Luka 14

1Palitsuva ilinge pasabati pwu UJesu akatsilya isinu nńumba jya mbaha mbapalisai. Avene vakantegelesa. 2Pwu akavona umunu uńa vutamu vwa matwitwi, vambikile pavuvalasu vita alole. 3Pwu UJesu akavavutsa avamańandagilo nava palisai akata: Ndeti ńi vajyango, nda kunnonu ukumponya umunu pasabati? 4Avene vakava mye vuvule. Pwu umwene akamwibata akamponya, akata bihaga lino. 5Pwu akatsova navene akata: Uńe umwumbelye ino angave ujyunge iligodovwe lya mwene pange nisenga jya mwene, ino jingave jigye mwiguli lya magasi, nda ileka ukuhumya ṅani-ṅani palitsuva lya sabati? 6Pwu tsikajaga avene itsa kumwanda patsitsitsi.

7Akavona avanu avilangilwe kwilya isinu vikihalila ukutama apimikivwe pwu akavavula ikihwanihitso akata: 8Angave umunu akwilangile atye vwitse kwilya isya pavutegulane, kwu bako ukutsitama apimikivwe, pange vwivona ilangilwe nujyunge umbaha nakwave, 9lola pwu uvone itsova kwave uvi avilangile ńi vavili, uvone ita: Umbukile unnino uju, lweli pwu uvone untwe gwidiga uve vwu vukwima ukubiha kukisikasika. 10Bako angave umunu akwilangile atye vwitsage tukalitsage twivoni isinu, pwu utengule ukutama kukisikasika, uvi akwilangile pwu ukuta itse atsove jujwa vwu itsile ate: Vi njyango toga utame apimikivwe palya. Pwu voni uvwu utamile navo pakulya valata: Vi vi mbaha uve. 11Mańa uvi ikijimika mwene, vi alisivwa, uvi ikijisa mwene, vi alimikwa.

12Namwene uvi amwilangile kwilya isinu akambula akata: Ungave uvatelekye avanu pange sya kulya pavusiku pange sya kulya pakimihe, pwu ulavilangaga avanino navalukololwako, navene uvwu mumańine, navamosu uvwu ubadiṅine navo pakutsenga. Lola pange uvone navene vikukutelekela isinu vikukwilanga, pwu vave nda vakuhombile pasinu syako. 13Bako ungave utelike isya kulya, pwu uvilange avagatsu navańavulema navidońoloka ukugenda navabosu. 14Pwu ulava va ndugataluko jilweli. Mańa avene navalinasyo isinge isya kukuvutsihitsa lola isya kuvutsa syu ulasivona vwu vitsuka avagolosu.

15Vwu apulike tsitsitsi ujyunge uvi atamile nave pakulya pwu akata: Ena vi va ndugataluko uvi alalya isinu ndudeva lwa Nguluve. 16Umwene UJesu akambula akata: Ujyunge umunu atelike isinu sya kwigoneka sisyongosu, pwu akavilanga vavongosu avanu. 17Pwu pakavalilo ka kulila akansuṅa unkivaga va mwene akata: Ubihage ukavavule avilangwa ukatetsage: Mwitsage lino mańa isinu sipye. 18Pwu voni vakatengula ukubela. Undongotsi akata: Lola ndigulile ungunda, kwu kuva ndili nuvusumbe vwa kulola. Bako ndume ukambelele. 19Ujyunge unine akata: Lola ndigulile iṅambako ihano, ndibiha kukutsigela, Bako ndume ukambelele, 20Ujyunge unine akata: Lola ndihumile pakutola undala lino, pwu nandikwitsi. 21Vwu itsile ukwu ale unkivaga uju, pwu akambula tsitsitsi unkuludeva va mwene. Pwu gukavipa sitso umwenevutsenge, akambula unkivaga va mwene akata: Ubihage ṅani-ṅani namakasi namunzila mmalekano ukavalundamanye umu voni navagatsu navańavulema navaboswe navidońoloka ukugenda. 22Pwu unkivaga akata: Nkuludeva ndivombile itsu ulagilage, musigye nńumba. 23Pwu unkuludeva akambula unkivaga va mwene akata: Bihaga gendaga mwoni namunzila namumbigo ukavumilitsage vuvule vitsage umu, vadige nńumba jyango umu. 24Lola ndikuvavula ndita: Avanu valya avilangwa nalasimańe ujyunge mundomo isinu syango isya kwigoneka.

25Lino vakagendanya nave avanu ikipuga kikyongosu, pwu umwene akavakilivukila akavavula akata: 26Angave umunu ikwitsa kwane untsilakunsula udadaje nuvańina navana navamamaje navahatsave, untsilakuvusula nuvwumi vwa mwene, vi niva nkongi vango. 27Namwene uvi nikitwika ikidamiṅanye kya mwene nikuṅonga, vi niva nkongi vango. 28Mańa uńe umwumbelye angave ujyunge ita nditsenge iliboma lya mapamba, pwu itengula ukutama pakuvala isya kutsengela tango, ita ndilole tango vwu ndili nasyo isya kutsengela isya kumalihitsa ndita? 29Mańa alumańile umwene ukuta voni avikundola vwu itsenga, valamovela vangave vavwene kundemile ukumalisa ińumba vwu avikile lu lwalo lwene, 30vitetsaga: Umunu uju atengwe ukutsenga iliboma, mańa likandema ukumalisa. 31Vuvule-vule namwene unkuludeva ndita uvi abye kwilwa iligoha nunkuludeva ujyunge. Ndita namwene itengula ukutama pakwisagila tango ita: Avango vali vaelipu kitsigo vuvule (10000), uvwu ulya agegile iligoha vali vaelipu imilevulo givili (20000), nda pwu ndimikane nave lino? 32Angave ivwene ita bako lindemile iligoha ili, pwu isuṅa avańakusuṅa vwu tango ali kuvutale unine ita nkambutse isya kumańanila nkatetsage: Syu siliku? 33Vuvulevule ńivoni umwu mbelye. Uvi nikusileka syoni isyuma sya mwene vuvule, vi niva nkongi vango.

34Umwińo gwu nnonu vuvule. Apene upwu gungave umwińo guvejangike, pwu upita sivetsagepwo isya kuvela nnonu. 35Gutye namungunda nagunogili ukuta vatagage, gutye napene napandakambe nagunogili. Bako vitaga vuvule. Uvi imbulukutu tsa kupulihitsa ali natso, vi apulinitsage.

Currently Selected:

Luka 14: Kinga

Highlight

Copy