काम 8
8
1सतफनुस की मोतनै साऊल सई बतायो।
साऊल को बिस्वासी मंडळीनै सताबो
बि दिनऊँई बिस्वासी मंडळ्या प तुमत आ पड़ी जिऊँ ईसु का भेजेड़ा चेलानै छोडर बाकी सगळा बिस्वासी यहूदिआ अर सामरीया म बिखरगा। 2बामैऊँ क्युं क भगत सतफनुसनै गाड्या अर बिकै मरबा को म्हातम मनायो। 3#काम 22:4,5; 26:9–11अर साऊल हो जखो बिस्वासी मंडळ्यानै उजाड़तो फिरतो हो अर बो घरा मऊँ काड-काडर घिसर मोट्यार-लूगायानै जेळ म बंद करबा लाग्यो।
सामरीया का मिनखा म फलिपूस को परचार
4अर दुसरी कानि बे बिखरेड़ा बिस्वासी जठै बी गया बठैई ईसु को चोखो समचार सुणाबा लागगा। 5फलिपूस सामरीया नाम की नगरी म जार बठै ईसुई मसी ह इकै बारां म परचार करबा लाग्यो। 6फलिपूस की बातानै सुणर अर बिका सेलाणी चमत्कारानै देखर लोग बिकी बाता प गोर धर्या। 7क्युं क बिका हाताऊँ बोळाजणा मऊँ सूगली ओपरी बलाया बार घालतीई निकळै ही। अर बोळा भाळ भेयड़ा अर लंगड़ा बिका हाताऊँ निरोगा होया। 8इ बजेऊँ नगरी का मिनख बोळा राजी होया।
जादूगर समोन
9बि नगरी म समोन नाम को एक मिनख हो, जखो मिनखानै जादू दिखार ताजूब म गेर देतो। अर खुदनै बडो आदमी बतातो। 10छोटाऊँ लेर बडा ताँई सगळा बिकी बाता प गोर धरता हा, अर बिका बारां म खेता हा क, “बो परमेसर की बा सक्ति ह जखी बोळी तगड़ी खुवावै ह।” 11क्युं क बो बोळा दिना ताँई बा मिनखानै जादू दिखार ताजूब म गेर राख्यो हो इ ताँई मिनख बिकाळी बाता प गोर धरता हा। 12पण जद फलिपूस मिनखानै परमेसर का राज अर ईसु मसी का नाम को चोखो समचार सुणायो जणा बे बिकी बाता प बिस्वास कर्या अर सगळा मोट्यार लूगाई बतिस्मो लिओ। 13आ देखर समोन खुदबी बिकी बाता प बिस्वास कर्यो अर ईसु मसी का नामऊँ बतिस्मो लेर बिकै गेल होलिओ, अर बो बा बडा-बडा सेलाणी-चमत्कारा अर अचरजभर्या कामानै देखर चोरंगो होज्यातो हो। 14अर जद ईसु का भेजेड़ा चेलानै ओ बेरो पड़्यो क सामरीया का रेह्बाळा परमेसर का बचनानै मानबा लागगा हीं जणा बे पतरस अर यहून्नानै बाकन भेज्या। 15अर बे बठै जार बा सगळा ताँई अरदास करी क बा सगळानै पबितर आत्मा मिलै। 16क्युं क हाल ताँई बे परबु ईसु का नामऊँ बतिस्मोई लिआ हा, बामैऊँ कोईसानैई परमेसर को आत्मा कोनी मिल्यो हो। 17जणा पतरस अर यहून्ना बापै हात धर्या अर बानै पबितर आत्मा मिलगो। 18समोन आ देख्यो क बाकै हात धरबाऊँ मिनखानै पबितर आत्मा मिल जावै ह जणा बो बाकै सामै रिपीआ धर'र बोल्यो, 19“अल्यो रिपीआ अर आ सक्ति मनै बी द्यो जिऊँ म बी जिपै हात धरूँ बिनै पबितर आत्मा मिलै।” 20जणा पतरस बोल्यो, “तेरा रिपीआ बी तेरै सागै नास होज्यावै क्युं क तू परमेसर का बरदाननै रिपीआऊँ मोल लेबो चावै ह। 21इ चिज म तेरी कोई पाँती कोनी क्युं क परमेसर ताँई तेरै हिया म पेटा पाप ह। 22इ ताँई तू बुरा कामाऊँ तौबा कर अर परबुऊँ अरदास कर जिऊँ तेरा हिया का बुरा बिचार माफ होज्यासी। 23क्युं क तू बळोकड़ो ह अर पाप म उळजर्यो ह।” 24जणा समोन बाऊँ बोल्यो, “थे मेर ताँई अरदास करो क थारा मुंडाऊँ निकळेड़ी कोईबी बात मेर प नइ पड़ै।” 25जणा पाछै बे आपकी गुवाई देर अर परमेसर को बचन सुणार यरूसलेम हाळा गेला म सामरीया का कई गाँवा म ईसु को उपदेस सुणाता ओटा यरूसलेम पुगग्या।
