Дила 2

О Шужо Духос фулел опэр апостоля

1Уло о дес э Пэиндако#2.1 О мисяфирлыки Базаренго — иудейски мисяфирлыки кидимаско имишэнго, кердёлас ки пэиндако дес пал мисяфирлыки ки Пэсах., тай алаи он сас екхетханэ. 2Бирдэн опрал шунлило шуми, саво ушадиел зоралэ балваляки, саво пхэрдяс алаи о кхер, катэ он сас бэшлэ. 3О сиклярдэ дикхлэ со-то, кай ушадиел э ягаки чибэнги, савэ паляштыларпэс тай тэрдилэ по екх опэр кажнестэ андар лэндэ. 4Алаи он пхэрдилэ Шужэ Духоса тай лилэ тэ зборизэн опэр аврэ чибэндэ: сар дэлас о Духос лэн тэ пхэнэн.

5Андэ Иерусалими адава вахыти сас э Дэвлэски иудея андар алаи ко пхуя ки дюняски. 6Ко шуми кидинэпэс бут дюняс; о мануша шаштиенас, вай кажын андар лэндэ шунляс, сар окола зборизэнас опэр лэски чибатэ. 7Он бут шаштиенас тай пхученас:

— Та со, алаи адала мануша, савэ зборизэн, нанай галилеяня? 8Сар адава кажни андар амэндэ шунэл лэн, кай зборизэн опэр амарэ чибатэ? 9Машкарэ амэндэ си парфяня, мидяня, еламитя, одола, савэ бэшэн ки Месапатамия, Иудея тай Каппадокия, Понт тай э правинцыя Азия, 10Фригия тай Памфилия, Египти, о тхана э Ливияке, савэ паш ко Кирени, одола, савэ бэшэн ко Рим, 11о иудея тай о празелитя#2.11 О мануш, саво кердяс абрезания тай саво болдиняспэс ко пакяпэ ки евреенго., о критяня тай о арабя. Тай алаи амэ шунас, сар он пхэнэн катар барэ дилэс ки Дэвлэски опэр амарэ чибэндэ!

12Он шаштиенас, на джянэнас сар адава тэ галён, тай пхученас екх аврэстэ:

— Со си адава?

13Сарсавэ асанас лэндар:

— Он пилэ тэрно винас!

О пхукаипэ э Пётарэско

14О Пётар ущино екхетханэ аврэ э дэшуекхенца тай пхэнляс э манушэнги бэбэряса:

— О мурша о иудея тай алаи, кон бэшэл ко Иерусалими! Тумэнги тэ овэл галярдо, шунэн лачес, со мэ кан пхэнав. 15О мануша адала нанай матэ, сар тумэ тюшундиен: анкха вай сабаги си, эня сагатя. 16Адава овэн о зборэс, савэ пхэнляс о прароки о Иоиль:

17«Андэ бытимаски деса, — пхэнэл о Дэл, —

Мэ кан чёрав о Духос Минро опэр алаи ко мануша.

Тумарэ чявэ тай чяя кан пхэнэн сар прарокя,

тумарэ тэрнагара кан дикхен дикхиматэс,

тай тумарэ пхурэ кан дикхен прарочискя сунэ.

18Джи опэр иргатя тай опэр иргатинкес Минрэндэ

Мэ кан чёрав одола деса Мо Духос,

тай он кан пхэнэн сар прарокя.

19Мэ кан сикавав чюдэс опрэ тай знамениес тэлэ опэр пху:

рат, яг тай бут тхув.

20О кхам кан калёл,

ай о чюнут кан овэл ратвало,

ангал отхэ, сар кан овэл баро тай махтадимэ дес э Сагбуско.

21Тай кажни, кон кан дэл икос о нав э Сагбуско,

кан овэл кутардимэ».

22О мурша о израильтяня, шунэн, со мэ тумэнги кан пхэнав. Барэ зоралэ дилэнца, чюдэнца тай сикаиматэнца, сар тумэ джянэн, о Дэл кердяс андар Исус тумэндэ ангал якха, о Дэл сикавдяс амэнги, кай о Мурш о Исус андар Назарет ало Лэстар. 23Сар мангляс тай тюшунды о Дэл, тумэ мардянус Лэс, кана динянус Лэс андэ васта ко бэзялэ, савэ мардэ Лэс опэр хачи. 24Ай о Дэл дживиндярдяс Лэс, кутарды андар хурлуки ки мэримаско, тай ко мэрипэ на сас зор Лэс тэ астарэл.

