KEKAMEN RASUL-RASUL 9

Saul Manu Idi Rireb

1Kareb ineh Saul meluun gateh niat sikal ngaté anak-anak sekola' Tuhan ineh. Idi ieh iné' matun Imam Rayeh, 2idi nemutuh neneh maré surat itenneh amé' Damsik kuan ruma'-ruma' sembayang déi', idi kudeng ieh mepapu' lemulun luk maya' Dalan Tuhan ineh, do' deléi idi decur pana', ieh miak ngakem nedeh idi nguit nedeh amé' Yerusalim.

3Idi uned ieh nalan amé' muneng ku Damsik, idi denak-denak inan aceh acang luk rayeh rat bang langit luk merasat nengelibut neneh. 4Idi ieh neluka' luun tana' idi neninger aceh tang luk pebala neneh, “Saul, Saul, anunké punneh iko ngedereh Negku.”

5Idi keburi'neh, “Idéké Iko ineh, O Tuhan?

Idi Ieh nepebala, “Ui ini Yésus, luk pederenmu ineh. 6Tumui iko idi semuet bang bawang, idi déi' iko miak ninger ratnan anun-anun luk ruenmu.”

7Idi lemulun luk nemaya' neneh netuped idi lingo-lingo, neninger bala ineh, iamo' na luk idi aceh burur lemulun pana' sinierdeh. 8Saul netumui; idi ieh nekulat mateh, iamo' ieh nebuser peh. Idi ideh nengimet ticu'neh, idi nenguyut neneh amé' bawang Damsik. 9Idi teluh aco kinioneh, ieh nebuser, idi na nekuman idi nengirup abpa' teh.

10Déi' Damsik inan aceh anak sekola', ngadanneh Ananias. Idi kebala Tuhan neneh bang aceh luk sinierneh, “O Ananias!”

Idi keburi'neh, “Anun idi, Tuhan?”

11Idi kebala Tuhan neneh, “Nalan iko idi amé' inan aceh dalan ngadanneh Mesiri, idi ngitun déi' ruma' Yudas ratnan seburur lemulun ngadanneh Saul, lun Tarsus, ngaceku nekini ieh sembayang. 12Idi ieh pangeh nenier selemulun ngadanneh Ananias luk nacing idi nengerareng ticu' luunneh, pad ieh miak nier peh.”

13Idi kebala Ananias, “O Tuhan, ui pangeh neninger mula' bala ratnan lemulun ini. Ieh pangeh nenganau' tuda'-tuda' kekamen luk dat kuan lun manu déi' Yerusalim. 14Idi tungé' Damsik pana' ieh inan lalud ratnan imam-imam rayeh ngakem amung-amung lemulun luk neten ngadanMu.”

15Iamo' kebala Tuhan neneh, “Amé iko, ngaceku ieh luk pinili'Ku, ngakem kuanKu, pad ieh ngegala' ngadanKu kuan lun pupu baken idi raca'-raca', idi kuan lun pupu Israil pana'. 16Idi Ui sebuleng sikal mada' kuanneh, tuda'-tuda' dereh luk miak kali'neh ngaceku ngadanKu.”

17Idi Ananias iné' idi nesemuet bang ruma' ineh, idi nengerareng ticu'neh luun Saul, keburi'neh, “O kinanakku Saul, ui ini icuk Tuhan, ieh ineh Yésus luk nengegala' bururNeh kuanmu uned dalan luk dinalanmu ina di, pad iko miak nier baruh teh, idi pad iko mepanu' ku Roh Meligan.” 18Idi kareb ineh teh inan luk nebpeh rat bang matehneh luk mepad kudeng rara lawid, idi ieh miak nier baruh teh, idi ieh nudur iné' rerebpen. 19Idi ieh nekuman pad ieh metueh.

Saul Mada' Déi' Damsik

Saul netudo tuda'-tuda' aco kinioneh idi nepamung dengan anak-anak sekola' ineh déi' bawang Damsik. 20Ieh petacu iné' bang ruma'-ruma' sembayang idi nemada' ratnan Yésus, Ieh ineh Anak Allah.

21Idi amung lemulun luk neninger balaneh mawa idi nepebala, “Naké ieh ineh lemulun luk ngaté lemulun luk neten ngadan ini déi' Yerusalim? Idi ieh nacing tungé' ngaceku ieh pian nguit nedeh kitem abetdeh pa kiung imam-imam rayeh.”

22Idi bada' Saul iuk-iuk melalud, idi ieh nengelaya' nelun Yahudi luk tudo déi' bawang Damsik ineh, kareb ieh nengegala' Yésus ineh Keristus peh.

