Yohane 12

Rcuhan Abura Meeniq Betania

(Mat 26:6-13. Mrk 14:3-9)

1Kiya de 6 ali berah smseman hrnasan ka Yesu we meyah Betania alang Rajaros pnkuudus na peeyah hnqilan. 2Spsramal daha hnpure gbiyan hiya ka Yesu ma mmiyak ka Marta. Msuupu Yesu tleung mekan hiya ka seediq we meeniq hiya ka Rajaros uri. 3Maadis 1 ini gmaxi ani maanu bale ba abura nrrudu mkere brigan ka Maria ma sricuh na papak Yesu, kiya de sresan na snuunux na dungal. To sknexan abura nii ka truma sapah. 4Rmengo ka Yehudah seediq Iskariot mbaruy Yesu, heya we 1 tnugsaan na, rmengo: 5“Hmuwa, ma ini brigi 3'00 hbangan ging ma sbege seediq qrinuc ka ricuh malu skenux nii ho?” 6Kari rnengo na nii we uxe ga psbrinah lmngelung seediq qrinuc. Ado mpgeeguy ka heya ma qmlahang psaan pila ka heya. Heya we hmilic pila snkuwan ckceka hiya. 7Rmengo ka Yesu: “Laxi heya! Pnsramal na ali sseku na bqerus mu ka sknexan nii. 8Ado ida msuupu yamu klaali ka seediq qrinuc. Kiya de ini namu psuupu yaku klaali ka yamu.”

Mphuqil Rajaros

9Mkela gisu hiya de nii ka hbaro seediq Yudaya. Uxe wano Yesu ka seeyah daha ma, meyah mita Rajaros spkuudus Yesu peeyah hnqilan. 10Kiya de dpusu msapuh we mpprengo pphqilun daha ka Rajaros uri. 11Ado ririh Rajaros we malix dheya ka hbaro seediq Yudaya ma mosa snhii Yesu da.

Knledax Mremux Yerusalem

(Mat 21:1-11. Mrk 11:1-11. Ruk 19:28-40)

12So kusun, qbhangan daha meeyah Yerusalem ka Yesu de hbaro bale seediq ga meyah smseman de 13maangal cida sbiki paru ma mosa smterung heya, mdiras:

“Hosana! Bukung seediq Israel!

Pooda ngayan qbsuran paru meyah we tndhuun!”

14Smdiyal wawa dapa roba ka Yesu ma paapa hiya da. Mntena so ga spatis Patis:

15“Weewa Sion, iya kiicu!

Tai, nii ka qbsuran paru namu da,

gisu paapa dapa roba.”

16Ini kela so nii prading ka tnugsaan na han. Asi ka metaq maangal knledax ka Yesu de kiya ka hani lmngelung kari nii we ga tmiyu matis heya. Seediq uri we bale ba wada daha sun hiya ka heya. 17Mlawa Rajaros pkuudus peeyah hnqilan na ciida ka Yesu, seediq mnsuupu heya meeniq hiya we pgkela noda nii. 18Mnbahang qneepah pnskraya noda nii ka hbaro seediq de mosa smnegul heya. 19Mpprengo ka seediq Parisay: “Tai, uka rrihan ka ndaan ta. Ado wada smnegul heya ka kana seediq bobo dxeral da.”

Mesa Mita Yesu ka Seediq Hellenis

20Ciida, ckceka daha meyah smseman hiya we niqan ka duma seediq Hellas. 21Meyah mita Pilipos seediq Betsaida ga Galil ka dheya ma dmurun heya: “Mqmita nami Yesu.” 22Mosa rmengo Andreas ka Pilipos. Kiya de msuupu rmengo Yesu ka Andreas ma Pilipos. 23Rmengo dheya ka Yesu: “Dehuk ka ali ngngalun knledax Laqi seediq da. 24Bale ba rngage maku, nasi ini ktuting bobo dxeral mhuqil ka demux mugi we ida 1 bale na. Nasi mhuqil de maha egu bale ka pnugheyi na. 25Gmaalu knuudus na nanak we mpuuka knuudus. Tmraqil knuudus na meniq bobo dxeral we meeniq knuudus na betaq ani knuwan. 26Nasi qmeepah kenan ka seediq we ida asi ka smnegul yaku. Ga ku meeniq inu we meeniq hiya ka seediq mqeepah yaku uri. Nasi qmeepah yaku ka seediq, Tama mu we spruun na ka heya.”

