मरकुस 14

ईसुनै मारबा की जाळ-साजी

(मत्ती 26:1–5; लूका 22:1,2; यहून्ना 11:45–53)

1दो दिना क पाछै फसै को त्युंहार#14:1फसै (पार कर जाणो) को त्युंहार जद परमेसर इबरानीआ का घरानै छोडर मिसर का पेलीपोत का होयड़ानै मार्यो हो बी याद म मनायो जावै ह। अर बिना खमिर की रोटी को त्युंहार#14:1इ दिन यहूदि बिना खमिर की रोटी क सागै एक खासतर्या को भोज करता हा। आबाळो हो। परधान याजक अर सास्तरी ईसुनै धोकाऊँ पकड़र मारबा की साजिस घड़र्या हा। 2पण बे आपसरी म खेबा लाग्या, “आपा ईसुनै त्युंहार क दिना म कोनी मारां। आपा त्युंहार क दिना म इनै मारां जणा के बेरो जनता भड़क जावै।”

ईसु प ईतर गेर्यो

(मत्ती 26:6–13; यहून्ना 12:1–8)

3 # लूक 7:37,38 जद ईसु बेतनिया म समोन जखो पेल्या कोढी हो बिकै घरा रोटी खाबा बेठ्यो, बठै एक लूगाई संगमरमर की बरनी म जटामासी (बाळ झड़) को मेंगो अर खरो ईतर लेर आई। अर बा लूगाई बि बरतननै खोलर बिकै मांयनै जत्तो बी ईतर हो बिनै ईसु क सीर प उंदका दि। 4बठै खड़्या मिनखा म क्युंक चिड़गा अर खया, “आ लूगाई इ ईतरनै क्याले खराब करी ह? 5इ ईतरनै तीन सो चाँदी का सीक्काऊँ#14:5एक बरस की मजुरी क बराबर बी बेत्ती म बेच्यो जा सकै हो अर इऊँ जखा रिपीआ मिलता बिनै गरीबा म बाट्यो जाणो चाए हो।” अर बे बिनै दकालबा लाग्या। 6ईसु बाकी इ बातनै सुणर बानै बोल्यो, “थे इ लूगाईनै क्याले तंग करो हो? थे इनै छोड द्‍यो। आ तो मेर सागै भलो करी ह। 7गरीब तो थारै सागै सदाई रेह्सी। थे जद चाओ बाको भलो कर सको हो, पण म थारै सागै सदाई कोनी रेहस्युं। 8अर जोक्यु बिकै बस म हो बा करी। आ मनै गाडबाऊँ पेल्या मेरी काया प ईतर उंदकार मेरो अभिसेक करी ह। 9म थानै सची खेऊँ हूँ सगळा जगत म जठै बी चोखो समचार परचार कर्यो ज्यासी, बठै इ लूगाईनै अर इका कामनै याद कर्यो ज्यासी।”

यहूदा ईसुनै धोको देबा ताँई राजी होयो

(मत्ती 26:14–16; लूका 22:3–6)

10यहूदा इस्करोती बारा चेला मऊँ एक हो, ओ परधान याजक क कनै ईसुनै पकड़ाबा की बातचित करबा ताँई गयो। 11यहूदा की इ बातनै सुणर याजक खुस होयो अर बे यहूदानै रिपीआ देबा की जबान करी। यहूदा ह जखो ईसुनै पकड़ाबा की ताक म मोको ढुंढबा लाग्यो।

चेला क सागै आखरी फसै

(मत्ती 26:17–25; लूका 22:7–14,21–23; यहून्ना 13:21–30)

12बिना खमिर की रोटी हाळै त्युंहार क पेलड़ा दिन जद फसै का त्युंहार प लल्डी का बच्या की बलि दि जाती ही बि दिन चेला ईसुनै बुज्या, “तू कठै चावै ह क म्हें तेरै ताँई फसै की रोटी खाबा की त्यारी करां?” 13बामैऊँ दो चेलानै ईसु अंय्यां बोलर भेज्यो, “थे गाँव क मांयनै जाओ अर थानै बठै एक मिनख पाणीऊँ भरेड़ो घड़ो लिआ मिलसी थे बिकै गेल होलिओ 14अर बो जि घर म जावै, थे बी बि घर म जार घर का मालिकनै बोलज्यो गरूजी बोल्यो ह, ‘मेरो फसै की रोटी खाबा को कोठो कठै ह जठै म आपका चेला क सागै फसै खा सकूँ।’ 15बो थानै बडोसारो अर सक्यु जच्यो-जचाईड़ो चोबारो दिखासी बिमैई आपणा ताँई सक्यु त्यार करज्यो।” 16अर बे चेला बि गाँव क मांयनै गया अर जंय्यां ईसु बानै बतायो हो बंय्यांई बे बठै देख्यो अर बे बठै फसै की रोटी खाबा की त्यारी करी।

