Ruka 23

Psiling Berah Pilatos ka Yesu

(Mat 27:1-2, 11-14. Mrk 15:1-5. Yoh 18:28-38)

1Ciida mtutuy ka kana seediq ma madis Yesu mosa berah Pilatos. 2Kiya de rmengo qnqnnaqah heya: “Qntaan nami seediq nii we prrudu qlhangan, mdakar bbege miyan pila Kaisar ma rmengo heya we Kiristo qbsuran paru.” 3Smiling Yesu ka Pilatos: “Isu we qbsuran su paru seediq Yudaya ho?” Cmiyuk ka Yesu: “Ida so rnengo su.” 4Pilatos we rngagan na ka dpusu msapuh ma kana knhbaro seediq: “Ini mu slai niqan qnquwan na ka seediq nii.” 5Kiya de krinah mbeyax ba rmengo ka dheya: “Heya we brburun na ka seediq. Tmgesa kari kana qnlhangan Yudaya peeyah Galil betaq hini.”

Smbiciq Mita Yesu ka Hrodes

6Mbahang kari nii ka Pilatos de rmengo: “Ye seediq Galil ka seediq nii ho?” 7Klaun na qnlhangan Hrodes ka hiya mesa de skgulan na Hrodes hiya ka heya. Ida gaga meniq Yerusalem ciida ka Hrodes. 8Mita Yesu ka Hrodes de mqaras bale. Ado wada na qbhangan ka quri noda na. Bsiyaq ba mqmita heya. Ado pnskraya qneepah Yesu we sntangan na ba qqita. 9Maanu so kiya de egu ba kari ka sniling na heya. Kiya de ini ciyuk ani maanu ka Yesu. 10Mheyu hiya ka dparu msapuh ma dmptpatis ma mbeyax bale rmengo qnnaqah na. 11Kiya de smbiciq mita Yesu ka Hrodes ma supi na. Phlisun daha ma plkusan daha lukus tqwilaq de psaun daha berah Pilatos dungal. 12Berah na ciida, mknpais ka Hrodes ma Pilatos han. Kiya de ali ciida de msdangi da.

Ngalan Mndungus Phqilun ka Yesu

(Mat 27:15-26. Mrk 15:6-15. Yoh 18:39-19:16)

13Pilatos we pssliun na mlawa ka dpusu msapuh, dmpdudul ma kana seediq. 14Rngagan na ka dheya: “Desun namu berah mu ka seediq nii we rmengo namu, prrudu seediq ka heya. Tai, bobo mu pnsgeegan berah namu de ini mu slai ka qnquwan na rnengo namu. 15Ani Hrodes uri mntena so nii. Kiya ka pbrnahun na ka heya. Nasi so kiya de, uka ka qneepah na mnuglengu phqilun ka heya. 16Maanu so kiya de bbeun mu ma psaun mu da.” 17Knkingal smseman we asi na ka sraguh ka 1 seediq ga shetur. 18Kiya de msuupu mddiras ka kana seediq: “Phuqil ka seediq nii! Rwhaani miyan ka Barabbas!” 19Barabbas nii we tnbrinah qbsuran ckceka alang ma pnhuqil seediq uri, kika shetur sapah kuung ka heya. 20Kmsruwa posa Yesu ka Pilatos ma texal dungal rmengo dheya. 21Kiya de mdiras rmengo ka dheya: “Ptaani jyujika! Ptaani jyujika!” 22Mn3 rmengo dheya ka Pilatos: “Hmuwa ho? Maanu ka snrtiqan na qmeepah ka seediq nii ho? Ini mu slai ka qnnaqah na mndungus phqilun. Maanu so kiya de bbeun mu ma psaun mu.” 23Kiya de paru ba quwaq daha pkeeyux rmengo Pilatos pteetu na jyujika ka Yesu. Kiya de wada mbeyax ka hrenang daha. 24Maanu so kiya de Pilatos we spuyu na ida so kari daha pqhedu rmengo. 25Kiya de wada na sraguh ka Barabbas pnesa daha. Heya we tnbrinah qbsuran ma pnhuqil seediq ma ga shetur sapah kuung. Kiya de sbege na dheya ka Yesu ma spooda na lnglungan daha nanak.

Spteetu Jyujika ka Yesu

(Mat 27:32-44. Mrk 15:21-32. Yoh 19:17-27)

26Desun daha ka Yesu ciida, qrapun daha ka Simon seediq Kurenaios pkelu ba peeyah lualang biciq. Spapa daha heya ka jyujika Yesu ppheal na smnegul Yesu. 27Smnegul Yesu ka hbaro bale seediq ma dmqedil. Dmqedil nii we naqah kuxul daha ma lmingis paru hiya. 28Pspgeriq heyi mquri dheya ka Yesu ma rmengo: “Weewa Yerusalem! Iya lingis kenan. Lingis yamu nanak ma lqlaqi namu! 29Ado uxe beyo dehuk ka ali. Mprengo ka seediq: ‘Mpbleyaq ka kdungean ma lbuwan uxe nniqan laqi ma uxe mnunuh na!’

