Кердипэ 4

О Каин тай о Авель

1О Адам сас э Еваса пэ ромняса, тай ой насвалили пуёстэ тай аракхлило о Каин#4.1 Авг. евр. нав «Каин» си катар збора «кана» (тэ кинэс, тэ керэс).. Ой пхэнляс: «Э ярдымеса э Сагбуски Яхвэскерэса мэ диндилём манушэс».

2Дэчи латэ аракхлило лэско пхрал о Авель.

О Авель чярявэлас э бакрэн тай бузнен, ай о Каин барярэлас опэр пху. 3Вахытестар о Каин андяс имиша э пхуяки, сар башладипэ э Сагбуски э Яхвэски, 4о Сагбус о Яхвэ махтады э Авелес тай лэско башладипэ, 5ай э Каинэс тай лэско башладипэ Ов на махтады. О Каин холясаило, тай лэско муй калило катар холи.

6Дэчи о Сагбус о Яхвэ пхэнляс э Каинэски:

— Соски ту холязэс? Соски то муй калило?

7Ту тэ керэса чячипэ, та со, ту на кан ваздэс то муй? Ай ту тэ керэс начячипэ, дэчи тэ ударэстэ гаравдэпэс бэзя: ов манген тэ овэн опэр тутэ, ай ту камэл тэ овэс опэр лэстэ.

8О Каин пхэнляс пэ пхралэски:

— Гадэ ки ливади.

Кана он сас ки ливади, о Каин читяспэс опэр пэ пхралэстэ ко Авель тай мудардяс лэс.

9Дэчи о Сагбус о Яхвэ пхэнляс э Каинэски:

— Кай то пхрал о Авель?

— На джянав, — пхэнляс одова. — Та со, мэ дикхав пал мэ пхралэстэ?

10О Сагбус о Яхвэ пхэнляс:

— Со ту кердян? О рат тэ пхралэско пхэнэл Манги андар пху. 11Акана ту дино арман, кувдимэ андар пху, сави пхутэрдили, тэ лэл о рат тэ пхралэско, чёрдо тэ вастэса. 12Кана ту кан керэс бути опэр пху, ой на кан дэл тут пэ имиша#4.12 Адава си: «тэ дэл пи зор».. Ту кан пхерэс опэр пху акарин-окорин, сар би кхерэско.

13О Каин пхэнляс э Яхвэ Сагбуски:

— Мо хурлуки пхаро, ниш ми зор тэ накхав. 14Анкха ту кувдиес ман катар муй ки пхуяко, тай мэ кан овав гаравдо Тутар. Мэ кан пхерав опэр пху акарин-окорин, сар би кхерэско, тай кон кан дикхел ман, одова кан мударэл ман.

15Ай о Сагбус о Яхвэ пхэнляс лэски:

— На. Кон кан мударэл э Каинэс, одова кан диндёл эфтавар бут.

Тай о Сагбус о Яхвэ кан керэл э Каинэски метка, тай никхон, тэ дикхела лэс, тэ на мударэл лэс.

16О Каин гело катар Сагбус Яхвэ тай бэшэлас андэ пху Нод, ко вастоки катар Эдэми.

О пуя э Каинэски

17О Каин сас пэ ромняса, тай ой насвалили пуёстэ тай аракхлило о Ханох. Одова вахыти о Каин тхэлас диз тай тхэдяс ла о нав пэ чявэско Ханох. 18Ко Ханох аракхлило о Ирад, ко Ирад аракхлило о Мехиаэл, ко Мехиаэл аракхлило о Метушаэл, тай ко Метушаэл аракхлило о Ламех.

19О Ламех лиляс пэски ромнян до джювлен: екх бучёлас Ада, авэр — Цылла. 20Ки Ада аракхлило о Явал: ов уло о дад одолэнго, кон бэшэл андэ катунэс тай барярэл гайванен. 21Лэско пхрал бучёлас Ювал: ов уло о дад алаенго, кон кхелэл опэр арфа тай дурули. 22Ли ки Цылла сас чяво, Тувал-Каин, саво керэлас вэрсавэ шэя катар бронза тай састэр. Э пхэн э Тувал-Каинэски сас Наама.

23О Ламех пхэнляс пэ ромненги:

— Ада тай Цылла, шунэн ман,

ромня э Ламехески, шунэн мэ зборэс.

Мэ мудардём муршэс андар одолэстэ,

кай ов чиндяс ман,

тэрнагарэс андар одолэстэ,

кай ов чялавдяс ман.

24Андар Каин тэ си о душманлыки эфтавар бут,

андар Ламех — эфтадэша эфтавар бут.

О Сиф тай о Енос

25О Адам генэ сас пэ ромняса, тай латэ аракхлило чяво тай тхэдяс лэс Сиф#4.25 Авг. евр. нав «Шэт» (Сиф) си катар збора «шат» (тэ дэс башладипэ)., пхэнляс: «О Дэл башлады ман авэрэ пуёс ко тхан ки Авелеско, савэс мудардяс о Каин». 26Ли ко Сиф сас чяво, тай ов тхэдяс лэс Енос.

Одова вахыти о мануша лилэ тэ манген о нав э Сагбуски Яхвэско.

Currently Selected:

Кердипэ 4: КРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия опэр крымски романи чиб