ZĨRINƆ 13

Baanaba kũ Soluo zĩnaa

1Annabinɔ kũ yãdannɛrinɔn kú Antiɔku sɔsi gbɛ̃nɔ tɛ́, ń tɔ́n Baanaba kũ Simɛɔ kũ òdi pinɛ Bárasirao kũ Sirɛni bùsu gbɛ̃ Lusiuo kũ Manaɛ kũ à nɛ́ blè kũ kína Hɛrɔduo lɛɛlɛ kũ Soluo. 2Gɔrɔ kũ òtɛn donyĩ kɛ Dikirinɛ kũ lɛ́yĩnaao, Luda Nini pì: À Baanaba kũ Soluo ditɛ ńdona zĩ kũ ma ń sɛ́a yãi. 3Kũ ò lɛ́ yĩ̀ ò adua kɛ̀, akũ ò ɔ dìdiḿma ò ń gbárɛ, ò dà zɛ́n.

Kunna Sipiru bùsun

4Kũ Luda Nini Baanaba kũ Soluoo zĩ̀ lɛ, ò gɛ̀ɛ Sɛlusia. Zaa gwe ò gɛ̃̀ gó'itɛn ò gɛ̀ɛ Sipiru bùsun. 5Kũ ò kà Salami, ò Luda yã waazi kɛ̀ Yudanɔ aduakɛkpɛnɔ gũn. Yuhana Maaku kú kũńwo kpanyĩri ũ. 6Ò gɛ̃̀tɛ luan pìla ari Pafɔ, akũ ò kpàkũ kũ Yuda dabokɛri kũ à de annabi ɛ́kɛ ũo gwe. A tɔ́n Yesunɛ. 7Àdigɔ̃ kú kũ bùsuu pì gbɛ̃ zɔ̃kɔ̃ Sɛgiu Pɔluo. Gbɛ̃ zɔ̃kɔ̃ɔ pì bi ɔ̃ndɔ̃riimɛ, akũ à Baanaba kũ Soluo sìsi kũ à ye à Luda yã ma yãi. 8Dabokɛrii pì tɔ́n Ɛlima kũ Giriki yão. À ibɛrɛɛ sɛ̀ kũńwo, àtɛn wɛtɛ à gbɛ̃ zɔ̃kɔ̃ pì sã vú de àsun Yesu náani kɛro yãi. 9Akũ Solu kũ òdi pi dɔ Pɔlu, Luda Nini dìdia, akũ a wɛ́ pɛ̀ Ɛlimaa à pì: 10Ibilisi nɛ́nɔ doke kemɛ n ũ! Mana sĩnda pínki kparaside! Bisãsiri kũ yã vãni sĩnda pínki pɛ̀kɛrɛa! Wɛ́zɛ̃ri pãsĩ! Ĩni Dikiri zɛ́ súsu litɛna kpɛdangara tóroo? 11Tera sà Dikiri ni ɔ kútɛmma de ǹ vĩ̀na kũ. Ĩni gɔrɔ pla kɛ kũ ifãntɛ̃'enaao. Gwe gɔ̃̀nɔ Ɛlima wɛ́ gɔ̃̀ dãadãa, gusira kùtɛa. Akũ àtɛn ɔ mátɛmatɛ à gbɛ̃ wɛtɛ à a ɔ kũ. 12Kũ gbɛ̃ zɔ̃kɔ̃ɔ pì yã kũ à kɛ̀ɛ pìi è, à Dikiri náani kɛ̀, zaakũ Dikiri yã kũ Pɔlu dànɛ a kũ̀ gbãna.

