ZĨRINƆ 11

Pita buri pãndenɔ yã gbãna Yuda Yesudenɔnɛ

1Zĩ̀rinɔ kũ Yesude kũ ò kú Yudeanɔ mà lákũ buri pãndenɔ Luda yã sì nà se. 2Kũ Pita sù Yurusalɛmu, gbɛ̃ kũ ò zɛ̀ kũ tɔ̃̀zɔ̃yãonɔ a taari lè 3ò pì: N gɛ̃ gyɔfɔrɔdenɔ bɛa n pɔ́ blè kũńwo. 4Akũ Pita fùtɛ àtɛn yã pì bɔkɔtɛńnɛ zɛ́azɛa à pì: 5Má kú Yɔpamɛ, matɛn adua kɛ, akũ ma wɛ́gupu è. Ma pɔ́ke è lán biza zɔ̃kɔ̃ɔ bà, bà dɔdɔna a kusuru mɛ̀n siikɔ̃nɔa, à bò ludambɛ àtɛn kipa ma kĩnaa. 6Ma wɛ́ pɛ̀a tíii, ma nɔ̀bɔnɔ è a gũn, sɛ̃̀ntɛ pɔ́nɔ kũ pɔ́ kũ òdi táa o kũ kùaonɔ kũ bãnɔ. 7Akũ ma kòtoo mà ò pìmɛnɛ: Pita, ǹ futɛ ǹ dɛ ǹ só. 8Akũ ma pì, agya Dikiri, tɛ̃̀ pɔ́ kesɔ̃ pɔ́ gbãsĩ ke dí gɛ̃ ma lɛ́n zikiro. 9Kòtoo pì bona ludambɛ gɛ̃̀n plade pì dɔ, pɔ́ kũ Luda kɛ̀kɛ à gɔ̃̀ swáswa, màsun a tɛ̃̀ boro. 10À kɛ̀ lɛ gɛ̃̀n aakɔ̃, akũ ò ɛ̀ra ò gà pínki ò tào ludambɛ. 11Gɔrɔ bire gɔ̃̀nɔ gbɛ̃nɔn aakɔ̃ kũ ò ń zĩma bona Sizarianɔ sù ɔn kũ má kún. 12Akũ Luda Nini pìmɛnɛ mà gɛ́ kũńwo sikaa sari. Ó gbɛ̃nɔ gbɛ̃nɔn suddo díkĩnanɔ gɛ̀ɛ kũmao lɛɛlɛ se, akũ o gɛ̃ gbɛ̃ kũ à gbɛ̃ pìnɔ zĩ̀ma bɛa. 13Akũ à òwɛrɛ lákũ a malaikaa è nà, à bò à sùawa a kpɛ́n à òarɛ à gbɛ̃ zĩ Yɔpa à ma sísi, 14de mà yã kũ ani a sura ba oarɛ, akãa kũ a bedenɔ ń pínki. 15Kũ ma na yã'onaaa, Luda Nini kìpaḿma lákũ à kìpawá káaku nà. 16Akũ yã kũ Dikiri ò dí dɔ̀magu kũ à pì, Yahaya gbɛ̃nɔ da'itɛ kɛ̀ kũ ío, akãa sɔ̃ áni ó da'itɛ kɛ kũ Luda Ninio. 17Lákũ Luda gba dokɔ̃nɔ kɛ̀ńnɛ kũ ókɔ̃nɔ kũ o Dikiri Yesu Kirisi náani kɛ̀nɔ nà, dín ma ũ mà fɔ̃ mà gí Ludanɛɛ? 18Kũ ò yã pìi mà, odi yãke o doro, akũ ò Luda tɔ́ bò ò pì: O è Luda ɛ̀ra à buri pãndenɔ gbà zɛ́ dɔ ò nɛ̀sɛ litɛ ò wɛ̃̀ndi kũ àdi lákaro le.

Antiɔkudenɔ zɛna kũ Yesuo

19Wɛ́tãmmana kũ à fùtɛ Sitivĩ ga gbɛra mɛ́ à tò gbɛ̃nɔ fã̀kɔ̃a ò tà Fenisia bùsun kũ Sipiru bùsuuo kũ Antiɔkuo, òtɛn Luda yã o Yudanɔnɛ ńtɛ̃nɛ. 20Ama ń gbɛ̃kenɔ bi Sipiru bùsu kũ Sirɛni bùsuuo gbɛ̃nɔnɛ, akũ ò gɛ̀ɛ Antiɔku òtɛn yã o buri pãndenɔnɛ se dɔ, òtɛn Dikiri Yesu baaru nna kpáńnɛ. 21Dikiri tɛn ɔ daḿma, akũ gbɛ̃nɔ yã pìi sì dasidasi ò arɛ dɔ̀ Dikiria.

22Akũ yã pì baaruu kà Yurusalɛmu sɔsi gbɛ̃nɔ kĩnaa, akũ ò Baanaba zĩ̀ Antiɔku. 23Kũ à kà gwe, à è lákũ Luda arubarikaa kɛ̀ńnɛ nà, akũ a pɔ kɛ̀ nna. À lɛ́ dàḿma ń pínki ò zɛ kũ Dikirio kũ nɛ̀sɛ mɛ̀n doo. 24Baanaba bi gbɛ̃ manamɛ, Luda Nini kũ ludanaanikɛnaao pɛ̀kɛrɛa, akũ ò kàra Dikiri gbɛ̃nɔ gũn dasidasi. 25Akũ Baanaba gɛ̀ɛ Taasu de à Solu wɛtɛ. 26Kũ à a lè, akũ à sù kãao Antiɔku. Òdigɔ̃ kakara kũ sɔsi gbɛ̃nɔ dasidasi ògɔ̃ yã dańnɛ ari wɛ̃̀ do papana. Antiɔku gwen ò Yesu ìbanɔ sìsin Yesudenɔ ũ káaku.

27Gɔrɔ kũ̀a annabinɔ bò Yurusalɛmu ò sù Antiɔku. 28Ń gbɛ̃ kũ òdi pinɛ Agabu fùtɛ à zɛ̀ à gĩnakɛ à nà zɔ̃kɔ̃ kũ ani ká andunia gũn pínki yã òńnɛ kũ Luda Nini gbãnao. Kalaudiu kíblena gɔrɔn nàa pìi kà. 29Akũ Yesudenɔ zɛ̀o ò ń gbɛ̃ kũ ò kú Yudeanɔ kámaza kɛ lákũ baadi gbãna kà nà ò kpãzãńnɛ. 30Akũ ò kɛ̀ lɛ ò Baanaba kũ Soluo zĩ̀o ò kpá ń gbɛ̃ zɔ̃kɔ̃nɔa.

Currently Selected:

ZĨRINƆ 11: BB2005

Highlight

Copy