Dilun Baro ka Laqi Seediq

27“Naqah kuxul mu ka saya. Mosa ba maanu ka rrengo mu ho? Mprengo ku, ‘Tama, doi ku baga peeyah ali nii’ ho? Kiya de ali nii ka seeyah mu. 28Tama, pniqi knledax ka ngayan su!” Kiya de peeyah baro ka hrenang: “Wada mu pldaxun ka ngayan mu duma prnaan mu pkledax dungal.” 29Mnbahang ka hbaro seediq ga mheyu ssiyo de rmengo: “Sbruwa da.” Duma daha we rmengo: “Rmengo heya ka snkgulan baro.” 30Cmiyuk rmengo ka Yesu: “Hrenang nii we uxe yaku, yamu ka seeyah na. 31Saya ka ali ppsgeegan bobo dxeral nii. Lwaqun saya ka bukung mpqlahang bobo dxeral nii. 32Wada ku daha dilun baro peeyah dxeral ka yaku de hgetun mu kenan ka kana seediq.” 33Gisu rmengo mphuwa mesa hhuqil na ka kari nii. 34Cmiyuk rmengo heya ka hbaro seediq: “Mnbahang nami rnengo patis gaya hiya: Meeniq ani betaq knuwan ka Kiristo. Ma su rmengo Laqi seediq we asi ka dilun baro ho? Ima ba ka Laqi seediq nii ho?” 35Rmengo dheya ka Yesu: “Uxe pqbsiyaq meeniq ckceka yamu ka ledax da. Meeniq yamu ka ledax han we kkesa han, so uxe meyah yamu ka mnkuung. Ga mkkesa kuung we ini kela ssaun na. 36Niqan ka ledax han we snhii ka ledax nii, maha namu mlaqi ledax.”

Ini Snhii ka Seediq Yudaya

Rmnengo kari nii ka Yesu de, wada mlatac duma mosa mgleing da. 37Ani wada qmeepah egu pnskraya noda ka Yesu we ida ini snhii heya ka dheya. 38So nii we kika maha mpbale rnengo Isaya mpgeela kari:

“Bukung! Ima ka snhii kari gnrangan nami ho?

Ima ka ptuura hiqur baga Bukung ho?”

39So nii ka ini daha snhyani. Ado rmnengo ka Isaya:

40“Utux Baro we wada na bduun ka doriq daha,

wada na pskrayan ka lnglungan daha.

Nasi so mita ka doriq daha,

mpkela ka lhebun daha, mpspgeriq mbrinah ka dheya,

ppkmalu mu dheya.”

41Ado qmnita knledax Yesu ka Isaya, kiya ka tmiyu heya rmnengo kari so nii. 42Ani so kiya we snhii heya ka hbaro ani mpdudul seediq Yudaya. Kiya de ririh seediq Parisay miicu ptuura snhiyan daha. Ado maha daha pplaxun peeyah sapah pssliyan ka dheya. 43Ado ptndahu seediq ka kuxul daha ma mgkala ptndahu daha Utux Baro.

Mpsgao Seediq ka Kari Yesu

44Mdiras rmengo ka Yesu: “Snhii kenan ka seediq we uxe yaku ka snhiyun na. Smnkagul kenan ka snhiyun na. 45Mita kenan ka seediq we qmita smnkagul kenan uri. 46Yaku we ledax meyah bobo dxeral. Kana snhii kenan we uxe meniq kuung. 47Nasi mbahang kari mu ka seediq we ini ba nduwa muyu we uxe yaku ka mpsgao na. Ado seeyah mu bobo dxeral we uxe ku meyah ppsgao. Mdoi baga seediq ka seeyah mu. 48Qmada yaku ma ini angal kari mu ka seediq we niqan ka mpsgao dheya. Kari rnengo mu we kika mpsgao dheya qnhdean ali. 49Ado uxe spooda mu yaku ka rmengo. Tama smnkagul yaku ka pnosa kari. Maanu ka rnengo na, maanu ka srengo mu. 50Klaun mu uri, pnosa na kari we kiya ka niqan uka psteqan knuudus. So kiya de rnengo mu we kiya ka pnuyu rnengo ku na Tama de wada mu kesun rmengo da.”

Currently Selected:

Yohane 12: Stgdaya

Highlight

Copy