काम 10
10
पतरसनै कुरनेलियुस को बुलावो
1कैसरिया म कुरनेलियुस नाम को एक मिनख हो, जखो सो सिपाईड़ा की रोमी फोज की इटाली पलटण को सुबेदार हो। 2बो परमेसर को भगत हो जखो आपका पूरा परवार समेत ईस्बर को डर मानतो हो, बो सदाई गरीबानै दान दिआ करतो हो अर परमेसरऊँ अरदास कर्या करतो हो। 3जणा एक दिन बिनै दिन का तीन बजै दरसाव होयो क परमेसर को एक ईस्बर नगरी दुत बिकन आर बिऊँ बोल्यो, “ओ कुरनेलियुस!” 4जणा कुरनेलियुस डरतोई बिकै कानि देखर बोल्यो, “ओ परबु काँई ह?” जणा बो बोल्यो, “तेरी अरदास अर दिन दुख्यानै दियड़ो तेरो दान परमेसर क कनै पुगगो ह अर बिनै बो बोळो चोखो लाग्यो ह। 5अर इब तू अंय्यां कर याफा म क्युंक मिनख भेजर समोन जिनै लोग पतरस बोली हीं बुलवा ले। 6बो चमड़ा को धंधो करबाळा समोन क घरा रूकर्यो ह जिको घर समदर क किनारा प ह।” 7परमेसर का ईस्बर नगरी दुत क जाबा क पाछै बो आपका दो नोकरानै अर एक सिपाईनै जखो एक भगत हो अर बिको खास सेवक हो बिनै बुलवायो। 8अर बानै सक्यु बतार याफा भेज्यो।
9आगला दिन बे चालता-चालता दोपारी म नगरी क सांकड़ै लाग्या अर ठिक बि टेमई पतरस अरदास करबा छात प चढ्यो। 10इकै पाछै बिनै भूख लाग्याई अर बो क्युं खाबा की मन म करी। अर जद रोटी बणावा हा जणा बिनै दरसाव होयो। 11अर बिनै दिख्यो क आसमान खुलगो अर च्यारू कूणाऊँ लटकायड़ी एक बडीसारकी चादर निचै धरती प उतररी ही। 12बिपै धरती का च्यार टांगा हाळा अर रिंगबाळा ज्यानबर अर आसमान का पंछी हा। 13बिनै सुण्यो, “पतरस खड़्यो हो आनै मार'र खाले।” 14जणा पतरस बोल्यो, “नइ परबु कदैई नइ क्युं क म हाल ताँई कोईबी सूगली अर बरजेड़ी चिज कोनी खाई।” 15इकै पाछै ओज्यु बिका काना म उवाज आई, “जोक्यु परमेसर सुद कर्यो ह बिनै बरजेड़ो मना खे।” 16तीन बर अंय्यांई होबा क पाछै हात्युहातई बि चादरासानै आसमान म उठा लिओ गयो। 17पतरस बि दरसाव क बारां म सोचई रिह्यो हो क ओ काँई होबो चाए अत्ता मई कुरनेलियुस का भेजेड़ा मिनख समोन का घर को ठिडो बुजता बिका बारना पई आर खड़्या होगा। 18अर हेलो देर कह्या, “समोन जिनै पतरस बोलीं हीं बो अठैई ह के?” 19पतरस हाल बि दरसाव क बारां म बिचार करर्योई हो क पबितर आत्मा बिनै बोली , “देख बारनै तीन मिनख तनै ढुंढीं हीं। 20जणा इब तू खड़्यो होर तळै जा अर बिना झिजकै बाकै सागै होले क्युं क बानै मई भेज्यो हूँ।” 21आ सुणर पतरस तळै आगो अर बाऊँ बोल्यो, “जिनै थे ढुंढो हो बो मई हूँ बोलो थारै आबा क पिछै काँई बात ह?” 22जणा बे बिऊँ बोल्या, “म्हारी पलटण को सुबेदार कुरनेलियुस जखो धरमी अर परमेसरऊँ डरबाळो मिनख ह, सगळा यहूदि मिनखा म जिकी बूज ह बो एक परमेसर का पबितर ईस्बर नगरी दुतनै दरसाव म देख्यो अर बो दुत बिनै बोल्यो ह की बो तनै बुलार तेरूँ परमेसर को बचन सुणै।” 23जणा बो बानै मांयनै बुलार बाकी आवभगत करी।
कुरनेलियुस क घरा पतरस
