Mark 7

Jeju elta nyabelɓe lo Parisɨg

(Oo Mat 15:1-9; Luk 11:37-41)

1Parisɨg kɨ ngéndoo deg madg ɗen ko kɨ Jerusalemt kawɨn na kɨ ro Jejut. 2Oon kad ku ngéndoogt lo Jeju, kɨmadg ndɨ san kuɓɨr bɨna kɨ jid kɨyerr ad i ji kɨkanj tugo, kɨgo nyabelɓet lo Parisɨg. 3Kɨtɔ Parisɨg kɨ ndeg Juipg tube a san nya kɨ ji kɨkanj tugo al, na a tugon jid maj kete kamtã kɨgo nyabelɓet lo kaadg. 4Lon a telɨn suku a ne, a ndogɨn man kamtã, la a san nya ye, nyabelɓeg lod ngãibe ton nõ tɔ, ĩn hã ndɨ ngomɨn go: Tit tugo kam kopg, kɨjoo hanjg, kɨ jo ninga kasɨ, kɨ nyatog. 5Kɨtɔ 'nten la Parisɨg kɨ ngéndang maktub elɨn ne Jeju anan: Kɨtɔɗi nyaɗa ngéndoog loi i kɨgo nyabelɓet lo bɔwjg al, na ndɨ san nya kɨ jid kɨkanj tugo a?

6Jeju turd an: Ĩn ngéndokumdeg. Ejai Ngekelta kɨ ta Luwaht ndɔ ndil dan dɔsɨ goɗobat tit'n ndangɨn kam tat lo Luwah an: Girrdeg'n ɗan ndɨ ɔsɨn gonɨm kɨ ndar tad, na ngarkamd i sãi sem.

7Ndɨ ɔsɨn dɔd ber nõmt kari kɨ ndang, kɨta nyandoo'n ndɨ ndoon ye, i mberkɨnda lo deg.

8Jeju eld tɔ an: I ndɨ nyan mberkɨnda lo Luwah kɔt ko kɨɗa, na i telɨn rosɨ go nyabelɓet lo deg.

9Jeju el tɔ an: I rota la i ndɨ mbetɨn tel rosɨ go mberkɨndat lo Luwah kad i ngomɨn nyabelɓeg losɨ ye. 10Titbe la Moij el an: Ɔsɨgon bɔwi kɨ kõi, kɨ de'n elta kɨmal dɔ bɔwɨnt, ke kon a ne sumba koi.

11Ĩgɨn i ndɨ ndoon deg anan: Ĩla de el bɔwɨn ke kon an: Nyan i ndig kad m'ɗan sei ye, i korbã ad i kadkari kɨ nda kɔtkokɨɗa kɨta Luwah.

12Na nya ta kad ɗa nya mad kɨta bɔwɨn, ke kon na i ndigɨn dɔt sia. 13Titbe i ndɨ telɨn ta lo Luwah nyat kɨ kari pãbe kɨtakul nyabelɓeg losɨ, i ndi ndan mbera ngansɨg kad telɨn rod got, kɨ nya madg ngãibe kɨ titbe'n i ndɨ ɗan nõ.

Ta lo nya'n a tel de kɨyerrt

(Oo Mat 15:10-20)

14Kamla, Jeju tel kun koosɨdeg gog eld an: Ĩn tube, i nelɨn mbisɨ oon ne dɔ ta lom kad i gerɨn girra maj. 15Nyasa mad kɨ de sa kɨ asɨ kad and kam det tela kɨyerrt goto, na nya'n ndɨ tee kam det kɨ tɨga la ndɨ tela kɨyerrt ye. 16De'n ndɨ kɨ mbin kɨta koo a ne, kɨ oo dɔ.

17Lon Jeju nya deg, na and kuju ye, ngéndoog loa ndɨjena ta dɔ tat'n el nõ. 18Jeju turd an: Ĩn tɔ asɨn kad i gerɨn girr ta 'nten ale? Oon ale? Nya mad kɨ ko tɨga kɨ and kam det, na tela kɨyerrt goto.

