Лукастар 9
9
Ісус бічавел пескєре дешудуй апостолен те вакєрен Радишаґоскєро Гійрос
1Ісус вічіндя дешудуєн, і диня ленґє зор те е влада те траден аврі саворе дємонен і те сасарен насвалібе. 2Ов бічадя лен те вакєрен пало Девлескєро Краліпе і те сасарен ле насвален. 3Ов пгендя ленґє:
— На лен ніч пега андро дром: ані паца, ані ташка, ані маро і нісаве лове, і на лен пега авер голмі. 4Андро саво кгєр заджяна, одя те ачен, а паліш одарік джян дуредер. 5Те варекай мануша на прелена тумен, акор, сар авена аврі андало ода фоврос, разінен аврі о прахос пал тумаре піндре про свідєтєльство протів одала мануша.
6Сікаде ґейле дромега. Оне пгіренас ґав ґавестар, вакєренас Радишаґоскєро Гійрос і вшадзік сасаренас ле насвале манушен.
Ірод шунел пало Ісус
7Кана Ірод владаріс-тетрархос шундя пал саворо када, ов іґєн чудалінеласпес. Варесаве вакєренас, со ода Іоанн ушіля андал о мерібе, 8авер вакєренас, гой сікадяпес Ілія, а минґ варесаве мануша вакєренас, гой єкг чірлатуно пророкос ушіля андало мерібе. 9Ірод пгендя:
— Ле Іоанноскє ме отчіндьом о шейро. Акор ко ода Мануш, пал Касте ме шунав айсо?
Ов іґєн камелас те дикгєн ле Ісус.
Ісус чалярел панч езера манушен
10Кана апостоли вісаліле, оне розвакєрде Лескє, со кєрде. А паліш Ов іля чак лен Пега, і оне ґейле коркоре андро фоврос, саво вічінелпес Віфсаїда. 11Та нийпос доджянляпес пал ода і ґейле пал Лесте. Ов преіля лен і вакєрелас ленґє пало Краліпе ле Девлескєро, а ле насвален сасарелас. 12Кана аврі ратісаліля, акор дешудуя подґейле ко Ісус і вакєренас Лескє:
— Одмук ле нийпос, мі джян андре пашуне цікне те баре ґава те пресовен і те аракгєн пескє хавібе, бо амен андро біманушенґєро тган.
13Акор Ісус ленґє отпгендя:
— Ден тумен ленґє те хан.
А оне пгенде:
— Кє аменде ніч нане, чак панч маре і дуй мача. Чі аменґє те джян, те цінен хавібе пре кадала саворе мануша?
14Чак ле муршен одя есас варекай панч езера манушен. Та Ов пгендя пескєре сікаденґє:
— Тговен лен те бешен копенца по пенда мануша.
15Оне кєрде авка і розтгоде те бешен саворен. 16Ісус іля панч маре і дуй мача, дикгля про нєбос, палікєрдя, препгаґля і диня ле сікаденґє, те розден ле нийпоскє. 17Саворе ханас те чаліле, а одале которендар, саве на дохале, іскінде минґ дешудуй кошара.
Петро прінджярел, гой Ісус гіно Хрістос
18Єкгвар, кана Ісус модлінеласпес коркоро, і надур Лестар есас Лескєре сікаде, Ов пгучля лендар:
— Важ касте прелел Ман о нийпос?
19Оне отпгенде Лескє:
— Єкг пгенен, со Ту сал Іоанн Боладо, а авер пгенен, со Ту сал Ілія, а вареко пгенел, со єкг чірлатуно пророкос ушіля андало мерібен.
20Та Ов пгучля лендар:
— А тумен важ касте Ман прелен?
Акор Петро отпгендя Лескє:
— Важо Хрістос Девлескєро.
