काम 4

पतरस अर यहून्ना म्हापंचायत क सामै

1जद पतरस अर यहून्ना मिनखानै बतार्या हा जणाई याजक, मनदर का सिपाईड़ा को सरदार अर क्युंक सदुकी बठै आया 2अर बे आ दो चेलाऊँ आखता होगा, क्युं क बे बठै मिनखानै आ सीख देर्या हा क ईसु मर के ओज्यु जिंदो होगो अर ओ इ बात को सबूत ह की मरेड़ा ओज्यु जिज्यासी। 3जणा बे बानै पकड़र आगला दिन ताँई काळ-कोठड़ी म गेर दिओ क्युं क दिन आथगो हो। 4पण जत्ता बाकी सुण्या हा बामै बोळाजणा बिस्वास कर्यो जिऊँ बाकी गिणती बढर करीब पाच झार होगी। 5आगला दिन यहूदि नेता, बडका अर नेम-कायदानै सीखाबाळा यरूसलेम म भेळा होया 6अर बे याजका म सऊँ परधान म्हायाजक हन्ना, केफा, यहून्ना#4:6 यहून्ना ओ म्हायाजक को बेटो हो।, सिकन्दर अर परधान याजका का परवार का घणकराक मिनखाऊँ मिल्या। 7अर बा भेजेड़ा चेलानै आकै सामै हाजिर कर बाऊँ बुजबा लाग्या, “थे ओ काम किका नाम अर किकी सक्‍तिऊँ कर्यो।” 8जणा पतरस पबितर आत्माऊँ भर'र जुबाब देबा लाग्यो, “ओ यहूदि नेता अर बडको 9ज आ थे इ लंगड़ा मिनख क सागै होई भलाई क बारां म पुछाताछी करर्या हो क बो कंय्यां निरोगो होयो। 10जणा थानै अर इजरायल का सगळा रेह्बाळानै ओ बेरो होज्याणो चाए, क ओ मिनख जखो थारी आँख्या क आगै चोखो-भलो निरोगो खड़्यो ह ओ ईसु मसी नासरी का नामऊँ निरोगो होयो ह। ओ बोई ईसु ह जिनै थे सुळी प चढायो हो अर जिनै परमेसर मर्या पाछै ओज्यु जीवायो हो। 11ओ बोई ईसु ह जिकै बारां म सास्तरा म मंडर्यो ह की,

‘ओ बो भाठो ह, जिनै मिस्तरी ख्याई जोगो कोनी जाण्यो, पण बोई कूणा को भाठो होयो।’”

12“ईसु क सिवाय आपानै पापऊँ कोईबी कोनी बचा सकै। अर इ धरती प अंय्यां को दुसरो नाम आथई कोनी जखो मिनखानै बचा सकै। क्युं क परमेसर मिनखानै बचाबा ताँई ईसुनैई भेज्यो ह, अर बोई आपानै बचा सकै ह।” 13जद पंचानै ओ बेरो पड़्यो क पतरस अर यहून्ना दोन्यु कम पढ्या-लिख्या आम आदमी हीं जणा बे बाकी हिमत देखर ताजूब म पड़गा। अर पाछै बानै बेरो पड़्यो क अ दोन्यु ईसु क सागै रेह्ता हा। 14पतरस अर यहून्ना क आगै बाकी पावली कोनी चाली क्युं क जखो निरोगो होयो हो बो मिनख बठैई खड़्यो हो। 15जणा बे बानै पंचायतऊँ बारनै भेज दिआ अर आपसरी म बतळाबा लाग्या क, 16“आपा आकै सागै काँई कर सकां हां। क्युं क यरूसलेम का सगळा जणा जाणै ह क आकै हाता नइ होबाळो चमत्कार होयो ह अर बिनै आपा अनदेख्यो कोनी कर सकां। 17पण आ बात ओर नइ फेलै इ ताँई आपा आनै धमकार छोड देवां क बे आईंदा ईसु क नाम की चरचा कोईसई नइ करीं।” 18जणा बे बानै मांयनै बुलार आदेस दिआ, “ईसु का नामऊँ नइ तो कोईनै क्युं बतळाज्यो अर नइ बिका नामऊँ सीखाज्यो।” 19पण पतरस अर यहून्ना बानै जुबाब दिओ, “इ बात को थेई न्याय करो क परमेसर की नजर्या म काँई चोखो रेह्सी थारी बात मानबो नहिस परमेसर की? 20क्युं क आ तो होय कोनी सकै क जोक्यु म्हें देख्यो अर सुण्यो ह बिनै कोनी खेवां।” 21जणा पंच बानै सूल चेतार छोड दिआ, अर बानै सजा देबा को गेलो कोनी लाध्यो, क्युं क जोक्यु होयो हो बिकी बजेऊँ लोग परमेसर को गुणगान गार्या हा। 22अर जि मिनख प ओ निरोगो होबा को चमत्कार होयो हो बो चाळिस क पार हो।

