇ ಕುರುಡೆ ಆದಿತ್ತಿ ನರಮಾನಿನ್ ಕುಡ ಲೆತ್ತ್‌ದ್, “ಈ ದೇವೆರೆಗ್ ಮೈಮೆ ಕೊರ್ಲ; ಆ ನರಮಾನಿ ಪಾಪಿಷ್ಟೆ ಅಂದ್‌ದ್ ಎಂಕುಲು ತೆರಿದ,” ಪನ್ನಗ 25ಆ ಕುರುಡೆ, “ಆಯೆ ಪಾಪಿಷ್ಟೆನಾ ದಾನ್ನ ಎಂಕ್ ತೆರಿದ್‌ಜಿ, ಆಂಡ ಒಂಜಿ ಮಾತ್ರ ಗೊತ್ತುಂಡು, ಯಾನ್ ಕುರುಡೆ ಆದಿತ್ತೆ, ಇತ್ತೆ ಎಂಕ್ ಕಣ್ಣ್ ತೋಜುಂಡು,” ಪಂಡೆ.
26ಅಕುಲು ಆಯಡ, “ನಿಕ್ಕ್ ಆಯೆ ದಾದ ಮಲ್ತೆ, ನಿಕ್ಕ್ ದೃಷ್ಟಿ ಎಂಚ ಕೊರಿಯೆ?” ಅಂದ್‌ದ್ ಕೇಂಡಿನೆಕ್ಕ್ 27ಆ ಕುರುಡೆ, “ಯಾನ್ ನಿಕ್ಲೆಗ್ ಅಪಗನೆ ಪಂತೆ ಅತ್ತಾ, ನಿಕುಲು ಕೇಂಡ್ದ್‌ಜರ್, ದಾಯೆ ಕುಡ ಕುಡ ಕೇನೊಂದುಲ್ಲರ್? ದಾನೆ, ನಿಕ್ಲೆಗ್ಲಾ ಆಯನ ಶಿಷ್ಯೆರ್ ಆವೆರೆ ಮನಸ್ ಉಂಡಾ?” ಪಂಡೆ.
28ಐಕ್ ಅಕುಲು ಆಯಗ್ ನೆರ್ದ್, “ಈ ಆ ನರಮಾನಿನ ಶಿಷ್ಯೆ, ಎಂಕುಲು ಮೋಶೆನ ಶಿಷ್ಯೆರ್. 29ಮೋಶೆಡ ದೇವೆರ್ ಪಾತೆರ್‌ದೆ ಎಂಕುಲು ತೆರಿದ, ಆಂಡ ಉಂಬೆ ಒಲ್ತುಡ್ದು ಬತ್ತಿನಾಯೆ ಅಂದ್‌ದ್ ಎಂಕ್ಲೆಗ್ ತೆರಿದ್‌ಜಿ,” ಪಂಡೆರ್.
30ಐಕ್ ಆ ಕುರುಡೆ, “ಆಯೆ ಎನ ಕಣ್ಣ್‌ಗ್ ದೃಷ್ಟಿ ಕೊರಿಯೆ ಬೊಕ್ಕ ಆಯೆ ಒಲ್ತುಡ್ದು ಬೈದಿನಿ ಅಂದ್‌ದ್ ನಿಕ್ಲೆಗ್ ತೆರಿಯಂದಿನ ಬಾರಿ ಅಚ್ಚಿರದ ಸಂಗತಿ! 31ಪಾಪಿಷ್ಟೆರೆನ ಪ್ರಾರ್ಥನೆನ್ ದೇವೆರ್ ಕೇನುಜೆ. ದೇವೆರೆ ಭಕ್ತೆರಾದ್, ದೇವೆರೆ ಚಿತ್ತದ ಲೆಕ್ಕ ನಡಪುನಾಯನ ಪ್ರಾರ್ಥನೆನ್ ಕೇನ್ವೆ ಎಂಕುಲು ತೆರಿದ. 32ಪುಟ್ಟು ಕುರುಡಗ್ ಏರಾಂಡಲಾ ದೃಷ್ಟಿ ಕೊರ್ತಿನೆನ್ ಲೋಕದ ಆದಿಡ್ದ್ ಏರ್ಲಾ ಕೇಂಡ್ದ್‌ಜೆರ್. 33ಉಂಬೆ ದೇವೆರೆಡ್ದ್ ಬೈದಿನಾಯೆ ಆದಿತ್ತಿಜೆಡ, ಇಂಚಿತ್ತಿ ಕೆಲಸೊಲೆನ್ ಮಲ್ತುದ್ವಯೆ,” ಪಂಡೆ.
