Mako 14

Bihanganiko bya kubeba Yeshu

(Mateo 26:1-5; Luka 22:1-2; Yowano 11:45-53)

1 # Kut 12:1-27. Oho kwashalile matena abili ngayi batende Shimbo sha Kupitilila na sha Mankende A kubula Mumena, bakankombela ba bakulwane na bakakulongesha ndayano, bashingilenga nzila mwakukwatila Yeshu na ku shoshoka ngayi bamuzihe. 2Bambile ngayi, “Hinga shitendiwa ha mutena wa Shimbo, ndaba bantu ba kutwesha kuleta mushunga.”

Yeshu ukuwabishiwa ku Mbetani

(Mateo 26:6-13; Yowano 12:1-8)

3 # Luka 7:37-38. Yeshu wekalile mu Mbetani mu litala lya Shimoni ou wekalile na bimakwa. Oho ekalile na kulya, mbuyama wezile na mushashi wakwinzala na mazi a nandi akunuka shiwahe a ndando yayinene. Wapabwile mushashi, niho ayitilile mazi ha mutwe wa Yeshu.

4Bantu bamo bekalile kuyo bapilamine, pe bambile ku umo na wamina ngayi, “Ndaba ngani akuyandisha awa mazi a lukumba? 5Akutwesha kulandishiwa na ndando ya kupitakana myanda yihatu ya muwayawaya wa shiliva, mwanga mali apanikiwe ku bakakushepwa.” Niho bakalihilile uya mbuyama shikuma.

6Ngoboni Yeshu wambile ngayi, “Mulehenu! Bishini mu kumuyandishila? Unatende shuma shashiwahe kukwami. 7#Nday 15:11. Ndaba bakakushepwa muli nabo, kami shikati nimwasho mukushinga mu kutwesha kubatenda shiwahe, ngoboni ami kwikala nenu shikati nimwasho nifwako. 8Unatende eshe akutwesha, unawabishi mazi lutu lwami kuluwahisha oho shilolo luyakiwe mu shinzimbi. 9Mwa shikuma nikwamba kukwenu ngayi, oku zikashimikiwa eze ncango zaziwahe muno mu kaye nimwako, eshe anatende ou mbuyama shikashimikiwa, pe shikenga sha kumwanukila.”

Yundashi ukwitabila kubeba Yeshu

(Mateo 26:14-16; Luka 22:3-6)

10Niho Yundashi Ishikalyote, umo wa balikumi na babili ayile ku bakankombela ba bakulwane mu kubeba Yeshu kukwabo. 11Oho bayuvwile eshe, bawahililile, niho bamukulupishile ngayi ba kumupana mali. Nohobene, Yundashi washingilenga shikati sha kufwanina kupana Yeshu kukwabo.

Yeshu ukulya bya Shimbo sha Kupitilila na bandongesha bendi

(Mateo 26:17-25; Luka 22:7-14, 21-23; Yowano 13:21-30)

12Ha mutena wakutatika wa Shimbo sha Mankende A kubula Mumena, mutena kwazihiwilenga mbelele wa Shimbo sha Kupitilila, bandongesha ba Yeshu bambile kukwendi ngayi, “Kuti oku ukushinga ngayi tuye na kuwahisha, mwanga ukalileko bya Shimbo sha Kupitilila?”

13Niho Yeshu atumine bandongesha bendi babili, wambile kukwabo ngayi, “Yenunga mu munzi, mu kulihangana na mulume hinga ashimba ntesho ya mema. Mukonkenu, 14pe oku nimwako akengina, mukambe kuli mwine litala ngayi, ‘Mulongeshi unamba ngayi, kati litala lya bayeni oku nikalila bya Shimbo sha Kupitilila na bandongesha bami, lilikuti?’ 15Niye ukamimonesha litala lyalinene lya kuyilu, linawahishiwi mwaka, kami muli byuma bya kuliyavwisha, muyo nimo mukatuwahishila nimwabyo.”

16Bandongesha bendi bayile, benginine mu munzi, pe bawanine nimwabyo ngonehe abatongwezele Yeshu. Niho bawahishile byakulya bya Shimbo sha Kupitilila.

17Ku mazolo, Yeshu wezile na bandongesha balikumi na babili. 18#Nyi 41:9. Kami oho bekalile na kulya ku tebulu, Yeshu wambile ngayi, “Mwa shikuma nikwamba kukwenu ngayi, umo kukwenu ukambeba, ou ukulya hamo nami.”

19Niho bayenene, pe umo na umo wamwipwile ngayi, “Kampe ami ndi?”

20Yeshu wakumbwile ngayi, “Umo ku nenu balikumi na babili, ou ukutanta linkende na nami mu lulonga. 21Mwana Muntu ukafwa ngonehe kwatikitiwa byendi, ngoboni makando wendi uya muntu ukubeba Mwana Muntu. Shashiwahe shinga ngayi uya muntu kaliha wahemuwile!”