दुसरा दिन बो उठर बाकै सागै गयो अर क्युंक याफा का भाईड़ा बी बिकै सागै होलिआ। 24आगला दिन बे कैसरिया म पुग्या अर कुरनेलियुस आपका रिस्तेदारानै अर भाईलानै भेळा कर बानै उडिकर्यो हो। 25जद पतरस मांयनै बड़र्यो हो जणा कुरनेलियुस पतरसऊँ मिल्यो अर बिकै पगा म माथो टेकर बिकै धोक खाई; 26जणा पतरस बिनै खड़्यो कर बोल्यो, “म बी तेरी जंय्यां एक मिनखई तो हूँ।” 27जणा पाछै पतरस बिऊँ बतळातो मांयनै आयो अर बठै बोळा सारका मिनख भेळा होर्या हा। 28जणा बो बाऊँ बोल्यो, “जंय्यां क थे पेलीऊँ जाणोई हो क एक यहूदि मिनख को गैर-यहूदि मिनखऊँ कोई समंद राखबो अर बिका घरा आबो जाबो बरजेड़ो ह, पण परमेसर मनै दिखायो ह क, नइ तो कोई मिनख सूगलो ह अर नइ निची जात को ह। 29जणाई तो थे जद मनै बुलाया जणा म बिना क्युं बोल्याई आगो। इब थे मनै बताओ, मनै क्याले बुलवाया हो?” 30जणा कुरनेलियुस खेबा लाग्यो, “आजऊँ ठिक च्यार दिन पेल्या जद म दिन का तीन बजै मेरै घरा अरदास करबा लागर्यो हो जणा म देख्यो क एक मिनख मेरै सामै आर खड़्यो होगो बिका गाबा भळका मारर्या हा। 31अर बो मेरूँ बोलबा लाग्यो कुरनेलियुस तेरी अरदास अर दिन दुख्यानै दियड़ो तेरो दान परमेसर क कनै पुगगो ह अर बिनै बो बोळो चोखो लाग्यो ह। 32जणा तू इब अंय्यां कर याफा म कोईनै भेजर समोन नाम का मिनख जिनै पतरस बी बोलीं हीं बुलाबा भेज, बो चमड़ा को धंधो करबाळा समोन क घरा डटर्यो ह। 33जणा म हात की हात तेरै कनै मिनख भेज्या, अर तू बी ठिक कर्यो जखो आकै सागै आगो। अर इब म्हें परमेसर क आगै इ ताँई भेळा होर्या की जोक्यु तनै परबु ओडायो ह बे सगळी बाता तेरूँ सुण सकां।”
34जणा पतरस खेबा लाग्यो, “इब मनै पक्को बेरो पड़गो की परमेसर कोई भेद-भाव कोनी करै। 35बो धरती का सगळा मिनखानै अपणावै जखा बिको डर मानै अर नेक काम करै चाए बो कोईबी हो। 36परमेसर इजरायली मिनखानै चोखा समचार को संदेस दिओ क ईसु मसीऊँ थानै स्यांती मिलसी। जखो सगळा को परबु ह। 37यहून्ना लोगानै पाणी को बतिस्मो लेबा क बारां म परचार करबा क पाछैऊँ, गलिलऊँ चालू होर सगळा यहूदिआ म जखी बाता होई बानै थे जाणो हो। 38जंय्यां क थे जाणोई हो क परमेसर, कंय्यां पबितर आत्मा अर सक्तिऊँ ईसु नासरी को अभिसेक कर्यो। बो च्यारूमेर जार भलाई करतो अर सेतान का सतायड़ा सगळानै निरोगो करतो क्युं क परमेसर बिकै सागै हो। 39म्हें बा सगळा कामा का गुवा हा जखा बो यहूदिआ अर यरूसलेम म कर्यो हो अर बिनैई बे सुळी प लटकार मार गेर्यो। 40पण तीसरा दिन बिनै परमेसर ओज्यु जिंदो कर म्हारै प परगट कर्यो। 41सगळा प नइ पण बा गुवा प जानै परमेसर पेल्याऊँ टाळ राख्या हा, अर जखा बिकै ओज्यु जीबा क पाछै बिकै सागै खाया अर पीआ हा। 42अर बो म्हानै हेलो पाड़बा अर गुवाई देबा को आदेस दिओ की परमेसर बिनैई मरेड़ा अर जीवता को न्याय करबाळो बणायो ह। 43अर सगळा परमेसर की खेबाळा बिकै बारां म गुवाई दि ही की जखो बी बिपै बिस्वास करसी बिका पाप ईसु मसी क नाम म धुप ज्यासी।”
दुसरी जात्या प पबितर आत्मा को उतरबो
44पतरस बोलर्योई हो, अत्ती बारां मई बा सगळा सुणबाळा प पबितर आत्मा उतर्यो। 45पतरस क सागै आएड़ा सुन्नत होयड़ा यहूदि बिस्वासी आ देखर ऊक-चूक होगा की पबितर आत्मा को बरदान जखा गैर-यहूदि हीं बानै बी दिओ जार्यो ह। 46क्युं क बे बानै भात-भात की बोली म परमेसर को गुणगान करता सुणर्या हा। जणा पतरस बोल्यो, 47“आ सगळानै आपणी जंय्यांई पबितर आत्मा मिली ह, जणा इब कोई आनै पाणी को बतिस्मो लेबाऊँ मना कर सकै ह के?” 48अर जणा पाछै पतरस बानै ईसु मसी क नाम म पाणीऊँ बतिस्मो लेबा ताँई हुकम दिओ। इकै पाछै बे सगळा पतरसऊँ हात जो'ड़र कह्या की बो थोड़ा घणा दिन ओर बाकै सागै रेह्वै।
Currently Selected:
काम 10: एस डब्लु वी
Highlight
Share
Copy

Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved