Matie 5

Nya'n Jeju ndoo deg dɔ mbalt

(Oo Luk 6:20-26)

1Lon Jeju oo bakad deg koosɨg ye, al dõ dɔ mbalbot, kamla ndɨ ber, na ngéndoog loa ɗen roat. 2Ta la Jeju tee tan ndoodɨn, an:

3Ngéronelg la ĩn ngéndog kam ndildt ye,

kɨta kõɓe kɨ dɔrãt dõ i lod.

4Ngéronelg la i deg'n ndɨ hɔn ndo ye,

kɨta Luwah a sɔlkamd.

5Ngéronelg la ĩn deg kɨ sayelɨl ye,

kɨta Luwah a ad'd õn nduba dɔning kɨgo kunkɔt loa.

6Ngéronelg la in deg'n ɓo kɨ kɨnda ɗa nya kɨdenesew,

ndɨ õd ye, kɨta Luwah a ad'd ndenɨn.

7Ngéronelg la ĩn ngékookumtondo lo deg ye,

kɨta Luwah a oo kumtondo lod.

8Ngéronelg la ĩn deg'n kamd janjoi ye,

kɨta a oon Luwah.

9Ngéronelg la ĩn ngéla deg nooj nat kɨ kam kɨsokɨber ye,

kɨta a kunɨnd ngan Luwah.

10Ngéronelg la i ĩgɨn deg dan rod ndo kɨta

nyaɗa kɨdenesew ye,

kɨta kõɓe kɨ dɔrãgt i lod.

11Ĩn ngéronelg, lon deg a tajsɨn, a dan rosɨ ndo, a elɨn takɨbal kɨ dang dang dɔsɨt kɨta kĩsɨ ngéndoog lom. 12I ɗan ronel, kɨ kamnda kɨ dumbit. Kɨtɔ nyabajisɨ a i kɨbobe kam dɔrãt dõ, kɨta titbe la dan ne ro ngékeltag kɨ ta Luwaht ndo, ĩgɨn ɗen kete nõsɨt ye.

Ngékadkamg ĩn kat kɨ kunj dɔning

(Oo Mrk 4:21-23; Luk 8:16-18; 1 Pie 2:9-12)

13Ĩn kat dan degt kɨ dɔningt; na ĩla mɨrã kat goto a ne, ndaa i ɗi a? Maj kɨta nya mad al, na kũa kɔ kad deg ɓan kɨ njad tã koon.

14Ĩn kunj lo deg kɨ dɔningt. Ɓe'n ndahna dɔ mbalt dum yaro. 15De a ndah horr lambat kɨta la girr ngot kɨbo al, na a ndaa dõ dɔ kag nda lambat tã, kad unj dɔ degt tube kɨ kam kujt. 16I titbe la kɨ adɨn kunjsɨ unjɨn nõ degt kɨtakad oon kɨlaɗasɨg kɨmaj, kad ɔsɨn ne gon bɔwsɨ kɨ kam dɔrãgt dõ.

Ta kɨ mbɨna Krist't kɨ mberkɨnda lo Moij

(Oo Luk 12:58-59; 16:18)

17Ot koon Kana m'ɗe kɨta kɔrr mberkɨnda lo Moij kɨ kɨlo ngékeltag kɨ ta Luwaht kɔ. M'ɗe kɨta kɔrr kɔ al, na kɨta tɔlta tag kad asɨnatap. 18Kɨtɔ, m'ndɨ m'elsɨ rota, lon dɔrã kɨ dɔning tɔin kɔ al ɓaitɔ, nya mad kɨɗa kɨndang kɨdu tẽbe, ke kɨ ngon mesirr be kaa a tɔi kɔ kam mberkɨndat lo Moij al, mbã kad nyag tube ɗan nya kamtã. 19Kɨtɔ 'nten dekɨɗen'n tɔi dɔ kɨkɨɗa lo kɨdu tɔi ku mbergt'n non, na ndoo deg kad ɗan titbe ho a ne, a kunɨna kɨdu tɔi kam kõɓet kɨ dɔrãgt. Na dekɨɗen a ɗago mberkɨndat, na ndoo deg kad ɗan goot ho a ne, a kunɨna kɨbo tɔi kam kõɓet kɨ dɔrãgt. 20Kɨtɔ m'ndɨ m'elsɨ: Ĩla nyaɗasɨ kɨdenesew tɔi kɨ lo ngéndang maktubg, kɨ Parisɨg al a ne, a andɨn kam kõɓet kɨ dɔrãgt al bat.

Mberkɨnda lo Jeju

21Oon dɔ: Elɨn ngékɨkete anan: A i tɔl de al, de'n tɔl de a ne, kɨ awɨn sia logangtat. 22Na mĩ, m'ndɨ m'elsɨ: Dekɨɗen ndɨ ɗa wong kɨ ngonkõ a ne, kɨ awɨn sia logangtat; dekɨɗen ndɨ el ngonkõ an raka: Ad i de kɨ pãbe tɔ a ne, asɨ ta kad ngékɔjtag ɔjɨna kuma, na de'n a el ngonkõ an: Ĩ ɓood de a ne, asɨ ta kad aw kam horr Jahanamat. 23Kɨtɔ 'nten lon i ndɨ i la kadkari loi kɨ dɔ dɨngɨr kadkarit, na nõbe kami gah dɔ ngonkõit kɨ aw sei kɨ ta mad a ne, 24i nya kadkari loi nõbe kɨ dɔ dɨngɨr kadkarit, na aw i la nooj nat kɨ ngonkõi kete, kamla i ɗe i la kadkari loi ad Luwah ye.