Ісус вакєрел, гой Ов мерела, а паліш джівісальола
21Акор Ов ленґє диня аврі нікаскє те на вакєрен пало ода, 22вакєрібнага:
— Ле Манушенґєро Ча маїнел іґєн бут те семвединен. Ов ейла отчідо ле пгуредеренца, єкг баредер рашаєнца те ле танітовенца Законоскєре. І маїнел тейн мурдардо, а про тріто дівес ушела андал о мерібе.
23А паліш Ісус пгендя ленґє:
— Те вареко тумендар камел те авен пал Манде, акор отпген тут пестар, сако дівес ле пескєро кєрестос і ав пал Манде. 24Ко камел те ратинен пескєро джівіпе, ода нашавела лес, а ко нашавела пескєро джівіпе важ Манде, ода ратинела лес. 25Саві хасна ле манушескє те захудела саворо светос, та коркоро пескє мосарела джівіпе і доліджяла лес ко мурдаріпе? 26Важ ода ко ладжялапес Мандар і Мійре лавендар, одалестар ладжяла те о Ча ле Манушенґєро, кана Ов авела андре Пескєрі слава, андре слава ле Дадескєрі і свентне анґєленґєрі. 27Та чачес пгенав туменґє: гін мануша машкар туменде, саве тердьон аде, саве на мерена, адик на дикгєна о Краліпе ле Девлескєро.
Ісус вакєрел ле Моїсєйога те Іліяга
28Варекай толо охто дівес, сар Ісус пгендя адала лава, Ов іля ле Петрос, ле Іоанн те ле Яковс і ваздняпес ленца про партос те модліненпес. 29А кана Ов есас андре молітва, о муй Лескєро чіріндяпес, а Лескєре голмі ачіле парне і іґєн фес бліскіненас. 30Акор варекатар сікадепес дуй мурша і вакєренас Лега, ода есас Моїсєй те Ілія. 31Оне сікадепес андре слава те вакєренас пало ода, сар Ов отджяла адале светостар андал Єрусалім. 32Акор про Петрос те про одален, ко есас лега андре єкг, авля совібе. А кана оне ушіле опре андал совібе, дикгле Лескєрі слава а те дує муршен, саве тердьонас пашес паж Лесте. 33Ачіля авка, кана одала дувджяне іма джянас Лестар, акор Петро пгендя ле Ісусоскє:
— Танітов, міште аменґє аде! Домук аменґє, і амен кєрага аде трін шатрі: Тукє єкг, Моїсєйоскє єкг те ле Іліяскє єкг, — та ов коркоро на ахальолас, со вакєрел.
34Кана ов минґ вакєрелас, сікадяпес е хмара і зучардя лен, і авля пре ленде барі дар, кана ачіле андре хмара. 35І есас ганґос андал е хмара, саво вакєрелас:
— Када Мійро Ча іскіндно. Лес шунен!
36Кана ганґос ціхісаліля, Ісус ачіля Коркоро. А оне нікаскє на вакєренас андро одала дівеса пало ода, со оне дикгле.
Ісус сасарел терне чаворес, захундес нажувже духога
37Про авер дівес, кана оне авле тейле пало партос, одя ле Ісус ужаренас іма бут мануша. 38Акор єкг мануш андал ода нийпос кєздиндя те вріскінен:
— Танітов, манґав Тут, дикг про мійро чаворо, бо ов кє манде чак єкг! 39О духос худел лес, і ов єкгваресте кєздинел те річінен. Ов разінел лес авка, со андал лескєро муй джял е пена. Духос мучінел лес і лєду біду одмукєл лес. 40Ме манґльом Тийре сікаден те траден лес аврі, та оне на бійрінде.
41Ісус отпгендя:
— О, біпатябнаскєро те спорціме родос! Кєці Манґє минґ тейн туменца і те тийрінен тумен? Ан аде тийре чаворес.
