Seemthawhnak 28

1Cuhnukah Isaak ni Jakob a ko ih thluasuah in, “Kanaan mi numi cu na pi thok lo henakhawh. 2Paddan-aram ram ih na nu ih pa Bethuel ih inn ah tat vohvi; cun acunangih om na nu ih ṭapa Laban ih tianu pakhat nupi ah la. 3Pathian Zongzatikho ni tan thluasuah in, tianau tampi tan piain tan punzaisak seh, cuticun miphunpawl buurpi a cang taw ci. 4Abraham ih thluasuah cu namah leh na ciitlang rum tan pia hngai seh, cuticun Pathian ni Abraham hemih a piakmi ram—atu tluangmi diinhmun in na omnak hi a ngeihtia taw ci,” tiah thu a cah. 5Cuticun Isaak ni Jakob cu a tahsak mianmi; cuticun Paddan-aram ih ommi Laban, Jakob leh Esau ih nu Rebekah ih ṭapa, Aram mi Bethuel ih tiapa, hemahcun a tat.

Esau ni Ishmael ih Tianu a Pi

6Isaak ni Jakob thluasuah in Paddan-aram ah, acunangih nupi ngeicih dingin a thlah timi leh, thlua a suah a’khin, “Kanaan mi numipawl cu na pi hngai thok lo henakhawh,” tiah thu a kaat, cun 7Jakob ni a pa leh a nu ih thu cangngai hngai in Paddan-aram ah a tat rom ti Esau ni a tiah. 8Curuangah Kanaan numile ni a pa Isaak lung an hmuisak lo ti Esau ni a tiah. 9Esau cu Ishmael hemah a tat ih a ngeihciami nupile hleiah, Abraham ih tiapa Ishmael ih tianu Mahalath, Nebaioth ih tarnu cu nupi dingah a lat beeng.

Bethel ah Jakob ih Mang

10Jakob cu Beersheba matain Haran laah a tat. 11Hmun pakhat a phat tikah ni a pil rom ruangah acunang ahcun zan a caam. Acui hmun ih lung pakhat lain a lu tangah a phel ih acui hmun ahcun a me. 12Culeh khur parih ṭhunmi kailaang cu a zim van tongin, culeh Pathian ih vanmile a parah an ṭum an kai ti in mang a man. 13Culeh Bawipa cu a hrialah a diing ih, “Kei hi na pa Abraham ih Pathian leh Isaak ih Pathian ka ii; a parih na met nak hmunram hi namah leh na ciitlang ka tan ṭhen hngai thok; 14culeh na ciitlang cu vulei ih leivut zet an i thok, cun vongpinla leh vapinla, sak leh thlang ah nan karh thok; cun vulei cungih hrin hmawhhmawh cu nang leh na ciitlang thawngin thluasuah an i thok. 15Ka tan ompi thok ih na vah nakpohah ka tan kilkhawi thok, cun hi hmunram ah ka tan kirsak ṭhan thok; icatile ka tan tiammi ka vuak uh hlansung cu ka tan mata thok lo, ti hi tiah law,” tiah a ti. 16Cutikah Jakob cu a metnak in a han ṭhangtia ih, “Bawipa cu hi hmun a’hin a om taktak hi tang—acu cu ka tiah ta lo hepa’n!” tiah a ti. 17Culeh a hrul ih, “Hi hmun ih ṭihawkṭha ik zia hi! Hihi cu Pathian inn simlo hmun ce a i tal lo, cun hi cu vancung kotka a ik tu hi,” tiah a ti.

18Curuangah Jakob cu mawla ah tuanpan a tho, culeh a lu tangih a phelmi lung cu a la ih palhtiak-lonak lung ah a ling, cun a parah thathau a toih. 19Acui hmun cu Bethel#28:19 Bethel ti cu Pathian ih Inn tican. tiah a ko; a khua min peita zong cu Luz a ita. 20Cutikah Jakob ni thu a khaamtia ih, “Pathian ni ma ompi in, ka tahnak lam a’hin a ma kilkhawi ih, awk ding caw leh sinthlai ding partlai a ma pia ih, 21cuticun ka pa ih inn ah daite’n ka phat ṭhan a’cun Bawipa cu ka Pathian a i thok, 22cun palhtiak-lonak ca-ih ka linmi hi lung hi Pathian ih inn a i thok; culeh nang ni a ma piakmi zate ih ṭhen hra ah ṭhen khat cu ka tan pia hrimhrim thok,” tiah a ti.

Currently Selected:

Seemthawhnak 28: KHBF

Highlight

Copy