25I la nooj nat kɨ madkɔli kanangbe lon ĩn ne sia dɔ ɗob kaw logangtat ɓaitɔ; na ɓeta madkɔli lai ji ngegangtat, ngegangta a lai ji asɨgart, na asɨgar tɔ a lai dangait. 26M'ndɨ m'eli rota; a i teet al bat mbã i ba dɔboi sile.

Nyandoo lo Jeju dɔ sah dekɨdẽt kɨ sah ngawt

27Oon dɔ elɨn maɗi anan: A i sah dekɨdẽ ke i sah ngaw al. 28Na mĩ m'ndɨ m'elsɨ m'an: Dekɨdɨngã'n ndɨ nɔl dekɨdẽ mbã, ad nyura õa a ne, saha ngarkamɨnt woi. 29Na ĩla kumi ko kõi i nya kɨ gai gigt kad i so a ne, ɔrra i laa kɔ sãi; kɨta i sooit kad ngonroi kɨkɨɗa nuj kɔ, tɔi kad lan dãroi kɨtaagbe kam horr Jahanamat. 30Na ĩla jii ko kõi i nya kɨ gai gigt kad i so a ne, i ganga i laa kɔ sãi. Kɨtɔ i sooit kad ngonroi kɨkɨɗa nuj kɔ, tɔi kad lan dãroi kɨtaagbe kam horr Jahanamat.

Nyandoo lo Jeju dɔ tuɓa dekɨdẽt

(Oo Mat 19:9; Mrk 10:11-12; Luk 16:18)

31Elɨn maɗi tɔ anan: Dekɨdɨngã'n ndɨ tuɓa nẽn a ne, kɨ ada maktub tuɓa. 32Na mĩ m'ndɨ m'elsɨ: Ĩla dekɨdẽ ɗa ngaw al a ne, na ngawa tuɓaa, de'n non ndɨ ndah nẽn kayat kɨ ɗa; na de'n a taa dekɨdẽ kɨ ngawa tuɓa kɨtɔ ɗa ngaw a ne, ndɨ saha ta sah.

Nyandoo lo Jeju dɔ yokɨndat

(Oo Mat 12:36; Mat 23:16-22; Jak 5:2)

33Oon dɔ tɔ elɨn ngékɨkete anan: A i nda yo kɨ ta kɨ ngom al, na nya'n un kɔi i ndan yo ad Bɨraɓe nõ, a i tɔl kona. 34Na mĩ m'elsɨ: A i ndan yo al bat, ke kɨ nya mad kɨ dɔrãt dõ kɨta i pong kõɓe lo Luwah, 35ke kɨ nya mad kɨ dɔningt nẽ, kɨta i ɓebo lo Ngar kɨbo. 36A i nda yo kɨ dɔit al ho, kɨta asɨ kad bisɨdɔi kɨ kɨɗabe tel kɨndà ke kɨ kil al. 37Na adɨn ta losɨ i ãã, ke ã ã koon; ta'n a elɨn tɔi dɔ ĩgɨn non taa ɗe kokɨro ngemajalt.

Nyandoo lo Jeju dɔ ndangɨrat

(Oo Luk 6:29-30)

38Oon dɔ elɨn maɗi anan: Kum kɨta kum, ngang kɨta ngang; 39na mĩ m'ndɨ m'elsɨ, ot ndan ngɨra dɔ det'n ndɨ ɗa sesɨ majal, na ĩla de mad nda kɔti ko kõi a ne, i tel ko kɨ mad ada tɔ. 40Ĩla de mad ndig kaw sei lo gangtat kɨ'n taa ngamaj loi a ne, i nya kubkul loi ada kɨdɔt. 41Ĩla de mad hɔi kɨ lo ngetɔgt kɨ n'aw sei kilometɨr kɨɗa a ne, aw sia mbã kilometɨr joo. 42De mad ndɨ kɔi nya a ne, ada. Na ot tel gidi kad de'n ge tɨnai nya ho.

Nyandoo lo Jeju dɔ tar madngétagt

(Oo Luk 6:27-36; Rom 12:17-21)

43Oon dɔ elɨn anan: A i tar madɓei, na a ɔsɨta madngétai. 44Na mĩ m'ndɨ m'elsɨ: I tarɨn madngétasɨg; i njangɨn dɔ ĩgɨn hã ndɨ ndɔlsɨn, i ɗan maj kɨ ĩgɨn ndɨ ɔsɨsɨn ta, i kɔɔn Luwah kɨta deg kɨ ngédarosɨndo, kɨ ngéndoorsɨ, 45kɨtakad ĩn ne ngan bɔwsɨ kɨ dɔrãt dõ; kɨta ndɨ ad kàd lon ɓa dɔ ngéɗamajalgt, kɨ ngéɗamajg tu, ndɨ ad man ndii ed dɔ ngéɗadenesewt kɨ ngéɗadenesew al tu. 46Na ĩla i ndɨ i tarɨn ngétarsɨ tã a ne, nyabaji losɨ i ɗi a? Ngétirr nya ndɨ ɗan titbe ho ale? 47Na ĩla i ndɨ i ɗan lapia ngankõsɨg tã koon a ne, i ɗan ɗi kɨtadang kɨ tɔi lo deg madg a? Deg kɨ gerɨn Luwah al ndɨ ɗan titbe ho a le? 48Kɨtɔ 'nten la maj kad ĩ ne deg kɨkasɨnatap tit'n bɔwsɨ kɨ dɔrãt dõ ĩn kɨkasɨnatap ye be ho.

Currently Selected:

Matie 5: MlL

Highlight

Copy