Jenesesi 19

Angelro ambinli kohofiya vande va Lroti

1Evale angelro ambinli ale kohofiya sidadi ya Sodoma ora ya tchiguwo. Tempu yenne mulombwana Lroti agaratilege va mulango va sidadile. Mwa enne liye agaaonne angelro ale kazaga, ohovenyaga, liye dowa afwanya, akokorela aoramihaga muru waye ante fiyiha vati. 2Ohavepaga eraga: <<Andimuwa, nnouvepani ira muperuwe, muhaye vande va namalaba wenyu. Muhuwe manyalo enyu, mugone. Unde watcha na mabebehene, nyo podi venya, dowaga ulrendwinyu.>> Aliwa mbwenye kohokonda, aliwa ira: <<Nari, hiyo nnadowa nagone varampani vale.>>#19:2 varampani vale: Owu hehi vaparasani vale. 3Mbwenye Lroti ohakanyiheda. Noira eno, kohorumela, aliwa muhara Lroti vande vaye. Mwa enne Lroti ohowotcha pawu dohosakanyiwana leverina na jodja jimohi joindjiva, japama, alendwale aliwa dja.

4Mbwenye aliwa kahanadowe gona, alombwana atene a sidadi ya Sodoma, azombwe na andimuwa, nne mutu mmohi ohala, atene kohozaga irindja nyumba ya Lroti. 5Kohoromaga muitana, keraga: <<Kali waani alendo kazile vaninyu mahiyu anna? Waakumihede vande va, hiyo nnafuna naagonena.>> 6Lroti ohokumela unde wali atu vamulangoni vale, liye funga musuwo unduli waye, 7liye roma wonga eraga: <<Abalaga, nnouvepani ira mwahasakanye yabure. 8Muhuiziwa ira dihakana anamwali aga ambinli, kali kahanagone na mulombwana. Mwafuna, nnoakumiha aliwene ira mwaatukule, mwaairegena malringana inafuna nyo.#19:8 dihakana anamwali aga ambinli, kali kahanagone na mulombwana… nnoakumiha aliwene ira mwaatukule, mwaairegena malringana inafuna nyo: Mulugu aavahile ababi mabasa oakoya ahimiwa, hiya avaheda mmandani mwa anamwindji ira kaaviyolarigi. Zelru yapama vamentoni va Mulugu, Lroti ogokonda akumiha alendwale ahawongile ja ahimaye. Mbwenye alombwana ala kamwaairele yengo mwasiwa aliwa ba alendo, kazela haya vande vaga.>> 9Atwale mbwenye kohomuwakula keraga: <<Kavenyavo va mulango vo! Weyo uli namaza! Peno unafuna unitongege hiyo vano? Nnouirela makalelo abure kwaranya makalelo nafuna hiyo airela alendwawo ayo!>> Evale kohomundunya Lroti, kadowaga va mulango ira katwe musuwo.

10Evale alendo ale kohulaga musuwo, aliwa muhinda Lroti na mandiwa, muwetela mmba mule, aliwa fungawo. 11Eto kohatwaga meso alombwana a Sodoma anno karindjile nyumba ya Lroti#19:11 kohatwaga meso alombwana a Sodoma anno karindjile nyumba ya Lroti: Makalelo otwa meso kaireyile eva, na iEberewu inavweya nnga wohokala moneya undimuwa wazilege fiyeda atwale meso ewa aliwa tima, aliwa haonaga na mwasa owareya wazile ule. ale, roma azombwe, fiyeda andimuwa ewa. Mwa enne kohoroma saka musuwo mbwenye tchawanda fwanya. 12-13Noira enne, alombwana ambinli ale kohowonga na Lroti keraga: <<Hiyo nazela gudjula sidadila. Tchoira kuwa ozela jabure jidjindji jinaira atu jihimala vweya na Mulugu. Eni Yehova gunirumile ira nize nigudjule. Kodi musidadi mu uhukanamo atwawo amohiwa? Inafwanela uvenyemo vamohi na atwawo atene, ahimawo, anapongwe nari anavihiyana, na akamwenawo, nari mutu wawo uli watene.>> 14Lroti ohovenya, dowa awandela akamwenaye anno kafuna atela ahimaye, ira: <<Muvenyemo musidadi mu mwasiwa Yehova tchineneva unoigudjula.>> Mbwenye aliwa kaonne nnga Lroti awonga ipale.

