Luk 22
22
Kɨbog lo Juipg sahn ɗob tɔl Jeju
(Oo Mat 26:1-16; Mrk 14:1-16)
1Ɗa nah bɨna kɨkanj berrkasɨ kɨ a kunɨna Pakɨ i nderbe. 2Ngéjamosɨkadkari kɨbog kɨ ngéndoo Maktubg sahn ɗob kɨ'n tɔlɨn Jeju, na ndɨ ɓoolɨn deg.
Judas ndig la Jeju ji madngétaagt
(Oo Mat 26:14-16; Mrk 14:10-11)
3Judas'n tɔa kɨmad i Iskariot, i kɨkɨɗa ku ngéndoogt kɨkɨlah gidaijoo lo Jeju. Sitan and kamat. 4Titbe aw, ɔj ta kɨ ngéjanyamosɨkadkari kɨbog, kɨ bɨradɔ ngéɗɔɔg ĩgɨn ĩn ngéngom kuj ndub Luwah dɔ nyat'n n'an ɗa kad'n lan Jeju jidt. 5Deg'n non ɗan ronel dɔt, unɨn kɔd adɨna anan: J'a jadi nar.
6Judas ndig dɔt, aw sah ɗob kad'n lan Jeju jidt kɨkanj kad deg gerɨn.
Jeju el ngéndoog lon kad ɗan go Pakɨ
(Oo Mat 26:17-29; Mrk 14:12-25; 1 Kor 11:23-29)
7Ndɔ ɗa nah bɨna kɨkanj berrkasɨ ɗe woi. Kari na a jan ngon bat Pakɨt ndɔt'n non. 8Jeju la Pierr kɨ Jã an: Awɨn, i ɗan go Pakɨ kɨtaj, kɨtakad kɨ san.
9Elɨna anan: Lo kɨɗen i ndig kad kɨ ɗat a?
10Eld an: Oon maj. Lon a andɨn kam ɓet ye, de mad a ndɔdsɨ, de'n non a to man kɨ ɓir. I ndulon goa mbã kɨ kam kujt'n a andt. 11A elɨn ngekuj anan: Ngendoo deg ndɨjei: Ke kuj mbahg'n m'a m'sa Pakɨt tit nat kɨ ngéndoog lom i ɗa a? 12A dasɨ kuj mad kɨbo kɨ dõ, ĩn ɗan goa woi; nyag tube ĩn kamt kɨta ɗa nah Pakɨ.
13Awɨn, a kɨ ngahn nyag tit'n eldɨn ye be, ɗan go Pakɨ tit nõbe.
Jeju la girr kawna'n tɔa i mburr nam kɨhɔ kɨ Bɨraɓe
(Oo Mat 26:26-30; Mrk 14:22-26; 1 Kor 11:23-26)
14Lon dɔkàd asɨ woi ye, Jeju ndɨ ber ta nyasat sed ngombangkɨlag. 15Eld an: M'ge ngãi kɨ m'sa Pakɨ 'nten nat sesɨ kamtã la kɨ m'dai yom kɨ kõ ye. 16Kɨtɔ m'elsɨ m'a m'sa gog al ta, mbã kad girra kɨ jeje tee kam kõɓet lo Luwah. 17Kamla Jeju taa kop, ɗa mersi Luwah, na eld an: I taan, 'nten i kegɨn na kɨnasɨt. 18Kɨtɔ m'elsɨ, nẽbekɨnõt, m'a m'ãi man kand nduu gog al, mbã kõɓe lo Luwah ɗe kamtã. 19Kamla un bɨna ɗa mersi hɔ tet ad'd an: 'Nten i dãrom ĩn adɨn kɨtɔsɨ. I ɗan nya 'nten kad i nya ndahkamdɔt. 20Titbe tɔ la un kop go nyasat, an: Kop 'nten i kij kunkɔ kam mosɨmt, ĩn i kɨ kũ kɔ kɨtɔsɨ. 21Na oon. Ji de'n a lam ji madngétagt i nat sem dɔ tabɨlt. 22Kɨtɔ rota Ngon de ndɨ aw lo koit tit'n Luwah ndan kete. Na beto lo de'n a laa ji madngétaagt. 23Kamla mban girr ndɨjen na kɨnadt, ke nõ kudt a ɗa nya'n non.
