Marko 6

Atɔnu Eti Ku Awɔ̃ Nɛ Yɛ Kepi

1Yesu aba shɛ nɛ ɔkɛlɛ avɛ kepi, yɛ badɔkpasɛ nɛ tsyɛ ba za yɛe de. 2Gɛ Kimuenewi nɛ kɛ na, Yesu ada kpa kɛdɔ kasɛ nɛ oxogokɔvu nɛ mɛ. Banɔ gelee gɛ be nu yɛ kɛdɔ, kiyinɔ balɛ.

“Fakɔ anɔa nɛ edenɔ ebuia nɛ gɛ aɖɔ?” “Kide gɛ nu kibui nyinyi nɛ, gɛ ba kɔ yɛa na, gɛ kɔ sɛ abhɛtɛ ebui gɛ eyinɔanɔ tsyɛ! 3Ganɛ osiafatɛ nɛ naa? Ganɛ Maria yɛeyi Yakobo, Yosɛfu, Yuɖas anɛ Simɔnɛ balɛ adzya nɛ naa? Sɛ yɛadalɛ nɛ balɛ ɔkɛ̃ nɛ bulɔ?” Klɛ banɔ na mɔ obulo nɛ yɛ.

4Yesu etsre alɛ asɛ, “Anɔ nɛ gɛ amɔ ebui aɖɔ nɛ yɛshopoa lɛ shi nɛ yɛnahwɛ kepi eti ku awɔ̃.” 5Adɛ bhɛtɛ ebui yiyinɔanɔ kanyaka nɛ ɔkɛlɛ, ɔyɛkɔdɛ banɔ nyɛnya bhli teli kabha ko atrɔ ahwɛ klɛ ebeke balɛ banya. 6Kɛbhɛtɛ yɛ kibi sɛ yɛeletealɛ nɛɛ, tɛyɛyɛkɛŋa ma balɛ mɛ.

Yesu Akpɛ Yɛ Banɔ Lɔfɔntɛabha Nɛ Xwɛ

Ɔkɛlɛ Yesu anyɔ akana anɛ yɛ kɛdɔkɛkasɛ denɔ ɛmabhli mɛ ɔvɛnɔ ɛmabhli mɛ. 7Gɛ eklu yɛ Banɔkpɛkpɛ nɛ amɛna yɛ ɔbha, akpɛ balɛ asɛsɛ tɛabha tɛabha klɛ akɔa lɛ kabhaŋɛŋa sɛ tɛ ba ŋa ɛfufɔɛkpã nɛa bha.

8Yɛ ɛshã ɛlɛ dzi sɛ, “Nɔ tɛ yɛkɔ kɛdɔnyɛdɔ kɔ wɔnɔ kidzo gɛga nɛ ɔyɛkɔdɛ ovusi, nɔ tɛ yɛkɔ kɛŋɛŋa, nɔ tɛ yɛkɔ ɔkpɛtɛ nɛ kɔba nɛ ɔdzadi mɛ. 9Nɔ kpɛ ɔtsrɛklɔ pɔ nɔ tɛ yɛkɔ awidzidze bhla. 10Bupa nɔɔ nɛ mɛ gɛ nɔɔ dɔ ya, nɔ za bulɛ mɛ ɔdɔ nanɔ kibe lɛ gɛ nɔ bɔ shɛ̃ nɛ ɔmaa lɛ nɛ mɛ. 11Ɔkɛlɛ gɛ noo ku pɛ baa dɛ yɛkɛ wɔnɔ, klɛ ba dɛ taa nɔ batɔ, no xule osumududu nɛ wɔnɔ butsrukpɔ nɛ olu tɛ nɔ shɛ̃, tɛ kidzi kibuimɔɖɔ nɛ balɛ shu.”

12Ba vɛ ada kasɛ kɛdɔ sɛ tɛ banɔ nɛ be tsyina kite mɛ. 13Ba kɛka ɛfufɔɛkpã, ba balɛ bubɔ nɛ banɔ nyɛnyɛa bha, klɛ be beke balɛ banya.

Be Bhui Yohanɛsɛ Enikpɛ Nɛ Kɛtɔkpu

14Ekusi Heroɖesɛ ebe nu kibui, alasɛ le be ti Yesu kinyi nɛ mɔmɔ. Banɔ teli asɛ, “Yohanɛsɛ Enikpɛ nɛ yɛ aza nyɛmɛ edenɔ bekpu mɛ, klɛ so gɛ ebuiyiyinɔ anɔ kemia nɛ di kaa wa kɛxwɛ nɛ yɛ mɛ ana.”

15Banɔ teli asɛ, “Eliya.”

Klɛ banɔ bhlatɔ tsyɛ asɛ, “Enu atɔnu, anasɛ batɔnu nɛ gɛ ba za klibe nɛ teli.”

16Pɔ gɛ Heroɖesɛ enu ana nɛɛ, asɛ, “Yohanɛsɛ, agɛ yɛ tɔkpu ibhui ba flanɔ, yɛ aza nyɛmɛ edenɔ bekpu mɛ!”

17Alasɛ Heroɖesɛ nahwɛ atɛ kɔ ɔshã sɛ bevu Yohanɛsɛ, ba nya yɛ tɛ bakɔ ada kpɛ buvu. Abhɛtɛ kibui nɛ alasɛ Heroɖias, gɛ enu yadzya Filipo yedzini nɛ gɛ ayɛkɛ agbanɔ nɛ so. 18Alasɛ Yohanɛsɛ aganɛ aɖɔ etsre Heroɖesɛ asɛ, “Ɔshã ɔdɛ kɔ kidzo sɛ tɛ ɔyɛkɛ wadzya yedzini.” 19Kibui lɛlɛ nɛ so Heroɖiasɛ evu Yohanɛsɛ akpɛ ɛyam klɛ atrɔ sɛ ebe yi yɛ. Pɔ adɛ mɔ kidzo nɛ yɛ shu, 20alasɛ Heroɖesɛ eesi Yohanɛsɛ kifu, so nɛ akpɛ buka akpɛ yɛ, gɛ enyi yɛ asɛ anɔnɛna klɛ yɛshu bhui. Onu gɛ Heroɖesɛ enu Yohanɛsɛ ebuiɖuɖɔ nɛ eshuku, tsyɛ apɛ asɛ tɛ ezee nu yɛ ebui.

21Gugɔɛ nɛɛ, kibe dzyɔgo ba kɔ yɛ. Nɛ yɛ kɛmɔwi ŋɛŋa nɛa bha atɔ kɛdɔ, eklu yɛ shu banɔ gbɛgbla, yɛ keyutugbani baka nɛ otugba banɔ nɛ Galelia. 22Gɛ Heroɖiasɛ yɛ eyiadzɛ nɛ ebe yu kivu nɛ, yɛ kivuyuyu nɛ ku Heroɖesɛ nɛ yɛ be fu nɛ same.

Ekusi nɛ etsre adzɛnuvɔɛ nɛ asɛ, “Bisi kɛdɔnyɛdɔ gɛ ɔpɛɛ tɛ ɛbhɛtɛ kɔ wɔ.” 23Klɛ aka atabu atrɔ kɛlɛ kabha sɛ, “Kɛdɔnyɛdɔ gɛ obisi mɛ ko eba kɔ wɔɛ lɛ, ɔkɔ nanɔ mɛ bukusiɔŋakɔ nɛ kapɛ zɛzɛ.”

24Klɛ adzɛnuvɔɛ nɛ ekoeyi avɛ yɛeni ɔbha klɛ ede bisi yɛ asɛ, “Kidee mɛ ɛba bisi?”

Yɛeni nɛ etsre yɛ asɛ, “Yohanɛsɛ Enikpɛ nɛ yɛ tɔkpu.”

25Adzɛnuvɔɛ nɛ anawɔ̃ avɛ ada tɔnɔ Ekusi Heroɖesɛ nɛ tɛbibisi nɛ asɛ, “Ɛpɛɛ Yohanɛsɛ Enikpɛ nɛ kɛtɔkpu nɛ kɛtɛa bha ɔtsɔtsiɔ̃.”

