Johani 3

1Alepwo ujyunge umunu umpalisai ilitavwa lya mwene ale vi Nikotemu umbaha mba-Juta. 2Vi akabiha kwa Jesu pakilo akatsita: Vi mańisi tukumańile ukuva vi mańisi vi Muma-kwa-Nguluve, mańa nipela ujyunge isipelwa isyu wipela uve angave Unguluve niva nave. 3Pwu UJesu akanda akata: Jilweli-lweli ndikukuvula ndita: Angave umunu nikwandisa ukuholwa, pwu nikulumańa Uludeva lwa Nguluve. 4Umwene UNikotemu akanda akata: Aholwagwe ndeti umunu vwu agosipe? Pange andisage avujage ingilage mwa vańina mwitumbu pwu aholwagwe? 5Umwene UJesu akanda akata: Jilweli-lweli ndikukuvula ndita: Angave umunu niholwa nakumagasi nakwa Mepo pwu nalingile lusiku kuludeva lwa Nguluve. 6Uvi gumolile gu mmana namwene mańa vuvule, uvi amolile UMepo namwene mepo vuvule. 7Tsu ulakeńemukaga itsu ndikuvulile nditye: Upita mwandisage ukuholwa. 8Lola imepo jyu jikuvilila mwoni umwu jinogilwe jyene. Ilimeńu lya jyene lyu vupulika vi munu, lola ukujimańa ukwu jihumile nukwu jibiha, bako kwu nujimańili. Lola vwu vali vuvule-vule voni uvwu avaholile UMepo. 9Pwu UNikotemu akambutsa akata: Tsu tsipelage ndeti tsitsitsi? 10Umwene UJesu akanda akata: Vi mmańisi mbańa-Isilaeli umu natsene tsitsi nutsimańili? 11Jilweli-lweli ndikukuvula ndita: Uvwe twitsova itsu tutsimańile, tusimilitsa itsu tupulike. Nuńe ulusimilitso lwitu namukulwupilila. 12Apene tsingave natsitsa nkilunga umu namukutsivona upwu ndita ndivavule, pwu ndatsivona ndeti itsa kukyańa ndingave tsu nditye ndivavule? 13Nasiki lusiku ujyunge kukyańa, mwene jujwa uvi ikile ahumile kukyańa, vi Ńamunu uvi nalino ali kukyańa vi asikekwo. 14Vwu nu-Mose imike ińandalwe ndukungu mulya vwu upita namwene Uńamunu imikivwagwe vuvule-vule, 15voni avikumwidika ukuta valajagaga, bako vavuvone uvwumi vwa sikutsoni. 16Mańa vuvule-vule akiganile Unguluve ikilunga, pwu akipye unswambe mpamato ludiga, ukuta voni avikumwidika valajagaga vave nuvwumi vwa sikutsoni. 17Ulwakuva upwu Unguluve ansuṅaga nkilunga unswambe pwu nansuṅili ukuta akihige ikilunga, bako pwu ansuṅile ukuta akipoke ikilunga. 18Uvi ikumwidika vi nihigwa, lola uvi nikumwidika vi ahigililwe ṅani ulwakuva abelile ukulyidika ilitavwa lya nswambe va Nguluve mpamato ludiga. 19Kwu ukuhiga vihigye ṅani avanu nupwu ulumuli lwitsaga nkilunga umu, upwu avene valugililaga ulumuli ulwakuva imbombo tsa vene tsale mbivi. 20Ulwakuva voni avivejanga itsinge vwu navaluganili ulumuli, navibiha kulumuli ulwakuva vita bako pange tuvone lukutuvunga itsu tuvombile. 21Avene avivomba itsa jilweli vwu viva kulumuli ulwakuva vita tsivonekage vuvule itsu vavombile ukuta vatsivombye mu mwa Nguluve.

22Pambele patsitsitsi pwu UJesu akabiha nkilunga kya mu-Jutai navakongi va mwene. Mwu vakatsigona akavotsa navanu. 23Mańa namwene nu-Johani avotsaga avanu mu-Enoni pipi namu-Salimu, ulwakuva ulugasi lwale lwongosu mumwa. Avanu vakitsa vakotsivwa. 24Mańa akanale UJohani ukudindilwa nńumba jya vańololo, 25Pwu ulukani lukatengula navakongi va Johani nava-Juta, vakakaniṅana ulwiho lwa kwoga. 26Vakatsigega kwa Johani vakata vi atsidumulage vakata: Vi mańisi umunu ulya uvi vwale nave umwambo gulya gwa Jolitani, uvi untsovage sitso unsimilitsage uve, mańa lino namwene ikuvotsa avanu, voni vikwitsa kumwene. 27Akanda UJohani akata: Nujyunge umunu nikitolela nisinge mwene. Lola sisyu apevilwe kukyaṅa syu iva nasyo sisyo. 28Mańa mwapulike nuńe upwu nditetsage: Mańa nandili vi Kilisiti uńe, upwu ndatetsaga: Bako ndisuṅilwe vuvule ukuta ndilongole mbulongolo mmwene jujwa. 29Uvi ali nave uńavutegulwa vi vi nkuvapo jujwa. Mańa umwene untuni va nkuvapo vi ikwima vi ipulika vwu itsova umwene, vi ihekela sitso vwu apulike ilimeńu lya nkuvapo. Uluhekelo ulu lwu ulu ndihekye nune ndigwite lino. 30Umwene vi upita avalage, une upita ndisilage. 31Uvi ahumile kukyańa vi ali kukyańa kuvoni. Mańa uvi ahumile nkilunga umu vi va nkilunga vuvule, natsene itsu itsova tsa nkilunga vuvule. Umwene uvi ahumile kukyańa vi ali kukyańa kuvoni. 32Umwene itsu atsivwene nitsu apulike tsu itsova isimilitsa. Mańa nakuli ujyunge uvi ikutsupilila itsu itsova. 33Uvi ikutsupilila itsu itsova isimilitsa umwene, vi ipelile ukuva kimańilo kya kumańilamwo ukuta Unguluve va jilweli. 34Ulwakuva uvi ansuṅile ju Nguluve, vi itsova amameńu ga Nguluve. Mańa Unguluve upwu imepo umunu nikumpela pakigelelo, bako ikumpa jyoni vuvule. 35Udadaje anganile unswambe, syoni ampye nkivoko kya mwene. 36Uvi amwidike unswambe, vi ali navwo uvwumi uwa sikutsoni. Lola uvi ikumbeda unswambe, vi nalavuvone uvwumi, bako uluvipo lwa Nguluve lwu lwiva pamwene.

Currently Selected:

Johani 3: Kinga

Highlight

Copy