Jenesesi 9

Mulugu ohosakanya nipangano naye na atu

1Mulugu ohomureliha Nowe na ahimaye, liye ira: <<Mubalihane, muindjivihane, muzale ilambo ya vati. 2Vinyama ja mukokolani na mbalrame dovava zulu, jomburunuwa ja mwilamboni na somba da mbara, jatene jinerege uovani na makalelo ohokala a masika. Jatene ejo eto dihimala hiya mmandani mwenyu ira mutongege. 3Nnouvahani eto vinyama datene dokalawo ira mudjege. Sawasawa nnga dauvahileni miyo wanle ira mudjege jalo, peno miyo nnouvahani ira mudjege vinyama datene.#9:3 Mulugu ohowonga na Nowe ira: peno miyo nnouvahani ira mudjege vinyama datene. Agali voroma vene, Mulugu kaavahile atu ira kadjege mwanainyama uli watene, tempu ya Nowe, Mulugu ohavaha atu ira kadjege mwanainyama uli watene. Ku wonga Mulugu aapandutchaga wene atu, tchadja nyama ili yatene, nne mwanaku nne mbuzi nne nni. Mbwenye aNowe kohovahiwa ira kadjege mwanainyama uli watene kafuna atu nnga mwanaku nari nguluwe nari mwanapaka nari munyani. Ira nivwe zela tempu Mulugu akamelihile liye jodja jimohi jiwa, nione Detoronomiyo 14:3-21. Ira nivwe zela nkani wa jodja tempu ili hiyo ila, nione eto Markuji 7:18-19 na 1 Timoteyo 4:4-5 na marodape anafwanyeya wewo. 4Mbwenye mwadjaga nyama, kamudjege na sangiri niwa nene. Tchoira sangiri ti neno nnavaha ingumi.

5<<Eto wenne unampe mutu, atatilaga sangiri na ingumi ya mutu, miyo na ibaribari nnomutonga. Mutonga uwa, atu afwaye kampe wenne unavuvihe sangiri na nfwaye.#9:5 atu afwaye kampe wenne unavuvihe sangiri na nfwaye: Mazwala ananiwandela makalelo Mulugu unafuna liye ira apanga katongiwe. Eto fwanyeya ira ale anampa mpanga kinna mulandu vamentoni va Mulugu mwasiwa Mulugu gwaarumile ira kairegena. Pakana peno Mulugu uhunvaha guverno utongi woapa apanga. (Roma 13:1-6) Mazwala kinatapulela ira inafwanela mutu vande vaye ampe mbwiyaye na mwasa wa jomunukeda zela ukwiri. Anatapulela ira mutu ahindiwa agampile mutu na mandaye, inafwanela atongiwe na andimuwa. Mulandule amugwela, andimuwa kohovahiwa na Mulugu ira kampe mutule kahana mulandu. Masiki mwanainyama avenya, ampa mutu, mwanainyamole akwe. 6Ule unampe mutu nfwaye avuviha sangiri naye, na liyene sangiri naye nivuvihiwe na atu afwaye, mwasiwa mutu apandutchiwe molingana na Mulugu. 7Mbwenye nyo, mubalihane, muindjivihane. Mukale pwi, muindjivihane mwilamboni ya vati.>>

8Evale Mulugu ohomuwandela mulombwana Nowe vamohi na ahimaye eraga: 9<<Peno miyo nnosakanya yopangana yaga na nyo vamohi na ahiminyu a musogolro, 10na anavinyama atenene kakumile mmwadeyani anafwanyeya mwilamboni ya vati, anno anafwanyeya vamohi na nyo, romela mbalrame, anavinyama a vande vamohi na anavinyama a mukokolani, na anavinyama atenene a mwilamboni ya vati. 11Yopangana inasakanya miyo tchi ila: Miyo kadiza ditolotcha jovuma jatene jene na mahindje madjindji. Kadiza diziha mahindje madjindji obwanyula ilambo ya vati.>>