34ಉಂದೆನ್ ಕೇಂಡ್ದ್ ಅಕುಲು, “ಈ ಪಾಪೊಡೇ ಪುಟ್ಟುದು ಬುಲೆದಿನಾಯೆ, ಎಂಕ್ಲೆಗ್ ಬೋಧನೆ ಮಲ್ಪುವನಾ?” ಅಂದ್‌ದ್ ಆಯನ್ ಸಭೆಡ್ದ್ ಪಿದಯಿ ಪಾಡಿಯೆರ್.
ಆತ್ಮೀಕ ಕುರುಡುತನ
35ಆಯನ್ ಪಿದಾಯಿ ಪಾಡ್ದೆರ್ ಅಂದ್‌ದ್ ಯೇಸು ತೆರಿದ್ ಆಯನ್ ನಾಡ್ದ್ ತಿಕ್ಕ್‌ನಗ, “ಈ ನರಮಾನಿ ಮಗನ್ ನಂಬುವನಾ?” ಅಂದ್‌ದ್ ಕೇಂಡೆ.
36ಐಕ್ ಆಯೆ, “ಆಯೆ ಏರ್ ಕರ್ತವಾ, ತೆರಿಪಾಂಡ ಕಂಡಿತ ನಂಬುವೆ,” ಪಂಡೆ.
37ಐಕ್ ಯೇಸು, “ಈ ಆಯನ್ ತೂತ ಅತ್ತಂದೆ ನಿನಡ ಇತ್ತೆ ಪಾತೆರೊಂದುಪ್ಪು ಯಾನೇ ಆಯೆ.” ಪಂಡೆ.
38ಆಯೆ, “ಅಂದ್ ಕರ್ತವಾ, ನಂಬುವೆ! ಅಂದ್‌ದ್ ಆಯಗ್ ಅಡ್ಡಬೂರ್ಯೆ.”
39ಅಪಗ ಯೇಸು, “ಕುರುಡೆರೆಗ್ ದೃಷ್ಟಿ ಕೊರಿಯೆರೆ ಬೊಕ್ಕ ಕಣ್ಣ್ ಇತ್ತಿನಾಕುಲೆಗ್ ಕುರುಡೆರ್ ಆವೊಡು ಅಂದ್‌ದ್ ಯಾನ್ ನ್ಯಾಯತೀರ್ಪುಗಾದ್ ಈ ಲೋಕೊಗು ಬೈದೆ.”
40ಈ ಪಾತೆರೊನು ಆಯ ಕೈತಲ್ ಇತ್ತಿ ಪರಿಸಾಯೆರ್ ಕೇಂಡ್ದ್, “ಎಂಕುಲುಲಾ ಕುರುಡೆರಾ?” ಅಂದ್‌ದ್ ಕೇಂಡಿನಪಗ
41ಯೇಸು ಅಕ್ಲೆಡ, “ನಿಕುಲು ಕುರುಡೆರ್ ಆದಿತ್ವರ್ಡ, ನಿಕ್ಲೆಗ್ ಪಾಪ ಇತ್ತ್‌ದ್ವಂದ್, ನಿಕ್ಲೆಗ್ ಕಣ್ಣ್ ತೋಜುಂಡು, ಅಂದ್‌ದ್ ಪನೊಂದುಪ್ಪುನೆಡ್ದ್ ನಿಕುಲು ಪಾಪಿಲು ಆದುಲ್ಲರ್.”
Currently Selected:
ಯೋಹಾನೆ 9: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