बिस्वास्या की अरदास

23बठैऊँ छुट-छुटार पतरस अर यहून्ना सिदा आपकी टोळी म जार बानै बे बाता बताई जखी परधान याजक अर यहूदि नेता बानै बोल्या हा। 24आ सुणताई बे सगळा बिस्वासी एक सागै एक चित होर परमेसरऊँ अरदास करबा लागगा क, “ओ मालिक तूई अकास अर धरती, समदर अर जोक्यु आमै ह बानै बणायो ह। 25अर थे थारी पबितर आत्माऊँ म्हारा कूणबा का बडका अर थारा दास दाऊद क मुंडा बुलवायो हो, ‘अ जखा परमेसरनै नइ ध्यारबाळा हीं बे क्याले झाळ्या भर्या? अर क्याले मिनख बेकार की बाता घड़ीं हीं? 26धरती का राजा अर राज करबाळा आपसरी म एको कर परबु परमेसर अर बिका अभिसेक करेड़ा मसी क सामै होगा।’ 27#लूक 23:7–11; मत्त 27:1,2; मर 15:1; लूक 23:1; यह 18:28,29सचमई थारा अभिसेक करेड़ा पबितर दास ईसु क खिलाप हेरोद अर पिन्तुस को पीळातुस इ नगरी क मांय इजरायल का मिनखा अर गैर-यहूदिआ क सागै कांदाऊँ कांदो मिलार खड़्या होगा। 28जोक्यु तू तेरी सक्‍ति अर इंछ्याऊँ पेलीई ते कर राख्यो हो, बिनैई बे पूरो कर्या। 29इब परबु जी थे गोर धरो अर थारा दासानै हिमत क सागै थारा बचनानै सुणाबा की सक्‍ति द्‍यो। 30थारा पबितर दास ईसु का नामऊँ मिनखानै निरोगा करबा ताँई, नइ होबाळा काम अर चमत्कार करबा ताँई थारा हात बढाओ।” 31बाकै अरदास करताई बा झघा जठै बे भेळा होर्या हा हालबा लागगी अर बे सगळा पबितर आत्माऊँ भरगा अर हिमत क सागै परमेसर का बचनानै बोलबा लागगा।

एक हियो राखबाळी बिस्वासी मंडळी

32 # काम 2:44,45 बिस्वास्या की टोळी एक हिया अर एक बिचार की ही जोक्यु बाकन होतो बे बिनै आपसरी म बाट लेता हा, अर कोईबी तेरी मेरी कोनी करतो। 33भेजेड़ा चेला हिमतऊँ ईसु क ओज्यु जी उठबा की गुवाई देता रिह्या, अर बा सगळा प परमेसर की बोळी दया अर आसिरबाद हो। 34बाकी टोळी म कोईबी गरीब कोनी हो क्युं क जिकै कनै जमीन अर घर हा बे बानै बेचर बिकेड़ी चिजा का दाम ल्यार 35भेजेड़ा चेला क हाता म देता हा। अर बे बा दामानै जिकी जंय्यां जुर्त होती बामै बंय्यांई बाट देता हा। 36जणा बामै युसूफ नाम को लेवी हो जखो साईपरस को रेह्बाळो हो। जिनै भेजेड़ा चेला बरनाबास खेता हा, जिको मतबल हिमत देबाळो होवै ह। 37बिकन जमीन को एक टुकड़ो हो जिनै बो बेचर बिका दाम भेजेड़ा चेला क हाता म ल्यार दे दिआ।

Currently Selected:

काम 4: एस डब्लु वी

Highlight

Copy