लूका 19

चुंगी लेबाळो जक्कई

1जद ईसु यरियो नगरी होतो होयो जार्यो हो। 2जणा बठै जक्कई नाम को एक मिनख हो जखो चुंगी लेबाळा को सरदार हो अर बो पिसाळो हो। 3बो ईसुनै देखबा की तक म हो पण भापड़ो देख कोनी पार्यो, क्युं क भीड़ रेह्गी घणी अर बो रेह्गो बावन्यो। 4जणा बो ईसुनै देखबा ताँई भीड़ऊँ अगाऊ भागर ईसु, जि गेलाऊँ जाबाळो हो बि गेला म एक अंजीर का दरख्त प जार चढगो। 5जद ईसु बि दरख्त क कनै पुग्यो जणा बो बठै खड़्यो होर उपरनै देखर जक्कईऊँ बोल्यो, “जक्कई बेगोसो तळै उतर्या क्युं क आज म तेरै घराई बासो लेस्युं।” 6जणा जक्कई बेगोसोक दरख्तऊँ तळै उतर्यो, अर बानै राजी-राजी आपकै घरा लेगो। 7आ देखर जत्ता बी बठै भेळा होर्या हा बे सगळा आपसरी म बड़बड़ाबा लागगा क, “ओ तो पापी क घरा पावणा-पुड़ी खाबा गयो ह।” 8पण जक्कई ह जखो भापड़ो खड़्यो होर परबुऊँ बोल्यो, “ओ म्हराज मेर कनै जत्ती बी धन-दोलत ह बिको आदो म गरीबा म बाट देस्युँ अर ज बेईमानीऊँ कोई भाईड़ा को क्युं बी दाब लिओ हो जणा म बिको बिनै चोगुणो पाछो दे देस्युँ।” 9अत्ती सुणर ईसु बिनै बोल्यो, “इ कूणबा म आज छुटकारो आगो ह क्युं क ओ बिस्वास कर दिखा दिओ की ओ अब्राहम की ओलाद ह। 10#मत्त 18:11क्युं क मिनख को बेटो गुमेड़ानै ढुंढबा अर बानै बचाबाई धरती प आयो ह।”

परमेसर जोक्यु दे बिनै बरतो

(मत्ती 25:14–30)

11जद बे बिकी बाता सुणर्या हा जणाई बो बानै एक मिसाल ओर दिनी क्युं क ईसु यरूसलेम क सांकड़ैई हो अर मिनख आ मन म कर राखी ही क परमेसर को राज बस परगट होबाळोई ह। 12जणा बो खेबा लाग्यो, “एक आदमी जिकनै अणाप-सणाप धन-दोलत ही बो राज करबा की सीख लेबा ताँई दूर दिसावर चलेगो। 13जाबाऊँ पेल्या बो आपका दस दासानै बुलाया, अर बुलार बानै एक-एक सोना की म्होर दिनी अर बोल्यो, ‘म जि दिन ताँई पाछो नइ आऊँ बि दिन ताँई आऊँ लेणदेण करज्यो।’ 14पण बिकी नगरी का दुसरा मिनख बिऊँ जळता-बळता हा बे बिकै गेल एक टोळी क हात आ खुवा भेज्यो की, ‘म्हें कोनी चावां क ओ म्हारै प राज करै।’

15“पण बो राजा बणर पाछो आपकै घरा आग्यो। अर आताई बो बा दासानै बुलायो जानै बो सोना की म्होर देर गयो हो क्युं क बो आ जाणबो चावै हो क बे बा म्होराऊँ क्यु कमाया हीं क कोनी। 16जणा पेलो आर बोल्यो, ‘मालिक थारी एक म्होरऊँ म दस म्होरा ओर कमाली।’ 17जणा बो मालिक बि दासनै बोल्यो, ‘तू मेरो चोखो दास ह जखो तू अत्तीसी बात म बी मेरै बिस्वास जोगो रिह्यो। जणा इब म तनै दस नगरा प हक द्‍युँ हूँ।’ 18दुसरो आर बोल्यो, ‘मालिक थारी म्होरऊँ म पाच ओर कमाई।’ 19पेला की जंय्यांई बो बिनै बी बोल्यो, ‘तू पाच नगरा प जमीदार होसी।’ 20इब तीसरो आर बोल्यो, ‘अ ल्यो थारी म्होर जिनै म बि दिन इ गमछा म आटी देर बांद लिनी ही। 21क्युं क म डरगो हो, थे हो जखा अंय्यां का आदमी हो जखो थारो कोनी बिनै लेल्यो अर जखो थे कोनी बोयो बिनै काटल्यो।’ 22जणा बो मालिक बिऊँ बोल्यो, ‘तू बुरो दास ह! म तेरा कह्या गेलई तेरै सागै करस्युं। तू जाणता बुजता क म टेडो आदमी हूँ जखो म कोनी धरूँ बिनै लेल्युँ अर जखो कोनी बोऊँ बिनै काट ल्युं। 23तू बिनै ब्याजुणा क्युं कोनी दिओ? जिऊँ म पाछो आर बानै ब्याज समेत ले लेतो।’ 24जणा जखा बठै बिकन खड़्या हा बाऊँ बो बोल्यो, ‘इकी म्होर इऊँ पाछी लेल्यो अर जखो दस कमाई ह बिनै देद्‍यो।’ 25आ सुणर बे बोल्या, ‘मालिक इकन तो पेलीऊँ दस म्होरा हीं।’ 26#मत्त 13:12; मर 4:25; लूक 8:18मालिक बोल्यो, ‘म थानै बोलुँ हूँ जिकनै ह बिनै ओर दिओ जासी अर जिकनै कोनी बिऊँ जोक्यु बिकन ह बो बी पाछो खोस लिओ जासी। 27#मत्त 25:14–30अर बे जखा मेरा बेरी हीं जखा मनै, इ राजगद्दि प बेठ्यो कोनी देख सकै बानै मेरै सामै ल्यार बाका सीर धड़ऊँ नाकै कर द्‍यो।’”

