Markos 11

Mremux Yerusalem

(Mat 21:1-11. Ruk 19:28-40. Yoh 12:12-19)

1Uxe beyo betaq Yerusalem ka Yesu ma tnugsaan na. Dehuk Betpage ma Betania Dgiyaq Curung. Kiya de smkagul 2 tnugsaan na ka Yesu, 2rngagan na: “Osa alang sipo hiya, mremux namu hiya de mpqita namu 1 wawa dapa roba gaga seegul hiya. Ini bale ppai ani ima ka dapa roba kiya na. Lhelah ma adis hini. 3Nasi niqan ka seediq rmengo yamu: ‘Ma namu moda so nii?’ Kesa rmengo ka yamu: ‘Ddooyun Bukung ka roba, saya ba ddulun nami meyah hini dungal.’” 4Mosa ka dheya duma, taan daha niqan 1 wawa dapa roba nii seegul elu nganguc sapah. Kiya de lhlahan daha. 5Mheyu hiya ka duma seediq ma rmengo: “Hwaun namu lmhelah ka wawa dapa roba?” 6Tmgeru kari rnengo Yesu cmiyuk ka dheya, kiya de srwaan daha posa ka dheya da. 7Desun daha Yesu hiya ka wawa dapa roba. Psaun daha bobo wawa dapa roba hiya ka lukus daha. Kiya de paapa baro hiya ka Yesu. 8Niqan hbaro ba ka seediq ssapo daha elu ka lukus daha nanak. Niqan ka duma seediq smeqic sudu qhuni peeyah qnpahan ssapo daha elu uri. 9Mtddiras kana meniq berah ma meniq bukuy ka hbaro seediq:

“Hosana!

Pooda ngayan Bukung meyah ge tndhuun ta kiya!

10Mmeeyah bobo nii ka qnlhangan rudan ta Dawid, kiya ka tndhuun ta!

Hosana! Ga meniq tgpusu baro!”

11Mremux Yerusalem ka Yesu. Asi osa Sapah Thmkuwan. Qtaan na kana ka ssiyo na. Tena sreesa ka karac da. Kiya de, msuupu mlatac 12 tnugsaan na, mquri Betania.

Smiyus Qhuni Nunuh

(Mat 21:18-19)

12Tg2 ali, mlatac peeyah Betania ciida ka dheya, muure ka Yesu da. 13Stheya na qmita qhuni nunuh niqan waso. Kiya de mosa hiya. Tay so maha niqan giimun na peeyah bobo qhuni. Betaq hiya ma, wano waso, uka ani maanu slayan na hiya. Ado uxe ali gnhiyan ka ciida. 14Rmengo qhuni ka Yesu: “Peeyah saya ma ani betaq knuwan, uka ka seediq maha mekan heyi su!” Wada mbahang ka tnugsaan na uri.

Psbgurah Sapah Thmkuwan

(Mat 21:12-17. Ruk 19:45-48. Yoh 2:13-22)

15Meyah Yerusalem ka dheya. Mremux Sapah Thmkuwan ka Yesu. Kiya de prading pqduriq dseediq mpbaruy hiya ka heya. Poxun na ka gakac uuqan pnsaan daha pryuxan pila ma tluungun dmpsbaruy byugu, 16ini na sruwai ka seediq dmoi qyqeya moda Sapah Thmkuwan. 17Tmgesa dheya ka Yesu: “Uxe ga spatis Patis hiya ka:

‘Sapah mu we sapah drunan kana qnlhangan bobo dxeral kesun tmngayan’ ka kari peni?

Ma namu nii ngalan rudu mpgeeluk gmeeguy!”

18Wada mbahang ka dpusu msapuh ma dmptpatis. Kiya de lmngelung kmphuqil Yesu ka dheya ma miicu heya uri. Ado mskluwi tnugesa na ka kana hbaro seediq. 19Gbiyan de mlatac mosa nganguc alang ka dheya.

Tnugesa Peeyah Qhuni Nunuh

(Mat 21:20-22)

20Mgrebu ciida, mkleelu moda heya, taan daha ka qhuni nunuh ani gamil wada mdengu. 21Lmngelung kari rnengo Yesu ka Petros, kiya de rmengo heya: “Mptgesa, tai, wada mdengu ka qhuni nunuh sniyus su da.” 22Cmiyuk rmengo ka Yesu: “Pniqi snhiyan namu quri Utux Baro. 23Rngage maku, ani ima rmengo dgiyaq nii: ‘Osa, skrebu ckceka rcilung!’ Nasi ini tiiyax ka lhebun na ma, wano snhii rnengo su nanak de maha bale ba, mesa su de, ida maha so nii ka heya. 24Maanu so kiya de rngage maku. Ani maanu ka ddrunan pgsaun namu, wano snhii, wada ta ngalun da, mesa ge, kiya de maha bale ba biqun maku. 25Mheyu namu dmurun ciida, nasi niqan ka qnrquwan namu seediq we asi su ka srwaun. So maha smruwa qnquwan namu ka Tama namu ga baro uri. 26Nasi namu ini sruwai, uxe mpsruwa qnnaqah namu ka Tama namu ga baro uri.”

Ini Snhii Beyax Yesu

(Mat 21:23-27. Ruk 20:1-8)

27Meyah Yerusalem dungal ka dheya. Mkkesa toma Sapah Thmkuwan ciida ka Yesu. Mosa Yesu hiya ka dpusu msapuh, dmptpatis ma ddrudan mpqlahang. 28Rmengo heya: “Ga inu ka pusu beyax nangal su qmeepah ooda nii ho? Ima ka bnege pusu beyax qmeepah ooda nii ho?” 29Rmengo dheya ka Yesu: “1 kari ka siling mu yamu. Cyuki ku. Kiya de mprengo ku yamu, pnooda mu maanu ka pusu beyax qmeepah so nii. 30Pneyah inu ka ptgaya smino Yohane, ye pneyah karac baro ma pneyah seediq ho? Cyuki ku.” 31Mpprengo ka dheya: Nasi ta kesun pneyah Utux Baro, maha mprengo ita: ‘Hmuwa, ma namu ini snhii heya?’ 32Nami rmengo so nii, pneeyah seediq kiya, miicu ta hbaro seediq dungal. Ado ngalan daha bale ba mpgeela kari ka Yohane ka kana seediq. 33Kiya de, cmiyuk rmengo Yesu ka dheya: “Ini miyan kela.” Kiya de rmengo dheya ka Yesu: “Uxe ku mprengo yamu uri, mnoda ku pusu beyax maanu qmeepah ku so nii.”

Currently Selected:

Markos 11: Stgdaya

Highlight

Copy