26Tɛbibisi nɛ kɛ trɔ Ekusi nɛa bha piim, pɔ atabu, anɛ yɛ befu nɛ so adɛ pɛa sɛ tɛ atɛ yɛkɛ adzɛnuvɔɛ nɛ tɛbibisi. 27Kɛlɛ so akpɛ yɛ atɔkpubhui nɛ teli sɛ ada mɛna Yohanɛsɛ kɛtokpu zia. Anyɛ na vɛ ede bhui Yohanɛsɛ kɛtɔkpu nɛ buvu nɛ mɛ, 28klɛ ayɛkɔ atrɔ kɛtɛ kabha amɛna. Ayɛkɔ kɛlɛ akɔ adzɛnuvɔɛ klɛ yɛ tsyɛ ada yɛkɔ akɔ yɛeni. 29Gɛ Yohanɛsɛ badɔkpasɛ nɛ nui bui nɛɛ, ba tɔnɔ aba klɛ la ba yɛkɔ yɛ ishuidzya nɛ ede lu odzrem.

Yesu Anyunɔ Banɔ Akpã Teti

30Banɔkpɛkpɛ nɛ be xogo nɛ Yesu ɔbha klɛ be tsre yɛ ebui nɛ gɛ bada bhɛtɛ nɛ kɛdɔ nɛ gɛ bakasɛ nɛ petee. 31Kɛlɛ gɛ banɔ gelee ba vɛ pɛ baa ba balɛ ɔbha nɛ so, ba dɛ mɔ kibe gɛ la ba ŋa kɛdɔ, Yesu etsre balɛ asɛ, “Nɔ tɔnɔ mɛ ɔba wɔnɔnahwɛ tɛ bu vɛ ɔkranakɔ toli tɛ nɔ do muene kɛbɔɛ.”

32Kɛlɛso, be ku keniabha opupu toli balɛ nahwɛ klɛ ba shɛ avɛ ede ku ɔkranakɔ toli. 33Pɔ nɛɛ, banɔ gelee ba mɔ balɛ edzyesi, so bakpanɛ kisi edenɔ ɛma nɛ mɛ petee eputɔ kɔ balɛ ede ku ɔklɛ. 34Kibe lɛ nɛ gɛ Yesu ede ku pɛ amɔ banɔɛza nɛ piim, eshutukubui eku yɛ nɛ balɛ, alasɛ baza kɔ yɛ anasɛ ibhoshi gɛ agbɛgbanɔ ama kɔ ɛlɛ. So etenɔ balɛ kɛdɔ edidedi kasɛ.

35Nɛ ɔɖa lɛlɛ nɛ mɛ keli kaa vɛ obelekɔ, so yɛ badɔkpasɛ nɛ be tsuebunɔ yɛ. Klɛ baa ɖɔ sɛ, “Ɔkɛŋ nɛ onu okpukpukɔ, ” “klɛ keli eti bele. 36Shɛnahwɛ banɔ nɛ shu tɛ bamɔ kɛshɛ vɛ ɛma nɛ gɛ kana balɛ nɛ mɛ, tɛ balɛnahwɛ bada mɔ kɛdɔ tili edzi tɛ ba ŋa.”

37Pɔ ebu kɛlɛ bunu asɛ, “Wɔnɔ nɔ pɛɛ dɔ tili ɔkɔ balɛ tɛ ba ŋa.”

Be tsre yɛ asɛ, “Anɔ wele tɛasuɛ kɛbhɛ ko klɛ ba nyunɔ banɔ kplumua! Kɛ lɛ sɛ tɛ bɔ vɛ da zi kɔba nɛɛ di nyɔɔ kɔ balɛ kɛŋɛŋa dza?”

38Ebisi balɛ asɛ, “Gbɛgbɛvu ɛgbaa tɛshɛ ɛlɛ lɛ wɔnɔ ahwɛ?” “Nɔ vɛ tɛ no do di.”

Gɛ ba vɛ ede di nɛɛ, ba ɖɔa sɛ, “Titi anɛ kenimɛdzya tɛbha.”

