Marko 14
14
I pralstune kamenn o Jesuses te marell
1His dui diwessa glan kol bare diwessa, kai kharenna Passa un glan kol diwessa, kai chan i bibolde kek shutlo maro.#14:1 Pash o Passa well i biboldenge an o shero, kai glan i rah tsiro o Dewel len dran o them Egiptia win anas, dik: 2. Mose 12:17-21 Un kol bare rashaja un kol biboldengre tchatchepangre rodan i latcho tsiro, te taprenn le o Jesuses tchorchanes, te marenn le les. 2Jon penan mashkral pende: “Mer taprah les gar ap o Passa, te wenn i menshe gar diwjo un chojedo ap mende.”
I djuwel, kai well gar bistedo
3Un o Jesus his an o gab Betani, an o Simoneskro kheer. Kowa hi ko Simon, kai his les i djungelo nasslepen ap peskro mass.#14:3 Ko nasslepen, kai o mass tele merella, kras les pale-tchiddo an i biboldengre jaka. Har o Jesus kote chas, was i djuwel pash leste. Kolat his i tushni an o wast. Koi his djudjo un kutch djet dren, kerdo dran ko kasht, hoi kharella Narde. Un joi phagas koi tushni pre, un tchoras ko djet ap leskro shero, te makell li les dren.
4Mank kolende, kai koi pashel his, his sawe, kai choiran pen un penan mashkral pende: “Hoske tchoras li ko djet tchitcheske win? 5Te bikrams ko djet, lams budeder har triin-sheel rupene beme. Un kol lowe nai dams mer i tchorwelende.”
Un jon tchingran ap late.
6Penas o Jesus ap lende: “Mukenn lat! Hoske tchingrenn tumer ap late? Hoi joi mange kras, his mishto. 7I tchorwele hi hako tsiro pash tumende. Un te kamenn tumer, nai krenn tumer lenge latcho koowa. Me hom gar hako tsiro pash tumende. 8Koja kras, hoi nai kras li, un makas man kanna dren ko diweske, kai wau paskedo. 9Tchatchepah, me penau tumenge: Ap i tseli phub, kai penenn le o latcho lab mandar i menshenge, koi well ninna penlo, hoi koi djuwel mange kras. Joi wella gar bistedo.”
O Judas phukrell ap o Jesuseste
10O Judas Iskariot, jek kol deesh-te-dujendar, djas pash kol bare rashajende, te phukrell lo ap o Jesuseste. 11Har jon kowa shunan, his le bachtelo, un penan: “Mer dah tut lowe!” Un job rodas i latcho tsiro, te dell lo les an lengre wasta.
O Jesus chal peskre malentsa
12His jek diwes glan kol diwessa, kai chan i bibolde o maro, kai kek shutlo jarro dren hi. Ap ko diwes marenn le i bakren, te chan le len ap ko baro diwes Passa. Koi penan o Jesuseskre mala ap leste: “Kai djas mer, te kras o chapen tuke?”
13Un job bitchras dui peskre malendar un penas ap lende: “Djan an o foro. Koi dikenn tumer i murshes, ko hidjrell i khoro pani. Djan leske palla! 14An ko kheer, kai job dren djal, penenn o rajeske an ko kheer: Maro sikepaskro putchell tutar: Kai hi koi isema, kai nai chau me o bakro mire malentsa?
15Un job sikrell tumende i bari isema pral an ko kheer. Kote hi beshepangre un lauter hoi men hunte well. Kote krenn menge o chapen!”
16Un kol mala djan koi, un wan an ko foro un hatsan kowa jaake, har job lenge penas. Un jon kran o chapen.
17Un ap i rati was job kol deesh-te-dujentsa. 18Un har jon pash i chapaskri beshdo his un chan, penas o Jesus: “Tchatchepah, me penau tumenge: Jek tumendar, kai chal mantsa, kowa phukrella ap mande.”
19Ko dukas len. Un jon putchan lestar, jek pal o wawar: “Hom me kowa?”
20Koi penas job ap lende: “Kowa hi jek kol deesh-te-dujendar, kai tchiwell peskro kotar maro mantsa an jek tcharo. 21O Mensheskro Tchawo hunte merella jaake, har hi lestar tchinlo an o Debleskro lab. Hawi bibacht well ap koleste, kai ap leste phukrella! Koleske wals feteder, te wals lo gar boldo.”
22Har jon chan, las o Jesus o maro, parkras pes pash o Debleste, phagas ko maro, das les peskre malende, un penas: “Lenn ko maro un chan les! Kau maro hi miro mass!”