15Unde utchaga, angelro ale kohowonga na Lroti,#19:15 Unde utchaga, angelro ale kohowonga na Lroti: Mahiyu anne Lroti agavwile mazu a angelro ale, liye kakumilemo. Ohoromaga dodoma fiyeda ante unde uromaga tcha, kalaga nnga jawandeliwe liye jile karoromela. keraga: <<Kavenya mobaranya, unkumihemo musidadi mu muhiyanawo na ahimawo ambinli unna we, tawiha ira munatolotchiwe vamohi na sidadila yatongiwaga.>> 16Lroti agawandeliwe, ohoromaga dodoma. Mbwenye na tangaranga da Yehova alombwanale kohomuweta ndanda, vamohi na muhiyanaye, na anaye ambinlene, aliwa adowana unde wa sidadile. 17Kagavenyilemo musidadi mule, mungelro mmohi ohawandelaga, liye ira: <<Inafwanela mutawe ira muwombole vingumi dinyu! Kamuing'ane mundulri nne kamuimele ilambo yatene yotandeleya ila. Inafwanela mudowe mwatawele mmwangoni ira muwombowe eto mwahafwanyiwe.>>

18Evale Lroti ohawakula angelro ale eraga: <<Andimuwa nnouvepani ira yahakale eno. 19Nyo muhudifwewela murima miyo dagali namalaba wenyu, muhuvulusa ingumi yaga na zivela wenyu wororomeleya. Miyo mbwenye ira ditawele mwangoni kavili jowandeya mwasiwa nnatawa ira dera ditawele mwangoni, ubure unadifwanye wewule, dikwe. 20Kaing'anani, imwana sidadi ile iwandamenle na vili hiyo va. Kahi inene. Nnauvepani ira ditawele wewule ira divuluwe.>> 21Evale mungelrole ohomuwakula eraga: <<Tabo. Miyo dihirumela yovepa yawo, kannatumeya mwana sidadi iwongile we ile. 22So ubaranye ira utawele wewule, mwasiwa miyo nnaudedihege weyo ufiye para dirome laba mabasaga.>> Na mwasa wenne, sidadile inaitaniwa Zowari [ku wonga ing'onong'ono]. 23Mulombwana Lroti ohofiyaga ilambo ya Zowari nzuwa nikumaga wene.

Tolotchiwa wa Sodoma na Gomora

24Evale Yehova ohorumbwiha zulu mabwe onuka otanganiha na munlo, roma morihedaga sidadi ya Sodoma na Gomora. 25Mwa enne Yehova ohobwanyula sidadi dile na ndabo natene nawandamannena wewule. Ohapa atu atene kafwanyeya mwemule eto ohotolotcha jomela jatene. 26Mbwenye mwadi Lroti, ohoing'ana mundulri. Againg'anne mundulri, ohosanduwaga kala iruwa ya mwinnyu.#19:26 Againg'anne mundulri, ohosanduwaga kala iruwa ya mwinnyu. Mwadi Lroti ahanasanduwe iruwa ya mwinnyu ohowandeliwa na mungelro ira ahaing'ane mundulri. Mbwenye na mwasa wa uvuruvuru, ohotolowa agamanleve kuma musidadi mule. Muselu wenna unalingana na mutu wenne utwaruwile, amala awelela mundulri. Mutu wenno unagomela kala nnga mwadi Lroti. Nione eto Matewuji 13:21, 24:13; Eberewu 3:6,14, 6:4-9, 10:26-27; 1 Juwawu 2:19, 3:8-10.

