ZĨRINƆ 14

Kunna Ikɔniu

1Ò kɛ̀ Ikɔniu lákũ òdi kɛ nà, ò gɛ̃̀ Yudanɔ aduakɛkpɛn ò yã ò ari Yudanɔ kũ buri pãndenɔ Dikiri náani kɛ̀ dasidasi. 2Akũ Yuda kũ ò gì yã pì síinɔ buri pãndenɔ sã vù Yesudenɔnɛ ò ibɛrɛɛ sɛ̀ kũńwo. 3Bee kũ abireo Pɔlu kũ Baanabao gɔrɔ pla kɛ̀ gwe ò Dikiri yã ò kũ swɛ̃̀gbãnao, akũ Dikiri ń gbá zɛ́ ò sèedanɔ kũ daboyãnɔ kɛ̀, kũ à yãpura kpà a gbɛ̃kɛyã kũ òtɛn oa. 4Akũ wɛ̃tɛdenɔ kɛ̃̀kɛ̃kɔ̃a, gbɛ̃kenɔ zɛ̀ kũ Yudanɔ, gbɛ̃kenɔ sɔ̃ kũ zĩ̀rinɔ. 5Akũ Yudanɔ kũ buri pãndenɔ kũ ń gbãnadenɔ zɛ̀o ò wɛ́ tãḿma ò ń pápa kũ gbɛ̀ɛo. 6Kũ Pɔlu kũ Baanabao ń yã dɔ̃̀, akũ ò bàa sì ò tà Likaonia bùsu wɛ̃tɛnɔ gũn, Lisitira kũ Dɛbio kũ ń lakutunɔ. 7Akũ ò kpɛ́ òtɛn baaru nna pì kpáńnɛ gwe.

Kunna Lisitira

8Gɔ̃gbɛ̃ ke kú Lisitira a gbánɔ íbana. Zaa lákũ ò a ì nà ɛrɛɛmɛ, adi táa o zikiro. 9Àtɛn sã kpá Pɔlu yãi, akũ Pɔlu wɛ́ pɛ̀a tíii, à è a ludanaanikɛnaa kà à a werekɔ̃a, 10akũ à pìnɛ kũ kòto gbãnao: Ǹ futɛ ǹ zɛ n gbáa. Akũ à vĩ̀ à zɛ̀ à nà táa'onaa. 11Kũ gbɛ̃nɔ è lákũ Pɔlu kɛ̀ nà, akũ ò wiki kàkara kũ Likaonia yão ò pì: Tãnanɔ lì bisãsirinɔ ũ ò kìpawá. 12Ò tɔ́ kpà Baanabanɛ Zusu, Pɔlu sɔ̃ Ɛmɛsi kũ àkũ mɛ́ àdi dońnɛ arɛ kũ yã'onaao yãi. 13Zusu pì kpɛ́ kú wɛ̃tɛ kpɛ, akũ a gbàgbarii sù kũ zùsa kũ ò lávu zãblebɔɔ kɛ̀ńnɛnɔo wɛ̃tɛ bĩnilɛa. À ye gbɛ̃nɔ sa oo zĩ̀rinɔa. 14Kũ Baanaba kũ Pɔluo yã pìi mà, ò ń utanɔ gàga ò kɛ̃̀kɛ̃, akũ ò sì gbɛ̃nɔ tɛ́ kũ wikio 15ò pì: Gbɛ̃nɔ, bɔ́ yã mɛ́ à tò átɛn kɛ lɛɛ? Bisãsirinɔn ó ũ se lán á bà. Baaru nnan ótɛn kpáárɛ, de à kpɛ li pɔ́ gina dínɔnɛ à arɛ dɔ Luda Wɛ̃̀ndidea. Àkũ mɛ́ à musu kɛ̀ kũ zĩtɛo kũ ísirao kũ pɔ́ kũ ò kú a gũnnɔ pínki. 16À buri sĩnda pínki tò yã ò ń zĩda zɛ́ sɛ̀. 17Bee kũ abireo à a zĩda mɔ̀árɛ yãmanakɛnaa gũn. Àdi tó legũ maárɛ de à pɔ́ kɛ̃ a gɔrɔa. Àdi á gba pɔ́ble dasi de àgɔ̃ kú pɔnna gũn. 18Bee kũ yã bire onaao, gbãna kũ gbãnao ò gbasa ò gì gbɛ̃nɔnɛ ò sa oḿma.

19Akũ Yudanɔ bò Antiɔku kũ Ikɔniuo ò sù ò gbɛ̃nɔ sã vù. Akũ ò Pɔlu pàpa kũ gbɛ̀ɛo ò a gàtɛ ò bò kãao wɛ̃tɛ kpɛ, òtɛn da à gàmɛ. 20Kũ Yesudenɔ kàkarai, akũ à fùtɛ à gɛ̃̀ wɛ̃tɛ gũn. Kũ gu dɔ̀, àpii kũ Baanabao gɛ̀ɛ Dɛbi.

Zĩ̀rinɔ tana Antiɔku

21Kũ ò baaru nna kpàńnɛ wɛ̃tɛ pìi gũn, ò gbɛ̃nɔ lè dasidasi. Akũ ò ɛ̀ra ò gɛ̀ɛ Lisitira kũ Ikɔniuo kũ Antiɔkuo, 22òtɛn Yesudenɔ gba gbãna, òtɛn lɛ́ daḿma ò wɛ́ tã Yesu náanikɛnaaa ò pì: Séde ò wari kɛ manamana, gbasa ò gɛ̃ kpata kũ à bò Luda kĩnaa gũn. 23Ò gbɛ̃ zɔ̃kɔ̃nɔ dìtɛńnɛ sɔsi kũ sɔsio, akũ ò adua kɛ̀ńnɛ kũ lɛ́yĩnaao ò ń ná Dikiri kũ ò a náani kɛ̀ ɔĩ.

24Kũ ò bɔ̀tɛ Pisidia bùsu kpa, akũ ò kà Pamfilia bùsun. 25Ò Luda yã ò Pɛga, akũ ò gɛ̀ɛ Atalia. 26Gwen ò gɛ̃̀ gó'itɛn ò tà Antiɔku, gu kũ ò ń ná Ludanɛ a ɔĩ yã, de à gbɛ̃kɛ kɛńnɛ zĩ kũ ò kɛ̀ ò làka tera yã musu. 27Kũ ò kà, ò sɔsi gbɛ̃nɔ kàkara ò yã kũ Luda kɛ̀ńnɛ gbã̀ńnɛ pínki, lákũ à buri pãndenɔ gbà zɛ́ ò a náani kɛ̀ nà. 28Akũ ò gɔrɔ pla kɛ̀ kũńwo gwe.

Currently Selected:

ZĨRINƆ 14: BB2005

Highlight

Copy