17अर दिन आथबा क सागैई ईसु बारा चेला क सागै बठै गयो 18अर जद बे सागै बेठर रोटी खार्या हा ईसु आपका चेलानै बोल्यो, “म थानै सची खेऊँ हूँ थारै मऊँ एक जणो जखो अठै मेरै सागै जिमर्यो ह बो मनै पकड़ासी।” 19बे ईसु की इ बातनै सुणर दुखी होया अर बे ईसुनै एक-एक कर बुजबा लाग्या, “म्हराज बो म हूँ के?” 20ईसु बाऊँ बोल्यो, “बो थारै बारामऊँ एक ह। बो मेरै सागै कचोळा मऊँ टिमोवै ह। 21मिनख का बेटानै तो मरनोई ह जंय्यां की पबितर सास्तर म मंडेड़ो ह। पण कत्ती बुरी दसा ह बि मिनख की जिकै बजेऊँ मिनख को बेटो पकड़ायो जासी। इऊँ चोखो तो ओ होतो क बो मिनख कोनी जलमतो।”

परबुभोज

(मत्ती 26:26–30; लूका 22:14–20; 1 कुरन्थीयो 11:23–25)

22बे जिमर्याई हा क ईसु रोटी लेर परबुनै धनेवाद देर रोटीनै तोड़्यो अर ईसु आपका चेलानै आ खेतो रोटी बाटी, “ल्यो आ मेरी काया ह।” 23इकै पाछै ईसु कचोळो लिओ अर परबुनै धनेवाद देर बो कचोळो आपका चेलानै दिओ बे सगळा बिमैऊँ पीआ 24अर ईसु बाऊँ बोल्यो, “ओ मेरो लोय ह ओ परमेसर का नया करार की सेलाणी ह जखो बोळा ताँई बहायो जार्यो ह। 25म थानै सची खेऊँ म आ अँगूरी जद ताँई कोनी पीस्युं जद ताँई परमेसर का राज म नई कोनी पीऊँ।” 26इकै पाछै बे एक गीत गार जेतून का डूँगर प चलेग्या।

पतरस ईसुनै पिछाण्बाऊँ मना करसी

(मत्ती 26:31–35; लूका 22:31–34; यहून्ना 13:36–38)

27ईसु आपका चेलाऊँ बोल्यो, “थे सगळा कानि-कानि होज्यास्यो। क्युं क पबितर सास्तर म मंडेड़ो ह,

‘म गुवाळ्यानै मारस्युं अर लल्ड्या तीनतेरा होज्यासी।’

28“#मत्त 28:16पण म ओज्यु जिंदो होर थारूँ अगाऊ गलिल जास्युं।” 29जणा पतरस बोल्यो, “चाए सगळा तनै छोडर भाग जावै पण म थारै सागै डट्यो रेहस्युं।” 30ईसु पतरस की इ बातनै सुणर बिऊँ बोल्यो, “म तनै सची खेऊँ हूँ आज की रातई मुरगा क दो बार बांग देबाऊँ पेल्या तू तीन बार मनै पिछाण्बाऊँ मना करसी।” 31पतरस ईसु की बात सुणर ओर जोरऊँ बोल्यो, “ज मनै थारै सागै ज्यान बी देणी पड़ी जणा बी म पिछै कोनी हटूँ।” अर सगळा चेला बी आई बात बोल्या।

गतसमनी का बाग म ईसु की अरदास

(मत्ती 26:36–46; लूका 22:39–46)