27Mabebehi amohive anne, unde utchaga Abarahamu ohomaruwa adowaga nimburo nenne natapanya liye na Yehova. 28Againg'anne pandi ya Sodoma na Gomora na ilambo yatene yenne, ohoonaga mirambo da utchi digwelaga nnga utchi wa muhofuni. 29Mbwenye Mulugu agudjulaga sidadi da ilambo yenne, ohomuumbuwela Abarahamu, nona ohonvulumutcha muzuliye Lroti#19:29 Mulugu agudjulaga sidadi da ilambo yenne, ohomuumbuwela Abarahamu, nona ohonvulumutcha muzuliye Lroti: Lroti ira ahatumeyiwe na aSodoma, avulumuwile muwari molobela wa mbwiyaye Abarahamu. Nona na vanove, lobelelana tchi yengo yapama. Kahi ira namulobelela mutu unowanda vulusiwa ahatwaruwile. So mbwenye nnalobela ira wenno ahatwaruwile awande twaruwa. Eto mulobelela maliba pupuruwa tchi yengo yapama vamentoni va Mulugu. (1 Juwawu 5:16) amukumihagamo musidadi mwemo mwakaletcha liye ahanatolotche sidadi dile.

Muselu wa ahima a Lroti

30Lroti na mwasa oova kala sidadi ya Zowari, ohovenyaga vamohi na ahimaye ambinli, aliwa dowa kala mwangoni. Evale ohodowaga liye roma kala munifukweni vamohi na ahimaye ambinli anavihiyana ale. 31Siku nimohi mwana Lroti wa mulukuluwa ohowongaga na mbalaye wa ng'onong'ono ule, liye ira: <<Babihu eni uhumala ulula eto mwilamboni muli hiyo muno kamuli mulombwana nne mmohi ira anitele nnga jinaireya mwilamboni mwatene. 32Ndowe ninvahe babihu vinyu ira alrezelre. Amala lrezelra, hiyo nidowe namugonena. Nera eno, nnowanda akana ahima, nikoye nlogo na papa ira nahadimele.>> 33Kagawongile enne, isi imohive yenne kohonvaha babiwa vinyu, liye fiyeda mwezo olrezelra. Agalrezenlre mwana wa mulukulu ule ohodowa gona na babaye. Mulombwana Lroti na mwasa olrezelra bure, kaonnewo jatene jejile jiireyaga. 34Mmetcheloni muwa mwana wa mulukulu ule ohowongaga na mung'onong'ono waye eraga: <<Miyo mahiyu dihigona na papa. Inafwanela peno nimulrezelrihe ira na wenne udowe wagone na liye mahiyu vano ira niwande abala ahimihu, niwande koya nlogo na papa ira nahadimele.>> 35Mahiyu anne kohomulrezelriha mulombwana Lroti akoka na vinyu, nomala eno mwana wa ng'onong'ono ule na liyene ohodowa gona na babaye. Na fendo yanembinli yenne mulombwana Lroti kaonnewo jatene jejile jiireyaga. 36Mwa enne ahima ambinlene kohokana vambani muwari mogona na babiwa. 37Mulukuluwa ohombala mwana wa mwanapongwe, liye nvaha nzina na Mowabe. Mowabe gu nikolo na akuda Mowabe anno kaliwove fiyeda siku na peno.#19:37 kaliwove fiyeda siku na peno: Navwa kawongaga ira akuda Mowabe kohokalawo fiyeda peno, anawonga zela tempu yalrembiwa mazwala. Ku wonga maliba lremba mazwala tempu yalremba liye, akuda Mowabe kohokalawo. 38Mwana wa ng'onong'ono ule eto na liyene ohombala mwanaye wa mwanapongwe, liye nvaha nzina na Beni-Ami. Beni-Ami gu babi wa nlogo na aAmoni, anno kaliwove fiyeda siku na peno.

Currently Selected:

Jenesesi 19: iLolo

Highlight

Copy