Mark 12

Terrta dɔ ndɔɔ nduut kɨ deg'n ɗan kɨla kamt

(Oo Mat 21:33-46; Luk 20:9-19; Eja 5:1-7)

1Kamla got, Jeju mba girr keld ta kɨ terrta. Eld an: De mad hɔ ndɔɔ nduu, nda kɨnga gugɨn dɔ, ɗa lo ɓa nduu tit ho, ɗa kuj kɨ ngal kɨ dõ kad'n ngomɨn ndɔɔ nduu. Kamla la ndɔɔ nduu ji ngéndɔɔgt kad kɨ ndɔɔn, na tɔi aw mbah dɔ ɓet kɨɗang. 2Lon dɔnah ja kand nduu asɨ woi ye, la ɓer lon mad ro ngéndɔɔgt kad kɨ taa gaj kand nduu lon jidt. 3Na deg kɨ ngéndɔɔ nduu hɔna ndana mbukɨmbukɨ, na tel tuɓana ad aw jin kari. 4Na ngendɔɔ nduu tel la ɓer mad kɨ dɔdt gog tɔ: Hɔn ɓer'n non tɨndan dɔa mbɔkɨmbɔkɨ, tajɨna ho ho, lan rosɔl dɔat. 5Ngendɔɔ nduu tel la kɨ ɓer mad kɨɗang gog tɔ, ngéɗakɨlag kam ndɔɔ nduut tɔlɨna. Kamla de kɨ ngendɔɔ nduu la kɨ ɓerg lon ngãibe ɓaitɔ. Deg kɨ ngéɗakɨlag kam ndɔɔ nduut tɨndan kɨmadg mbujmbuj, na tɔlɨn kɨmadg tɔ. 6Kɨɓe ngendɔɔ nduu a kɨ ngon'n kɨ nge tar kɨɗabe, la sia kɨ ro ngéndɔɔ nduut gog an: A ɓoolɨn ndil ngonɨm.

7Na ngéndɔɔg kɨmajal'n non elɨn na ta kudt anan: Ĩn ɗan la i ngekõnduba ye; ad kɨ hɔna, kɨ tɔlɨna, na jad nyanduba loa tel loj. 8Taa ne, tɔlɨn ngon kɨɓe ngéndɔɔ nduu, lana gid ndɔɔt kɔ.

9Jeju ndɨje ta an: Ɗi kɨɓe ngendɔɔ nduu a ɗa a? A ɗe, kad tɔl ngéɗakɨlag'n non, kamla a tel kɨ ndɔɔ nduu la ji degt kɨ ngéɗakɨlagt kɨɗang. 10I dan tag 'nten kam maktubt kɨkunjɗang'n el an: Mbal'n ngéɗakuj mbetɨna, mbal'n non la tel bɨradɔ kuj kɨ dõ ye ale?

11I kɨtakul ndig lo Bɨraɓe la telɨn titbe ye.

I nya kɨ ya kɨtatɔj ale?

12Kɨbog lo Juipg sahn ɗob kɨ'n hɔn Jeju. Kɨtɔ gerɨn ɓet kad terrta'n el ye, el dan dɔd. Na ɓoolɨn koosɨdeg; kɨta 'nten nya'n Jeju, na tɔi awɨn lo lod.

Parisɨg kɨ deg lo Herod ndɨjen Jeju ta dɔ kɔrr lambot

(Oo Mat 22:15-22; Luk 20:20-26)

13Parisɨg kɨ deg lo Herod Antipas lan kɨ deg madg kudt ro Jejut, kad ɓana kɨ gum ta kɨ taat 14Lon ɗen roat ye, elɨna anan: Ngendoo deg, kɨ ger kad ĩ Ngerota i ndɨ ɔrr de dene al, na i ndɨ ndoo deg kɨkanj ɓool kumd, kɨgo ɗobt kɨ Luwah ndig kad deg ndulon go elj i goɗobat kad kɨ ba lambo ngar Sejar a? Ke i goɗobat kad kɨ ba al a? 15Na tit kan Jeju ger ndokum lod ɓet ye eld an: Kɨtɔɗi i ndɨ namɨn ne a? I ɗen kɨ sile romt so ad m'oo. 16Ɗen kɨ sile adɨna, kamla Jeju ndɨjed an: Ndil de, kɨ tɔ de'n ndangɨn silet 'nten ye, i lo nõ a? Turɨna anan: I lo Sejar. 17Taa ne, Jeju eld an: Nya'n i lo Sejar ye, sumba kad adɨn Sejar, na nya'n i lo Luwah a ne, maj kad adɨn Luwah ho.

Ta kɨ ndɨje dɔ ɓai ku ngékoit

(Oo Mat 22:23-33; Luk 20:27-40)

18Kamla Saduki madg ɗen kɨ ro Jejut, ĩn deg kɨ ngékel kan ɓai lo ngékoig lo koit goto. Ndɨjena ta anan: 19Ngendoodeg. Moij ndang kam maktubt adj an: Ĩla de mad oi na nya nẽn kɨkanj ngon a ne, kɨ ngonkõa taa nẽa, titbe a ndakoh ngonkõn hã goto. 20Tag maɗi, ngankõnag ĩn tanãimɨta; kɨdasa taa dekɨdẽ, na oi kɨkanj nya ngang gootɨnt. 21Kɨ ngekõjoo taa dekɨdẽ'n non tɔ, na oi kɨkanj nya ngang gootɨnt. Kɨ kõmɨta kaa i titbe tɔ. 22Mbã ku ngankõnagt kɨtanãimɨta ye, tube taan dekɨdẽ'n non kɨkanj kad de kɨɗa kudt nya ngang gootɨnt. Goot gog taa ne, dekɨdẽ'n non ɗe oi ho. 23Ye ndɔ ɓai ngékoig lo koit, dekɨdẽ'n non, a i nẽ nõ jeje kudt? Kɨtɔ ngankõnag tanãimɨta la taana tube ye. 24Na Jeju turd an: I ndõmɨn ɗob, kɨtɔɗi i ndomɨn ne ɗob a? I kɨta i gerɨn girr maktubg kɨkunjɗang al ho, i gerɨn girr tɔg lo Luwah al ho. 25Kɨtɔ lon ngékoig a ɓain lo koit ye, dekɨdɨngã kɨ dekɨdẽg a taan na al ta, na deg a ĩn tit malaikag kɨ dɔrãt dõ. 26Na dɔtat lo ngékoig taa ne, i dan kam maktubt lo Moij lot'n elta lo du ngar kɨ horr i kamt nõ ale? I lot'n non la Luwah el Moij an: Mĩ Luwah lo Abraham, kɨ Isaak kɨ Luwah lo Jakob. 27Luwah i Luwah lo ngékoig al, na i Luwah lo ngékumkajɨrg, ye i udɨn mut kɨ rota.

Mberkɨnda kɨbo tɔi

(Oo Mat 22:34-40; Luk 10:25-37; Rom 13:8-10)

28De mad ku ngéndang maktubgt oo dɔ, ta'n majɨn na. Na oo kad ta'n Jeju tur ye, tur maj, ndɔt kɨ roat, na ndɨjea an: Ku mberkɨndagt ye, kɨɗen kudt i kɨbo tɔi a? 29Jeju tura an: Mberkɨnda kɨdasa bang laten: ĩ Israel oo dɔ. Bɨraɓe i Luwah loj, i kɨ kɨɗanbe la i Bɨraɓe ye. 30A i tar Bɨraɓe Luwah loi kɨ ngarkami tube, kɨ roi tube, kɨ tagahi tube, kɨ tɔgi tube tɔ. 31Kɨkõjoo tɔ laten: a i tar madɓei tit roi be. Mberkɨnda mad kɨbo tɔi ĩgɨn non goto.

32Ngendang maktub el Jeju an: Maj. Ngendooj, ta'n el ten i rota: Bɨraɓe kɨ kɨɗanbe la i Luwah ye. Luwah mad kɨɗang goto, na ĩ tã; 33sumba kad dekɨɗen tara kɨ ngarkamɨn tube, kɨ tagahn tube kɨ tɔgɨn tube, sumba kad dekɨɗen tar madɓen tit ron be, telrogotat 'nten i soot ngãi tɔi kadkarig kɨla horr kɨ kadkarig kɨjakɔ tube. 34Jeju oo kad ngendang maktub turta kɨ goosɨ ye, ela an: Ĩ sãi al kɨ kõɓe lo Luwah. De mad kɨ ire kamɨn kad'n ndɨje ta kɨ titbe Jeju goto ta.

Jeju ndɨje ta dɔ ngon Dabidt

(Oo Mat 22:41-45; Luk 20:41-44)

35Jeju ɗa ndoo deg kam kuj kawnat lo Juipg. Ndɨje ta 'nten deg an: Titbãi ngéndang maktub ndɨ elɨn anan Krist i Ngon Dabid a? 36Dabid ĩ kɨɓe, Ndil Kɨkunjɗang ɔrra ta ɗob ad el an:

Bɨraɓe el Bɨraɓe lom an:

I ɗe i ndɨ dɔ jikõmt

mbã kad m'tel madngétaig mad ĩn girr tɔgit.

37Ĩla Dabid ĩ kɨɓe el an: Krist i Bɨraɓe lon a ne, titbãi hã Krist a i ngon Dabid a?

Jeju el deg kad oon go rod maj dɔ ngéndang maktubt

(Oo Mat 23:1-14; Luk 20:45-47)

38Jeju ndood kam nyandoot lon an: Oon go rosɨ maj. Ot ɗan nya tit ngéndang maktub'n neld la kub kɨ ngal maj maj, a ndian ne kɨ dɔ ɗobg kad ɗand lapia kɨ kɔsɨgon kam sukɨgt. 39Deg'n non ĩn ngésah lo ndɨ kɨmaj kam kuj kawnat lo Juipg, kɨ lo ndɨ de kɨbog lo mburr namt. 40Ĩn deg kɨ ngétaanyag lo dekɨdẽ ngéngawkoig tube; ĩn deg kɨ ngékelta ngãi; kad deg oon kad ĩn ngékelta kɨ Luwah jeje, na i ndokum koon. Kɨtɔ 'nten, takɨgang lo Luwah'n a gang dɔdt ye, a ot ɓool tɔi lo ndeg deg.

Jeju ɔsɨgon dekɨdẽ kɨ ngengawkoi'n ad Luwah nyaɓetro lon tube

(Oo Luk 21:1-4)

41Kam kuj ndub Luwaht Jeju ndɨ ber sumba sand sew, oo koosɨdeg'n ɗa lan nar kadkarit adɨn Luwah. Ngényamajg ngãibe ũn nar lod kam sundt nõ ho. 42Dekɨdẽ mad kɨ ngendo ɗe ho, ũ ngan sile joo kam sund nart. Sile kɨjoo nõ asɨ nar joo. 43Taa ne, Jeju kun ngéndoog lon kɨ ront, na eld an: I rota la m'ndɨ m'elsɨ ye, nya'n dekɨdẽ kɨ ngengawkoi la kam sundt ye, tɔi kɨ lo ndeg deg tube. 44Kɨtɔ deg'n non tube adɨn gaj nya kɨ tẽbe kam nyamajg lod kɨ to mbuj; na dekɨdẽ'n non taa ne, kam ndot loa, ad nyaɓetron kɨtaagbe.

Currently Selected:

Mark 12: MlL

Highlight

Copy