NAANAA 48

Yakubu Ɛflaimu kũ Manaseo ditɛna a zĩda nɛ́nɔ ũ

1Gɔrɔ pla gbɛra ò ò Yusufunɛ a de tɛn gyã kɛ, akũ à a nɛ́ gbɛ̃nɔn planɔ Manase kũ Ɛflaimuo sɛ̀tɛ à gɛ̀ɛ kũńwo. 2Kũ ò ò Yakubunɛ a nɛ́ Yusufu sù a gwa, à kokari kɛ̀ à fùtɛ à vùtɛ a gádo musu. 3À pì Yusufunɛ: Luda Gbãnasĩndapinkide bò à sùma zaa Luzu, Kanaanɔ bùsun, à arubarikaa dàmagu 4à pìmɛnɛ áni tó mà nɛ́ i manamana, áni ma kara mà gɔ̃ burinɔ dizi ũ áni bùsuu pì kpá ma burinɔa ma gbɛra ń pɔ́ ũ ari gɔrɔ sĩnda pínki. 5Tera sà nɛ́ gbɛ̃nɔn pla kũ n ń í Misila ari màgɔ̃ su n kĩnaanɔ ma pɔ́nɔmɛ. Ɛflaimu kũ Manaseo gɔ̃̀ ma nɛ́nɔ ũ lákũ Rubɛni kũ Simɛɔo de nà. 6Nɛ́ kũ ĩni ń i ń gbɛranɔ mɛ́ onigɔ̃ de n pɔ́ ũ, oni ń túbi ble ń vĩ̀ninɔ kĩnaa. 7Zaakũ kũ matɛn su kũ Mɛsɔpɔtamiao, n da Rahila gà zɛ́n Ɛflata kũ òdi pi tera Bɛtilihamu lɛ́i zaa Kanaanɔ bùsun, akũ ma a vĩ̀ zɛ́n gwe.

8Akũ Isaraila Yusufu nɛ́nɔ gwà à pì: Dínɔn gwee? 9À pì a denɛ: Nɛ́ kũ Luda ma gba lanɔn gwe. Akũ Isaraila pì: Ǹ mɔ́ kũńwo ma kĩnaa mà sa'olɛ kɛńnɛ. 10Zĩkũna Isaraila wɛ́ bùsa àtɛn gu e manaro, akũ Yusufu nài kũ nɛ́ pìnɔ. Isaraila lɛ́ pɛ̀pɛḿma à ń kpá a kùla, 11akũ à pì Yusufunɛ: Mádi da yã mà wɛ́ sinlɛ doro, akũ Luda tò ma n e kũ n nɛ́nɔ dɔ. 12Yusufu ń gó a de gbála, akũ à kùtɛnɛ à a arɛ pɛ̀tɛ. 13Akũ Yusufu a nɛ́nɔ kũ̀ ń pla ń pínki. À Ɛflaimu kũ̀ kũ ɔplao Yakubu ɔzɛ kpa, akũ à Manase kũ̀ ɔzɛ kpa Yakubu ɔpla kpa, akũ à nài kũ nɛ́ pìnɔ. 14Akũ Yakubu a ɔ pã̀kɔ̃la à a ɔpla nà Ɛflaimu kũ à de dakũna ũ mìia, à a ɔzɛ nà Manase kũ à de daudu ũ mìia. 15Akũ à sa'olɛ kɛ̀ Yusufunɛ à pì:

Luda kũ ma dizinɔ Ibrahĩ

kũ Isaakuo táa ò kãao,

Luda kũ à dòmɛnɛ arɛ

ma kunnaa gũn ari kũ a gbãrao,

16a Malaika kũ à ma bo a vãnin pínki

à arubarika da nɛ́ díkĩnanɔgu,

à tó ògɔ̃ ń sísi ma tɔ́a,

kũ ma dizinɔ Ibrahĩ kũ Isaakuo tɔ́o,

à tó ògɔ̃ kɔ̃ manamana andunia gũn.

17Kũ Yusufu è a de a ɔpla nà Ɛflaimu mìia, adi kɛnɛ nnaro. À a de ɔ kũ̀ de à go Ɛflaimu mìia à na Manase pɔ́a 18à pì: Lɛnlo Baa, gbɛ̃ díkĩna mɛ́ à daudu ũ. Ǹ n ɔpla na a mìia. 19Akũ a de gì à pì: Má dɔ̃ ma nɛ́, má dɔ̃. Àpi sɔ̃ ani gɔ̃ buri ũ, anigɔ̃ zɔ̃kɔ̃, ama a dakũna zɔ̃kɔ̃ nigɔ̃ deala, a buri nigɔ̃ dasi. 20Zĩ kũ̀a à sa'olɛ kɛ̀ńnɛ à pì:

Isarailanɔ ni sa mana okɔ̃nɛ kũ á tɔ́o

oni pi Luda tó ǹ gɔ̃

lán Ɛflaimu kũ Manaseoo bà.

Lɛmɛ à Ɛflaimu dò Manasenɛ arɛ lɛ.

21Akũ Isaraila pì Yusufunɛ: Ma ka gana, ama Luda nigɔ̃ kú kãáo, ani ɛra à tá kãáo á dizinɔ bùsun. 22Sɛkɛmu bùsu mana kũ ma sì Amɔrinɔa kũ ma fɛ̃nɛdao kũ ma sáo, ma n gba, mɔkɔ̃n kũ ń de n vĩ̀ninɔla.

Currently Selected:

NAANAA 48: BB2005

Highlight

Copy