Smnlean 7
7
Rnecux Paru
1Rmengo Noax ka Utux Tmninun: “Isu ma kana tnsapah su we osa mremux truma asu kana. Ado knxalan nii we, qntaan su mu meniq berah mu we seediq msderux noda. 2Kana tnbugan ini qrutiq we ngali pn7 ma bais knkingal klegan. Tnbugan mrutiq we ngali pnkingal ma bais knkingal kiya. 3Ngali pn7 ma bais kn1 klegan qbheni skiya karac baro. So maha mtngari ka wada na, muudus meniq bobo dxeral. 4Ado bobo mk7 ali de, mpquyux ku bobo dxeral 40 ali ma rabi. Phqilun mu kana ka knuudus smnalu mu.” 5Noax we muyu tnugesa Utux Tmninun mosa meepah ka heya.
6Stngayan rnecux kana ka bobo dxeral ciida, Noax we 6'00 knkawas na. 7Msuupu laqi na, mqedil ma ina na mremux asu, tgleing rnecux paru ka Noax. 8Bgurah tnbugan ma naqah tnbugan, qbheni skiya ma kana kuyi mkkarang dxeral, 9ida bale so skkingal bais, niqan balas ma gipu mosa Noax hiya mremux asu. Mntena so rnengo na Noax ka Utux Baro. 10Bobo wada ka 7 ali de, stenge bobo dxeral ka rnecux.
11Noax we 6'00 knkawas idas 2 ali 17, kiya ka ali ciida, mtraguh kana ka pusu hrean qsiya pusu ebun toma, mtraguh uri ka bais karac baro uri. 1240 ali ma rabi qyexan quyux paru ka bobo dxeral. 13Meniq ali ciida, Noax ma laqi na Sem, Xam, Yepet ma mqedil na ma 3 ina na we msuupu mosa mremux asu kana. 14Dheya ma kana lmlamu klegan camac. Kana lmlamu klegan tnbugan, kana lmlamu klegan kuyi mkkarang dxeral, kana qbheni, kiya ka lmlamu klegan ga niqan palic sskiya na. 15Kana muudus niqan heyi ma dara ga niqan hengak knuudus we, wada mnbais mosa Noax hiya, mremux asu. 16Kana ani maanu ga niqan heyi we, wada mnbais kana mremux asu, mntena so rnengo na Noax ka Utux Tmninun. Kiya de lebun na ckceka asu ka heya.
17Msrnecux 40 ali bobo dxeral ka rnecux paru. Mgkala baro ka qsiya, kiya de psddilun na baro ka asu. Kiya de mqluli bobo dxeral ka asu da. 18Paru riyung ka qsiya, ini beyo mgkala baro ka qsiya. Asu de qluli bobo qsiya da. 19Paru riyung ka qsiya meniq bobo dxeral de, kana dgiyaq paru we wada bungun qsiya kana da. 20Paru riyung ka qsiya, mgkala 15 sese hnrnasan na bungu dgiyaq. Bungan qsiya kana ka bungu dgiyaq da. 21Kana niqan heyi ga mlgelu dxeral, kiya ka qbheni, tnbugan, camac ma kana qpuruh mlgelu muudus ma, kana seediq we wada mhuqil kana da. 22Kana niqan hengak knuudus ckceka muhing daha ga meniq dxeral mdengu we wada mhuqil kana da. 23Utux Tmninun we wada na phqilun ka kana klegan mlgelu muudus bobo dxeral, nii we niqan seediq, tnbugan, kuyi mkkarang, qbheni skiya. Dheya we wada phqilun kana peeyah bobo dxeral da. Wano Noax ma duma mntheyaq heya mtngari meniq ckceka asu. 24Paru riyung ka qsiya, betaq 1'50 ali nniqan na bobo dxeral.
Currently Selected:
Smnlean 7: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
