लूका 24

मर्या पाछै ईसु को जी उठबो

(मत्ती 28:1–10; मरकुस 16:1–8; यहून्ना 20:1–10)

1सपता का पेला दिन दितबारनै, भागपाट्याई बे लूगाया जखी बो सुगंद देबाळो लेव जिनै बे त्यार करी ही बिनै लेर कबर प गई। 2बानै कबर का मुंडा आगै को भाठो सरकेड़ो लाध्यो। 3जणा बे मांयनै जार देखी पण बानै बठै परबु ईसु की लास कोनी लाधी। 4बे खड़ी-खड़ी सोचबा लागी क, “ईसु की लास कठै गई,” अत्ती बारां मई बाकन दो आदमी आर खड़्या होगा जाका गाबा भळका मारै हा। 5जणा बे बानै देखर डर क मारी धरती म निची घूण घाली। बे दोन्यु जणा बाऊँ कह्या, “जखो जिंदो ह बिनै मरेड़ा म क्युं ढुंढो हो? 6#मत्त 16:21; 17:22,23; 20:18,19; मर 8:31; 9:31; 10:33,34; लूक 9:22; 18:31–33बो अठै कोनी। बो जी उठ्यो। बा बात याद करो जखी बो मरबाऊँ पेली गलिल म थारूँ बोली ही। 7बो बोल्यो हो, ‘आ तो होणी ह क मिनख को बेटो पाप्या क हाता म पड़सी बिनै सुळी प चढायो जासी पण तीसरै दिन जी उठसी।’” 8जणा बा लूगाया क बिकी बाता याद आई। 9अर बठैऊँ पाछी आर बे बा ग्यारा चेला अर दुसरानै बे सगळी बाता बताई। 10अ बाता बताबाळी लूगाया म मरीयम मगदलिनी, योअन्ना अर याकूब की माँ मरीयम अर ओर बी ही जखी बा चेलानै जखा भेजेड़ा चेला खुवाता हा अ बाता बतारी ही। 11पण बाकी बाता बानै फांप लागी अर बे बाकी बाता प भरोसो कोनी कर्या। 12पण पतरस आ सुणर भाग्यो जखो कबर प जार थम्यो अर बो झुकर देख्यो जणा बठै गाबा क अलावा क्युंई कोनी हो। जणा बो जोक्यु बठै देख्यो बिपै ताजूब करतो घरा चलेगो।

इमाउस का गेला म

(मरकुस 16:12,13)

13बि दिनई बिका चेला मऊँ दो जणा यरूसलेमऊँ करीब सात कोस परै इमाउस गाँव जार्या हा। 14अर बे जोक्यु होयो हो बिपै चालता-चालता आपसरी म बतळार्या हा। 15अर जद बे बतळार्या हा जणा ईसु बाकै कनै आर बाकै सागै होलिओ। 16पण बे बिनै देखर बी कोनी पिछाण सक्या। 17ईसु बाऊँ बुज्यो, “थे चालता-चालता आपसरी म काँई बतळार्या हो?” जणा बे दुखी होर बठैई खड़्या होगा। 18बामैऊँ किल्युपास नाम को एक आदमी हो बो बोल्यो, “तू एकलोई अंय्यां को आबाळो जाबाळो मिनख ह जिनै गेलड़ा दिना म यरूसलेम म जोक्यु घट्यो बिकै बारां म कोनी बेरो?” 19जणा ईसु बोल्यो, “अंय्यां को काँई होगो?” जणा बे बिनै बताबा लाग्या क, “अ बाता ईसु नासरी क बारां म ह जखो सगळा मिनखा अर परमेसर की नजर्या म खेबा अर करबा म सक्‍तिसाली अर परमेसर की खेबाळो हो। 20बिनै म्हारा यहूदि नेता अर परधान याजक पकड़ा'र बिनै मोत की सजा दिवा दिआ अर बिनै सुळी प चढा दिओ गयो। 21अर म्हें इ बात की आस लगाया बेठ्या हा, की ओई इजरायलनै छुटाबाळो मिनख ह, आ बातानै होया निमड़्या आज तीसरो दिन ह। 22अर म्हारी टोळी की लूगाया म्हानै ताजूब म गेर दिनी। होयो अंय्यां की आज भागपाट्याई बे कबर प गई। 23अर बानै बठै बिकी लास कोनी मिली। बे पाछी आर म्हानै आ बोली क म्हानै ईस्बर नगरी दुता को दरसाव होयो ह जखो म्हानै आ बताई की बो तो जीवै ह। 24जणा म्हारै मऊँ क्युंक कबर प गया पण जंय्यां लूगाया बताई ही बठै ठिक बंय्यांई हो, अर बिको क्युंई अतो-पतो कोनी हो।” 25जणा ईसु बानै बोल्यो, “थे कंय्यां का बादु अर परमेसर की खेबाळा की बाता प बिस्वास करबा म ढिला हो। 26काँई मसी ताँई ओ जरूरी कोनी हो क बो आ दुख-तकलिफानै भोगै अर आपकी मेमा धारण करै?” 27अर बो बानै मूसाऊँ लेर सगळा परमेसर की खेबाळा की बे बाता खोलर बताई जखी पबितर सास्तर म बिकै बारां म मंडरी ह। 28जद बे बि गाँव क सांकड़ा पुग्या जठै बे जावै हा। जणा ईसु क्युं अंय्यां को बरताव कर्यो जंय्यां बिनै आगै जाणो होवै। 29पण बे बिनै जिदा-जादि कर आ खेर डाट लिआ की, “इब दिन आथगो ह।” जणा बो मांयनै गयो अर बाकन डटगो। 30अर जद रोटी खाबा बो बाकै सागै चोकी प बेठ्यो जणा रोटी उठार परमेसर को धनेवाद कर्यो अर रोटी तोड़र बानै दिनी। 31बि घड़ीई बा सगळा की आँख्या खुलगी अर बे बिनै पिछाण्गा। पण बो बाकै सामैऊँ गायब होगो। 32जणा बे आपसरी म बतळाबा लागगा, “बो गेला म जद आपणाऊँ बातचित कर्यो हो। अर आपानै सास्तर की बाता समजार्यो हो। बि टेम आपणा मन म जोस पैदा कोनी होर्यो हो के?” 33जदकी जदई बे खड़्या होर यरूसलेम रवाना होगा। अर बठै बानै बे ग्यारा चेला अर बाकी का एक सागै भेळा होयड़ा मिल्या। 34बे बोलर्या हा, “परबु सचमई जीगो क्युं क समोन बिनै जीवतानै देख्यो ह।” 35जणा बे दोन्यु जणा जोक्यु बाकै सागै गेला म होयो बानै बतायो अर आ बी बता दिनी की बे कंय्यां बिनै रोटी तोड़ता टेम पिछाण्या।

