Johani 17

1Vwu atsovile tsitsitsi UJesu pwu akinamuka amiho ga mwene akalola kukyańa akata: Vi dada kitsile akavalilo. Umpetsage uvuvaha unswambo, namwene unswambo pwu ukuta akupetsage uvuvaha nuve. 2Lola umpye avanu voni ukuta ave mwenenavo voni uvwu umpye, ukuta avapetsage uvwumi vwa sikutsoni uju uvwa mwene uju uvwa mwene. 3Uvwene uvwumi vwa sikutsoni vwu uvu vangave vatye nuve vakumańile ukuva vi Nguluve va jilweli uve vimwene, vatye nuvi unsuṅile UJesu Kilisiti namwene vammańile. 4Ndikupye uvavaha nkilunga umu, ndimalile nimbombo itsu umye utye tsu uvombage. 5Lino vi dada umetsage uvuvaha vwango kwave ukwa, uvwu ndale navwo kwave kukwa vwu kikanale ukuvakwo ikilunga kyoni. 6Ndivagubukulye ilitavwa lyako avanu uvwu umye nkilunga umu. Vale vako, umye une, avene ilimeńu lyako valivikile munumbula tsavene. 7Lino pwu valumańile ukuta syoni isyu umye sihumile kwave. 8Mańa ninongwa itsu umye tsu ndivapye avene, navene vatsupilye, vatsivwene jilweli ukuta tsihumile kwave, pwu vatsivwene avene itsakuta usuṅile uve.

9Vwu ndikuvatsovela avene upwu ndikisaja nandikukitsovela ikilunga kyoni, bako ndikuvatsovela uvwu umye, mańa vwu vako. 10Mańa syoni isyango syako uve, syoni isyako syango une, nune ndikavile uvuvaha mbene. 11Uńe kwukuva ndihumile nkilunga umu lino, avene lola vakanale, vali nkilunga umu, une ndikwitsa kwave. Vi dada vi mbalatse uvibatililage mwitavwa lyako uvwu umye une, navene ukuta vipelage ukuva mpamato mwene voni nduvwu tuli mpamato mwene twi vavili nuve nune. 12Vwu ndili navo nkilunga umu ndikavibata mwitavwa lyako une, Uvwu vwamye uve ndivuvatilye, najagili ujyunge umwuvavelye, vi Ńaluvejangiko mwene vi ajagile ukuta tsitse itsivigilwe mwa kalata. 13Lino ndikwitsa kwave, tsitsitsi tsu nditsovela nkilunga umu, ulwakuva ndita uluhekelo ulwu ndihekela une vavetsage nalwo avene ululuti vuvule mwitumbu mbene. 14Ndivavulile ilimeńu lyako, pwu ikilunga kikavasula ulwakuva navali va nkilunga umu avene nduvwu nune nandili va nkilunga umu. 15Upwu nditekelesa kwave pwu nandita uvahumyage nkilunga umu, bako ndita uvuvatilage kumbivi. 16Navali va nkilunga umu avene, nduvwu nune nandili va nkilunga umu. 17Uvapele vavalatse mbwajilweli vwako, mańa ilimeńu lyako vwu vwajilweli. 18Nduvwu usuṅile une nkilunga umu uve, vwu ndigahile nune ndikuvasuṅa nkilunga. 19Ndikivalatsa une ulwakuva ndita ndive nekelo jya vene avene nune, navene ukuta vipelage vavalatse mbwajilweli.

20Lola upwu nditekelesa pwu nandikuvadovela ava vene, bako ndikuvadovela navene avalańidikilaga pimeńu lyavene, 21voni ukuta vipelage ukuva mpamato mwene vuvule nduvwu nuve vi dada ulimwane, nune ndilimwave. Navene ukuta vave mwavwe uvwe, pwu nikilunga kilumańage ukuta usuṅile une. 22Navwene uvuvaha uvwu vwamye uve vwu ndivapye avene une ulwakuva ndikata navene vipelage ukuva mpamato mwene vuvule nduvwu nuvwe tuli mpamato mwene vuvule twi vavili nuve nune. 23Ndikata une ndive mbene, uve ndikata uve mwane, pwu ukuta vipelage valuti pakuva mpamato mwene vuvule, nakyene ikilunga pwu ukuta kimańilage baha ukuta ukusuṅa une usuṅile uve, nukuvagana uvaganile avene nduvwu unganile nune. 24Vi dada avene voni uvwu umye uve, vwu ndinogilwe ukuta navene vavetsage nune kwoni ukwu ndilikwu une, ukuta vavulolage uvuvaha vwango uvwu umye uve ulwakuva unganile kakatale vwu kikanale nikilunga ukwalivwa. 25Vi dada vi ngolosu ukuhiga, mańa nakyene nikilunga nakikumańili lusiku, lola une ndikumańile sikutsoni, navene ava vakumańile ukuta vi unsuṅile. 26Ndivamańise ilitavwa lyako, ndivuja ndikuvamańisaga, pwu ukuta navene vavetsage nalyo mwitumbu mbene ulugano ulwu unganile nune ukuta ndivetsage mbene vuvule.

Currently Selected:

Johani 17: Kinga

Highlight

Copy