Лука 3
3
О Иоанн о Болдимари сиклярэл
1Андэ дэшупанджто брэш ки императореско э Тиберияско, кана опэр Иудея сас о Понтий Пилат, о Ирод сас о сагбус-тетрархи#3.1 Тетрархи — о екх андар штар сагбудэс областяко, патишайлыкеско, пхуяко. э Галилеяко, лэско пхрал о Филипп — о сагбус-тетрархи э Итуреяко тай э Трахонияки областяко, о Лисаний — о сагбус-тетрархи э Авилинеяко, 2ай о барэ попазя сас о Аннас тай о Кайафа, э збора э Дэвлэски сас э Иоаннески, э чявэски э Захариескерэски, ки ливади. 3Пал отхэ о Иоанн гело алаи ко пхуя, савэ сас паш ко Иордани, тай пхэнэлас э манушэнги, тэ ачявэн пумарэ бэзя тай тэ болэнпэс, тэ мукел о Дэл лэнги бэзя. 4Сар си яздимэ андэ книжка ки прарокески Исаиески:
«Сэси шунлёл ки ливади:
"Гортярэн о дром э Сагбуски,
керэн доврус о тхан, опрал савэстэ Ов кан накхел!
5Кажни хорипэ мэ овэл пхэрдо,
тай кажни горас тай учё тхан — мэ фулен тэлэ;
о болавдэ дрома мэ овэн доврус,
тай о камбуря дрома — мэ гортён,
6тай алаи о дживиндэ тэ дикхен э Дэвлэско кутардипэ"».
7Ко Иоанн авэнас бут дюнядэс, тэ болэл ов лэн, ов лэнги пхэнэлас:
— Тумэ, канлыс сапанэ породаки! Кон пхэнляс тумэнги тэ нашэн катар холи, кай авэл? 8Дилэнца сикавэн, кай ачявдянус тумарэ бэзя. Ма тюшундиен тэ пхэнэн андэ тумэндэ: «Амаро дад — о Авраам!» Пхэнав тумэнги, кай ко Дэл си зор тэ керэл пуен э Авраамески акалэ барэндар. 9О товэр пашло ко корини ки тэрэкеско, тай саво тэрэки на анэл лаче имиша, кан овэл чиндо тай чито андэ яг.
10— Со амэнги тэ керас? — пхучелас о дюняс.
11О Иоанн пхэнляс:
— Одова, кастэ си дуй гада, мэ дэл екх одолэс, савэстэ нанай били екх, тай одова, кастэ си хапэ, мэ керэл аякха жэ.
12Кидимаря э налогенги авэнас тэ болэнпэс.
— Сикляримарина, — пхученас он, — со амэнги тэ керас?
13— Ма лэн катар мануша бут, ниш камэл, — пхэнэлас ов лэнги.
14Пхученас лэс о салдатя:
— Ами со амэнги тэ керас?
О Иоанн пхэнляс лэнги:
— Ма лэн ко мануша ловэ зораса тай трашаимаса, никхас хохавнэс ма керэн тай дошалэс, бэшэн одолэса, со покинэн тумэнги.
15О дюняс ишандиенас, тай алаи мангенас тэ галён, на о Христос си о Иоанн. 16Адалэски о Иоанн пхэнэлас лэнги алаенги:
— Мэ болав тумэн панеса, ай кан авэл Одова, Саво май зорало мандар, мэ на керав тэ пхутрав э кустик Лэски минидэндэ. Ов кан болэл тумэн э Шужэ Духоса тай ягаса. 17Лэстэ андэ васта сэнэки, тэ шужарэл о гив. О гив кан кидэл андэ Пэ аранестэ, ай о сипэс кан тхарэл андэ яг, сави на мэрэл.
18Тай бут авэр пхэнэлас о Иоанн, тай галярэлас э дюняски, тай пхукавэлас лэски Лошано Габэри.
19О Иоанн лиляс тэ керэл дошалэс э сагбус-тетрархи э Иродес, кай лиляс э Иродиада, пэ пхралэски ромня, тай андар алаи ко канлыдэс дилэс лэскерэндэ. 20О Ирод алаи ко джюнгалипэ тхэдяс генэ екх, кай пханляс э Иоаннес андэ пханли.
О Иоанн болэл э Исусес
21Кана алаи о дюняс болдяспэс ко Иоанн, сас болдо ли о Исус, тай кана пал ко болдипэ Ов зборизэлас э Дэвлэса, пхутэрдило опрэ удар, 22тай опэр Лэстэ фулистино о Шужо Духос, фулистино андэ тэни, сар голуби. Тай опрал шунлило сэси:
— Ту — Мо дэхло Чяво! Ту — Ми лош!
Э порода э Исусески
23Э Исусески сас паш ко триянда брэш, кана Ов лиляс тэ керэл иргатлыки э Дэвлэски. Сар алаи тюшундиенас, Лэско дад сас о Иосиф, тай Лэски папудэс сас о Илий, 24о Матфат, о Левий, о Мелхий, о Ианнай, о Иосиф, 25о Маттафия, о Амос, о Наум, о Еслий, о Наггей, 26о Мааф, о Маттафия, о Шымьи, о Иосиф, о Иодай, 27о Иоханан, о Рисай, о Зоровавель, о Шэалтиил, о Нирий, 28о Мелхий, о Аддий, о Косам, о Элмадам, о Ир, 29о Иосий, о Элиезер, о Иорим, о Матфат, о Левий, 30о Симеон, о Иуда, о Иосиф, о Ионам, о Элиаким, 31о Мелеай, о Маинай, о Маттафай, о Нафан, о Давид, 32о Иессей, о Овид, о Боаз, о Сала, о Нахшон, 33о Аминадав, о Админ, о Арний, о Хецрон, о Парец, о Иуда, 34о Яков, о Исаак, о Авраам, о Терах, о Нахор, 35о Серуг, о Реу, о Пелег, о Евер, о Шэлах, 36о Каинан, о Арпахшад, о Сим, о Ной, о Ламех, 37о Мафусал, о Енох, о Иаред, о Малелеил, о Каинан, 38о Енос, о Сиф, о Адам, о Дэл.
Currently Selected:
Лука 3: КРБ
Highlight
Share
Copy
Want to have your highlights saved across all your devices? Sign up or sign in
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/
