Johani 6

1Pambele patsitsitsi pwu UJesu akalovoka ińanza jya mu-Galilai ijyu vaninye vita jya mu-Tibelya, akabiha umwambo gulya. 2Pwu navanu vakankonga ikipuga ikyongosu ulwakuva vasivwene isipelwa isyu apelaga pavatamu. 3UJesu akatoga pakidugala akatama pakyańa navakongi va mwene. 4Ale mbwipi UPasa va va-Juta. 5Pwu UJesu akalolesa akavona avanu vongosu vitsile kumwene. Pwu akavutsa kwa Pilipo akata: Isinu tugulage ndaku isyakukwila avanu voni? 6Mańa UJesu akatsova tsitsitsi ukungela jujwa vuvule, mańa umwene akamańila ṅani itsa kugahwa. 7Umwene UPilipo akamwanda akata: Isinu sya pandalama vamia vavili (200) napene navikwila vidumukilwa, napene tungave twatetsaga tuvameńulanyage utumeńule uju aka mwene uju aka mwene. 8Pwu akambula unkongi ujyunge ale vi Andileja ununave va Simoni Petele akata: 9Pwale baha undume uvi ali nisivanda sihano nisomba ivili. Twu tuliṅane navo avanu ava tututu? 10Umwene UJesu akata: Mbavule avanu vatame pasi. Mańa ilińasi lyale lyongosu baho. Pwu vakatama avanu. Vwu vivala vakavona avagosi vali pavaelipu vahano (5000). 11Pwu UJesu akatola isivanda akasana kwa Nguluve akavagavanya avatamile. Natsene isomba vuvule-vule, akavapa mumwa vanogilwe. 12Vwu vigwite pwu UJesu akatsova kuvakongi va mwene akata: Ndundamanyage utumeńukila utwu vasigitse, silajagaga pavuvule isinge. 13Pwu avene vakalundamanya utumeńukila twa sivanda sihano sisyo utwu vasigitse avalitsaga vakaditsa isidoto kitsigo nasivili. 14Avene avanu vwu vakivwene ikipelwa ikyu apelile UJesu pwu vakata: Uju jilweli vi namalago uvi vatetsaga ikwitsa nkilunga umu. 15Umwene UJesu vwu avwene ukuta vita tumwibate tumwimike ave nkuludeva vitu pwu akavuja akakimbilila pakidugala, pwu akatsikijyekela umwene vuvule.

16Avene avakongi va mwene vakavona vuhwe kukimihe, pwu vakika ukubiha kuńanza. 17Vakipaka mwiboti vakata tulovoke ińanza, tubihe mu-Kapelinaumu. Najyene niṅisi vwu jingye umwene UJesu vwu nitsili nkwipaka mwiboti lya vene. 18Mańa ińanza jikahambuka ulwakuva ilikuluguta lyakuvililaga ilivaha. 19Lino vavwene vingye niliboti muńanza pasigelelo pange imilevulo givili nasihano pange imilevulo gidatu, pwu vakavona UJesu ikada vuvule ukugenda pańanza, vakavona asigye padebe ukusika piboti lya vene. Pwu vakadwada. 20Umwene akavavula akata: Mańa nene, ndadwadaga. 21Lino vwu vita tuntolele mwiboti, pwu vakakeńemuka iliboti lisika ṅani-ṅani pamwambo ukwu vabihaga.

