Mark 13
13
Jeju elta dɔ nujt'n kuj ndub Luwah a nuj
(Oo Mat 24:1-51; Luk 21:5-36; Mat 10:16-23; Luk 17:22-37)
1Lon Jeju ndɨ tee kam kuj ndub Luwaht kɨ tɨga ye, kɨkɨɗa ku ngéndoogt loa ndɨjea an: Ngendooj, oo. Mbal kɨ tɔsɨ kɨmaj, kɨ kuj kɨ kootɓool'n ɗa ɗen. 2Jeju tura an: Oo kuj kɨ majg'n ɗan ɗen ye, mbal mad kɨ a ndɨ dɔ mbalt mad goto, na a tɔsɨ tɨland kɨɗa kɨɗa tube.
Yaɓood kamkɔl kɨ darondo
3Jeju ndɨ dɔ mbal ɓirgt sumba kuj ndub Luwah sew. Pierr, Jak, Jã kɨ Andre ɔrrɨn Jeju ta dang na ndɨjena ta anan. 4Elj: Ɗɨngãt nyag'n non a ɗan nya a? Nyakɔj kɨ titbãi a ɗa nya kad kɨ gerɨn kad nyag'n non ndɨ tɔlɨn kond a?
5Taa ne Jeju mba girr keld ta an: Oon go rosɨ maj, na ɓet de mad goolsɨ. 6Kɨtɔ deg ngãibe a unɨn tɔm, a ɗen ne rosɨt, na a elɨn anan: Mĩ la mĩ Krist ye, kad goolɨn ne koosɨdeg ngãibe. 7Lon a oon hoi ɗɔɔg, kɨ kah ɗɔɔg ye, ot kadɨn kamsɨ gang man kɨta nyag'n non a ɗan nya titbe; na ĩn ten hã i dɔboi nyag al ɓaitɔ. 8Girr de mad a ɓai ndoor girr de mad, ngar mad a ɓai ɗɔɔ kɨ ngar mad. Dɔning a yee kɨ log kɨ dang dang; ɓo a õ deg kɨ lo lo. Nyag'n non tube i yaɓood tokooj ɓaitɔ. 9Na ĩn taa ne, oon go rosɨ maj. Deg a awɨn sesɨ nõ ngégangtat, a ndasɨn kam kuj kawnat lo Juipg kɨ ndeh, a awɨn sesɨ nõ ngékõɓegt kɨ ngarg kɨtatɔm, kad kɨ i manaj nõdt kɨtatɔm. 10Kɨtɔ, maj kad a lan mber Hoita kɨmaj girrdeg kɨ dang dang tube kete kamtã. 11Lon ndɨ awɨn sesɨ lo gangtat kad'n gangɨn ta dɔsɨt ye, ot soolɨn dɔ tat'n ɓet a elɨn, na ta kɨɗen a elɨn kaglot'n non ye, Ndil Kɨkunjɗang a nda ta tasɨt kad elɨn. 12Deg a unɨn dɔ ngankõdg kad tɔlɨnd; Bɔw ngon tɔ, a un dɔ ngonɨn; ngang a ɓai ndoorɨn ngékoojdg, ad deg tɔlɨnd kɔ. 13Deg tube a ɔsɨsɨnta kɨtatɔm, na de'n hɔ ron ba mbã dɔboia a ne, ĩla a aj ye.