25О Давид пхэнэл Лэстар:

«Сальтя Мэ дикхавас э Сагбус ангал Мандэ:

Ов катар прави васт Мандар —

Мэ на кан кхелавдяв.

26Оничин лошазэл о ило Минро,

тай лошазэл э чиб,

тай о тэни Минро кан бэшэл ишандимаса.

27Вай Ту на кан мукес Мо духос андэ дюняс ки мулэнго

тай на кан дэс Тэ Шужэс тэ овэл прахос.

28Ту сикавдян Манги о дрома э бэшымаски,

Ту кан пхэрэс Ман лошаса ангал муй Тинрэстэ».

29Пхралалэн, мукен ман тэ пхэнав тумэнги доврус, кай о папус Давид муло тай сас пароскердо. Лэско склепи си амэндэ джи авдес. 30Ов сас прароки тай джянэлас, кай о Дэл динясас збора совленца тэ тхэл лэски тронестэ екхес андар лэски породатэ, 31ов дикхелас, со кан овэл, пхэнэлас катар дживиндипэ ки Христоско, кай Ов на сас ачявдо андэ дюняс ки мулэнго тай Лэско тэни на уло прахос. 32Тай аки, о Дэл дживиндярдяс адалэ Исусес, тай амэ алаи адава дикхлям! 33Ов сас ваздино э Дэвлэски чяче вастэса тай лиляс катар Дад о Шужо Духос, саво Ов пхэнляс кай кан дэл, тай чёрдяс Лэс опэр амэндэ. Тай анкха тумэ адава дикхен тай шунэн. 34Вай о Давид на ваздиндило опрэ, ами ов пхэнляс:

«Пхэнляс о Сагбус э Сагбуски минрэски:

Бэш ко прави васт Мандар,

35бискай Мэ на керав Тэ душманен скамейка тал Тэ пинрэндэ».

36Оничин алаи о кхер э Израилеско мэ джянэл одова, кай Адалэ Исусес, Савэс тумэ мардянус ко хачи, о Дэл кердяс Сагбус тай Христос!

37Кана о мануша шунлэ адава, лилэ пумарэ илэндэ. Он пхученас ко Пётар тай аврэ апостолен:

— Пхралалэн, со амэ тэ керас?

38О Пётар пхэнляс:

— Ачявэн тумарэ бэзя, тай кажни андар тумэндэ мэ овэл болдо андэ нав ки Исусеско Христоско. Дэчи о Дэл кан мукел тумэнги тумарэ бэзя тай кан башладиел тумэн о Шужо Духос. 39Вай адава, кай пхэнлило, си тумэнги, тумарэ пуенги тай одолэнги, кон эси дур: алаенги, кон кан диндёл икос э Сагбуса, амарэ Дэвлэса.

40Тай бут авэра зборэс о Пётар пхэнэлас лэнги:

— Кутардиен тумэн адалэ гарами дюнястар.

41Одола, савэ лилэ лэнги зборэс, болдэпэс. Одова дес улэ лэнца паш ко трин биня мануша.

О бэшыпэ пакялэнго

42Он зоралэс астарэнаспэс ко сиклярипэ ки апостоленго, он екхараи сас екхетханэ, пхагерэн о манро тай зборизэн э Дэвлэса. 43Алаи сас пхэрдэ траш ангал Дэл, вай о апостоля керэнас бут чюдэс тай сикаиматэс.

44Алаи, савэ пакянас э Дэвлэски, сас екхетханэ, тай алаи лэнго сас екхетханэ. 45Он бикнэнас пумарэ мангина тай дэнас алаендэ, каски сокабор камэлас. 46Кажын дес он кидэнаспэс андэ храми, ай ко кхера пхагерэнас о манро тай ханас лошаса тай ивашы илэса, 47махтадиенас э Дэвлэс, тай алаи андэ дюняс лэн дэхэнас. О Сагбус кажын дес бутярэлас одолэн кон эсас кутардимэ.

Currently Selected:

Дила 2: КРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия опэр крымски романи чиб