32इकै पाछै बे गतसमनी नाम की झघा गया अर बठै ईसु आपका चेलानै बोल्यो, “थे अठैई बेठ्या रिह्यो जद ताँई म अरदास करूं।” 33ईसु आपकै सागै पतरस, याकूब अर यहून्नानै लेगो। ईसु बोळो दुख-दुबळो होर्यो हो। 34ईसु बाऊँ बोल्यो, “मेरो हियो बोळो उदास ह, अठै ताँई म मरबाळोसो होर्यो हूँ। थे अठैई बेठ ज्याओ अर जागता रिह्यो।” 35इकै पाछै ईसु बठैऊँ चिनेक दूर जार धरती प मोदो पसर अरदास करबा लाग्यो अर बोल्यो, “ज हो सकै तो आ घड़ी मेरूँ टळ जावै जणा चोखो हो जावै।” 36अर बो बोलबा लाग्यो, “अब्बा ओ परम-पिता थारै ताँई क्युंई ओखो कोनी। इ दुख का कचोळानै मेरूँ नाकै कर दे, पण जंय्यां म चाऊँ बंय्यां नइ हो पण जंय्यां तू चावै बंय्यांई होवै।” 37ईसु अरदास कर आपका चेला कनै गयो अर बानै सुत्यो देखर पतरसनै बोल्यो, “ओ समोन तू सोर्यो ह के? के तू घंटा भर बी कोनी जाग सक्यो? 38थे जागता रिह्यो अर अरदास करो जिऊँ थे बिचास्या नइ जाओ। आत्मा तो जखो सई ह बो करनो चावै ह पण आ काया माड़ी ह।” 39ईसु ओज्यु अरदास करबानै चलेगो अर जंय्यां पेल्या अरदास करी बंय्यांई बो अरदास करबा लाग्यो। 40अर ईसु ओज्यु चेला कनै गयो अर बिनै बे सुत्या लाध्या अर बाकी आँख्या म निंद चढरी ही अर बानै बेरो कोनी हो क बे ईसुनै काँई जुबाब दि। 41ईसु तीसरी बार आर बानै बोल्यो, “बस बोळा सोलिआ हालबी थे अरामऊँ सुत्या हो। देखो बा घड़ी आगी जद मिनख को बेटो पाप्या क हात पकड़ायो जार्यो ह। 42थे उठो अर देखो मनै पकड़ाबाळो अठैई ह।”

ईसुनै धोकाऊँ पकड़ायो

(मत्ती 26:47–56; लूका 22:47–53; यहून्ना 18:3–12)

43ईसु अंय्यां बोलर्योई हो क यहूदा जखो बारा चेला मऊँ एक हो बो आपकै सागै परधान याजक अर सास्तरानै सीखाबाळा अर यहूदि नेता का हुकमऊँ घणीसारी भीड़ लेर बठै आयो बाकन तलवार अर लाठ्या बी ही। 44धोकाऊँ पकड़ाबाळो पेल्याई बि भीड़नै बता दिओ हो क जिको म माखो ल्युं बोई ईसु ह थे बिनै पकड़र ध्यानऊँ सिपाया की निगरानी म लेर जायो। 45अर जंय्यांई यहूदा बठै आयो अर बो ईसु कनै जार बोल्यो, “गरूजी” अर बो ईसु को माखो लिओ। 46इकै पाछै बा भीड़ बिनै पकड़र आपका कब्जा म लेली। 47ईसु कनै खड़्यो एक चेलो#14:47 एक चेलो पतरस आपकी तलवार काडी अर म्हायाजक का एक दास को कानड़ो काट गेर्यो। 48ईसु बाऊँ बोल्यो, “म कोई डाकू हूँ के थे मनै पकड़बा ताँई तलवार अर लाठी ल्याया हो? 49#लूक 19:47; 21:37म रोजकी मनदर म थानै सीखातो, थारै सागैई रिह्या करतो हो जद थे मनै कोनी पकड़्या, पण ओ पबितर सास्तर म मंडेड़ो ह जिनै पूरो होणोई ह।” 50ईसु का चेला बिनै छोडर भागगा।

51एक मोट्यार आपकी उघाड़ी काया प चादरो ओड ईसु क गेल-गेल होर्यो हो लोग बिनै पकड़बा ताँई बिकै गेल भाग्या 52जणा बो चादरो बगार उघाड़ोई भाग छुट्यो।

म्हापंचायत म ईसु

(मत्ती 26:57–68; लूका 22:54,55,63–71; यहून्ना 18:13,14,19–24)

