Malaki 3
3
Ɗe ngeɗago ɗob lo Bɨraɓe
1Oon, m'ndɨ m'la ngombangkɨla lom, a ɗago ɗob nomt, na Bɨraɓe'n i ndɨ sahna a tee pat, ud kam kujt lon kɨjaɓat. Oon, ngombangkɨla lo kunkɔ'n i ɗan ronel sia ye, ndɨ ɗe, kel Bɨraɓe Ngekoosɨg. 2Nõ asɨ hɔ ron ngang ndɔ ɗeat a? Nõ a asɨ ɗa dõ ndɔ teeat hɔi a? Kɨtɔ a i tit horr lo ngekar hand kɨ tit sabõ lo ngetugo kub be. 3A ndɨ tit de kɨ ngekar nar arjã ad janjoi. A ar ngan Lebi kɨdɨngã kad telɨn kɨjanjoi tit nar ɔrr kɨ nar arjã be kɨtakad lan kadkarig kɨgoɗobat adɨn Bɨraɓe. 4Kamla kadkari lo Juda kɨ Jerusalem, a nel Bɨraɓe tit kɨ kam ndɔgt kɨ maɗi, kɨ kam ɓalg kɨkete nu. 5M'a m'ndɔt kɨrosɨt kɨta gangta, m'a m'manaj kanangbe dɔ mbooligt kɨ ngéɗakaya kɨ ngéndayo kɨngom, kɨ ĩgɨn ɗan ngetɔg dɔ nyabaji ngéɗakɨla kɨ ĩgɨn dan kum ngéngawkoi kɨ ngonhal ndo, kɨ ĩgɨn ɗan majal kɨ mbahg na ɓoolmɨn al, titbe i takel Bɨraɓe Ngekoosɨg.
De a ɓoog Luwah al
6Mĩ Bɨraɓe, m'mbel al, kɨta 'nten la ĩn ngan Jakob i nujɨn ne al ye. 7Tit kɨ kaglot lo bɔwsɨg kɨmaɗi, i nyan go mberkɨnda lom kɔ, i ngomɨn go al. I telɨn kɨromt, na mĩ m'a m'tel kɨrosɨt ho, kel Bɨraɓe Ngekoosɨg. Na elɨn anan: Titbãi j'a kɨ tel kɨ roat a? 8De a ɓoog Luwah a? Kɨtɔ i ndɨ i ɓogɨmɨn. Na elɨn anan: Kam ɗit kɨ ndɨ kɨɓogit a? Kam gaj kɨkɨɗa ku kɨkɨlaht kɨ kadkarig kɨlakad. 9Ĩn kɨ ndɔl kɨta i ɓogɨmɨn, ĩn girrdeg'n ɗan kɨtaagbe, 10I ɗen kɨ gaj kɨɗa ku kɨkɨlaht kam kujngomnyat kɨtakad nyasa i kam kujt lom, Titbe i namɨn oon, kel Bɨraɓe Ngekoosɨg, ke m'a m'tee burrolog kɨdɔrãt kɨtɔsɨ, ke m'a m'ũ majkurr kɨtombuj dɔsɨt al a. 11Kɨtatɔsɨ la m'a m'ndangɨn ngetujnya kɨtakad tuj kandnya losɨ kɨdɔningt al, dĩndu kam ndɔɔt losɨ a nal kanda al tɔ, kel Bɨraɓe Ngekoosɨg. 12Kamla girrdeg tube a elsɨn anan: In ngémajkurr, kɨta dɔning losɨ a i dɔning ronel, kel Bɨraɓe Ngekoosɨg.
Tɔrr go nya kɨmaj kɨ nya kɨmajal nat
13I ndoormɨn kɨ tag losɨ kɨngang, kel Bɨraɓe, na i ndɨ anan: Ta ɗi j'el kɨ ndoorɨn? 14Elɨn anan: Ɗa ɓer kad Luwah i kari kɨndang, ɗi j'a kɨ ngah lo ngomgo mberkɨndat loa kɨ ndia kɨ hɔndo nõ Bɨraɓe Ngekoosɨgt a? 15Tajigla ndɨ j'el j'an: Ngedɔngangg la in ngéronel, na ngéɗamajal in ngémajkurr, ndɨ nán Luwah oon na teen kɨ lapia kari. 16Kamla ĩgɨn ɓoolɨn Bɨraɓe ye, elɨn na ta kudt na Bɨraɓe nel mbin oon dɔ. Ndangɨn maktub ga kamdɔt, ndan nõat kɨta ĩgɨn ɓoolɨn Bɨraɓe na gaan dɔ tɔat. 17A ĩn lom, kel Bɨraɓe Ngekoosɨg, a ĩn lom ndɔt'n m'a m'ɗago nyamajg lom kɨkɔsɨdɔm. M'a m'ɔjd kamkẽ tit'n de a ɔjɨn kamkẽ ngonɨn kɨ ngeɗakɨlaɓer kadɨn. 18Kamla a i tel ɔrrɨn mbɨna de kɨdenesew kɨ de kɨmajal, de kɨ ngeɗaɓer kad Luwah kɨ de kɨ ngeɗaɓer kada al.
Ndɔ lo Bɨraɓe ndɨ ɗe
19Kɨtɔ oon, ndɔ ndɨ ɗe tɨngabil tit pur be. Ngédɔngang tube kɨ ngéɗamajalg tube a i tit mũ be. Ndɔ ndɨ ɗe õd mugɨj kel Bɨraɓe Ngekoosɨg. A nya ngɨra kag ke dɔj kag al. 20Na kɨ tɔsɨ, ĩn ngéɓool tɔm ye, kad kɨdenesew a ɓa kɨ yoot girr bɔgɨnt. A i teen, a i ɓai kɨdɨtalg titɨn ngan mangg a teen lo kuldt be. 21A i ɓan dɔ deg kɨ majal kɨta a i ĩn tit buhoor be girr danjasɨt dɔ ndɔt'n in m'a m'ɗa nya 'nten, kel Bɨraɓe Ngekoosɨg. 22I gan kamsɨ dɔ mberkɨndat lo ɓer lom Moij in m'ndambera dɔ mbal Horebt kɨta Israelg tube mberkɨndag kɨ takɨgang. 23Oon m'a m'la Eli, ngekelta kɨ tamt, m'a m'la kɨrosɨt kete nõ ndɔt kɨ bo kɨkootɓool lo Bɨraɓe in ndɨ ɗe 24A i tel kɨ ngarkam bɔw kɨ ro ngandgt kɨ ngarkam ngang kɨ ro bɔwdgt na ɓeta m'ɗe m'nda dɔning kɨ ndɔl.
Currently Selected:
Malaki 3: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