ईसु आपका चेलानै दिख्यो

(मत्ती 28:16–20; मरकुस 16:14–18; यहून्ना 20:19–23; काम 1:6–8)

36हाल बे आ बाता क बारां म बतळार्याई हा क ईसु खुद बाकै मांय आर खड़्यो होगो अर बाऊँ बोल्यो, “थानै स्यांती मिलै।” 37पण बे बुरी ढाळ डरग्या जंय्यां कोई भूत देख लिओ होवै। 38जणा बो बानै बोल्यो, “थे क्याले चित उठा राख्या हो? अर थारा मना म ओ भेम कठैऊँ आग्यो? 39मेरै हात लगार मेरा हात पगानै देखो। क्युं क भूत म हाड-मास कोनी होवै जंय्यां थे मेर म देखर्या हो।” 40अंय्यां बोलर बो बानै आपका हात-पग दिखाया। 41पण बे खुसी अर ताजूब क मार्या हाल ताँई बिपै बिस्वास कोनी कर सक्या, जणा बो बानै बुज्यो, “थारै कनै खाबा ताँई क्युं ह के?” 42बे बिनै भुंदेड़ी मछी को टुक दिओ। 43बो बिनै लेर बाकै सामै खायो। 44अर बाऊँ बोल्यो, “अ बे बाता हीं जखी म जनाड़ै बोली ही जद म थारै सागै हो। अ सगळी बात जखी मूसा का नेम-कायदा म, परमेसर की खेबाळा अर भजना की पोथी म मंडरी ह सगळी पूरी होणीई ही।”

45अर बो पबितर सास्तरनै समजाबा ताँई बाकी बुदी का पाट खोल दिआ। 46अर बो बानै बोल्यो, “अ बेई बाता हीं जखी पबितर सास्तर म मंडेड़ी ह की, ‘मसी दुख भोगसी अर मर्या पाछै तीसरै दिन ओज्यु जी उठसी।’ 47अर बिका नामऊँ पाप की माफी ताँई मन फेरबा का चोखा समचार को यरूसलेमऊँ लेर धरती का सगळा कूणबा म परचार कर्यो जासी। 48थे आ बाता का गुवा हो। 49#काम 1:4अर जिको करार मेरो परम-पिता मेरूँ कर्यो ह बा पबितर आत्मा म थारै ताँई भेजस्युं। पण थे बि दिन ताँई इ नगरी मई टिक्या रेहज्यो जद ताँई थानै पबितर आत्माऊँ सक्‍ति कोनी मिलज्या।”

ईसु को ईस्बर नगरी म उठायो जाबो

(मरकुस 16:19,20; काम 1:9–11)

50 # काम 1:9–11 जणा बो बानै बेतनिया गाँव ताँई बारनै लेगो। अर बो बानै हात बढार आसिरबाद दिओ। 51अर बानै आसिरबाद देतानैई नाकै कर ईस्बर नगरी म उठा लिओ गयो। 52जणा बे बिकी भगती करी अर राजी-खुसी यरूसलेम बावड़्याया। 53अर बे मनदर म परमेसर को गुणगान करता आपको टेम काटबा लागगा।

Currently Selected:

लूका 24: एस डब्लु वी

Highlight

Copy