Mark 9
9
1Jeju eld tɔ an: Rota m'ndɨ m'elsɨ kɨ tɨga wakɨsɨ, kɨmadg ku ĩgɨtɨn ndɨn la ye, a oin al mbã kad oon kõɓe lo Luwah kamtã, kõɓe lo Luwah'n ndɨ ɗe kɨ tɔg.
Pierr, Jak, kɨ Jã oon Jeju kam kunjt kɨɗangeɗeng
(Mat 17:1-13; Luk 9:28-36; 2 Pie 1:16-18)
2Go ndɔt kɨbojidet Jeju un Pierr kɨ Jak, kɨ Jã nat sen, aw sed dɔ mbalt kɨ ngal puwuw. Nõbe, i nat kɨ ngéndoog lon koon. Takumdt roa tel kɨɗang. 3Kubg loa ndulon nyũtnyũt, ndaan ngũng kɨ tɔi takɔl. De kɨ dɔningt kɨ asɨ ɗa kub kad nda titbe goto. 4Ngéndoog lo Jeju kɨ mɨta'n non oon Eli kɨ Moij, teen hɔi ɗa dan ta kɨ Jeju. 5Pierr un tan elɨn Jeju an: Ngej, i nya kɨmaj kad kɨ ndɨ nẽbe. Ad kɨ ɗa kuj mɨta kɨkɨɗa kɨtatɔi, kɨmad kɨta Moij kɨmad tɔ kɨta Eli. 6Kɨtɔ Pierr ger nya'n ndɨ el al, ɓool tɔla sɔkɨr nat kɨ ndeg ngéndoog. 7Kilndii ɗe ut dɔd mbukɨ. Ndi ta mad tee ko kam kilndiit nõ el an: Ĩn ɗan, i ngonɨm kɨ ngetar lom, i nelɨn mbisɨ oon ne dɔ ta loa.
8Na ngéndoog loa nulɨn lo gugɨn dɔd, na oon de mad kɨɗang al na Jeju kɨ kɨɗanbe la i sed ye. 9Na lon ndɨ ɗisɨn dɔ mbalt ye, Jeju ndad mber kɨ tɔgɨn kad elɨn de mad nyan oon kɨ kumd nõ al, mbã kad Ngon de ɓai ku ngékoit tã. 10Ngéndoog loa hɔn ta 'nten sem kamdt, na kudt ĩn kɨɓeg ndɨjen na ta anan: Ɓai lo koit ye, kama i ɗi a?
11Kamla ndɨjen Jeju anan: Kɨtɔɗi ngéndang maktubg elɨn anan kete tã kad Krist ɗe ye, ngekelta kɨ ta Luwaht Eli a ɗe kamtã. 12Jeju eld an: Ɗuba, Eli a ɗe kete kad ɗago nyag tube ad asɨna kamtã. Na kɨtɔɗi ndangɨn kam maktubt kɨjaɓat da ne dɔ Ngon de'n ɓet a ngah kõ ngãi, deg a oona nyat mad al tɔ a? 13Na m'ndɨ m'elsɨ; Eli ɗe woi, na deg ɗan sia nya kɨ kamd ndig, tit'n ndangɨn ne kam maktubt kɨjaɓat dan ne dɔa.
Jeju yoot ngon'n ndil kɨyerr i kamat ɔga kelta
(Oo Mat 17:14-21; Luk 9:37-43)
14Lon tel ɗen ro ngéndoogt'n nyand gog ye, oon bakad koosɨdeg gugɨn dɔd. Na Juipg kɨ ngéndang maktub ɗa majɨn na ta ngãi sed ngéndoog lo Jeju. 15Na lon bakad koosɨdeg oon Jeju ye, ta yaad biw. Tajigt deg ãin ngɔd lan taa, ɗana lapia. 16Jeju ndɨje ngéndoog lon an. I ɗa i majɨn na ta dɔ ɗit a? 17De mad ku koosɨdegt tur an: Ngendooj, m'ɗe kɨ ngonɨm kɨdɨngã, ndil kɨmajal i kamat, dɔɔ ngangãa ɗa, ɔga dɔ kelta. 18Lokɨɗen awt a ne, ndil kɨyerr'n non a kɨla laa ɓap; ad taa ɓa hulum njukɨ njukɨ, ngoor ngang'n mormor, roa ngang kongkong. M'ndɨje ngéndoog loi kad ɔrrɨn ndil kɨyerr'n non kamat kɔ, na asɨn kɔr al. 19Jeju eld an: Ĩn ngékadkamsɨ Luwah al, kaglo asɨ bãi ɓet m'am ndɨ nat sesɨ a? Kaglo bãi hã m'am ndɨdɔt sesɨ a? I ɗen kɨ ngon'n non so adɨn m'ooa.
20Ɗen kɨ ngon'n non roat. Lon ndil kɨmajal oo Jeju ye, tur ngon murmur kɨ tɔgɨn, ad so ber ndur gundi gundi, na hulum taa ɓa njukɨ njukɨ. 21Jeju ndɨje bɔw ngon an: Kaglo asɨ bãi hã nya 'nten ɗan nya a? Bɔw ngon tura an: Lon ĩn ngon kɨɗoi ɓaitɔ.
22Ndil kɨyerr'n non kɨ njanatbe a ɔsɨ laa kam horrt, ke kam mant kad oi kɔ. Ĩla asɨ ɗa nya mad a ne, oo kumtondo loj na i ɗa sej. 23Jeju tura an: Kɨtɔɗi i elɨn an: Ĩla asɨ a ne. Nyag tube i root ro det kɨ ngekadkamɨn Luwah. 24Na, bɔw ngon kɔ kɨ nõ kumɨnt an: M'adkam Bɨraɓe, i ɗa sem, na kɨta kadkam lom la i tẽbe ye.