Kamkɔl kɨbo a ɗe
(Oo Mat 24:15-51; Luk 21:20-36; Luk 17:22-37)
14Na lon a oon nya kɨ kɔked kɨ ngenujlo ɗalot'n sumba kad ɗat al. De'n ndɨ da nyag 'nten kɨ oo go ron maj. Kaglot'n non deg kɨ ngendɨ dɔning Judet a ãin na kɨ dɔ mbalbot. 15De'n ndɨ dɔ kujt a ne, ot ɗisɨ ber kɨta kand kuju kun nya mad jint. 16De'n i kam ndɔɔt a ne, asɨ kad tel kɨ ɓe kɨta kun kub lon al. 17Kam ndɔgt'n non dekɨdẽg ngéndan ngang, kɨ ĩgɨn ndɨ adɨn mba ngandg a ngang sed ngãi. 18Kɨtɔ 'nten i kɔ'n Luwah kad nyag'n non ten dɔsɨt dɔ nah kult al. 19Kɨtɔ ndɔg'n non a i ndɔ kamkɔl, kɨ de a oo kɨ tita kete al lo yaɓoodat nu, lon Luwah ndahn dɔning mbã ɓone. Deg a ngahn kõ kɨ titbe gog al ta. 20Ĩla Bɨraɓe gangta ndɔg'n non ad gɔj dep be al a ne, de mad kɨ asɨ ngah kaj goto na kɨtakul kɨmbedg'n Luwah mbed'd la Luwah gangɨn ta ndogɨn non ad gɔj ye. 21Ĩla de mad elsɨ an: Oon Krist i nẽbe. Ke Krist i nube. A ne, ot taan ta loa. 22Kɨtɔ Krist kɨ ngomg a ɗen, ngékelta kɨ ta Luwaht kɨ ngom a ɓaɨn ho, na a anan n'ndɨ nelɨn ta kɨta Luwaht. A ɗan nyakɔjg kɨ nyag kɨ yaya kad golɨn ne deg ho, kad nũ ne deg kɨ mbed lo Luwah kam mut. 23Ye oon go rosɨ maj. M'ug m'elsɨ nyag'n non tube kete woi.
Ngon de a tel ɗe
(Oo Mat 24:29-31; Luk 21:25-28)
24Na kam ndɔgt'n non, go kaglo kamkɔlt, til a ut kum kàd mbukɨ, nah kaa a ndaa al ho. 25Kɨmẽg kɨ dõ dɔrãt a tuson kɨ ber, tɔgg kɨ kam dɔrãt a yeen yɨkɨtyɨkɨt. 26Kamla a oon Ngon de a ɗe kam kilndiit, kam tɔgt kɨbobe ho, kam kunjt kɨɗangeɗeng ho tɔ. 27A la malaikag lon kad kawɨn kɨ mbedg lon kɨ dɔ kum dɔningt kɨsɔɔ kɨ nat, ɓai dɔ kum dɔning mad mbã teen dɔ kumat mad.
Nyandoo kɨ dɔ kag mbaiɓoodt
(Oo Mat 24:32-35; Luk 21:29-33)
28Maj kad i ndoon terrta kɨ dɔ kag mbaiɓoodt. Lon dɔjiag telɨn kɨ mbool, mbia ɗa hunj a ne, a i gerɨn kad ɓar kɨ kud i nderbe. 29Titbe tɔ ho, lon oon nyag'n non ndɨ ɗan nya a ne, i gerɨn kad Ngon de i nderbe tabit't. 30I rota la m'ndɨ m'elsɨ ye. Deg'n ndɨn kɨ dɔd dõ ɓone a oin tube al lon nyag'n non a ɗan nya. 31Dɔrã kɨ dɔning a tɔin kɔ, na tag lom a tɔin kɔ al bat.
De kɨ ger ndɔ ɗe ngon de goto
(Oo Mat 24:36-44)
32Na ta kɨ dɔ ndɔt ke kàda, ĩn hã nyag'n non ɓet a ɗan nyat ye, de mad kɨ ger goto, ke malaikag kɨ kam dɔrãt, ke Ngon. Na Bɔw kɨɗabe tã la ger ye. 33Oon go rosɨ maj. I ndɨn dɔgt elɨn ta kɨ Luwah; kɨta i gerɨn dɔkàd'n nyag'n non a ɗan nya tit al. 34A i tit de'n ndɨ aw mbah dɔ ɓet mad, nya kuj lon, ad tɔg ɓerg lon dɔ nyagt lon, kamla ad dekɨɗen kudt kɨla'n sumba kad ɗa, goot ndamber ngéngom tabit kad ndɨn ndɔgt. 35Kɨtɔ 'nten i ndɨn dɔgt. Kɨtɔ i gerɨn kaglo'n kɨɓe ngékuj a tel ɗen al. Ke i lokɨsɔle, ke denlot, ke dɔ kàd ko kɨnjat, ke kɨsĩ. 36Na ɓeta tel ɗe a hursɨ yedeng dɔɓit 37Nya'n m'ndɨ m'elsɨ nõ, m'ndɨ m'el deg tube: I ndɨn dɔgt.
Currently Selected:
Mark 13: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