42Кана чаворо подавля капка пашедер, акор дємон чідя лега пре пгув і кєздиндя лега іґєн фес те разінен. Та Ісус диня аврі нажувже духоскє, сасардя ле чаворес і диня лес ле дадескє. 43Саворе, ко одя есас, чудаліненаспес, саво баро Дейл.
Ісус дуйтовар вакєрел пал Пескєро мерібе
А кана саворе чудаліненаспес саворескє, со кєрдя Ісус, Ов пгендя пескєре сікаденґє:
44— Шунен міште, со Ме канакє туменґє пгенава: о Ча ле Манушенґєро маїнел тейн предино андро васта ле манушенґєре.
45Та оне на ахаліле када лав, бо ода лав есас ґарудо лендар. Оне на ахаліле Лес, та даранас Лестар те пгучен пало ода.
Ко гіно баредер
46Акор есас машкар ленде о спорос: ко лендар ейла баредер? 47Ісус джянелас, со оне думінен, і важ ода Ов іля ле чаворес і тгодя лес паж Песте. 48І пгендя ленґє:
— Ко прелела кадале чаворес андро Мійро нав — Ман прелел, а ко Ман прелел — прелел Одалес, Ко бічадя Ман. А ко гіно єкг цікнедер машкар туменде, ода гіно баредер.
49Акор Іоанн пгендя Лескє:
— Танітов, амен дикглям єкгє манушес, саво Тийре навега траделас аврі манушендар ле дємонен. Амен пгендям, гой те на кєрел када, бо ов аменца на пгірел.
50Та Ісус ленґє отпгендя:
— На запріщінен лескє, бо ко нане протів туменде, ода важ туменде.
Ле Ісус на прелен андре Самарія
51Кана ле Ісусоскє подавля овра, і Лес маїндяпес те лен про нєбос, Лескє есас про їло те джян андро Єрусалім. 52Акор анґлал Песте Ов бічадя ле бічаден, і оне ґейле андро єкг самарійсько ґав, гой те прікєрен саворо. 53Та ґавутуне мануша на преіле ле Ісус, бо Ов джялас андро Єрусалім. 54Сар дикгле када Лескєре сікаде, о Яков те Іоанн, пгенде Лескє:
— Раєя, камес, амен манґага, мі авел е яґ пало нєбос те мурдарел лен?
55-56Та Ісус вісаліляпес кє ленде і диня ленґє аврі.#9.55-56 Андре варесаве манускріпти гін те авер лава: «Ов пгендя: — Тумен на джянен, саве духостар тумен сан. О Ча ле Манушенґєро на авля те мурдарен ле манушен, а те ратинен!»
Акор оне ґейле андро авер ґав.
Ко шай ейл Ісусоскєро сікадо
57Кана оне джянас андро дром, вареко пгендя Лескє:
— Ме джява пал Туте, кай Ту те на ґейлялас!
58Ісус лескє отпгендя:
— Ле ліскен гін пескєре хара, а ко чірікле нєбоскєре гін пескєре гнізда, а ко Ча ле Манушенґєро нане кай о шейро те тговен.
59Те дуйтонескє пгендя:
— Ав пал Манде.
Та ов пгендя:
— Раєя! Мук ман єкгвар, мі джяв те парунен мійре дадес.
60Ісус лескє пгендя:
— Мук, гой мувле мі парунен пескєре мувлен. А ту джя і розвакєр пало Краліпе ле Девлескєро.
61Минґ єкг пгендя Лескє:
— Ме джява пал Туте, Раєя! Та єкгвар домук манґє, те джяв пошлєдньо раз те дикгав мійро чаладос.
62Та Ісус лескє пгендя:
— Сако, ко тгодя пескєро васт про плугос, а дикгєл минґ палал, нане гонно пріґ о Краліпе ле Девлескєро.
Currently Selected:
Лукастар 9: ЗРБ
Highlight
Share
Copy
Want to have your highlights saved across all your devices? Sign up or sign in
© 2021 Pioneer Bible Translators