Nõ i kɨbo tɔi
24Gakɨna ɓai dan ngéndoogt lo Jeju kad n'oon ke nõ i kɨbo tɔi kudt. 25Jeju eld an: Ngarg lo girrdeg kɨ dang dang ndɨ õnɓe dɔdt, awɨn kɨ tɔg dɔdt tɔ. Be kaa ne, ndɨ geen kad kunɨnd ngeɗamaj. 26Na ĩn kɨ i ɗan titbe al. De'n i kɨbo tɔi kusɨt a ne, kɨ i tit kɨ ngon kɨdu be; de'n i bɨradɔ a ne, i tit ɓer be. 27Kɨtɔ nõ i kɨbo tɔi a? De kɨbo tɔi i de'n ndɨ ta nyasat e? Ke de'n ndɨ ɗa ɓer ada a? I de'n ndɨ ta nyasat ale? Na mĩ taa ne, mĩ dãsɨt tit ngeɗa ɓer be. 28Ĩla i hɔn tɔgsɨ ba sem kam nágt'n namɨn a ne, 29mĩ tɔ, m'a m'adsɨ tɔg kõɓe tit kɨ Bɔwm admɨn tɔg kõɓe ye be ho. 30Kɨtɔkad a i san nya, a ãin dɔ tabɨlt lom, kam kõɓet lom, a i ndɨn dɔ pong gangtagt kad i gangɨn ta dɔ girr Israelgt kɨkɨlah gidaijoo.
Jeju elta kete an Pierr a maj ta gerɨn
(Oo Mat 26:31-35; Mrk 14:27-31; Jã 13:36-38)
31Simõ, Simõ, oo maj, Sɨtan kɔ kɨ'n ngah ta ɗob siasɨ tube tit'n de a sian kum nyako be. 32Na m'kɔ Luwah kɨtɔi ĩ Pierr, kɨtakad kadkam loi du al. Ĩ tɔ lon i tel kɨromt a ne, sumba kad i ɗa kɨ ngankõig kad hɔntɔgd bá. 33Pierr ela an: Bɨraɓe m'ɗa rom woi kɨ m'aw dangait sei, ke koi kaa m'a mõi sei. 34Jeju ela an: M'eli Pierr, ɓone kɨnja a ko al ɓaitɔ a ne, a i maj ta gerɨm nja mɨta.
Ɗa goro kɨta ɗɔɔ
35Jeju eld tɔ an: Lon m'lasɨ kɨkanj ngong nar, kɨkanj ɓɔl, kɨkanj sanja ye, nya mad nalsɨ a? Turɨna anan: Kɨ nal nya mad al. 36Jeju eld an: Tajigtne de'n aw kɨ ngong nar a ne, ad un. Titbe tɔ ngeɓɔl kɨ un ɓɔl lon jint ho, na de'n kiyaɗɔɔ loa goto a ne, kɨ ɗaw kub lon kɔ ndugon kiyaɗɔɔ. 37Kɨtɔ m'ndɨ m'elsɨ. Ta 'nten, ĩn ndangɨn kam Maktubt: Tɨdana nat kɨ ngétɔidɔtag ye, kari na a tɔlɨn taa romt. Kɨtɔ nyag'n Luwah ndah dɔmt ndɨn ta tɔl kondt. 38Ngéndoog loa elɨna anan: Bɨraɓe oo kiyaɗɔɔ joo la eld an: Asɨ.
Jeju elta kɨ Luwah lot kɨ tɔa i Jesemani
(Oo Mat 26:36-46; Mrk 14:32-42; Jã 18:1-2)
39Jeju tee aw dɔ mbalbo kag olibgt kɨgo nyabelɓet lon, ngéndoog loa ndulon goa. 40Lon tee lot'n non ye, eld an: Elɨn ta kɨ Luwah, i kɔn ne kɨtakad i son al lon násɨn.
41Jeju tɔ ron rodt ɗoba wo asɨ la mbal, ɔsɨ gojɨn ber, elta kɨ Luwah, 42an: Bɔwm, ĩla i ndig a ne, un kop 'nten romt kɔ, na m'ndig kɨ m'ɗa kɨgo ndigt lom al, na kɨgo ndigt loi tã.
43Kamla malaika mad tee hɔi kɨ roat ko dõ dɔrãt, ɗa ada ngang. 44Kɨtɔ dai yon kam keltat kɨ Luwah kɨ rotĩn ad tutoa tel tit kɔwɨr mosɨ kɨ tuso dodɔ dɔningt be.
45Lon ɓai lo keltat kɨ Luwah ye, ɗe ro ngéndoogt lon, ngahd to ɓin kɨta kamkil. 46Eld an: Kɨtɔɗi i to i ɓin ne a? I ɓain dõ elɨn ta kɨ Luwah kɨtakad i son al lon násɨn.
