Markos 5

Pkmalu Seediq Peyah Gerasen ga Sdooyun Bgihur Naqah

(Mat 8:28-34. Ruk 8:26-39)

1Dehuk sipo rcilung ka dheya, dehuk dxeral seediq Gerasen. 2Hani peeyah asu ka Yesu de sterung na meyah heya ka ga sdooyan bgihur naqah ka 1 seediq pneeyah habung. 3Seediq nii we ida mtaqi habung. Uka ani ima ka dehuk mekuy heya, ani xiluy we ini tduwa mekuy heya uri. 4Mneegu daha bkean xiluy papak ma baga. Wada na pstequn ka xiluy bnekuy baga ma tnmeun na ka bnekuy papak. Uka bale ka dehuk pgseesu heya. 5Ani keeman ani diyan mdiras habung ma dgiyaq ka heya, hblutun na btunux ka heyi na nanak. 6Taan na peeyah theya ka Yesu de tmalang ma tmbqelic berah na. 7Paru ba quwaq na mdiras rmengo: “Yesu laqi Utux Baro Tgpusu Ba Baro, isu ma yaku we maanu ka pnugluban ta ho? Pooda mu Utux Baro psdehu rmengo sunan, iya ku pqrqili!” 8Ado tena rmnengo heya ka Yesu: “Bgihur naqah, latac peeyah seediq nii!” 9Smiling heya ka Yesu: “Ima ngayan su?” Cmiyuk ka heya: “Ngayan mu we Segion. Ado hbaro ba ka yami!” 10Iya miyan pqdriqi peeyah dxeral hiya, mesa rmengo bale Yesu ka dheya.

11Ga tbugan ssiyo dgiyaq heya ka qpuruh babuy. 12Dbgihur naqah we mesa Yesu: “Skguli miyan mosa babuy hiya ma say miyan ckceka babuy.” 13Smruwa dheya ka Yesu. Mlatac ka dbgihur naqah ma mremux ckceka babuy. Ida ba yaa 20'00 qpuruh babuy ka wada tmalang priyax kdere, skrebu rcilung ma mhuqil ckceka rcilung. 14Qduriq ka dmtabu babuy ma soosa daha smneeru alang paru ma alang dgiyaq ka ndaan nii. Meyah mita, maanu ka kiya, mesa ka kana seediq hiya. 15Meyah Yesu hiya ka dheya. Qtaan daha ka seediq qnerac bgihur naqah, kiya ka tnheqan utux ka seediq, ga tleung, mnlukus ma tgkeela ba. Miicu bale ka dheya da. 16Qmnita heya ka seediq we srengo daha dheya ka ndaan seediq qnerac bgihur naqah ma quri so babuy uri. 17Latac peeyah dxeral daha hiya mesa rmengo bale Yesu ka dheya. 18Mosa paapa asu ka Yesu ciida, kmtheyaq suupu Yesu ma meyah rmengo heya ka seediq qnerac bgihur naqah. 19Ini na srwai ma rngagan na: “Osa sapah ma osa lutuc su hiya. Saani smneeru wada huwa mesa qmeepah paru bale qneepah na sunan ka Bukung ma wada huwa mesa gmaalu sunan.” 20Mosa ka heya ma prading meniq dxeral Dekapolis gmarang wada huwa mesa qmeepah paru qneepah heya ka Yesu. Mskluwi kana ka seediq da.

Weewa Yairos ma Mqedil Mnarux Msdara

(Mat 9:18-26. Ruk 8:40-56)

21Paapa asu mntaril sipo rcilung dungal ka Yesu, msseli ssiyo Yesu ka hbaro ba seediq ma meniq ssiyo rcilung hiya ka Yesu. 22Meyah ka Yairos kesun 1 mpqlahang sapah pssliyan. Mita Yesu de tgtemaq berah papak Yesu. 23Mnpiya ba rmengo Yesu: “Laqi mu mqedil we ga mphuqil da. Braho su bale, so kkmalu na ma kkuudus na, say posa heyi na ka baga su.”

24Msuupu heya mosa ka Yesu ma pkeeyux smnegul Yesu ka hbaro ba seediq. 25Niqan 1 ka mqedil, wada 12 knkawas mnarux msdara ka heya. 26Egu ba ndaan na mqraqil pqita hbaro ba ising ma wada na sliqan ka kana dnoi na. Ini bale kmalu ma krinah mrana ka mnarux. 27Wada mbahang quri Yesu ka heya de tgimax ckceka hbaro ba seediq. Peeyah bukuy Yesu tmelung lukus na. 28Lmngelung ka heya: “Ani nak lukus na ka tlengun mu de ida ku mpkmalu da.” 29Kiya de asi kdengu cnriyu dara na ma klaun na wada malu ka mnarux na. 30Ciida, lnglungun so hari niqan beyax wada peeyah heyi na ka Yesu. Asi pspgeriq tunux na ma rmengo: “Ima ka tmnelung lukus mu ho?” 31Rmengo heya ka tnugsaan na: “Qtai, hbaro ba seediq ga mkkeeyux qmapur sunan, masu smiling: ‘Ima tmnelung kenan’ ho?” 32Pooda doriq na migin ka Yesu, mpqita mqedil wada mnoda so nii. 33Wada mkela so ndaan heyi na ka mqedil de miicu ma prkerang meyah tmbqelic berah Yesu, srengo na heya kana ka so ndaan. 34Rmengo heya ka Yesu: “Weewa, snhiyan su ka wada dmoi baga sunan. Psbleyaq lnglungan su osa sapah, wada malu ka narux su da.”

35Rmengo kari ciida ka Yesu we, meyah ka duma seediq pneeyah sapah mpqlahang sapah pssliyan ma rmengo: “Ga mhuqil ka laqi su mqedil da. Ma su lux smqeya mptgesa dungal ho?” 36Ini na bhangi rnengo daha ka Yesu, rngagan na mpqlahang sapah pssliyan: “Iya kiicu, asi snhii” 37Kiya de wano Petros, Yakobu ma mtswai Yakobu Yohane ka desun na, ani ima ini na srwai psnegul heya mosa. 38Dehuk sapah mpqlahang sapah pssliyan ka dheya, taan na ka seediq mrrudu squwaq, pnbaro ba lmingis. 39Mremux truma dheya ka Yesu, rmengo dheya: “Ma namu mrrudu squwaq ma lmingis ho? Ini huqil ka laqi, nii gisu mtaqi.” 40Phlisan daha ka Yesu. Lwaqan na nganguc kana ka seediq. Madis tama ma bubu laqi ma seediq smnegul Yesu, mosa gaga niqan laqi. 41Yesu ge, dooyan na baga ka laqi, rmengo heya: “Tarita, kumi!” Stsalu ka kari we “Laqi mqedil! Rngage su mu: ‘Tutuy!’” 42Asi tutuy mkkesa ka laqi mqedil. Ado 12 ka knkawas na. Mkluwi bale ka kana seediq. 43Kiya de scugan na pdakar ba rmengo, iya pklai ani ima ka noda nii. Posa kari seediq maangal uqun pekan heya.

Currently Selected:

Markos 5: Stgdaya

Highlight

Copy