23Palle las lo o khoro, parkras pes pash o Debleste, das len o khoro, un jon pijan halauter lestar. 24Un job penas ap lende: “Kai mool hi miro rat, hoi me ratau budenge. Jaake krau i drom, kai o Dewel un i menshe mala wenna. 25Tchatchepah, me penau tumenge: Me pijau buder gar i mool, bis te well ko diwes, kai hi o Dewel o rai pral halauter. Palle pijau newi mool pash leste an o bolepen.”
26Palle giwan le o Debleske i gili, un djan win pash o djeteskri berga.
O Jesus rakrell o Petreha
27Un o Jesus penas ap lende: “Tumer halauter mukenn man. Hi tchinlo an o Debleskro lab: O Dewel penas: Me dau o bakrengro rajes. Un i bakre nashenn penge.#14:27 dik: Sacharja 13:7
28Pal kowa krell o Dewel man i mulendar djido. Un te djan tumer an o them Galilea, palle djau glan tumende.”
29O Petro penas ap leste: “Ninna te nashenn halauter tutar krik, me mukau tut gar.”
30Penell o Jesus ap leste: “Tchatchepah, me penau tuke: Kai rati dell o bashno gar o duito kopo gole jaake rah, har tu gar triin kope penal, te prindjreh man gar.”
31Penell o Petro soreles: “Ninna te hunte meroms tuha, doms tut gar buchoste.” Ninna kol tsele wawar penan kowa.
An i baar Getsemani
32Un jon wan an i baar#14:32 baar, ap gadjkenes: Garten , koi kharas Getsemani. Un o Jesus penas ap peskre malende: “Beshenn tumen kate jaake rah, har rakrau o Debleha.” 33Un job las o Petres peha, ninna o Jakobes un o Johannes. Un i bari daar was ap leste, un job trissas#14:33 trissas, ap gadjkenes: hat gezittert . 34Un job penas ap lende: “Miro dji rowella un dukell, har te merap. Atchenn kate un sowenn gar!”
35Un job djas i kotar drom dureder, witsras pes ap i phub un mangas o Debles, te well ko pharo tsiro gar ap leste. 36Un o Jesus mangas o Debles: “Tata, halauter nai kreh tu. Muk, te wenn kol duka gar ap mande! Ninna te mangau tut kowa, ma kre, hoi me kamau! Kre jaake, har tu kameh!”
37Un job djas pale pash peskre malende un dikas, har sowan le, un penas ap o Petreste: “Simon, soweh tu? Nai rikreh tu gar tire jaka i tikno tsiro pre? 38Ma sowenn dren! Mangenn o Deblestar, te perenn gar miro dromestar tele! Tumen kokres hi kek soor, te atchenn pash mande, ninna te kamell kowa tumaro dji.”
39Un job djas pale koi, mangas o Debles un penas kol emlige laba.
40Palle djas lo pale pash lende un dikas, te sowenn le. Jon rikran nai lengre jaka gar pre. Un jon djinan gar, hoi te penenn le ap leste.
41Un job was o triinto kopo un penas ap lende: “Kamenn tumer dureder sowell un kate tchiddo atchell? Kanna hi doha! O tsiro hi kai, kai denn le o Menshengro Tchawes an i wasta i tchilatche menshendar.
42Stenn pre! Djas menge! Dikenn, ko phukepaskro wella.”
O Jesus wella tapedo
43Un har job jaake rakras, was o Judas, ko jek kol deesh-te-dujendar. Pash leste his bud wawar mursha. Len his chare un kashta an i wasta. Kolen bitchran i bare rashaja, un i biboldengre tchatchepangre un phureder.
44O Judas, ko phukepaskro, kras lentsa win: “Koles, kai tchumrau, kowa hi lo. Koles taprenn, anenn les krik un denn garda ap leste!”
45Un o Judas was pash leste, un penas: “Mo rai!” un tchumras les.
46Un kolla tapran les, un rikran les.
47Un jek kolendar, kai koi pashel tardo hi, las peskro charo, un das jek klisteske o kand tele. Kowa his i klisto, kai budrell o baro rashajeske.
48Un o Jesus penas ap lende: “Tumer wan i charentsa un i kashtentsa pash mande, har te woms i marepaskro.
49Hako diwes homs pash tumende an o Debleskro baro kheer un sikrom i menshende o Debleskro drom. Un tumer tapran man gar. Kau koowa well jaake, te well tchatcho, hoi o Debleskre rakepangre glan i rah tsiro an pengre lila tchinan.”
50Har peskre mala kowa shunan, mukan le les lauter un nashan penge.