Mulalilo wa Mwene

(Mateo 26:26-30; Luka 22:14-20; 1 Kolinte 11:23-25)

22Oho balilenga, Yeshu watolele linkende, wakambililile kuli Nyambi, walipabwile, pe wapanikile bandongesha bendi wambile ngayi, “Tambulenu mulye, olu nilo lutu lwami.”

23Niho kami atolele nkomoki, oho amanishile kukambilila kuli Nyambi, wabapanikileyo, niho banwinemo nimwabo. 24#Kut 24:8; Yel 31:31-34. Wambile kukwabo ngayi, “Owe niwo mukeza wami wakulimama kwakupya ou unetikili babengi. 25Mwa shikuma nikwamba kukwenu ngayi, ku kanwa kami bya mikabo ya mikolobozi ya shinyanca nifwako, hantu ha mutena uyo oho nikanwa byabipya mu Wene wa Nyambi.”

26Oho bamanishile kwimbila lwimbo, niho batutikile bayile ku lipili lya mitondo ya Olive.

Yeshu ukulubulula ngayi Pita ukamukana

(Mateo 26:31-35; Luka 22:31-34; Yowano 13:36-38)

27 # Zaka 13:7. Yeshu wambile kukwabo ngayi, “Nimwenu mukantina, ndaba kwatikitiwa ngayi, ‘Nyambi ukakama mulishani, pe bambelele bakapanzana.’ 28#Mat 28:16. Ngoboni munyima ya ku shanguka, nikaya kumbili yenu ku Ngalileya.”

29Pita wamukumbwile ngayi, “Hinge ndi nimwabo bakatina, ami nifwako!”

30Yeshu wambile kuli Pita ngayi, “Mwa shikuma nikwamba kukwobe ngayi, wushiku unobene, oho likombwe shilolo likuwe kabili, obe ukankana kahatu.”

31Ngoboni Pita wambile shikuma ngayi, “Kukakukana nifwako, hinge kufwa tukafwa hamo.”

Bandongesha nimwabo bambile nahiyo.

Yeshu ukulombela mu Ngeteshemani

(Mateo 26:36-46; Luka 22:39-46)

32Oho bakumine ku mbalila yikutumbiwa Ngeteshemani, Yeshu wambile ku bandongesha bendi ngayi, “Yikalenu kuno, nishili kuya na kulombela.” 33Washimbile Pita na Yakoba na Yowano wayile nabo. Yeshu watatikile kuyena shikuma na kukalikiza. 34Wambile kukwabo ngayi, “Moyo wami unayene shikuma kutwala ku kufwa. Yikalenu kuno, kami tonenu.”

35Niho ayile kumbili shashishe, wawililile hanci, pe walombelele ngayi, ndi shikutwesheka, shiya shikati sha makando hinga shiza kukwendi. 36Kami walombelele ngayi, “Tate, Tate! Byuma nimwabyo bikutwesheka kukwobe, fumisha eye nkomoki ya makando kukwami, ngoboni hinga kutendiwa ebye nikushinga, kutendiwe shamutima wobe.”

37Niho abokele, wabawanine bali mu tulo, wambile kuli Pita ngayi, “Obe Shimoni, uli mu tulo ndi? Kati kutwesha kutona hinge shikati shimo wufwako ndi? 38Tonenu na kulombela kutina mwingina mu byezeko. Moyo hiwushinga, ngoboni lutu lunapopo.”

39Niho ayile kami na kulombela, wambile mazu amo. 40Oho abokele kami, wabawanine bali mu tulo, ndaba meho wabo engile amalemu. Pe kaliha balimukile mwakumukumbwila.

41Wezile kami kawuhatu, wambile kukwabo ngayi, “Kati nihano mushili mu tulo na kuliyuvwilila ndi? Kunamana! Shikati shakumakale! Monenu, Mwana Muntu uli na kupanikiwa mu maboko a bakawubi. 42Katukenu, tuyenunga. Monenu, niye ukambeba uli hahepi!”

Kukwatiwa kwa Yeshu

(Mateo 26:47-56; Luka 22:47-53; Yowano 18:3-12)

43Wanguwangu Yeshu oho ushili kwamba, Yundashi umo wa balikumi na babili wakumine. Pe wezile na likunge lya bantu bashimbile mikwale na mishako, bafumine ku bakankombela ba bakulwane na bakakulongesha ndayano na bakulwane ba Bayunda. 44Ou wamubebele, wabatongwezele shilimukisho ngayi, “Ou nikazupeza niye muntu mukushinga. Pe mumukwate na kumutwala hinga mwamulama shiwahe.”

