Yohane 9

Pklmeun ka Mbudu Pneeyah Pnttingan

1Mkkesa elu ka Yesu ciida we taan na ka 1 seediq mbudu peeyah pnttingan. 2Smiling Yesu ka tnugsaan na: “Mptgesa, skbudu na peeyah pnttingan ka seediq nii we ima ka mnoda qnuuqu ho? Ye heya nanak ma ye rudan na ho?” 3Cmiyuk rmengo ka Yesu: “Uxe qnuuqu noda na ma uxe qnuuqu noda rudan na uri. Maha ptuura qpahun Utux Baro ka ckceka heyi na. 4Gisu diyan han we ida ta asi ka qmeepah qpahun smnkagul kenan. Dehuk ka keeman de ini tduwa qmeepah ciida ka ani ima da. 5Nii ku meeniq bobo dxeral han we ledax ku bobo dxeral.” 6Rmnengo kari so nii ka Yesu we mturuq dxeral ma gmaxun na dxeral de sricuh na doriq na. 7Kiya de rmengo heya: “Osa trima langu Siloax.” (Hdilun ka Siloax nii we ‘snkgulan’ kesun.) Kiya de mosa trima hiya de qmita duma meyah da. 8Seediq ssiyo ma qmnita heya mnesa uqun ka dheya ciida we rmengo: “Uxe seediq tnleung mnesa uqun ka nii peni?” 9Rmengo ka duma: “Ida hiya ba.” Duma na we rmengo: “Uxe, so heya uri.” Rmengo ka heya nanak: “Ida yaku.” 10Kiya de smiling heya ka dheya: “Wada huwa mesa qmita ka doriq su da ho?” 11Cmiyuk rmengo ka heya: “Yesu kesun ka seediq we gmaxun na dxeral rmicuh doriq mu ma rmengo kenan: ‘Osa trima langu Siloax.’ Mosa ku trima de asi ku qita da.” 12Smiling ka dheya: “Ga inu ka seediq kiya?” Rmengo ka heya: “Ini ku kela.”

Smiling Quri Pklmeun ka seediq Parisay

13Desun daha seediq Parisay hiya ka seediq mnbudu. 14Gmaxun na dxeral rmaguh doriq na ciida ka Yesu we ali sngayan. 15Smiling heya dungal ka seediq Parisay, wada huwa mesa qmita ka heya. Rmengo dheya ka heya: “Rcuhan ku na dxeral ka doriq mu de tnrima ku ma qmita ku da.” 16Kiya de rmengo ka duma seediq Parisay: “Uxe pneyah Utux Baro ka seediq nii, ado ini puyu gaya ali sngayan ka heya.” Duma ka rmengo: “Huwa mesa qmeepah pnskraya qneepah Utux ka seediq niqan qnquwan noda ho?” Kiya de maku mtg2 ka dheya da. 17Kiya de smiling seediq mnbudu dungal ka dheya: “Wada rmaguh doriq su ka heya, rengo bino, seediq mmanu ka heya?” Rmengo ka heya: “Mpgeela kari ka heya.”

18Seediq Yudaya ge, ini daha snhii bale ba mnbudu cuuxal ma wada qmita ka bobo na da. Betaq daha splawa ka rudan na. 19Kiya de slingan daha ka rudan na: “Laqi namu ka nii ho? Rmengo namu, ida mnbudu peeyah mtuting ka heya ma saya de wada hmuwa mesa mita da ho?” 20Cmiyuk ka rudan na: “Laqi miyan ka heya, ida mnbudu peeyah mtuting. Nii ge ida nami klaun. 21Kiya de wada huwa mesa qmita ka saya de ini miyan klai. Ima ka wada rmaguh doriq na we ini nami kela uri. Rudan ka heya da, slingi nanak heya. Mprengo ka heya nanak.” 22Miicu seediq Yudaya ma so nii ka kari rnengo rudan na. Ado mnhedu mpprengo ka dseediq Yudaya. Nasi rmengo, Kiristo ka Yesu de, asi ka plaxun daha peeyah sapah pssliyan. 23Kika rmengo ka rudan na: “Rudan ka heya da, slingi nanak.”

24Maanu so kiya de mn2 mlawa ka seediq mnbudu ka seediq Parisay ma rngagan daha: “Bqani Utux Baro ka knledax! Ado seediq niqan qnquwan noda ka nii we klaun nami.” 25Cmiyuk ka seediq kiya: “Yaa seediq niqan qnquwan noda ka heya we ini mu klai. Wano 1 ba ka klaun mu. Mnbudu ku han ma qmita ku saya da.” 26Kiya de slingan daha: “Wada su na hwaun kesun? Wada na huwa kesun rmaguh ka doriq su ho?” 27Cmiyuk ka heya: “Wada maku rngagan da ma ini namu lux mbahang. Hmuwa, ma namu mpqbahang dungal ho? Lmngelung namu mmaha tnugsaan na ka yamu uri ho?” 28Smngayan heya ka dheya: “Isu ka tnugsaan na. Yami we tnugsaan miyan Moseh. 29Rmnengo Moseh ka Utux Baro we klaun nami. Kiya de seediq nii we ini miyan klai pneeyah inu!” 30Cmiyuk dheya ka heya: “Wada rmaguh doriq mu ka heya. Ma so smhulis betaq nami ini klai pneyah inu ka heya! 31Klaun ta bale Utux Baro we ini qbahang seediq niqan qnquwan noda ka Heya. Wano thmuku heya ma qmeepah lnglungan na ka bhangun na. 32Uxe qnbhangan peeyah pnrdingan bobo dxeral ka seediq wada rmaguh doriq seediq mbudu peeyah pnttingan. 33Nasi uxe pneyah Utux Baro ka seediq nii we kani tduwa qmeepah ani maanu.” 34Cmiyuk heya ka dheya: “Bale ba mntuting ckceka qnquwan noda ka isu we mptgesa su menan ho?” Kiya de pqdriqun daha peeyah hiya ka heya da.

Mbudu Ckceka Utux

35Yesu we mnbahang wada daha pqdriqun ka heya de slayan na ka heya ma rngagan na: “Snhii su Laqi seediq ho?” 36Cmiyuk rmengo ka heya: “Bukung! Ima ka laqi seediq ho? Tgsai ku, ssnheyi ku heya!” 37Rmengo heya ka Yesu: “Ntaan su heya duma nii rmengo sunan we kika heya.” 38Rmengo ka heya: “Bukung! Snhii ku!” Kiya de tmbqelic thmuku heya. 39Rmengo ka Yesu: “Ppsgeegan ka seeyah mu bobo dxeral. Kiya de maha mita ka ini qita na, mita na we pkbudu.”

40Msuupu heya ka seediq Parisay we qbhangan daha ka so nii de rmengo heya: “Mbudu miyan uri ka yami peni?” 41Rmengo dheya ka Yesu: “Nasi namu mbudu ka yamu we maha uka qnquwan noda namu. Kiya de so saya we rmnengo namu: ‘Ga nami qmita’ de gaga hiya ka qnquwan namu nana.”

Currently Selected:

Yohane 9: Stgdaya

Highlight

Copy