Jenesesi 22

Mulugu ohowombeza nroromelo na Abarahamu

1Vagavirile malambo madjindjene, Mulugu ohofuna ira awombeze nroromelo na Abarahamu. Mwa enne ohomuitana ira: <<Abarahamu!>> Abarahamu ohomurumela ira: <<Gu miyene, dili vano.>> 2Evale Mulugu ohomuwandela, liye ira: <<Umutukule Izaki mwanawo mmohive unna we, wenno unamuziveliwetchetcha we, umudowena mwango nnafuna miyo utonyiheda mwilamboni mwa Moriya. Wampe wewo, umusakanye mukuto otumeya.>>

3Unde wagatchile na mabebehene, mulombwana Abarahamu ohoreba kuni dotumeyana mukuto, liye hela yogaratela vaburuni vaye. Ohatukula azombwe ambinli kafwanyeya kagali anamalabaye vamohi na mwanaye Izaki, aliwa venyihana dowaga nimburo nenne namuwandenle Mulugu. 4Kadowagave, nagafiyile siku naneraru keragave wenda, Abarahamu againg'anne okala ha ule, ohoona olapela wene nimburo nafuna atu dowa sakanya mukuto. 5Evale ohowonga na anamalabaye eraga: <<Nyo halani veva na burula. Miyo na mwanagola nnaya ule ira namutamalele Yehova. Namala mutamalela, nnowela nuufwanyeni veva.>>

6Abarahamu ohotukula kuni da mukuto, mukapatchiha mwanayele Izaki. Liye atukunlege munlo na mbene. Mwa enne kohoromaga wenda vamohi kadowaga. 7Evale kadowagave Izaki ohowonga na babaye ule eraga: <<Babani!>> Liye ohomurumela ira: <<Kawonga mwanaga.>> Izaki nfuka ira: <<Munlo, nihitukula. Kuni, nihitukula. Nnga mwana nibila niwa na mukuto otumeya nili uvi?>> 8Abarahamu ohomurumela eraga: <<Mwanaga, mwana nibila niwa na mukuto otumeya Mulugu unovisakela.>>#22:8 Mulugu unovisakela: Ku wonga Mulugu mwinnya gunawanda visakela jinafuna liye. Sawasawa nnga liye ohowanda saka mukuto ofwanela vamalroni va Izaki, liye eto owanda visakela mukuto ofwanela vamalroni va atu otega. Mukutuwa asakile liye gu Yesu Kiristu. Mwa enne koharanagave kadowaga.

Mulugu ohonvunela Izaki ira ahakwe

9Kagafiyile nimburo nenne namutonyihedile Mulugu nne, Abarahamu ohokunga ibuwa ya mukuto, tandavo kuni. Eto ohommanga mwanaye Izaki, muhela vaibuwani vale, vazulu va kuni dile. 10Evale ohopululaga mbenaye ira amusige mwanaye. 11Mbwenye ahanairena, Mungelro wa Yehova ohowonga zulu amuitanaga eraga: <<Abarahamu! Abarahamu!>> Liye murumela ira: <<Miyo vano!>> 12Mungelrole ohowonga eraga: <<Kumpe mwanawo eto nne kumuirele yengo yotakala! Tchoira peno dihiiziwa ira weyo uli mutu omuova Mulugu mwasiwa kudikondihile mwanawo mmohive unna we.>>

13Abarahamu agarungunuwile, ohoonaga unduli waye nibila na mulombwana nagamangeyile manyanga vanikupuni. Ohodowa tukula nibila nne, liye hela vaibuwani, sakanya mukuto otumeya vamalroni va mwanaye.

14Noira enne, Abarahamu ohovaha nimburo nenne nzina noira: <<Yehova gunasaka.>> Nona iwongiwagave ante peno ira: <<Vamwangoni va Yehova vinosakeliwa.>>#22:14 Vamwangoni va Yehova vinosakeliwa. Abarahamu awandeliwe ira adowe asakanye mukuto mwango Moriya. Eto nafwanya 2 Koronika 3:1, nnovwa ira Salomawu ohomanga Nyumba ya Yehova vazulu va mwango Moriya, sidadi ya Jeruzalemu. Abarahamu muwari mowonga ira: <<Yehova gunasaka>>, inakala nnga liye ohoiziwa ira: <<Mulugu udivaha mukuto ira Izaki avuneye eto liye unosaka mukuto mmohiwa ira atu atene kavuneye.>> Eto fwanyeya ira Yesu wenno unafwanyeya agali mukuto wehu wenno unisakenle Mulugu, na liyene apiwe Jeruzalemu wewo wawongile Abarahamu ira: <<Vamwangoni va Yehova vinosakeliwa.>>

15Mungelro wa Yehova ohomuitana Abarahamu akoka zulu, 16liye ira: <<Yehova uwongile ira: <Na mwasa wa makalelo wirile we, voira weyo kudikondihile mwanawo mmohive unna we, miyo nnolumbela mwa nzina naga dagali Yehova, 17mwa ibaribari miyo nnoureliha eto nnoza daaindjivihe ahimawo a musogolro kakale nnga indjiva wa nyenyedi da zulu eto nnga miseva da mutcherelani mwa bara. Aliwa anoza kagondjihe sidadi da amwidaniwa ira dikale dewa. 18Eto muwari mwa ahimawo a musogolro, malogo matene a ilambo ya vati anoza karelihiwe, mwasiwa weyo uvwelela yaurumile miyo.> >> 19Nomala enne, Abarahamu ohowelela wali anamalabaye ale, aliwa venyihana vamohi dowaga Beriseba, liye kalaga wewo.

Ahima a Nahori

20Jatene ejile jagaireyile, vagamanle malambo, Abarahamu ohovwa mpanganyo ira: <<Mbalawo Nahori na muhiyanaye Milika kohabala ahimiwa. 21Muwari mwa ahima kaabanle atu, mwana oroma ali mwanapongwe eriwa Uzi. Adibiliye ba ala: Buzi, Kemuweli wenno ambanle Arani, 22Kezedi, Hazo, Pilidaxi, Jidilafe na Betuweli 23wenno ambanle Rebeka. Ala ba ahima atanu na araru aabanle Milika na mamunaye Nahori wenno unafwanyeya agali Abarahamu mbalaye. 24Mulombwana Nahori ohomukana eto muhiyanaye wang'ono eriwa Rewuma. Rewuma ule ahima aabanle liye ba ala: Teba, Gamu, Taxi, na Maka.>>

Currently Selected:

Jenesesi 22: iLolo

Highlight

Copy