39Klɛ Yesu etsre badɔkpasɛ nɛ asɛ ba kɔ anɔnyanɔ ezhi aza kesi nɛ etsu etsu mɛ nɛ tɛwa wuwɔ nɛa bha. 40Klɛ so ba za kesi nɛ kɛfɔɛfɔ etsum anɛ afeti etsu mɛ. 41Gɛ ayɛkɔ ɛgbaa titi anɛ kenimɛdzya tɛbha, ebu amɛ akpɛ owũsise, ehu ahwɛ klɛ aya ɛlɛ mɛ. Klɛ ayɛkɔ kpɛ badɔkpasɛ nɛ ahwɛ sɛ tɛ ba ya kɔ anɔnyanɔ nɛ ɔkɛlɛ. Kana dzuku ba ya kenimɛdzya tɛbha nɛ akpɛ balɛ mɛ. 42Banɔ nɛ petee ba ŋa klɛ be xui, 43klɛ badɔkpasɛ nɛ be xogo kɛgɛ wɔlɛ li kesukpa klɛ tsyɛ na ashwɛ lɔfɔntabha. 44Banɔnyɛ nɛ gɛ ba ŋa kɛdɔ nɛ tɛkɛklamɛ za akpã teti.

Yesu Aga Keniabha

45Kibe dɛ dze ko Yesu akɔ sɛ yɛ badɔkpasɛ nɛ be de tsoku kenia bha opupu nɛ mɛ eputɔ kɔ yɛ avɛ Betsaiɖa, flogo pɛ akpɛ banɔɛza gugɔɛ nɛ dzo. 46Gɛ Yesu ashɛ̃ nɛ balɛ ɔbha, ewu avɛ butu tulia bha kɔ kpayakuklu.

47Gɛ owulago nɛ ɔna, opupu nɔ za keni nɛ kishitɛbha, klɛ Yesu terikpo agɔ nɛ ogbigbe nɛa bha. 48Yesu evu awɔ̃hũ asɛ badɔkpasɛ nɛ be dzi aza mɔ butɔ nɛ opupu nɛ tigige nɛ keni nɛa bha, alasɛ kɛ lɛɛ nɛ lɔ kititi nɛ tɛvɛvɛ nɛm. Ansɛ olizatɔ ɛɖa tɛlɛ mɛ ana ekoeyi aaga keni nɛa bha atɔnɔ balɛ aavɛ. Abhɛtɛ ansɛ aafla balɛ dza, 49pɔ gɛ ba mɔ yɛ gɛ aaga keni nɛa bha, balɛ kɛtɔkpu nɛ mɛ tsre alɛ asɛ ekpu. Ba kpɛ ogugu, 50alasɛ balɛ petee ba mɔ yɛ klɛ besi kifu tsutsɔmɔɔ tsɔmɔ.

Aɖɔ sɛsɛ alɛ zia sɛ, “Nɔ kpɛ kite! Mɛ nɔɔ mɔ! Nɔ ti si kifu.” 51Ɔkɛlɛ ewoku opupu nɛ mɛ atɔnɔ balɛ, ko klɛ kɛlɛɛ nɛ yulɔ fu. Tɛbhɛbhɛtɛ nɛ kɛ bhɛtɛ balɛ kibi petee, 52alasɛ gbɛgbɛvu nɛ kibui nɛ tsyɛ beke nu klɛ kesi, balɛ idzyi mɛ agɛganɛ.

53Kibe lɛ gɛ ba tsɔkɛ, ba da dzrɔ nɛ Genesarɛt klɛ le dzu opupu nɛ kesi nɛ ɔklɛ. 54Kibe lɛ gɛ benye koeyi nɛ opupu nɛ mɛ ko, banɔ nɛ ba kpɛ Yesu kɛxawũ. 55Banɔ besi edenɔ kibee lɛlɛ nɛ mɛ petee klɛ ba yɛkɔ balɛ banyɛnya nɛ etuku nɛ iputso abha atɔnɔ Yesu avɛ ɔklɛ gɛ bee nye nu yɛ kɛdɔ sɛ alɛ ko. 56Klɛ ɔkɔnyɔkɔ gɛ avɛ ko, ɛma bhlibhli, ɛmagbla, anɛ idubha nɛ petee mɛ, ba yɛkɔ banyɛnya nɛ ebe lu budzi nɛm. Ba kɔ kɛtɔkpu asɛ, Yesu akɔ balɛ be hunɔ yɛ awi nɛ butɔ tite ko, klɛ bagɛ be hunɔ yɛ nɛ petee balɛ banya nɛ be beke.

Currently Selected:

Marko 6: tcd

Highlight

Copy