Kunna Antiɔku kũ à kú Pisidia bùsun

13Akũ Pɔlu gɛ̃̀ gó'itɛn kũ a gbɛ̃nɔ ò bò Pafɔ ò gɛ̀ɛ Pɛga, Pamfilia bùsun. Gwen Yuhana Maaku ń tón à ɛ̀ra à tà Yurusalɛmu. 14Bona Pɛga ò gɛ̀ɛ Antiɔku kũ à kú Pisidia bùsun. Kámmabogɔrɔ zĩ ò gɛ̀ɛ ò vùtɛ aduakɛkpɛn. 15Doka kũ annabinɔ takadanɔ kyókɛnaa gbɛra aduakɛkpɛ gbɛ̃ zɔ̃kɔ̃nɔ gbɛ̃ zĩ̀ à pìńnɛ: Gbɛ̃nɔ, tó á karana yãke vĩ à o gbɛ̃nɔnɛ, à o. 16Akũ Pɔlu fùtɛ à ɔ kɛ̀ńnɛ à pì: Isarailanɔ kũ buri pãnde donyĩrinɔ, à ma yã ma. 17Isarailanɔ Luda ó dizinɔ sɛ̀, akũ à ń buri kàra kũ ò kú Misila bùsun. Akũ à bò kũńwo gwe kũ a gbãna zɔ̃kɔ̃ɔo. 18À ń gwa gbárannan lán wɛ̃̀ bupla taka bà. 19À gbãna blè Kanaanɔ bùsu buri mɛ̀n supplanɔa, akũ à ń bùsuu pìi kpàḿma. 20A pínki kà wɛ̃̀ wàa pla kpɛ́ bupla akuri taka bà. Abire gbɛra à yãgɔ̃gɔ̃rinɔ dìtɛńnɛ ari à gɛ̀ɛ pɛ́ annabi Samuɛlia. 21Kũ ò kína gbɛ̀ka, akũ Luda Kisi nɛ́ Solu, Biliaminu buri dìtɛńnɛ. À kpata blè wɛ̃̀ bupla, 22akũ Luda a bò kpatan à Dauda kà a gɛ̃nɛ ũ. Luda Dauda yã ò à pì a lè Yɛsɛ nɛ́ Dauda laasun pɔ kɛ̀arɛ, ani a pɔyeina pínki yã kɛmɛ. 23A buri gũn à Yesu bòn Isarailanɔnɛ Surabari ũ lákũ à a lɛ́ sɛ̀ nà. 24Ari Yesu pì gɔ̃ gɛ́ su Yahaya gĩnakɛ à waazi kɛ̀ Isarailanɔnɛ ń pínki, à òńnɛ ò ń nɛ̀sɛ litɛ ò da'itɛ kɛ. 25Kũ Yahaya zĩ ye à láka à pì: Dín átɛn da má de a ũu? Gbɛ̃ kũ átɛn wɛ́ dɔin ma ũro. À ma! Ade tɛn su ma gbɛra, mádi ká mà a kyate bobonɛro.

26Ma gbɛ̃nɔ, Ibrahĩ burinɔ kũ buri pãnde donyĩrinɔ, ókɔ̃nɔn Luda surabana yã díkĩna kpã̀zãwɛrɛ. 27Yurusalɛmudenɔ kũ ń gbãnadenɔ dí Yesu dɔ̃ro, odi annabinɔ takada kũ òdigɔ̃ a kyó kɛ kámmabogɔrɔ zĩ pínki zɛ́ dɔ̃ro, akũ ò tò annabii pìnɔ yã pàpa ò yã dàala. 28Odi yãke lea kũ à kà ò a dɛro, akũ ò wɛ́ kɛ̀ Pilatia de ò a dɛ. 29Kũ ò yã kũ ò kɛ̃̀ a yã musu kɛ̀ pínki, ò a kìpa lía ò a wùtɛ miran. 30Ama Luda a vù bona gan. 31A gɔrɔ pla kɛnaa gũn à bò à sù gbɛ̃ kũ ò bò Galili ò gɛ̀ɛ kãao Yurusalɛmunɔa. Mɔ́kɔ̃nɔmɛ a sèedadenɔ ũ gbɛ̃nɔnɛ. 32Ókɔ̃nɔ sɔ̃, o su a baaru nna kpáárɛ. Lákũ Luda lɛ́ sɛ̀ ó dizinɔnɛ nà 33à kɛ̀ ókɔ̃nɔ kũ ó de ń buri ũnɔnɛ, à Yesu vù lán ò ò Zabura plade gũn nà. Luda pì:

Ma nɛ́mɛ n ũ,

gbãran ma n i.