23 # 2 Kor 11.32–33 Pangeh tuda'-tuda' aco idi lun Yahudi nepegayam sikal ngaté ni Saul. 24Iamo' gayam lemulun ineh pangeh nekali'neh. Idi ideh nengabang munung tanga' tebaco kedangan, pad ideh miak ngaté neneh; 25iamo' lun rurumneh nengalap neneh kareb malem aco, idi nengurur neneh bang buan amé' libal ar.

Saul Déi' Yerusalim

26Saul iné déi' Yerusalim, idi ieh sikal nutun perurum dengan anak-anak sekola' Yésus. Iamo' ideh matot neneh, idi na manu ratnan ieh seburur anak sekola' Yésus. 27Iamo' Barnabas nengedengan neneh idi nenguit neneh amé' matun rasul-rasul ineh. Ieh nemada' nedeh ratnan kudeng apeh Saul nenier Tuhan uned dalanneh, idi kudeng apeh Tuhan nepebala neneh. Idi teh ieh nemada' nedeh ratnan kudeng apeh Saul nemada' ratnan ngadan Yésus dengan mekuu' déi' bawang Damsik. 28Idi Saul tudo dengandeh idi nenalan aput Yerusalim. Ieh nemada' bang ngadan Tuhan dengan mekuu'. 29Idi ieh neperiteteng idi nepesaad dengan lun Yahudi rat bawang Grika, iamo' ideh pana' nenakap dalan sikal ngaté neneh. 30Kareb bala ini nekali kinanak-kinanakneh luk baken, idi ideh nenguit neneh amé' Kaisaria, idi nengecuk neneh amé' Tarsus.

31Idi sidang luk aput-aput tana' Yudia, Galilia, idi Samaria nengalap awang idi anu luk meraben. Idi sidang ineh iuk metueh dengan matot inan Tuhan, idi dengan lalud Roh Meligan ideh iuk amé' mula'.

Pétrus Déi' Lidda Idi Yopa

32Pétrus nenalan aput-aput bawang idi ieh iné' matun lun manu luk tudo déi' Lidda. 33Idi déi' ieh nepapu' selemulun ngadanneh Anias, luk telubid luun luk inanneh rudap ualuh lak kinioneh, idi ieh mét naté urat. 34Idi keburi' Pétrus neneh, “O Anias, Yésus Keristus ngedo' namu. Tumui iko, idi ngelepi' luk inanmu rudap.” Idi petacu ieh netumui peh. 35Idi amung lun luk bang bawang Lidda idi Saron ineh nenier neneh, idi nelumi inan Tuhan.

36Déi Yopa inan seburur decur luk manu, ngadanneh Tabita, luk ilungneh Dorkas, ieh ineh “Talau.” Idi decur ineh megéi' nganau' kekamen luk do' idi méi' nelun masi'. 37Idi kareb ineh luk mét nacing neneh idi ieh petacu naté. Idi kareb ideh pangeh nemaru' butungneh, idi ideh nengerareng neneh bang takep luk déi' parung. 38Idi bawang Lidda ineh muneng ku Yopa, idi kareb anak-anak sekola' Yésus neninger Pétrus idi déi' bawang Lidda ineh, idi ideh nengecuk dueh burur amé' neteng neneh, kebala didueh, “Do' saget amé' nekai.” 39Idi Pétrus netumui idi nemaya' nedidueh. Kareb ieh nacing idi ideh nenguit neneh semuet déi' parung. Idi amung-amung lun decur tinula' luk tuped iringneh nangi' idi nemada' sirenneh kuyu' idi ayung luk pangeh inau' Dorkas kareb ieh idi dengandeh. 40Pétrus nengecuk amung-amung lemulun remuat, idi ieh netekeradung nesembayang. Idi ieh nelumi inan butung ineh, keburi'neh, “O Tabita, tumui iko!” Idi Tabita nekulat. Kareb ieh nenier Pétrus, idi ieh netumui. 41Idi Pétrus nengegenang ticu'neh idi nenganau' neneh tuped. Idi kareb ieh pangeh nenawar nelun manu idi decur-decur tinula', ieh nemaré neneh kuandeh dengan do'. 42Idi bala ini nepiar libut-libut bawang Yopa, idi mula' lemulun manu inan Tuhan peh. 43Idi Pétrus netudo déi' Yopa tuda'-tuda' aco dengan seburur lemulun ngadanneh Simun, ieh ineh lun luk ngakem ratnan kubil pung.

Currently Selected:

KEKAMEN RASUL-RASUL 9: BLD

Highlight

Copy