22Pavusiku pwu avanu ikipuga kyoni avavujile umwambo gulya avimile pamwambo pańanza pwu vakisagila vakata: Lola nalitsili nilinge iliboti apa, litsile lyene ilyu vipakage avakongi va mwene kumihe vakisagila vakata mańa umwene UJesu nipakili navo avakongi va mwene, bako vale vene avakongi va mwene vwu valutile. 23Lola vakavona agange amaboti gahumile mu-Tibelya gitsile mbwipi ukwu valilaga isivanda sya lwisajo lwa nkuludeva. 24Avanu ava ikipuga kyoni vwu vavwene navakuli baha UJesu navakongi va mwene, pwu vakipaka navene mmaboti aga vakalovoka ukubiha mu-Kapelinaumu vakatsikundonda UJesu. 25Vwu vambwene umwambo gulya pwu vakambutsa vakata: Vi mańisi vwitsile ndali? 26Umwene UJesu akanda akata: Jilweli-lweli ndikuvavula ndita: Upwu mukundonda namukundondela lulwu ndivapelye ikidego, bako mukundondela lulwu mulye isinu mwigwite. 27Kwu bako ukwijumilitsa isinu isijaga, bako mwijumilitsage isinu isivakwo isya vwumi vwa sikutsoni, isyu Uńamunu ita ndivape. Umwene vi uvi udadaje Unguluve ambikile nikimańilo kya kumwidikila. 28Avene vakambutsa vakata: Tugahage ndeti ukwijumilitsa imbombo itsu Unguluve ita muvombage? 29Akanda UJesu akavavula akata: Itsene imbomboi tsu Unguluve ita muvombage itsu tsa kumwidika uvi ansuṅile umwene. 30Pwu avene vakambutsa vakata: Upelile kiki ikya kukumańilamwo ikya kukwidikilamwo uvwe Uvombile imbombo iliku? 31Lola avadadajitu vwu valitsaga UMana ndukungu mulya nduvwu livigilwe mukalata ilita: Akavapa ikivanda ikihumakukyańa vakalya. 32Umwene UJesu akavavula akata: Jilweli-lweli ndikuvavula ndita: Ndatetsaga vi Mose uvi avapetsaga ikivanda kya kukyańa kilya, bako vi dada uvi ikuvapa ikivanda kya kukyańa ikya jilweli. 33Mańa ikyene ikivanda ikyu ikuvapa Unguluve kyu kihumile kukyańa, kyu kikukipa uvwumi ikilunga. 34Pwu avene vakata: Nkuludeva kyu utupetsage sikutsoni ikivanda iki. 35Pwu UJesu akavavula akata: Nene kivanda ikipelavwumi. Uvi ikwitsa kwane, vi najilavave lusiku inzala, uvi ańidike une, vi nalumilwe lusiku. 36Lola nduvwu ndivavulage–ukumbona kwu mumbwene mmiho, mańa namukuńidika. 37Voni uvwu ikumetsaga udada vwu vikwitsa kwane. Mańa uvi ikwitsa kwane vi nandilambinge. 38Mańa ndikile ndihumile kukyańa, lola nanditsili nkuvomba itsu ndinogilwe ndimwene, bako nditsile nkuvomba itsu anogilwe uvi asuṅile. 39Umwene uvi asuṅile une, tsu anogilwe ukuta voni uvwu amye umwene umwuvavelye ukuta alajagaga nu jyunge, bako anogilwe ukuta nditse ndivatsusage voni palitsuva lya kunepo. 40Mańa umwene udada tsu anogilwe ukuta voni avatye nukundola unswambe vatye nukumwidika ukuta vavuvone uvwumi vwa sikutsoni. Pwu nuńe ndilavatsusaga palitsuva lya kunepo.