19Kɨtɔ nyasa a and ngarkam det al, na kaandat tã, ad tee njaɓe. Jeju elta 'nten kad deg gerɨn kad kɨ'n telɨn nyasa tube kɨjanjoit. 20Jeju eld tɔ an: Nya'n ndɨ tee ko kam det nõ la, ndɨ tel de kɨyerrt ye. 21Kɨtɔ ko kɨ keme ad i ko ngarkamdet la tagahg, ndil kɨmajal ndɨ teent, ndɨ ɔj ta dɔ ɗa ngawt kɨ sah dekɨdẽ, 22ɓog, tɔl de, kɨ ɗa kayag, kumndàg, ɗa majal kɨ deg, gool deg, kuma, kelta kɨmal, dɔ ngang, kɨ nyaɗa kɨ lo ɓoodt, 23nyag kɨmajal'n non tube ye, ko ngarkam det la ndɨ teent ye, ho ndɨ telɨn de kɨyerrt ho ye.

Dekɨdẽ kɨ Juip al adkamɨn Jeju

(Oo Mat 15:21-28)

24Kamla Jeju ɓai nõbe aw kam dɔningt kɨ Tir. And kam kujt, ndig kad de ger kad n'ndɨ kam kujt nõ al, be kaa ne, deg oon hoia kad ndɨ kam kujt nõ. 25Tentenbe dekɨdẽ mad'n ngona kɨdẽ aw kɨ ndil kɨyerr kamɨnt oo hoi Jeju kad ndɨ kam kujt nõ. Dekɨdẽ'n non aw so nja Jejut.

26I dekɨdẽ kɨ mbah, i de kɨ Penisit kam dɔning Sirit. Ndɨje Jeju kad ɔrr ndil kɨ majal kɔ kam ngonɨnt kɨdẽ. 27Na Jeju ela an: I nya ngan ngeɓeg ad san nyasa ndenɨn kete kamtã. I goot al kad de un nyasa lo ngang la ad ngan bisɨg.

28Dekɨdẽ tura an: Bɨraɓe, i rota, na ngan bisɨg a san bud nyasa'n tuson girr tabɨlt.

29Taa ne, Jeju ela an: Kɨtakul ta'n i turɨm ye, aw ɓe loi: Ndil kɨmajal tee kam ngonit kɨdẽ kɔ.

30Dekɨdẽ aw ɓe lon, ngah ngonɨn to dɔ tɨrat, ndil kɨmajal tee kamat woi.

Jeju yoot de kɨ ngekelta nikɨnikɨ kɨ mbɨmboo

(Oo Mat 15:29-31)

31Jeju ɓai dɔningt kɨ Tir, na tɔi kam dɔning Sidõt, tel ɗe gog kɨ bahbo Galilet ndah dɔning ɓebo kɨkɨlah gang. 32Ɗen kɨ de kɨ mbia oo dɔ ta al, kɨ elta nikɨnikɨ ro Jejut. Ndɨjen na kad nda jin dɔat. 33Jeju un de'n non aw sia sãi kad koosɨdegt, tɨla ngan jin mbiat, tiw hortan ɔdɨn ndõa. 34Goot taa ne, un kumɨn kɨ dõ dɔrãt, lako pũ kɨ tɔgɨn, na ela an: Epata. Ad i: Kɨ i mbut. 35Tentenbe mbi de'n non mbut ad oo dɔ ta, ndõa kaa ne, tut ad elta ɔrr njereng. 36Jeju ndamber deg kɨ tɔgɨn kad elɨn de mad nyan'n ɗa nõ al, na kɨ kaglo tube'n a ndad mber ye, deg a aw lan mber kɨlag tube'n Jeju ɗa. 37Ta ya deg biw kɨ dumbit ad elɨn anan: Nyag tube'n ɗa ye maj, ad deg kɨ mbid tɔ oon dɔ ta ho, deg ngékelta nikɨnikɨ elɨn ta ɔrr njereng tɔ ho.

Currently Selected:

Mark 7: MlL

Highlight

Copy