ZĨRINƆ 10

Pita kũ Kɔnɛliuo

1Gbɛ̃ke kú Sizaria a tɔ́n Kɔnɛliu. Àkũmɛ soza gã̀ kũ òdi pi Itali gã̀ gbɛ̃ zɔ̃kɔ̃ ũ. 2Gbɛ̃ pì bi ludayãmariimɛ, àdigɔ̃ Luda vĩna vĩ àpii kũ a bedenɔ ń pínki. Àdi gba da manamana, akũsɔ̃ àdigɔ̃ adua kɛ gɛ̃̀n baaakɔ̃. 3Zĩkea fãnantɛ̃ mɔ̀ aakɔ̃ à Luda malaikaa è tɛ̃tɛ̃ntɛ̃ wɛ́gupu gũn, à gɛ̃̀ a bɛa à pìnɛ: Kɔnɛliu. 4Akũ Kɔnɛliu wɛ́ wɛ̃̀a kũ vĩnao, akũ à pì: Bɔ́mɛɛ, Dikiri? À wèa à pì: N aduakɛna kũ n gbadana gbɛ̃nɔnɛɛo kà Luda kĩnaa, akũ à sì. 5Ǹ gbɛ̃nɔ zĩ Yɔpa sà, de ò Simɔ kũ òdi pinɛ Pita sísi. 6À kìpa gbɛ̃ kũ òdi pinɛ Simɔ Ãna bɛa. A bɛ kú ísira lɛ́a. 7Kũ malaikaa pìi tà, Kɔnɛliu a zĩkɛri gbɛ̃nɔn pla kenɔ sìsi kũ soza ludayãmari kũ à naaao. 8Kũ à yã pìi bàbańnɛ pínki, akũ à ń zĩ Yɔpa.

9Kũ gu dɔ̀, akũ ò dà zɛ́n, ò kà kãni kũ wɛ̃tɛ pìio. Gɔrɔ birea kũ ifãntɛ̃ kà mìdangura, Pita dì kpɛ́ musu de à adua kɛ. 10Nà tɛni a dɛ à ye à pɔ́ ble, akũ gɔrɔ kũ òtɛn pɔ́ble kɛ à wɛ́gupu è. 11À ludambɛ è wɛ̃kɔ̃ana, pɔ́ke tɛn kipa lán biza zɔ̃kɔ̃ɔ bà. Bà dɔdɔna a kusuru mɛ̀n siikɔ̃nɔa pínki, àtɛn su zĩtɛ. 12Pɔ́ buri sĩnda pínki kú a gũn, nɔ̀bɔnɔ kũ pɔ́ kũ òdi táa o kũ kùaonɔ kũ bãnɔ. 13Akũ ò pìnɛ: Pita, ǹ futɛ ǹ dɛ ǹ só. 14Akũ Pita pì: Agya Dikiri. Mádi tɛ̃̀ pɔ́ ke pɔ́ gbãsĩ ble zikiro. 15Akũ à kòtoo pìi mà a gɛ̃̀n plade dɔ ò pì: Pɔ́ kũ Luda pì à swáswa, ǹsun a tɛ̃̀ boro. 16À kɛ̀ lɛ gɛ̃̀n aakɔ̃, akũ kãnto ò pɔ́ pìi gà ò tào ludambɛ.

17Pita tɛn bídi kɛ wɛ́gupu kũ à è pìia, akũ Kɔnɛliu zĩ̀ri kũ ò Simɔ bɛ gbɛ̀kanɔ kà gɔ̃̀nɔ, ò zɛna gãnu lɛ́a. 18Ò lɛ́ zù ò gbɛ̀ka tó gwen Simɔ kũ òdi pinɛ Pita kìpan. 19Ari tera Pita tɛn laasun lɛ́ wɛ́gupu kũ à èea, akũ Luda Nini pìnɛ: Gbɛ̃nɔn aakɔ̃nɔ tɛni n gbɛka. 20Ǹ kipa ǹ gɛ́ kũńwo sikaa sari, zaakũ makũ mɛ́ ma ń zĩmma. 21Akũ Pita kìpa à gɛ̀ɛ gbɛ̃ pìnɔ kĩnaa à pì: Makũmɛ gbɛ̃ kũ átɛn gbɛka ũ. Bɔ́ yã mɛ́ à tò a su laa? 22Ò pì: Sozanɔ gbɛ̃ zɔ̃kɔ̃ Kɔnɛliu mɛ́ à ó zĩ. Gbɛ̃ manamɛ, à Luda vĩna vĩ. Yudanɔ pínki dì a tɔ́ nna sí. Luda malaikaa pìnɛ à n sísi ǹ su a bɛa de à n yã ma. 23Akũ Pita gɛ̃̀ kũńwo ɔnn à ń yàrii kɛ̀.