Judas la Jeju ji madngétagt ad hɔna
(Oo Mat 26:47-56; Mrk 14:43-50; Jã 18:3-12)
47Ɗa elta ɓaitɔ la, deg koosɨg ɗen. De mad kɨɗa ku ngéndoog kɨkɨlah gidaijoo'n a kunɨna Judas ɔrrd ta ɗob. Ɗe nderbe kɨ ro Jejut, ɗaa lapia njuta. 48Na Jeju ela an: Judas, kɨ lapia njuta la i ndɨ lan Ngon de ji madngétagt yo?
49Lon ngéndoog'n ɗan gugɨn dɔ Jeju oon nya'n ndɨ ɗa nya ye, anan: Bɨraɓe kaa kɨ ga kɨ kiyaɗɔɔ? 50Kɨɗa ku ngéndoogt ga mbi ɓer lo bɨra ngejanyamosɨkadkari kɨbo ko kõat ga gang. 51Na Jeju el an: Asɨ ta. Ɔd mbia yootan.
52Kamla el ngéjanyamosɨkadkari kɨbog, kɨ bɨradɔ ngéɗɔɔg, ĩgɨn ĩn ngéngom kuj ndub Luwah, kɨ kɨbog lo Juipg ĩgɨn ɗen kɨ dɔat ye an: I teen kɨ kiyaɗɔɔ kɨ gɔlg tit deg kɨ ngéhɔ de kɨ ngekumɗob be e? 53Kɨ ndɔg tube mĩ sesɨ nat kam kuj ndub Luwaht, na i sahn ɗob hɔm al. Na kaglo 'nten i kaglo losɨ kɨ tɔg til.
Pierr maj ta ger Jeju
(Oo Mat 26:57-75; Mrk 14:52-72; Jã 18:12-27)
54Deg'n non hɔn Jeju, awɨn sia ɓe lo bɨra ngejanyamosɨkadkari, na Pierr a ndulo goa ko sãi. 55Lon ɗan horr natɓet ye, Pierr aw ndɨ dan degt nõ. 56Ɓer mad kɨdẽ ooa ndɨ tuw horr, tɔrr kumɨn kɨ dɔat, an: De'n ndɨn i sia nat. 57Na Pierr maj ta an: Dekɨdẽ m'ger de'n non al.
58Goot gog jenbe, de mad ooa an: Ĩ kudt ho. Na Pierr an: Dekɨdɨngã, m'gotot.
59Lon kaglo tɔi asɨ dɔkàd kɨɗa ye, de mad tɔ hɔ tan ngang an: Rota de'n ndɨn i nat sia kɨta i de kɨ Galilet. 60Na Pierr el an: Dekɨdɨngã m'ger ta'n i ɗa el al. Tentenbe lon ndɨ elta ɓaitɔ kɨnja kɔ. 61Bɨraɓe mbel, la kumɨn dɔ Pierrt. Pierr tɔ ga kamɨn dɔ tat'n Bɨraɓe ela, an: Ɓone kɨnja a ko kete al, na a i maj ta gerɨm nja mɨta. 62Tee aw nõ kɨ n'oi.
63Deg'n hɔn Jeju ye, ɗa ɔlɨna, ɗa tɨndana. 64Ndomɨn kuma, na ɗa ndɨjena anan: I ndɔ ndil, nõ ndai a? 65Elɨna ta kɨ mal madg ngãibe tɔ.
Jeju ɗa nõ ngékoogotagt
(Oo Mat 26:59-66; Mrk 14:55-64; Jã 18:19-24)
66Lon loti woi ye, ɓut kɨbog lo deg sed ngéjanyamosɨkadkari kɨbog, kɨ ngéndoo Maktubg kawɨn na kɨnat, ad ɗen kɨ Jeju nõ ngekoogotagt lod. 67Elɨna anan: Ĩla ĩ Krist a ne, elj. Na Jeju eld an: Ke m'elsɨ kaa ne, a i admɨn kamsɨ al. 68Na ĩla m'ndɨjesɨ ta mad a ne, a i turmɨn al.
69Nẽbekɨnõt a oon Ngon de ndɨ ko jikõ tɔg Luwaht. 70Ĩn tube anan: Ad ĩ Ngon Luwah a? Eld an: Ĩ elɨn anan i mĩ.
71Kamla anan: Kɨ ge naj kɨ ma mad kɨɗang gog tɔ al. Jĩ kɨdɔj j'oo ta kɨ taat.
Currently Selected:
Luk 22: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