41Pwu vakasisa ava-Juta ulwakuva atye nene kivanda ikihumile kukyańa. 42Avene vakata: Ndita vi Jesu uńa-Josepu, ndita tummańile nudadaje nuvańina, pwu itsove ndeti ukuta: Ndikile ndihumile kukyańa? 43Akavanda UJesu akata: Ndasisaga ńivoni. 44Nujyunge nikwitsa kwane vwu nankwegili kwane udada uvi asuṅile une, vi ndilantsusaga palitsuva lya kunepo. 45Navene avańamalago vavigyeṅani vatye: Voni valava vamańisivwa uvwu avamańise Unguluve. Voni avipulika kwa dada, avikutsimańa inongwa kumwene vwu vikwitsa kwane. 46Pwu ndatetsaga pange ujyunge ambwene mmiho udada. Bako nambweni mmiho ujyunge. Mwene uvi ahumile kwa Nguluve vi lweli vi ambwene mmiho udada. 47Jilweli-lweli ndikuvavula ndita: Uvi ikuńidika une vi ali nuvwumi vwa sikutsoni. 48Nene kivanda ikipelavwumi. 49Avadadajińo vakalya UMana ndukungu vakaswa. 50Ikyene ikivanda ikihumile kukyańa kyu angave umunu alye pwu niswa. 51Nene kivanda ikyumi ikihumile kukyańa, Umunu uvi alye ikivanda iki, vi alavakwo sikutsoni. Ikyene ikivanda ikyu ndilavapa gwu mmana gwango ugwu ndilavapa ukuta gwipele vwumi vwa kilunga. 52Pwu vakakaniṅana ava-Juta vakata: Ikutupetsaga ndeti ummana gwa mwene umunu uju, gwu tulitsage ndeti. 53Umwene UJesu akavavula akata: Jilweli-lweli ndikuvavula ndita: Ngave namwilya ummana gwa Ńamunu, ngave namwińwa unkisa gwa mwene, pwu uvwumi nandi navwo mwitumbu mwane. 54Uvi ita ummana gwango ilya, ita nunkisa gwango ińwa vi lweli vi ali nuvwumi vwa sikutsoni, vi ndilantsusa palitsuva lya kunepo. 55Mańa ummana gwango syu sinu sya jilweli sya kulya, unkisa gwango syu sinu sya jilweli sya kuńwa. 56Uvi ita ummana gwango ilya, ita nunkisa gwango ińwa vi ivetsaga mwane, vi nune ndivetsaga mmwene jujwa. 57Nduvwu mwumi udada uvi asuṅile uńe, vwu nune ndili mwumi upwu ndivelye mwa dada ukuva ndili mwumi, vwu igaha namwene uvi anditsaga uńe ivetsaga mwane ukuva mwumi. 58Vwukili ikyene ikivanda ikihumile kukyańa–ikyene nakili ndu Mańa uvi valitsaga avadadajińo vakaswa–bako ikyene uvi alye vi ivakwo sikutsoni. 59Tsu akavavula vwu ikuvamańisa inongwa nńumba jya kwisajilamwo jya mu-Kapelinaumu.

60Avange avakongi va mwene avongosu vwu vapulike tsitsitsi pwu vakata: Lipala ilimeńu ilyu itsova lyu veni ipulika. 61Umwene UJesu vwu avavwene mwitumbu mmwene avakongi va mwene ukuta vikihiva patsitsitsi itsu atsovile pwu akavavutsa akata: Tsu tsita ndivambutse tsitsitsi? 62Pwu ndagaha ndeti mungitse mbone Uńamunu itoga ibiha ukwu ale katale? 63Mepo uvi ikumpa uvwumi umunu, ugwene ummana gwu nagukumpa kinu umunu. Amameńu ugwu ndivavulile vi Mepo, vwu vwumi agene. 64Mańa mwuvale avange umwumbelye umu uvwu navikutsivona. Mańa UJesu avamańyeṅani pavutengulilo uvwu navatsivone, namwene uvi alamendamaga ulwambele ammańile ukuta vi nongi. 65Akongela akata: Tsu tsitso ndivavulile nditye: Nikwitsa ujyunge kwane vwu nampili udada ukwitsa. 66Tsu itsi avange avakongi va mwene avongosu vakajaga kumwene, vakaleka ukugenda nave. 67Pwu UJesu akavavutsa avakitsigo navavili akata: Nuńe nda nnogilwe ukundeka? 68Akanda USimoni Petele akata: Nkuludeva tubihe ndaku? Mańa amameńu aga gikutupa uvwumi vwa sikutsoni ugwu vukutuvula. 69Mańa uvwe tutsivwene, uvwe tukumańile ukuta vi Mbalatse va Nguluve uve, 70Akanda UJesu akata: Nda nandivahalili upwu ndavahalaga kitsigo navavili? Mańa mpamato vi Setano vuvule. 71Antsovaga ju Juta uńa-Simoni va mu-Kalyoti. Mańa vi ale va kumendama ulwambele nupwu ale va pakitsigo navavili.

Currently Selected:

Johani 6: Kinga

Highlight

Copy