30Ciida, mprengo dgiyaq paru ka seediq:

‘Takur bobo heyi nami!’

Mprengo biciq dgiyaq ka seediq:

‘Bungi nami!’

31Nasi daha kesun hiya ka meluq qhuni we mphuwa mesa ka mdengu qhuni di?”

32Niqan 2 heyi qmneepah qnnaqah uri ka msuupu Yesu pphqilun daha. 33Dehuk dxeral Rngerang Qrari Tunux kesun de ptteun daha jyujika hiya ka Yesu ma ptteun daha ka 2 heyi qmneepah qnnaqah uri: Narac na ka 1 ma iril na ka 1. 34Rmengo ka Yesu: “Tama, srwai ka dheya. Ado maanu ka qneepah daha we ini daha klai.” Supi we spooda daha blebil qreti aasu daha lukus na. 35Ga mheyu hiya qmita ka seediq. Tgreno heya ka dmpqlahang ma rmengo: “Pkdusun na ka seediq! Nasi bale ba Kiristo ma gneegan Utux Baro de naka pkuudus heya nanak!” 36Tmsiiyax heya ka supi uri ma meyah mege piimah sino tgbasi heya, 37rmengo: “Nasi su qbsuran paru Yudaya ka isu we pkdusi nanak ka isu!” 38Ga spatis bobo tunux Yesu ka 1 patis: “Qbsuran paru seediq Yudaya ka nii.”

39Ga spteetu hiya ka 2 heyi qmneepah qnnaqah we mhulis heya ka 1, rmengo: “Uxe su Kiristo ka isu peni? Pkdusi ka isu ma yami uri!” 40Mseang rmengo heya ka taxa qmneepah qnnaqah, rmengo: “Mntena so nii wada ngalan mndungus pkdraun ka isu we ini su kiicu Utux Baro peni? 41Bale ba mndungus pkdraun ka ita, ado ngngalun ta we mndungus qneepah ta. Maanu so seediq nii we uxe qmneepah ani maanu naqah ka heya.” 42Kiya de rmengo Yesu ka heya: “Yesu, mremux su qnlhangan su ciida we lnglungi ku hiya!” 43Rmengo heya ka Yesu: “Bale ba rngage su mu. Ali saya we mpsuupu su kenan meeniq mbleyaq hiya ka isu da.”

Mhuqil ka Yesu

(Mat 27:45-56. Mrk 15:33-41. Yoh 19:28-30)

4412 toke ceka naali ka ciida. Mnkuung ka kana bobo dxeral yaa ba betaq 3 toke. 45Mkuung ka hido da. Kiya de mtg2 msgaliq ka pala pntaayus ckceka Sapah Thmkuwan. 46Kiya de paru hrenang na mdiras rmengo ka Yesu: “Tama! Pstama mu baga su ka utux mu.” Mhedu rmengo kari nii de msetuq ka hengak na da. 47Mita so nii ka qbsuran 1'00 supi de tmdahu Utux Baro: “Bale ba msderux seediq ka nii!” 48Taan daha ka noda so nii ka seediq meyah msseli qmita de tmapaq berah daha ma wada sapah da. 49Kana ka mkela Yesu ma mmqedil smnegul heya peeyah Galil we smtheya mheyu qmita kana so nii.

Smeku heyi Yesu

(Mat 27:57-61. Mrk 15:42-47. Yoh 19:38-42)

50Niqan ka 1 seediq Yosehu kesun ngayan na. Heya we pnhyegan psgeegan pssliyan. Malu ba seediq ma msderux ooda ka heya. 51Heya we ini snegul qneepah daha. Seediq Yudaya ma pneeyah Yalimatay. Kiya uri ma psmeyah eeyah qnlhangan Utux Baro ka heya. 52Mosa Pilatos hiya ka heya ma mesa heyi Yesu. 53Kiya de sladu na ka heyi Yesu de lbuun na tninun malu ware keguy ma saan na posa habung knriyan tasil ma uxe pnsaan ani ima. 54Ali psrmalan ka ciida ma smdaling ka ali sngayan. 55Smnegul bukuy ka dmqedil mnsuupu Yesu pneeyah Galil, mita habung na ma wada huwa mesa ka snkuwan heyi Yesu. 56Kiya de mosa brinah ka dheya ma psramal ricuh malu sknexan. Muyu gaya pndakar msange ali sngayan ka dheya da.

Currently Selected:

Ruka 23: Stgdaya

Highlight

Copy