51I terno mursh djas o Jesuseske palla. Koles his kokres i laintikro kotar trul peste. Un jon tapran pal leste. 52Koi mukas lo ko laintikro kotar an lengre wasta, un nashas nanges lendar.
O Jesus hi glan i tchatchepangre tardo
53Un jon anan o Jesuses pash o baro rashajeste. Un i tsele bare rashaja un i biboldengre phureder un tchatchepangre wan khetne. 54Dur pal leste djas o Petro leske palla, un was glan o shukar kheer o baro rashajestar. Un job djas an o baro wudar dren un beshas pes pash i lurdende pash i jag un tatsras pes.
55Un i bare rashaja un i tsele pralstune bibolde rodan tchomone, hoi anenn le nai ap o Jesuseste, te nai marenn le les. Un jon hatsan tchi. 56Bud anan ap leste chochepen pre. Un har jek rakras jaake un o wawar jaake, rakran le gar dran jek mui.
57Palle stan mursha pre un anan chochepen ap leste pre un penan: 58“Mer shunam, har job penas: Me phagau kau Debleskro baro kheer tele, hoi i menshe pengre wastentsa kran. Un an triin diwessa krau i wawar Debleskro baro kheer, hoi kek menshe pengre wastentsa kran.”
59Ninna kowa, hoi kolla penan, rakran le gar dran jek mui.
60Un o baro rashai stas pre, djas mashkral lende, un putchas o Jesusestar: “Peneh tu tchi ap kowa, hoi jon ap tute pre anan?”
61Un o Jesus penas tchi. Pale putchas o baro rashai lestar: “Hal tu ko baro rai, kolestar o Dewel penas, te well job? Hal tu o tchawo o baro Deblestar?”
62“Me hom kowa,” penas o Jesus, “un ko diwes wella, kai dikenn tumer o Menshengro Tchawes, har hi lo beshdo ap i tchatchi rig o sorelo Deblestar, un har well lo an i wolke dran o bolepen.”
63Koi kras o baro rashai peskre koola paash, te sikrell lo peskri choli, un penas ap i wawar pralstunende: “Kek hunte penell menge budeder. 64Tumer shunan: Job krell pes har o Dewel. Hoi kamenn tumer leha te krell?”
Un jon penan halauter: “Job hunte well maredo!”
65Koi wan mursha un tchungran leske an o mui, pandan leske tchomone trul leskre jaka, dan les un penan ap leste: “Pen menge, koon das tut?” Un i lurde dan les an o mui.
O Petro dell o Jesuses buchoste
66O Petro his glan o kheer beshdo. Koi was i budepaskretsa o baro rashajestar.
67Un har dikas li o Petres, har tatsras pes lo pash i jag, dikas li ap leste, un penas: “Tu hals ninna o Jesuseha dran Nazaret khetne!”
68Un o Petro penas: “Na-a, kowa hi gar tchatcho! Me djinau gar un haiwau gar, hoi tu peneh!”
Un job djas win pash o baro wudar glan ko kheer. Un o bashno das gole.
69Un koi budepaskretsa dikas les, un penas pale ap kolende, kai koi pashel tardo his: “Kawa hi jek kolendar!”
70Un job penas pale: “Na-a, me hom kek lendar!”
Pal i tikno tsiro penan kolla, kai kote tardo hi, pale ap o Petreste: “Tchatchepah, tu hal ninna jek kolendar. Tu hal dran o them Galilea.”
71Koi tchingras lo, das pes sowel, un penas ap lende: “Me prindjrau ko murshes gar, kolestar rakrenna!”
72Un sik koi pre das o bashno o duito kopo gole. Un o Petreske wan o Jesuseskre laba an o shero, hoi job leske penas: “O bashno dell gar o duito kopo gole jaake rah, har tu gar triin kope penal, te prindjreh man gar.”
Kowa djas an leskro dji, un job rowas.
Currently Selected:
Marko 14: Sint2021
Highlight
Share
Copy
Want to have your highlights saved across all your devices? Sign up or sign in
© 2021 Romanes-Arbeit-Marburg e.V.
Erste Auflage
Alle Rechte vorbehalten
Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.
Herausgeber und Vertrieb: Romanes-Arbeit-Marburg e.V., Germany
info@romanes-arbeit-marburg.de
ISBN: 978-3-00-068366-4
Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995
Farbige Illustrationen mit Erlaubnis von Louise Bass
Kartenmaterial generiert mit Bible Mapper © 2005-2010 von David P. Barret
Alle Rechte an den Karten © 2021, Wycliffe Bible Translators, Inc.