25Na lon Jeju oo bakad koosɨdeg ndɨ ɗen kɨ dɔat kɨ ngɔd ye, ndáng ndil kɨmajal kɨ tɔgɨn, ela an: ĩ ndil kɨ ngekɔg de kelta ho, i ngekɔg koo dɔ ta tɔ ho ye, m'eli kad i tee kam ngont kɔ. Ot kand kamat gog.
26Ndilɨn non ɓa ko bang, tur ngon murmur kɨ tɔgɨn, kamla nda lo tee kamat. Ngon to tit oi be, ad koosɨdeg elɨn anan: Oi. 27Na Jeju hɔ ji ngon, unan kɨ dõ, ad ngon ɓai ɗa dõ. 28Lon Jeju tel and kuju ye, i sed ngéndoog lon koon, ngéndoog loa ndɨjena anan: Kɨtɔɗi jĩ j'asɨ tuɓa ndil kɨmajal'n non al a? 29Jeju turd an: Ndil kɨ tit'n non a asɨ tee kam det kɨtakul kelta kɨ Luwah tã.
Jeju elta dɔ koint kɨ ɓain lo koit gog tɔ
(Oo Mat 17:22-23; Luk 9:43-45; Mrk 8:31-33)
30Ɓain lot'n non, awɨn ndan dɔning Galile gangɨn. Na Jeju ndig kad de mad ger al. 31El ngéndoog lon an: A lan Ngon de ji madngétaagt, a tɔlɨna, go ndɔgt kɨmita a ɓai lo koit. 32Na ngéndoog loa gerɨn girr ta'n non al ad ɓoolɨn kad'n ndɨjena ta dɔt.
Nõ i kɨbo tɔi a?
(Oo Mat 18:1-9; Mat 5:29-30; Luk 9:46-50; Mrk 10:35-45)
33Ɗe teen Kapernawmt. Lon ndɨn kam kujt ye, Jeju ndɨje ngéndoog lon an: Lon ĩn dɔ ɗobt ye, ɗi a i majɨn na ta dɔt a? 34Na ngéndoog loa, ndin tad mbo kɨta majɨn na ta kudt kɨ n'oon ke nõ i kɨbo tɔi a? 35Kamla Jeju ndɨ ber, kun ngombangkɨlag lon kɨkɨlah gidaijoo eld an: Ĩla de mad ndig kad nĩ kɨbo tɔi a ne, maj kad i ngekut go deg ho, ngeɗakɨla kad deg tube ho. 36Taa ne, un ngon kɨdu ndaa dandt, hɔa kɨ ront, na eld an: 37De'n ndɨ hɔ ngon kɨdu kɨɗen kɨ ront kɨtakul tarɨn tarɨm a ne, i mĩ kɨɓe la ndɨ hɔm kɨ ront ye, na de'n ndɨ hɔm kɨ ront a ne, i mĩ hã ndɨ hɔm kɨ ront al, na ndɨ hɔ ĩn hã lam.
De'n ndoorj al ye, i nat sej
(Oo Luk 9:49-50)
38Jã el Jeju an: Ngendooj. J'oo de mad ɗa tuɓa ndilg kɨmajal kam tɔit. Kɨ ndig kad j'ɔga dɔ kɨta i nat sej al. 39Jeju ela an: Ot kɔgɨna dɔ kɨta de'n ndɨ ɗa kɨlag kɨ yaya kam tɔmt ye, asɨ kelta kɨmajal dɔmt kanangbe al. 40Na de'n ndoorj al a ne, dea nõ i sej. 41Rota m'ndɨ m'elsɨ kɨ tɨga wakɨsɨ: Ĩla de mad adsɨ mankãi kɨlat kam tɔmt kɨta ĩn kɨ lo Krist a ne, dea nõ a nal nyabaji al bat.
Oon go rosɨ maj. Ot ɗan majal
(Oo Mat 18:6-9; Luk 17:1-2)
42Na dekɨɗen ndɨ ga ngan kɨ dug, ngékadɨm kamd'n ɗan gigt, ad soon kam majalt a ne, i soot kad lan mbal kusɨ nya kɨbobe kɔat lana ne kam bahbokat't. 43Ĩla jii ko kõi ɔsɨ kad i ɗa majal a ne, i ganga kɔ; i soot kad and kam kumkajirt kɨ jeje kɨ jii kɨ gind, tɔi kad kɨ jii joo aw kam jahanamat ad i horr kɨ dum tɔl. 44I lon kɨdeg a oint al bat, horra i kɨ dum tɔl. 45Ĩla njai tel nyagai gigt kad i so kam majalt a ne, i ganga i la kɔ; i soot kad and kam kumkajirt moot, tɔi kad lain kɨ njai kɨjoo kam jahanamat. 46Lot'n kɨdeg a oin tit al bat, na horra i kɨ dum tɔl tɔ. 47Ĩla kumi tel nya gai gigt tɔ a ne, i ɔrra i la kɔ sãi; i soot kad i and kam kõɓet lo Luwah kɨ kumi kɨɗa tɔi kad lain kɨ kumi kɨjoo kam horr jahanamat. 48Kɨtɔ i lo kɨ kɨdeg a oin tit al bat, horra i kɨ dum tɔl. 49Kɨtɔ dekɨɗen a telɨna kɨjaɓat't kɨ horr, tit'n a gan ne kat dɔ nyajamosɨkadkarit nõ be.
50Kat i nya kɨmaj, na ĩla mɨrã kat goto a ne, ndaa i ɗi a? Kɨ i ndɨn kɨ kat kam rosɨt, i ndɨn kɨ kam kɨsokɨber dɔ nat.
Currently Selected:
Mark 9: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