34Adi yagi kɛro, ama Luda a vù bona gan lákũ Luda ò nà yã à pì:

Mani kúadona arubarika kɛárɛ yãpura

lákũ ma ò Daudanɛ nà.

35Akũ ò ò gukea dɔ ò pì:

Ĩni we n gbɛ̃ kũ à kú adona yagi kɛro.

36Dauda sɔ̃ à Luda pɔyenyĩnaa kɛ̀ a gɔrɔa, à gà ò a mira kpàkũsũ kũ a dizinɔ pɔ́o, akũ à yagi kɛ̀. 37Gbɛ̃ kũ Luda a vù bona gan pì dí yagi kɛro. 38Ma gbɛ̃nɔ, àgɔ̃ dɔ̃ kũ durunnanɔ kɛ̃mmana waazi kũ ótɛn kɛárɛ bò Yesu gãimɛ. 39Musa doka dì fɔ̃ à tò Luda yã bo kũńwo nnaro, ama Luda dì tó yã bo kũ gbɛ̃ kũ òtɛn Yesu náani kɛnɔ nna a pínki gũn. 40À laakari kɛ, de yã kũ annabinɔ ò sún á lero 41ò pì:

À ma, ákɔ̃nɔ lalandikɛrinɔ,

à kɛ gìri à kakatɛ,

zaakũ mani yãke kɛ á gɔrɔa.

Bee tó ò òárɛ, áni síro.

42Kũ Pɔlu kũ Baanabao tɛn bɔtɛ aduakɛkpɛn, ò wɛ́ kɛ̀ḿma ò ɛra ò su yã pì ońnɛ kámmabogɔrɔ làa dɔ. 43Kũ òtɛn fãkɔ̃a, Yudanɔ kũ gbɛ̃ kũ òdi donyĩ kɛ kũńwonɔ bò ò tɛ̀ Pɔlu kũ Baanabaooi dasi. Ò yã òńnɛ ò lɛ́ dàḿma, de ògɔ̃ gɛ́ arɛ kũ gbɛ̃kɛ kũ Luda kɛ̀ńnɛo.

44Kámmabogɔrɔ làa wɛ̃tɛdenɔ kàkara ń pínki ò sù Dikiri yã ma. 45Kũ Yudanɔ pari è lɛ, ò nɛ̀sɛgɔ̃baa kpà manamana, akũ òtɛn Pɔlu yã ɛ́kɛ bo òtɛni a sɔ̃sɔ̃. 46Akũ Pɔlu kũ Baanabao yã òńnɛ kũ swɛ̃̀gbãnao ò pì: Ákɔ̃nɔn à kũ̀ ò Luda yã oárɛ káaku gĩa. Zaakũ a gii átɛn da ádi ká à wɛ̃̀ndi kũ àdi lákaro lero, óni ɛra ò arɛ dɔ buri pãndenɔa sà. 47Zaakũ Dikiri yã dí dìtɛwɛrɛ à pì:

Ma n ditɛ gupura ũ buri pãndenɔnɛ,

de ǹ gɛ́ kũ surabana yão ari zĩtɛ lɛ́a.

48Kũ buri pãndenɔ yã pìi mà, ń pɔ kɛ̀ nna ò bɛ̀ɛrɛɛ lì Dikiri yãnɛ, akũ gbɛ̃ kũ Luda ń dítɛ wɛ̃̀ndi kũ àdi lákaro pɔ́ ũnɔ Yesu náani kɛ̀.

49Akũ Dikiri yã dà bùsuu pìla pínki. 50Yudanɔ ɔ zɔ̃̀ buri pãnde nɔgbɛ̃ donyĩri bɛ̀ɛrɛdenɔi kũ wɛ̃tɛ gbãnadenɔo, akũ ò wɛ́ tã̀ Pɔlu kũ Baanabaooa ò pɛ̀ḿma ń bùsun. 51Ò lukutɛ̃ kpùkɛkpukɛ ń gbánɔa ń tona kũ Ludao sèeda ũ, akũ ò gɛ̀ɛ Ikɔniu. 52Yesudenɔ sɔ̃, Luda Nini pɛ̀kɛrɛḿma kũ pɔnnao.

Currently Selected:

ZĨRINƆ 13: BB2005

Highlight

Copy