Kũ gu dɔ̀, à fùtɛ à dà kũńwo zɛ́n. Yɔpa Yesude kenɔ gɛ̀ɛ kãao lɛɛlɛ. 24A gɔrɔ aakɔ̃den ò kà Sizaria. Kɔnɛliu a danɛnɔ kũ a gbɛ̃nna kãninɔ kàkara àtɛni ń dã. 25Kũ Pita gɛ̃̀ ɔnn, akũ Kɔnɛliu gɛ̀ɛ à dàalɛ à kùtɛ a arɛ. 26Akũ Pita a fùtɛ à pì: Ǹ futɛ ǹ zɛ. Bisãsirin ma ũ se. 27Àtɛn yã o kãao ari ò gɛ̀ɛ ò gɛ̃̀ kãao kpɛ́n, akũ à gbɛ̃nɔ lè kakarana gwe dasidasi. 28À pìńnɛ: Á dɔ̃ kũ Yudanɔ zɛ́ vĩ ò yãkatɛ kũ buri pãndeo ari ò gɛ̃ ń ɔnnlo. Ama Luda mɔ̀mɛnɛ màsun gbɛ̃ke gbãsĩ gwa ke mà a tɛ̃̀ boro. 29A yã mɛ́ à tò kũ ò ma sisi, ma su sikaa sari. Má ye mà yã kũ a ma sisiia ma sà. 30Akũ Kɔnɛliu pì: A gɔrɔ siikɔ̃den dí kũ matɛn adua kɛ ma bɛa ifãntɛ̃ mɔ̀ aakɔ̃ mandara'i. Akũ kãnto ma gbɛ̃ke è zɛna ma arɛ à pɔ́kasa kũ àtɛn tɛ́ kɛ dana 31à pì: Kɔnɛliu, Luda n aduakɛnaa sì, n gbadanaa kàagu. 32Ǹ gbɛ̃nɔ zĩ Yɔpa Simɔ kũ òdi pinɛ Pita sísi. À kìpa Simɔ Ãna bɛa zaa ísira lɛ́a. 33Akũ ma gbɛ̃nɔ zĩ̀mma gɔ̃̀nɔ. Lákũ n su nà à kɛ̀ mana. Tera sà ó pínki ó kú la Luda dɔ̃naa gũn, de ò yã kũ Dikiri ònnɛ ǹ owɛrɛ ma yãi.

Pita yã'onaa

34Pita nà yã'onaaa à pì: Ma sì yãpura sà kũ Luda dì gbɛ̃ke wɛ́ gwaro. 35Buri sĩnda pínki tɛ́ gbɛ̃ kũ àtɛn vĩna kɛnɛ, akũsɔ̃ àdi yã mana kɛ, ade yã mɛ́ àdi káagu. 36Á lɛ́gbãzã kũ Luda kɛ̀ Isarailanɔnɛ dɔ̃, à kɛna kãao nna Yesu Kirisi gãi baaru nna kpàńnɛ. Àkũmɛ buri sĩnda pínki Dikiri ũ. 37Á yã kũ à kɛ̀ Yudea gu sĩnda pínki dɔ̃, lákũ à nàa nà zaa Galili Yahaya waazikɛna da'itɛkɛna yã musu gbɛra. 38Á dɔ̃ lákũ Luda a Nini pìsi Yesu Nazɛraa nà, akũ à kú kũ gbãnao à gɛ̀ɛ wɛ̃tɛ kũ wɛ̃tɛo, à yã mana kɛ̀ńnɛ à gbɛ̃ kũ Ibilisi ń ɔ fɛ̃̀ńnɛ ń kpɛnɔa wèrekɔ̃a, zaakũ Luda kú kãao. 39Ókɔ̃nɔmɛ yã kũ à kɛ̀ Yudea bùsun kũ Yurusalɛmuo pínki sèedadenɔ ũ. Ò a lòko lía ò a dɛ̀, 40akũ Luda a vù gan a gɔrɔ aakɔ̃de zĩ à tò à a zĩda mɔ̀wɛrɛ. 41Adi kɛ gbɛ̃ sĩnda pínki mɛ́ à a èro, sé ókɔ̃nɔ kũ Luda gĩnakɛ à ó sɛ́ a sèedadenɔ ũ. A vuna gan gbɛra o pɔ́ blè o í mì kãao. 42Akũ à dàwɛrɛ ò waazi kɛ gbɛ̃nɔnɛ ò ońnɛ kũ akãamɛ gbɛ̃ kũ Luda dìtɛ gbɛ̃ bɛ̃nɛnɔ kũ gyãwãndenɔ pínki yãkpatɛkɛri ũ. 43Annabinɔ pínki a yã ò ò pì gbɛ̃ kũ ò a náani kɛ̀nɔ durunnanɔ ni kɛ̃ḿma a tɔ́ gãi.

Luda Nini kipana buri pãndenɔnɛ

44Gɔrɔ kũ Pita kpɛ́ àtɛn yã pì ońnɛ, Luda Nini kìpa gbɛ̃ kũ òtɛn yã pì manɔa ń pínki. 45Yã pìi bò Yuda Yesude kũ ò sù kũ Pitaonɔ sarɛ, kũ bee buri pãndenɔn Luda a Nini pìsiḿma gba ũ yãi. 46Zaakũ ò mà òtɛn yãke buri o òtɛn Luda yãbonsarɛ kɛnanɔ o. Akũ Pita pì: 47Gbɛ̃ pìnɔ Luda Nini lè lán ó bà. Dí mɛ́ ani fɔ̃ à gíńnɛ ò da'itɛ kɛɛ? 48Akũ à pì ò da'itɛ kɛńnɛ kũ Yesu Kirisi tɔ́o. Akũ ò wɛ́ kɛ̀a à gɔrɔ pla kɛ kũńwo.

Currently Selected:

ZĨRINƆ 10: BB2005

Highlight

Copy