काम 11

पतरस को यरूसलेम बिस्वासी मंडळीनै सक्यु बताबो

1परमेसर का बचननै गैर-यहूदि मिनख बी मानली ह, आ बात ईसु का भेजेड़ा चेला अर यहूदिआ का सगळा बिस्वासी भाई-भाणा का काना म पड़ी। 2जणा पतरस क यरूसलेम पुगताई सुन्नत होयड़ा यहूदि बिस्वासी बिकै सागै जिरै करी। 3अर बोल्या, “पेली बात तो तू गैर-यहूदि मिनखा #11:3 गैर-यहूदि मिनखा यहूदि मिनख चाता हा क अ गैर-यहूदि मिनख बी सुन्नत करवावै।क घरा गयो अर उपरऊँ बाकै सागै खायो पीयो।” 4जणा पतरस जोक्यु बठै घट्यो बो बानै सुणाबा लाग्यो: 5“म जद याफा नगरी म अरदास करर्यो हो जणा मनै दरसाव होयो अर म काँई देख्यो की आसमानऊँ च्यारू कूणाऊँ लटकायड़ी एक बडीसारकी चादर की जंय्यां कोई चिज आसमानऊँ उतर मेर कनै आई। 6अर म काँई देख्यो क बिमै धरती का च्यार टांगा का ज्यानबर, रिंगबाळा अर आसमान म उडबाळा पंछी हा। 7अर इकै पाछै मेरै काना म एक उवाज पड़ी, ‘पतरस खड़्यो हो आनै मार'र खाले।’ 8पण म खयो, ‘नइ परबु कदैई नइ क्युं क म हाल ताँई कोईबी सूगली अर बरजेड़ी चिज कोनी खाई।’ 9जणा आसमानऊँ दुसर क उवाज आई, ‘जोक्यु परमेसर सुद कर्यो ह बिनै सूगली मना खे।’ 10तीन बर अंय्यांई होबा क पाछै हात्युहातई बि चादरासानै आसमान म उठा लिओ गयो। 11बि टेमई जठै म रूकर्यो हो बठै कैसरियाऊँ भेजेड़ा तीन मिनख मेर कनै आया। 12अर पबितर आत्मा मनै बाकै सागै बिना झिजक क जाबा ताँई बोल्यो, अर अ छ बिस्वासी भाईड़ा बी मेरै सागै होलिआ, अर म्हें बि मिनख क घरा गया। 13बो म्हानै बतायो की बो एक ईस्बर नगरी दुतनै आपकै घरा खड़्यो देख्यो जखो बिऊँ बोल्यो क, ‘याफा म मिनख भेजर समोन जिनै पतरस बी बोलीं हीं बुला ले। 14बो तनै बचन सुणासी जिऊँ तेरो अर तेरा कूणबा को छुटकारो होसी।’ 15अर जद म परमेसर का बचन बानै सुणाबा लाग्यो, जणा ठिक बंय्यांई बापै पबितर आत्मा उतर्यो जंय्यां सरूआत म आपणा प उतर्यो हो। 16#काम 1:5जणा मनै परबु की बोलेड़ी बात याद आई क यहून्ना तो पाणी को बतिस्मो दिओ पण थानै पबितर आत्मा को बतिस्मो दिओ जासी। 17अर परमेसर बानै बी बोई बरदान दिओ जखो आपानै परबु ईसु मसी प बिस्वास करबाऊँ मिल्यो हो जणा फेर मेरी काँई हिमत क म परमेसरनै रोकतो।” 18अ बाता सुणर बे बिऊँ जिरै करबो बंद कर दिओ अर सगळा परमेसर की आ खेर बडाई करबा लागगा की, “परमेसर गैर-यहूदि मिनखानै बी सचो जीवन जीबा ताँई पापऊँ मन फेरबा को दान दिओ ह।”

अंताकीया म चोखो समचार

19 # काम 8:1–4 सतफनुस क मोत क पाछै बिस्वास्या म आया सताव की बजेऊँ बे तीनतेरा होगा। अर बे फिनीके, साईपरस अर अंताकीया ताँई जा पुग्या। अर ईसु को समचार सुणाता हा पण अ यहूदि मिनखानैई ईसु को समचार सुणाता हा। 20आमऊँ क्युंक साईपरस अर कुरेन का हा। अर जद बे अंताकीया म आया जणा बे यूनानी मिनखा म बी ईसु को समचार सुणाबा लागगा। 21परबु को हात बा प हो, जिकी बजेऊँ घणासारा मिनख बिस्वास कर ईसु क कानि मुड़्या। 22अर जद बाकी चरचा यरूसलेम की बिस्वासी मंडळी क काना म पड़ी जणा बे बरनाबासनै अंताकीया भेज्या। 23बरनाबास बठै परमेसर की दयानै देखर राजी होयो। अर बानै उपदेस दिओ की तन मनऊँ बिस्वास जोगा अर परमेसर म बण्या रेह्ओ। 24बो पबितर आत्मा अर बिस्वासऊँ भरेड़ो एक भलो मिनख हो। इकै पाछै ओर बोळा मिनख परमेसर प बिस्वास कर्या। 25बरनाबास साऊलनै टोबा तरसुस नगरी चलेगो। 26अर जद साऊल बिनै लाध्यायो जणा बो बिनै लेर अंताकीया आगो। अर बे पूरा बरस भर बिस्वासी मंडळ्याऊँ मिलता अर बोळासारा मिनखानै उपदेस देता रिह्या अर चेला सऊँ पेली अंताकीया मई मसी का मिनख बाज्या। 27आ दिना मई क्युं परमेसर की खेबाळा यरूसलेमऊँ अंताकीया म आया। 28#काम 21:10बामैऊँ एक जिको नाम अगबुस हो बो पबितर आत्मा क कह्या गेल बतायो की सगळा जगत म काळ पड़सी अर ओ काळ राजा कलोदियुस क टेम म पड़्यो#11:28 राजा कलोदियुस क टेम म पड़्यो ईसु का जलमऊँ पचास साल पेली।। 29जणा सगळा चेला जत्ता बी बठै हा बे आपकी पायना गेल यहूदिआ म रेह्बाळा भाई-भाणा ताँई मदद भेजबा को फेसलो कर्यो। 30अर बरनाबास अर साऊल क हाताऊँ यरूसलेम की बिस्वासी मंडळी का मुखिया क कनै थोड़ी घणी मदद भेजी।

Currently Selected:

काम 11: एस डब्लु वी

Highlight

Copy