45Wanguwangu oho Yundashi akumine, wayile kuli Yeshu, pe wambile ngayi, “Hekulu!” Niho amuzupezele. 46Pe bantu bakwatile Yeshu, niho bamumangile. 47Ngoboni umo ku baya bemanine kuyo, wahomwene mukwale wendi, wakamine ndungo wa Mukulwane wa Bakankombela Nimwabo, pe wamuketwile litu. 48Yeshu wambile kukwabo ngayi, “Munezi na mikwale na mishako mu kunkwata ngo nili mwizi ndi? 49#Luka 19:47; 21:37. Nekalile hakati kenu matena nimwawo na ku longesha mu Litala lya Nyambi, ngoboni kaliha mwankwatile. Haya byatikitiwa binafwanini kutendiwa.” 50Niho bandongesha bendi nimwabo bamushiyile, pe batinine.

51Ndumbana wamina ou walimangile tuhu shitango sha kulelema, wakonkelenga Yeshu. Bashingile kumukwata, 52ngoboni wetukile muhelengwa ku shiya shitango shendi.

Yeshu ukuyatishiwa

(Mateo 26:57-68; Luka 22:54-55, 63-71; Yowano 18:13-14, 19-24)

53Batwalile Yeshu kuli Mukulwane wa Bakankombela Nimwabo, kuyo kwakungulukile bakankombela ba bakulwane nimwabo na bakulwane ba Bayunda na bakakulongesha ndayano. 54Pita wamukonkelenga hahatali, kukuma na ku shinzanza sha Mukulwane wa Bakankombela Nimwabo. Wekalile hamo na bakakulama, hayota mundilo. 55Bakankombela ba bakulwane na bakankuta nimwabo bashingilenga wupaki wakuyata nawo Yeshu ngayi mwanga bamuzihe, ngoboni kaliha bawuwanine. 56Kami babengi bamubangilile bya mahalo, ngoboni ebye bambilenga, byalihwetele.

57Bamo bakatukile, bamubangilile ngayi, 58#Yowa 2:19. “Twamuyuvwile hamba ngayi, ‘Nikashiwula Litala lya Nyambi elye batendele na maboko, kami mu matena ahatu nikatenda lyamina lya kubula kutendiwa na maboko.’ ” 59Ngoboni hinge noho, ebye bambilenga byalihwetele.

60Mukulwane wa Bakankombela Nimwabo wemanine mukati, wepwile Yeshu ngayi, “Kati kukumbula kunebye bali na kwamba hahobe wufwako ndi?” 61Ngoboni niye wamwenene, kaliha wakumbwile shamina.

Kami Mukulwane wa Bakankombela Nimwabo wamwipwile ngayi, “Kati obe Kilishitu, Mwana Nyambi Wakutandala ndi?”

62 # Ndan 7:13. Yeshu wamukumbwile ngayi, “Amibene, kami mukamona Mwana Muntu hinga ekala ku liboko lya shilyo lya Mpandashilanga heza ha makumbi a muyilu.”

63Niho Mukulwane wa Bakankombela Nimwabo atabwile bivwalo byendi, wambile ngayi, “Bihi tushili kushinga wupaki wamina kami? 64#Bal 24:16. Munayuvwu lihandu lyendi. Mukuhanganika nahiti?”

Nimwabo bamuyatile ngayi afwe. 65Bamo batatikile kumufwizila mate, bamufwikile ku lupala, bamukamine, pe bambile ngayi, “Lubulula ou unakukama!” Kami bakakulama bamukamine zimbanda.

Pita ukukana Yeshu

(Mateo 26:69-75; Luka 22:56-62; Yowano 18:15-18, 25-27)

66Oho Pita ekalile mu nceto mu shinzanza, kwezile mbuyama umo wa bakamilimo ba Mukulwane wa Bakankombela Nimwabo. 67Oho amonene Pita hayota mundilo, wamunconcomekele, niho ambile ngayi, “Nanobe kami wekalilenga na Yeshu waku Nazaleta.”

68Ngoboni Pita wakanine ngayi, “Kulimuka nifwako, kami ku yuvwishisha ebye ukwamba nifwako.” Niho ayile ku mazezelo a lipangati. Haya bene likombwe lya kuwile.

69Kuyo kami, mbuyama wa mukamulimo wamumonene, pe watatikile kwamba na baya bemanine kuyo ngayi, “Ou muntu naniye kami umo wabo!” 70Ngoboni Pita wakanine kami.

Oho kwapitile kashikati kakashe, baya bemanine kuyo bambile na Pita ngayi, “Mwa shikuma uli umo wabo ndaba uli waku Ngalileya.”

71Ngoboni Pita watatikile kulikuta na kulibeza ngayi, “Ou muntu mu kutoya kumulimuka nifwako!”

72Wanguwangu likombwe lya kuwile ka wubili. Niho Pita anukile lizu liya ambile Yeshu kukwendi ngayi, “Oho likombwe shilolo likuwe kabili, obe ukankana kahatu.” Pe watatikile kulila.

Currently Selected:

Mako 14: LLK

Highlight

Copy