Ionihedo ya yopangana ya Mulugu na jatene jovuma

12Mulugu ohowonga eto eraga: <<Ila inafuna ikale ionihedo ya yopangana inasakanya miyo na nyo vamohi na jovuma jatene jinafunege baliwelamo sogolro. 13Miyo nnohela muzirilimbo mmiramboni ira ikale ionihedo zela yopangana yaga#9:13 nnohela muzirilimbo mmiramboni ira ikale ionihedo zela yopangana yaga: Mazwala ananiwandela ira muzirilimbo kahi yengo yabure yomubuleliha mutu. Tchi yengo yapama uhenle Mulugu zulu ira ikale ionihedo ira kaza atolotcha ilambo ya vati na mahindje akoka. Atu kawongaga ira muzirilimbo unombuleliha mutu, yenno tchi yonama ya Satana. na ilambo ya vati. 14Yopangana yaga tchi ila. Daziha mirambo zulu, amala aoneya muzirilimbo mmiramboni mule, 15miyo daona muzirilimbo ule, pa evo vanafuna miyo umbuwela ira: <Muzirilimbo unaona miyo ule, tchi ionihedo ya yopangana yaga na atu atene na jovuma jatene ira miyo kadiza ditolotcha jengo jatene na mahindje madjindji akoka.> 16Muzirilimbo aoneya mmiramboni mule, miyo Mulugu damuona nnerege umbuwela yopangana yaga yohomala isakannye miyo na jatene ja ingumi jinafwanyeya ilambo ya vati.>> 17Evale Mulugu ohomuwandela Nowe ira: <<Muzirilimbo ula tchi ionihedo ya yopangana disakanyile miyo na jovuma jatene jinakala mwilamboni ya vati.>>

Nowe vamohi na ahimaye

18Ana Nowe kakumile mmwadeyani kafwanyeya kagali araru: Semi, Kami na Jafeti. Kami gwenno ambanle Kana. 19Atu atene kabalaleyile mwilamboni ya vati kabaliwe muwari mwa ana Nowe araru anno.

20Mulombwana Nowe ali namalima. Muwari mokala namalima, liye gu mulombwana oroma alimile munda wa uva. 21Siku nimohi Nowe ohong'wa vinyu akumile mmundani mwaye mule, liye fiyeda lrezelra. Agalrezenlre, ohodowa mmusasani mwaye, liye wungula jowara jaye, liye gonanti agali mandave. 22Evale mulombwana Kami, babaye Kana ohomuonaga babaye ule agali mandave. Evale ohodowaga awandela abalaye ambinli ale kafwanyeya unde. 23Mbwenye mulombwana Semi na Jafeti kagavwile enne, kohotukulaga kapa, aliwa kapatchiha vanifudini, aliwa wendaga na indulrindulri, tawiha ira anaone umandave wa babiwa ule. Aliwa nkunela babiwa wenno ali mandave.

24Evale mulombwana Nowe agasisimuwile lrezelra walrezenlre liye ule, ohoiziwa zela yenne yairile Kami mwanaye wa ng'onong'ono ule. 25Evale Nowe ohowonga eraga: <<Mulombwana Kana atembelrelreye! Liye akale muzari wa azari, aalabege abalaye!>>#9:25 Mulombwana Kana atembelrelreye! Kana ali mwana Kami eto ali mbwiye wa akuda Kana anno aIzarayeli kaagondjihile atu ira kawande kala mwilamboni mwewa. 26Nowe ohowongagave eraga: <<Otamaleliwa akale Yehova, Mulugu wa Semi eto Kana akale muzari waye! 27Mulugu amuulukulihe Jafeti#9:27 Jafeti na iEberewu inatapulela ulukulihiwa. na ilambo yaye! Ahima a Jafeti kamangege nyumba diwa vamohi na ahima a Semi! Mulombwana Kana akale muzari wa Jafeti!>> 28Tempu ya mahindje madjindji yagavirile, Nowe ohomala yaka 350 dimohi diwa. 29Nowe kalawo waye watene amanle yaka 950. Mwa enne ohokwa.

Currently Selected:

Jenesesi 9: iLolo

Highlight

Copy