ईसु को यरूसलेम म आबो

(मत्ती 21:1–11; मरकुस 11:1–11; यहून्ना 12:12–19)

28अ सगळी बाता खे-खार ईसु यरूसलेम कानि बाऊँ पेली आपका पाऊंडा बढाया। 29अर जद बो जेतून डूँगर प बेतफगे अर बेतनिया क सांकड़ै पुग्यो जणा बो आपका चेला मऊँ दोनै आ खेर भेज्यो, 30“सामला गाँव म जाओ अर जंय्यांई थे बड़स्यो थानै एक गधेड़ी को बच्यो भंदेड़ो लाधसी जिपै आज ताँई कोई कोनी बेठ्यो बिनै खोलर ल्याओ। 31ज थानै कोई बुजै की थे इनै क्याले खोलर्या हो जणा थे बिनै बोल दिज्यो परबुनै इकी जुर्त ह।” 32जानै भेज्या बे जार बठै देख्या जणा बानै ठिक बंय्यांई जंय्यां बानै बो बोल्यो हो लाध्यो। 33जंय्यांई बे बिनै खोलर्या हा जणा बि गधेड़ी का बच्या का धणी बाऊँ बुज्या, “इ बच्यानै क्याले खोलो हो?” 34जणा बे बोल्या, “परबुनै इकी जुर्त ह।” 35अर बे बि गधेड़ी का बच्यानै ईसु कनै ल्याया अर आपका गाबा बिपै गेर बिपै ईसुनै बिठा दिआ। 36अर ईसु जि गेलाऊँ जार्या हा बि गेला म ईसु क आगै-आगै लोग आपका गाबा बिछाता जार्या हा। 37अर जद बो जेतून की डूँगरी की ढाळ म आयो जणा सगळा का सगळा चेला राजी हो होर जोरऊँ परमेसर की बडाई करबा लागगा क्युं क बे बिका सगळा ताजूब का कामानै देख्या हा। 38बे जोर-जोरऊँ कह्या, “धने ह बो राजा जखो परबु क नामऊँ आवै। ईस्बर नगरी म स्यांती अर परमेसर की जे-जैकार होवै।” 39जणा भीड़ मऊँ क्युंक फरिसी बोल्या, “म्हराज थारा चेलानै थामो।” 40बो बानै जुबाब दिओ, “ज अ चुप होज्यासी जणा भाठा चिला उठसी।”

यरूसलेम प ईसु को रोबो

41अर कनै आर जद बो यरूसलेमनै देख्यो जणा बिनै बिपै रोज आयो। 42अर बोल्यो, “ज तू आज आ जाणतो क तनै स्यांती किऊँ मिलसी! पण हाल बिनै तू तेरी आँख्याऊँ कोनी देख सकै! 43अर बे दिन बी आसी जद तेरा बेरी तेरै च्यारूमेर आडी देर तनै दबोच लेसी। 44बे तनै अर तेरा टाबरानै धूळ म मिला देसी। अर तेरै मांयनै भाठा प भाठोई कोनी छोडसी। क्युं क तू बि टेमनै कोनी जाण्यो जद परमेसर तनै बचाबा आयो।”

ईसु मनदर म

(मत्ती 21:12–17; मरकुस 11:15–19; यहून्ना 2:13–22)

45जणा ईसु मनदर का आँगणा म जार ब्योपारिआनै बारनै काडबा लागगो। 46अर बानै बोल्यो, “सास्तरा म मंडर्यो ह, ‘मेरा मनदरनै अरदास को घर बोल्यो ज्यासी।’ पण थे इनै डाकूआ की खोळ बणा लिनी ह।” 47#लूक 21:37अर ईसु रोजकी मनदर म सीख देतो हो। पण परधान याजक, सास्तरानै सीखाबाळा अर लोगा का नेता बिनै मारबा की ताक म रेह्बा लागगा। 48पण बाकै अंय्यां करबा को कोई मोको हात कोनी लाग्यो। क्युं क सगळा मिनख बिका बचनानै बोळा मानता हा।

Currently Selected:

लूका 19: एस डब्लु वी

Highlight

Copy