53ईसुनै म्हायाजक क कनै लेग्या, अर बठै परधान याजक अर यहूदि नेता अर सगळा सास्तरी आर भेळा होया। 54पतरस क्युंक दूरी बणार बाकै गेल-गेल आयो अर म्हायाजक क आँगणा क मांयनै आर बठै चोकीदार क सागै तपबा लाग्यो। 55परधान याजक अर सगळा म्हापंचायत का लोग ईसुनै जानऊँ मारबा ताँई बिकै खिलाप गुवाई ढुंढबा लाग्या। पण बानै कोई गुवाई कोनी मिली। 56घणासारा लोग ईसु क खिलाप गुवाई बी देर्या हा पण बाकी गुवाई झूठी ही अर एकसी बी कोनी ही। 57क्युंक खड़्या होर ईसु क खिलाप झूठी गुवाई देबा लाग्या। 58#यह 2:19बे खेबा लाग्या, “म्हें इका मुंडाऊँ सुण्या हां ओ खेवै ह, ‘म हातऊँ बणेड़ा मनदरनै ढा देस्युँ अर तीन दिना क पाछै दुसरो बणा देस्युँ बो बडो अरदास घर हाताऊँ बणाएड़ो कोनी होसी।’” 59अर इ बर बी बाकी गुवाई एकसी कोनी निकळी। 60बाकी बाता सुणर म्हायाजक खड़्यो होर ईसुनै बुजबा लाग्यो, “तू जुबाब क्युं कोनी देवै अ सगळा तेरै खिलाप गुवाई देर्या हीं।” 61पण ईसु चुपचालो बाकी सुणतो रिह्यो अर बो बानै जुबाब कोनी दिओ। म्हायाजक ईसुऊँ ओज्यु बुज्यो, “तू बि परमेसर को बेटो मसी ह के जखो धने ह?” 62ईसु बोल्यो, “हाँ म बोई हूँ अर थे मिनख का बेटानै सऊँ सक्‍तिसाली परमेसर क दाया हात बेठ्यो अर अकास म बादळा क सागै आतो देखस्यो।” 63म्हायाजक आपका गाबा पाड़्यो अर बोल्यो, “इब गुवाई देबा की जुर्त कोनी। 64थे खुदई इका मुंडाऊँ परमेसर की बुराई सुण लिआ हो इब थे काँई चाओ हो?” अर बे सगळा बोल्या, “इनै मार देणो चाए।” 65अर कई लोग ईसु प थूकबा लाग्या अर कई ईसु की आँख्या प गाबो बांदके मुका मारबा लाग्या अर बिको तमासो बणार बोल्या, “तू भबिस्वाणी करतो फिरतो हो, इब बता तनै कूण मार्यो” अर चोकीदार ईसुनै पकड़र थपड़ मार्या।

पतरस ईसुनै जाणबूजर कोनी पिछाण्यो

(मत्ती 26:69–75; लूका 22:56–62; यहून्ना 18:15–18,25–27)

66पतरस निचै आँगणा म बेठ्यो जणा बठै म्हायाजक की एक दासी आई। 67अर बा पतरसनै तपता देखर पतरसनै बोली, “तू बी तो ईसु नासरी क सागै हो।” 68पण पतरस नटगो अर बोल्यो, “म ईसु नासरीनै कोनी जाणू अर तू जोक्यु बोलरी ह बा मेरै तो क्युंई पलै कोनी पड़री।” अर बो अंय्यां बोलतो आँगणा की थळी प पुग्योई हो [अत्ता मई मुरगो बांग दिनी]#14:68“अत्ता मई मुरगो बांग दिनी” क्युंक मानी-थानी पुराणी पोथ्या म अ बाता कोनी मंडरी। 69बा दासी ओज्यु पतरसनै देखी अर बठै खड़्या मिनखाऊँ बोली, “ओ बी बामैऊँई ह।” 70पतरस ओज्यु नटगो थोड़ी देर क पाछै बठै खड़्या मिनखा मऊँ कई बोल्या, “सचमई तू बामैऊँ एक ह, क्युं क तू बी तो गलिल को ह।” 71पतरस बाकी बाता सुणर सोगन खार बोल्यो, “म बि मिनखनै जिकी थे बाता करो हो कोनी जाणू ज म झूठ बोलुँ तो परमेसर मनै सजा दे।” 72अर जदई दुसरी बार मुरगो बांग दिनी। जणा पतरस माथो पकड़्यो अर बिनै ईसु की खेईड़ी बा बात याद आई क मुरगा क दो बार बांग देबाऊँ पेल्या तू तीन बार मेरै ताँई खेसी म इनै कोनी जाणू, अर बो इ बातनै सोचर बळ-बळ रोबा लाग्यो।

Currently Selected:

मरकुस 14: एस डब्लु वी

Highlight

Copy