Jenesesi 20

Mwene Abimeleki ohomutukula mwadi Abarahamu

1Abarahamu ohotama, liye dowa ilambo ya Negebe, vari va Kadeji na Suri. Noira enne, ohodowaga garati pama pama ilambo ya Jerari nnga mutu oza. 2Abarahamu agadowile Jerari ule, awongetcha ira: <<Sara gu murongolaga.>> Na mwasa wenne, Abimeleki mwene wa Jerari ule, oharuma atu aliwa mudowela Sara muzana vande vaye ira akale muhiyanaye. 3Mbwenye na mahiyu, Mulugu ohomuzela mulombwana Abimeleki morohani amuwandelaga eraga: <<Weyo eni unopiwa mwasiwa muhiyana umutukunle we uyo uhuteliwa, ukana mamunaye.>> 4Abimeleki tempu yenne ali ahanamugonena Sara. Evale agavwile mazu anne, ohofuka eraga: <<Nabwiya kodi munoapa atu kahategileve? 5Tchoira mwinnyiwene Abarahamu gwadiwandenle ira: <Wenna gu murongolaga.> Eto na muhiyanayene ohorumelela ira: <He, wenna gu murongolaga.> Nona na ibaribari miyo dimutukulaga dairilena na mmirimani mwaga mwatene dahaiziwaga yengo tchivi.>> 6Evale Mulugu ohomuwakula morohani eraga: <<Miyo dihiiziwa ira na ibaribari weyo uirilena na mmirimani mwawo mwatene dahaiziwaga yengo tchivi. Nona miyo dukondiha gona na liye ira wahaditegele. 7Mbwenye inafwanela unvelele muhiyanoyo wa mamunaye. Tchoira mamunaye gu namafiyiheda wa Mulugu. Wamuweliheda, liye unoulobelela ira weyo wahakwe. Mbwenye wahafune muweliheda muhiyanaye, na ibaribari weyo vamohi na atwawo atene a vande vawo munokwa.>>

8Mmetcheloni muwa, mwene Abimeleki ohovenya na mabebehene, liye dowa aitaniha anamalabaye atene, liye awandela jatene jene jamuireyele. Anamalabaye ale kagavwile jatene jene kohokagana ova ulukulu. 9Nomala eno, mwene Abimeleki ohomuitaniha mulombwana Abarahamu, liye nfukaga eraga: <<Kodi jiniirele we ji nni? Dutegenle nni ante weyo fiyeda dizelana yotega ilukulu, miyo vamohi na umwene waga? Iirile we kahi yapama.>> 10Abimeleki ohonfukave Abarahamu kwi: <<Kodi yobalra tchivi yanna we, usakanyaga jeji?>> 11Abarahamu ohomuwakula mulombwana Abimeleki eraga: <<Miyo ira diirena eni dere umbuwela ira: <Ilambo yenna ili miyo ila atu anakalamo kinamuova Mulugu. Dera diwonge ira: <<Wenna gu muhiyanaga>>, anodipela.>#20:11 Dera diwonge ira: <<Wenna gu muhiyanaga>>, anodipela. Abarahamu amuwongihaga muhiyanaye Sara ira: <<Gu murongolaga>>, airana muwari mokana nroromelo noyeva. Tchoira ira Abarahamu akale mwilamboni mule, amudowilena wewule ali Mulugu. Eto Mulugu oholumbela na Abarahamu ira: <<Miyo nnoukoya.>> (Jenesesi 15:1) Yali yofwanela Abarahamu amuroromele Mulugu ira amukoye hiyaniha no nvaheda muhiyanaye mmandani mwa atu amohiwa. 12Eto hiya yennove bahi, na ibaribari liye gu murongolaga mwasiwa gu mwana babaga, so nihiyanne ummani. Mwa eno, miyo mutela. 13Mulugu adikumihaga vande va babaga, miyo dohonvepa muhiyanagola, miyo ira: <Upama unafuna we diirela gu ula. Mwatene mwene munafiyege hiyo, uwongege ira: Ula gu murongolaga.> >>

14Evale Abimeleki ohonvaha Abarahamu mabila, ng'ombe, anamalaba a alombwana vamohi na a ahiyana. Eto ohomutukula Sara, liye muweliheda. 15Noira eno, ohowonga na Abarahamu eraga: <<Ilambo yaga yatene tchenna. Musakulre pandi ili yatene munafune nyo ira mukalege vevo.>> 16Evale Abimeleki ule ohomuwongana Sara eraga: <<Miyo dihinvaha murongoliyo kobiri da parata 1.000 para ikale ionihedo ira atwawo nari atu atene anafwanyeya eva kaiziwe ira kilivo iireyile muwari mwa weyo na miyo, tawiha ira unakalewo unaunukedege yengo.>>

17Noira enne, Abarahamu ohomulobelela wa Mulugu. Evale Mulugu ohonvulumutcha mwene Abimeleki na muhiyanaye vamohi na azari aye atene a ahiyana, aliwa roma bala. 18Tchoira na mwasa omutukula mwadi Abarahamu, Yehova ohafunga ahiyana atene a vande va Abimeleki, aliwa habalaga.

Currently Selected:

Jenesesi 20: iLolo

Highlight

Copy