फलिपूस अर कूस देस को अधिकारी
26जणा पाछै परमेसर को एक ईस्बर नगरी दुत फलिपूसनै आर बोल्यो, “खड़्यो हो अर दिखणाद कानि बि सुन्ना गेला म जा जखो यरूसलेमऊँ गाजा नगरी म जावै ह।” 27जणा बो त्यार होर चाल पड़्यो अर बि गेला मई कूस देस को एक मिनख भगती कर यरूसलेमऊँ आर्यो हो जिनै हिंजड़ो बणायो गयो हो अर ओ कूस देस की राणी कन्दाकी का सगळा खजाना को अधिकारी हो। 28बि टेम बो आपका रथ म बेठ्यो-बेठ्यो यसाया परमेसर की खेबाळा की पोथी मऊँ बाचर्यो हो। 29जणा पबितर आत्मा फलिपूसऊँ बोल्यो, “इ रथ क सागै होले।” 30जणा बो भागर बि रथ क कनै गयो जणा बो बिनै यसाया की पोथी बाचता सुण्यो अर आ सुणर बो बिनै बुज्यो, “तू जखा बाचै ह बानै समजै ह के?” 31जणा बो फलिपूसऊँ बोल्यो, “जद ताँई कोई मनै आ बचनानै कोनी समजावै जद ताँई म कंय्यां आका भेदानै जाणू।” अर बो बिऊँ बोल्यो, “थे उपर मेर कनै आर बिराजो।” 32सास्तरऊँ जखो लेख बो बाचर्यो हो बो अंय्यां हो, “बिनै मारबा ताँई बि लल्डी की जंय्यां लेर गयो जखी कटबाळी होवै, अर जंय्यां उन्यो ऊन कतरबाळा क आगै चुपचालो सिदो खड़्यो रेह्वै ह बंय्यांई बो बी आपको मुंडो कोनी खोल्यो। 33बिकी दुरदसा करी गई। बिनै न्याय कोनी मिल्यो। इ धरतीऊँ बिको जीव तो खोस लिओ गयो। अर इब बिकी पिडी क बारां म कूण बतावै?” 34इपै बो हिंजड़ो हो जखो फलिपूसऊँ अरदास कर बुज्यो, “मनै अंय्यां बता अठै आ बात की ताँई बोली गई ह, ओ परमेसर की खेबाळो आपकी बात करै ह, क ओर कोईकी।” 35जणा फलिपूस बोलबा लाग्यो अर बिनै सास्तर की आ बाताऊँ लेर ईसु का चोखा समचार ताँई सुणा दिओ। 36अर बे चालता-चालता एक पाणी हाळी झघा पुग्या, जणा पाणीनै देखर हिंजड़ो बिऊँ बोल्यो, “अठै पाणी तो हई, जणा पाछै मनै बतिस्मो लेबा म काँई ढिलाई ह।” 37#8:37 क्युंक मानी-थानी पुराणी पोथ्या म 37 की बाता कोनी मंडरी।(फलिपूस बिनै जुबाब दिओ, “तू तेरा मनऊँ पूरो बिस्वास करै जणा तनै कूण डाट सकै ह।” बो बोल्यो, “हाँ म मेरा पूरा मनऊँ मानू हूँ क परबु ईसु मसीई परमेसर को बेटो ह।”) 38जणा पाछै हिंजड़ो रथनै रोकबा ताँई ओडायो अर बे दोन्यु जणा पाणी म उतर्या अर फलिपूस बिनै बतिस्मो दिओ। 39अर जंय्यांई बे पाणी क बारनै निकळ्याक परबु की पबितर आत्मा फलिपूसनै उठा लेगो अर बिकै पाछै बो हिंजड़ो बिनै कोनी देख्यो अर बो राजी-खुसी आपका गेलै चलेगो। 40अर दुसरी कानि फलिपूस खुदनै असदोद नगरी म पायो, अर नगरी-नगरी ईसु को चोखो समचार सुणातो-सुणातो कैसरिया पुगग्यो।
Currently Selected:
काम 8: एस डब्लु वी
Highlight
Share
Copy

Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved