Mark 11

Jeju and Jerusalemt

(Oo Mat 21:1-11; Luk 19:28-40; Jã 12:12-19)

1Jeju kɨ ngéndoog ĩn nderbe kɨ Jerusalem, kɨ Betpaje kɨ Betanit, nderbe kad mbalbo kag olibt ye, Jeju la ngéndoog lon joo. 2Eld an: Awɨn kam ngon ɓet'n ɗa nõsɨt nõ, nõbe a i ngahn ngon korro kɨ dɔnah kɨ kɨla, ĩn hã de ɓai dɔat al ɓaitɔ. I tutɨn na, i ɗen sia so. 3Ĩla de mad ndɨjesɨ an: Kɨtɔɗi i ɗa i tutɨn ne korro ye a? A ne a i elɨna anan: Ngej la ndɨ ge korro ye na, a tel lan gog tajigne.

4Ngéndoog aw ngahn ngon korro, ɗa tɨga dɔ ɗobt, i kɨ dɔ tabit kujt, ad tutɨn na. 5Deg madg ɗan nõ, kɨmadg kudt ndɨjed anan: Ɗi i ɗa i ɗan titbe a? Kɨtɔ ɗi i ɗa i tutɨn ne ngon korro a? 6Ngéndoog turɨnd tit'n Jeju eldɨn ad deg nyand ad awɨn. 7Lon ngéndoog ɗen kɨ ngon korro ro Jejut ye, ũn kubg lod dɔat adɨn Jeju ndɨdɔt. 8Deg ngãibe najɨn kubg lod dɔ ɗobt na kɨmadg un dɔ ji kagg kɨ mbool'n tɨgan kam ndɔɔgt un dɔ ɗobt ho. 9Ngéndia kete nõ Jejut kɨ ĩgɨn ndulon goa ye, kon anan: Hosana. Kɔsɨgon kɨ dɔ Luwaht, kɨ Luwah njang dɔ ĩn hã ndɨ ɗe kam tɔ Bɨraɓet. 10Kɨ Luwah njang dɔ kõɓe'n ndɨ ɗe, ad i kõɓe lo bɔwj Dabid. Hosana kam log kɨ tɔitɔi kɨ dõ. 11Jeju aw tee Jerusalemt, kamla and kam kuj ndub Luwaht. Nda kumɨn nulɨn nyag tube mbet't, na tɔi aw Betanit nat sed ngombangkɨlag lon kɨkɨlah gidaijoo, kɨta lo sɔl yelel woi.

Jeju nda ndɔl dɔ kag mbaiɓoodt

(Oo Mat 21:18-19)

12Loti goot, lon ɓain Betanit ndɨ awɨn ye, ɓo õ Jeju. 13Oo kag mbaiɓood mad ko sãi, mbia la durur; ndɔt kɨ girrt kɨ n'oo ke ɓet n'an ngah kanda tit a? Na lon ndɔt ɗe tee girr kagt ye, ngah nya mad al, na mbi mbaiɓood koon; kɨta i dɔ nah kand mbaiɓood al ɓaitɔ. 14Taa ne, Jeju elta kag mbaiɓood an: Labekɨnõt, de kɨ a sa kandi goto. Ngéndoog loa oon dɔ ta'n el nõ.

Jeju tuɓa ngéɗagatg kam kuj ndub Luwaht

(Oo Mat 21:12-17; Luk 19:45-48; Jã 2:13-22)

15Aw teen Jerusalemt. Jeju and kam kuj ndub Luwaht, mba girr tuɓa deg ngéɗagat, kɨ ĩgɨn ɗa ndugon nyag kam kuj ndub Luwaht kɔ. Jeju tɔsɨ tabɨlg lo deg ngémbel nar kɨ komberg lo deg kɨ ngéɗaw derrg tɨlad kɔ; 16na nya de mad, ad un nya mad teen kam kuj ndub Luwaht kɨ tɨga al. 17Kamla ndoo deg eld an: Ndangɨn ta 'nten kam maktubt kɨjaɓat ale? Kuj lom a kunɨna kuj kelta kɨ Luwah kɨta girrdeg kɨ dang dang, na ĩn taa, i telɨna bulo to ngékumɗobg. 18Kɨbog lo ngéjanyamosɨkadkari, kɨ kɨbog lo ngéndoo deg mberkɨnda oon hoi nya'n ɗa nya nõ; ad deg'n non sahn ɗob kɨ'n tɔlɨn Jeju kɔ; na ɓoolɨn kɨta nyandoo loa dum dɔ koosɨdeg tube. 19Lon lo sɔl ye, Jeju kɨ ngéndoog lon ten kam ɓebot kɨ tɨga.

Jeju ndoo ngéndoog lon girrta lo kag mbaiɓood

(Oo Mat 21:20-22)

20Loti gog kɨsĩ, lon ndɨ tɔin dɔ ɗobt ye, ngéndoog lo Jeju oon kag mbaiɓood kan Jeju nda ndɔl dɔat nõ tut kurum kɨ ngɨrang be. 21Kam Pierr gah dɔ nyat'n ɗa nya ad el Jeju an: Ngendooj, oo kag mbaiɓood kan i ndɔla ye, tut kurum. 22Taa ne, Jeju el ngéndoog lon an: Adɨn kamsɨ Luwah.

23M'ndɨ m'elsɨ kɨ tɨga wakɨsɨ, i rota; ĩla de mad el mbalbo'n ɗan an: I ndɔt kɔ lot'n i ɗat, na i kɨla i so kam bahbo kat't; na ĩla de'n non ɓad kamɨnt al bat, na ndahkamɨn dɔ tat'n el nõ a ne, nya'n non a ɗa nya titbe kɨtatɔa. 24Kɨtɔ 'nten m'ndɨ m'elsɨn. Lon i elɨn ta kɨ Luwah, na i kɔna nya mad a ne, i ndan kamsɨt kad nya'n i kɔ'n ye, i ngahn woi ad Luwah a adsɨ. 25Kaglot kɨɗen'n i ɗa elta kɨ Luwah, ĩla ĩn kɨ ta kɨ de mad a ne, maj kad i nyan go majal loa kɔ, kɨtakad bɔwsɨ kɨ i kam dɔrãt dõ nyan go majalg losɨ ho.

26Na ĩla i nyan go majal lo deg kɔ al a ne, Bɔwsɨ kɨ kam dɔrãt dõ a nyàgo majalg losɨ kɔ al ho.

Kɨbog ndɨjen Jeju ta dɔ tɔgt loa

(Oo Mat 21:23-27; Luk 20:1-8)

27Jeju kɨ ngéndoog lon tel ɗen Jerusalemt gog. Lon Jeju ndɨ kam kuj ndub Luwaht ye, kɨbog lo ngéjanyamosɨkadkari, kɨ kɨbog ngéndang maktubg kɨ kɨbog lo Juipg ɗen roat. 28Na ndɨjena anan: Kɨ tɔg kɨ ɗi i ndɨ ɗa'n nya 'nten a? Nõ adi tɔg 'nten kad i ɗan nyag 'nten a? 29Jeju eld an: Mĩ kaa ne, m'am ndɨjesɨ ta mad ho, maj kad i turmɨn kamla ɓet m'a m'elsɨ tɔ de'n adɨm tɔg kad m'ɗan nyag'n non ye. 30Baptem'n Jã ɗa deg ye, ɓai ko dõ dɔrãt e? Ke ɓai ko ro degt a? I turmɨn ad m'oo. 31Na deg'n non ɔjɨn na ta kɨnadt anan: Ĩla kɨ tur j'an: I Luwah la la sia a ne, Jeju a el an: Kɨtɔɗi kɨ taa ta'n Jã el nõ al a?

32Na ĩla kɨ tur j'an: Baptem ɓai ko ro degt a ne, kɨ ndɨ kɨ ɓool koosɨdeg; kɨta deg tube oon Jã tit ngekelta kɨ ta Luwaht jeje. 33Kɨtɔ 'nten turɨn Jeju anan: Kɨ ger al. Jeju kaa turd an: Mĩ tɔ, m'a m'elsɨ kɨ tɔg kɨ titbãi m'ndɨ ɗan nyag'n non al.

Currently Selected:

Mark 11: MlL

Highlight

Copy